2 Timoti 1 - Iduna

^1-2 Yo siule natunuwaku Timoti. Iya Folo Yesu Keliso yana afositolo ya leta ga'etoladina be una'itana. Bana Yaubada givegideku be Yesu Keliso yana kabu ganavaina, higa yana afositolo adi maka giveleku. Boi tuwaina giwonadabadaba vaita kaliva gaveyao Yesu Keliso buye hive'atutamo'aidi, medema yawai-vagahidi hinuhagana, ada mena yana wonadabadaba fa'ina gi'iveniniseku be galulumamalena. Yaubada Tamada kadu Yesu Keliso yada Kaiwabu hinanuwadoge hinahinekalikaliye kadu ase'ase hinakiveniwalovina.

Folo Timoti yana vetumagana toyogina ginuwenuwena.

³ Keke gavana fa'ina tu Yaubada againe gavesivesiule. Bana'e againe badi bwanenekweyao hihawahegedi amine, meda iya gahawahegeku be Bana fa'ine nuwafouku yegayegana gafififaisewa-yo keke tamo gavadi koyona fa'ina gadamatauseni-yo gadavenuwanauna. E, Bana againe gavesivesiule tu tova moya'aina bogi be uyadayada o fa'iniya gave'ove'o'ola.

⁴ Boi ganuyabuyabu tu utagi ma ganuwa-nunauyena ada nuwanuwaku lakahina gana'ita-havagile be higa Iya ganavemwamwala-mo'a.

⁵ Ya vetumagana toyogina Keliso againe ganuwa-nunauyena, anafaiweya nagona o hina Yunisi be tubu Loisi Keliso ana vetumagana againe hihawahege-vagahidi tu tova adamoya iya ganuwave'avina vaita kadu o Keliso ana vetumagana againe uhawahege-vagahi.

⁶ Ada medemi Keliso uvetumagane-mo'ena fa'ina, nuwa gatalafolena be faiwala Yaubada yana faisewa fa'ina givele-ma una'atu'auhina be keke ginakwe'u, au a vehimeya givele amanadi againe unafaiwala-mo'a. Boi nimaku againiya gaseni-yo gave'o'ole tovai-nadi Yaubada mena a vehimeya givele be yana faiwala unuhagana.

⁷ Au unafaiwala-mo'a, fa'ina Alu'aluwa Mahalina Yaubada giveleda-ma guwana keke matauta. Au Bana gifaiwalaveleda be ka'ase'asevatu, tobohiyadeyao fa'idiya kahawahawahegeda, taudeyao yada nuwanuwa kahawahawatana.

Lau'age higa keke ginawowomumu au vehawala velemo'ena againe ginaluve'avina.

⁸ Tu Bana gifaiwalavele fa'ina yada Kaiwabu ana hawavemogatala yo'o matadiya fa'ina keke unawowomumu. Kaiwabu ana laumamala fa'ina deliya hiseku tu iya yana kaliva yogoyogoniku fa'ikuya keke unawowomumu. Au tauni unahawahege be yada Kaiwabu yana Venuwa'ata Yamumuna unalumamalena againe, iya amine meda o buye vita tulina tulina unawahidi. E, Yaubada ginafaiwalavele amine vitai-dina unawahidi.

⁹ Bana Yaubada gikibababaleda ada gikovada be yada dewa matatabuna mahamahalina Bana matane kanamiyami. Ada kibababala inubana ma keke ide yada dewa hagihagina, au Bana Tauna yana nuwanuwa kadu Tauna yana nuwadoga fa'ina gikibababaleda. Tuwai-lokalokana tova aimo keke gidave'inuba tu mena yana nuwadoga Yesu Keliso againe givele-vagahida.

¹⁰ Atu tova adamoya ada Tokibababala Yesu Keliso yana hobu'ela againe mena Yaubada yana nuwadoga kabu'avane giyemu. Bana Yesu Keliso alika yana faiwala giyawelina, giyaweli-'owona ada kibababala ana Venuwa'ata Yamumuna againe yawai-vagahida ana eda gihawavemogatalena be kanamiyamiya-vagata.

¹¹ Ada au Yaubada givegideku be mena Venuwa'ata Yamumuna ganalulumamalena kadu ganavehavehawala Keliso loseyanina amine yaku gahe wa'inubana.

¹² Tova moya'aina Venuwa'ata Yamumuna ana hawavemogatala againe gafififaisewa fa'ina, mena vita tulina tulina gawahiwahina. Tu yaku aulolo yaku tagiya fa'ina keke-mo'a gadawowomumu, fa'ina Bana'e gavetumaganena-ma gahalamane-hagihagiyena, ada ganuwave'avina vaita aku vehimeya giveleku-ma Bana anafaiweya ginayavayavana be hidede amine ginanunauwena Kaiwabu yana yewa'ela ana toveya.

¹³ Au gavadi gavadi vehawala tunutunugina iya agaikuya unogalina, medema againe unaluluve'avina. Medema abaluvefota o fa'iniya. Ada ya wavetumagana ya wanuwakabubu Yesu Keliso againe give'inuba amanadi mena vehawala tunutunugina againe unaluluve'avina.

¹⁴ Yaubada yana nuwanuwa tunutunugina ana vehawala mena a vehimeya givele. Alu'aluwa Mahalina ase'asedeya gimimiyami-ma yana faiwala againe a vehimeya hagihagina una'itave'avina.

Tonuwayewa adi'iselu kadu toveluga sa'eyana fa'idiya.

¹⁵ Tu o uhalamanena tovetumagana moya'aidi Esiya ana fafali againe hikiloweku, badi Fidelo kadu Hemodenisi buye'i.

¹⁶ Tu bana Onesifolo tova moya'aina ase'aseku gikikivevatuna ada iya deliya gamimiyami nonogana keke iya fa'ikuya gidawowomumu fa'ina, bana ana unuma agaidiya Kaiwabu yana hinekalikali gidavetalaiyena.

¹⁷ E, bana keke iya fa'ikuya gidawowomumu. Au Loma againe gilakayemu ana toveya yana wadibumuhiga gileleleku gileleleku tu ginuhagaku.

¹⁸ Medema fa'ina Kaiwabu gave'o'olena be aimo ginayewa'ela kaliva ginavedewayaugida ana toveya, bana Onesifolo Kaiwabu yana hinekalikali ginanuhagana. Ada o'eni ahe uhalamane-hagihagiyena yana veluga moya'aina agaikuya boi Efeso againe gamiyami ana toveya.