Efeso 1 - Iduna

¹ Yo siule tobohiyakweyao moya'aimi Efeso againe. Iya Folo Yaubada givegideku be Yesu Keliso yana kabu gavaina, higa yana afositolo adi maka giveleku. Omi Yaubada yana yo'o mahamahalimiyao Efeso againe yami leta ga'etoladina be wana'itana. Omi higa Yaubada yana kaliva yana vevine mahamahalimiyao kadu Yesu Keliso againe wahawahegemi be wamiyamiyave'avina.

² Yaubada Tamada kadu Kaiwabu Yesu Keliso hinanuwadogemi kadu ase'asemi hinakiveniwalovina.

Yaubada yana vevai ide Keliso buye kave'atutamo'aida-ma fa'ideya.

³ Bana'e yada Kaiwabu Yesu Keliso yana Yaubada kadu Tamana amanadi kanahawadavadavana. Fa'ina lobama ana lokolokofou moya'aina alu'aluwada yana miya hagihagina fa'ina gihawahegena be ide Keliso buye kave'atutamo'aida-ma ginuwadogeda. Yaubada hidede amine ginuwadogeda fa'ina kanadavadavana.

^4-5 Boi tuwai-lokalokana aimo babi keke gidabubuni ana toveya, Yaubada ide gaveyao Keliso buye kave'atutamo'aida-ma ahe giluwafada be higa mahamahalideyao kadu keke ada wavita Bana matane kanamiyami. Ada nuwakabubu fa'ina tuwai-mo'ena givegide-vagahida be Yesu Keliso yana ihagihagi againe ide Bana natuneyao amine ginafayayeda. Bana Tauna yana inuba hagihagina fa'ina, au hidede amine givegide-vagahida be higa ginahawavenatuneda.

⁶ Mena yana nuwadoga lakahi-mo'ena againe ide Bana Natu'ase'asena buye kave'atutamo'aida-ma ginuwadogeda be higa Bana ana egana kanakilakahina kanagayo, “Ho Yaubada, ya nuwadoga keke kanawona!”

^7-8 Tu ide Keliso buye kave'atutamo'aida-ma ada aiyauga kanuhagana. Yada dewa koyona fa'ina yogoyogonideyao kamiyami tu Keliso dayagine gitutuvehobuda, higa yada koyona ana laufata Bana giseni tu Yaubada yada koyonai-dina giyawelidi. Mena ada tutuvehobu ma yana nuwadoga lakahina ana iya'iyaya, ada au yana nuwadoga ide agaideya givetalaiyena-ma gavatubuga! Hidede amine ginuwadoge-mo'eda be nuwahuya tulina tulina kadu Yaubada ana halamana againe kawahivemavemauga.

⁹ Boi tuwai-lokalokana Yaubada Tauna nuwahinagene ginuwanuwa be givevai, ada mena yana nuwahinage boi sevasevauyana ma ide agaideya gihawavemogatalena. Bana Tauna yana inuba hagihagina againe Keliso fa'ina givevai.

¹⁰ Ada yana vevai hidede amine. Yana aibubuna matatabuna tomiyalobama kadu tomiyababi ginavaga'auhida-yo kanavesa'eya be u'uda sa'eyana, higa Keliso. Ada gaitoma moya'aina adi aituha hinaluyabuna be tova gilubodana-ma ginalakayemu amine, Yaubada gaitoma moya'aina ana vesa'eya Keliso dibune fa'ina gavaimi givehimeya, mededemi ginafaisewa.

Yaubada Alu'aluwa Mahalina againe gisetagoda.

¹¹ Kadu'e, Yaubada ime Keliso buye ave'atutamo'aima-ma yana lokolokofou higa yana yo'o fa'ina giluwafama. E, boi tuwai-mo'ena yana vevai amine ime yana lokolokofou fa'ina givegide-vagahima. Bana'e gaitoma moya'aina givehimeyedi, ada Tauna yana inuba kadu yana vevai amine hilakayemu.

¹² Ada au yana inuba kadu yana vevai amine givegide-vagahima be Yaubada yana kikaiwabu yama dewa hagihagina againe anayemaunena be kaliva hina'itadavadavana, ime Yaubada yana Tovegida Keliso yana hobu'ela fa'ina yama wavetumagana amaduvebutu alulauboda kalivai-mana.

¹³ Kadu omi'iyao meda anafaiweya laumamala Yaubada yana nuwanuwa velemo'ena fa'ina, higa ami kibababala ana Venuwa'ata Yamumuna wanogalini-yo Keliso wavetumaganena. Keliso againe wavetumagana be Yaubada Alu'aluwa Mahalina againe gikibwami higa Alu'aluwana gi'iveninisena be givemagami, boi tuwaina giwonadabadaba vaita yana yo'ogaga agaidiya ginahawahegena amine.

¹⁴ Bana Alu'aluwa Mahalina ma vaita Yaubada yana kibwa ide agaideya amine, kadu kaliva kwamayoku gisetagona amine Yaubada Alu'aluwa Mahalina nuwahinagedeya gisena be gisetagoda, higa vaita gavaimi yana lokolokofou moya'aina ada du'u fa'ina giwonadabadaba, mededemi aimo ide agaideya ginasevefofona. Alu'aluwa Mahalina againe gisetagoda be higa aimo ide Tauna yana yo'ogaga ada tutuvehobu ginaluyabuni-yo ada aiyauga-vagata kanavai-'owona. Hidede amine Yaubada Alu'aluwa Mahalina againe gikibwada, kadu aimo ada tutuvehobu fa'ina gisetagoda be higa yana kikaiwabu kaliva hina'itadavadavana.

Folo give'o'ola be Keliso yana kikaiwabu hinahalamane-hagihagiyena.

^15-16 Tu mena Yaubada yana nuwadoga lakahina yana yo'ogaga agaideya fa'ina, tova moya'aina Yaubada againe gavesiule omi fa'imiya. Boi nagona yami vetumagana Kaiwabu Yesu againe kadu yami nuwanuwa hawahawahegana tovetumagana moya'aidi fa'idiya mena valeyami gamidinogalina againe, gavebutu omi fa'imiya gavesivesiule kadu keke gada'ilova, au yaku ve'o'ola againe tova moya'aina ami egana gayakayakahina.

¹⁷ Tova moya'aina gave'ove'o'ola be yada Kaiwabu Yesu Keliso yana Yaubada, higa Tamada Tokaiwabu-mo'a, tagami ginakifolefolena. Gave'ove'o'ola be Alu'aluwa Mahalina againe tagami ginakifolefolena kadu nuwami ginakiyauna be Yaubada ana halamana agaimiya ginakabu-fa'ila.

^18-19 Kadu gave'o'ola be matami ginakivemahalina be higa Yaubada yana nuwanuwa omi fa'imiya wanahalamane-hagihagiyena. Yana nuwanuwa hidede amine. Sa'eyana wanahalamanena ma Yaubada givegidemi be aimo omi fa'imiya gavaimi yamuyamumu-'owogina ginaga-ma fa'ina walulauboda. Kadu sa'eyana ma Yaubada gaveyao moya'aida yana kaliva mahamahalideyao, medema agaideya yana lokolokofou moya'aina ada du'u fa'ina giwonadabadaba, ada mena du'u-nadi ana kikaiwabu gavatubuga! Kadu Yaubada yana faiwala lakahina ide tovetumagana agaideya keke tamo gavadi againe kanahawaluveluveni. Mena yana faiwala lakahi-mo'ena, Keliso yana mididi-havagi againe giyemaunena ana tubuga amine, meda ide tovetumagana agaideya giyemayemaunena.

²⁰ E, Yaubada gifaiwala-mo'a be Keliso alikeya gisivemididina, Tauna i'atagine lobameya givehiyotona.

²¹ Wese lobama getane-mo'ane givetoga be gikaiwabu-mo'a. E, tokikaiwabu kadu tovehimeya kadu tofaiwala kadu kauveya tulina tulina gikaiwabuhege-mo'edi. Kadu Bana ana egana lakahi-mo'ena, ada gaveyao moya'aidi adi egana kaliva hikikilakahina, medema Yesu gikaiwabuhegedi, ada keke vaita hida tovagaga againe gidakaiwabuhegedi, au kadu aimo tova mulina buye'i.

^22-23 Kadu Yaubada gaitoma moya'aina Keliso agevavane gisedi, ada Bana gaitoma moya'aina adi tovehimeya ma ide tovetumagana ada yo'o Bana anakaibe ada to'itave'avina fa'ina gisena, higa ide tovetumagana vaita Keliso wowona amine ada Bana'e Tauna ma u'uda. Ada ide vaita wowona amine ma u'uda Keliso kaluyabuna, tu Bana'e Tauna gaitoma moya'aina givemagadi, au lobama be babi be ide buye givemaga-mo'eda be giluyabuda.