1 Timoti 1 - Iduna

¹ Yo siule natuku Timoti, Iya Folo Yesu Keliso yana afositolo ya leta gana'etoladina. Yaubada ada Tokibababala kadu Yesu Keliso yada abaluve'avina aku vehimeya giveleku ve'afositolo, higa Yesu Keliso yana kabu gavaina.

² Timoti o vaita natuku velemo'ena amine, fa'ina Keliso ana vetumagana againe iya gahawavenatune-mo'e. Yaubada Tamada kadu Yesu Keliso yada Kaiwabu hinanuwadoge hinahinekalikaliye kadu ase'ase hinakiveniwalovina.

Folo tovehawala ve'alololodiyao fa'idiya Timoti givenuwa'atana.

³ Keke gavana fa'ina tu boi gatauya be Masedoniya ana fafaliya ganana ana toveya gagahevagadone amine, nuwanuwaku medei Efeso againe unamiyami be higa badi tovehawala ve'alololodiyao unahawatadi be hina'ilova.

⁴ Unavenuwa'atadi be keke tova moya'aina nainaiya higa gahe-kawowo kadu kaliva tulina tulina bwaneneneyao adi egana ana loi ana loi nuwadiya hinaseuseni. Medema gaitomai-dina adi nuwa-nunauya againe keke halamana Yaubada yana vevai fa'ina hidavivaini, au ve'alakwalakwakwa giyemu. Yaubada yana vevai vetumagana againe kahalamanena, keke ve'alakwalakwakwa againe.

⁵ Mena vehawala ve'alololona ana hawata gayakahina be higa nuwanuwa hawahawahegana hinaseyemaunena. Nuwanuwai-nadi inubana ma ase'asedi yegayegana hinamiyami, kadu keke tamo vita nuwafoudiya hina'ayauneni, kadu Keliso ana vetumagana keke kebuladiya tu nuwadiya ginadauda-yo au nuwanuwa hawahawahegana againe hinamaga.

⁶ Kaliva tufoidi mena edai-nadi hifaniyena ada gahe-kawowo ana edeya hidamana be hinanauna.

⁷ Nuwanuwadi Yaubada yana vehimeya kaliva hinavehawaledi tu mena vehimeyai-nadi ana nuwanuwa keke agaidiya gidamahalini kadu gaitoma tulina tulina fa'ina hivehavehawala toyogina higayo, “Ime Yaubada bonana aluyabuna,” tu yadi vehawala inubadi hifaniyena.

⁸ Tu ide kahalamanena Yaubada yana vehimeya Mosese awane giveleda, ada ka'i kaliva vehimeyai-dina hinamuliyedi Yaubada yana nuwanuwa amine, medema abaleme hagihagina.

^9-10 Kadu'e kahalamanena Yaubada keke kaliva yegayegadiyao fa'idiya vehimeya kadu hawata gidasedi. Au kaliva koyodiyao fa'idiya gisedi, higa badi vehimeya ana tohawahegahega be ana todibutoyoga fa'idiya, badi Yaubada keke hidave'amohimohineni kadu dewa koyona hififaisewana-ma fa'idiya, badi yadi nuwanuwa keke mahamahalina kadu Yaubada bonana hihawatagona-ma fa'idiya, badi tamadiyao o hinadiyao hiluve'alikadi fa'idiya, badi mali kaliva adi toluve'alika fa'idiya, badi to'udo kadu tovetubo fa'idiya, badi mali kaliva hiki'afudi be higa hinave'agetogedi amanadi kadu tofwaya be badi Yaubada ana egana ana to'aiyakata-kawowo fa'idiya, au gava dewa tulina tulina yada Kaiwabu yana vehawala tunutunugina keke gidalubodani-ma kaliva hififaisewana, medema kaliva koyodiyao adi loi fa'idiya Yaubada vehimeya kadu hawata gisedi.

¹¹ Mena Yaubada yana vehimeya ana vehawala tunutunugina au Venuwa'ata Yamumuna galulumamalena-ma ana nuwanuwa amine. Venuwa'atai-nadi Yaubada Bana vemwamwala inubana ma yana kikaiwabu gihawavemogatalena, ada Yaubada aku vehimeya giveleku be yana Venuwa'ata Yamumuna ganalulumamalena.

Folo tokoyona-mo'a nonogana Yesu yana faisewa fa'ina givegidena.

¹² Tu Yesu Keliso yada Kaiwabu mena faisewa fa'ina gifaiwalaveleku-ma againe yaku vesiule gayakayakahina. Bana'e gi'itanuwenuweku vaita bonabona'abiku fa'ina givegideku.

¹³ Boi tuwaina Yesu gahawatagona kadu gahawave'iyohoyohoyena ada yana kaliva gakivekoyodi nonogana Yaubada yana hinekalikali agaikuya givetalaiyena, fa'ina iya fanifaniku keke yaku wavetumagana.

¹⁴ Ada yada Kaiwabu yana nuwadoga iya agaikuya givewahivemavemauku, ada au tova adamoya Yesu Keliso againe gavetumagana ada Bana againe nuwaku gasena.

¹⁵ Hida gahe au gahe velemo'ena ada gilubodana be againe yada wavetumagana kanaluve'avina. Yesu Keliso babiya gihobu'ela be tokoyona ginakibababaleda. Ada tokoyona moya'aidi agaidiya iya tokoyona-mo'a.

¹⁶ Atu iya tokoyona-mo'a tu Yaubada gihinekalikaliyeku be higa yana atuvefa'ila lakahi-mo'ena kaliva agaideya iya tokoyona-mo'a agaikuya ginaseyemaunena. Hidede amine gi'atuvefa'ile-mo'eku fa'ina iya aba'ita badi aimo hinavetumaganena be kibababala hinanuhagana-ma fa'idiya giseku.

¹⁷ Bana Tokaiwabu miyamiya-vagahina ana egana kanakilakahina. Bana keke-mo'a gina'alika kadu keke adafaiweya kana'itani. E, Bana'e Yaubada anakaibe'u-mo'a ana egana kanakilakahina be yana kikaiwabu ginaduva-vagata tova inaga inaga keke ana abalauyabu. Ehe hidedemi.

Folo Timoti gilu'ageyena be gina'atuvefa'ila.

¹⁸ Ho natuku Timoti, boi Alu'aluwa Mahalina Yaubada yana kaliva venuwa'ata aimo gavaimi unafaisewa-ma fa'ina gitunevehabalutugidi be hi'awatalatalainena, ada tova adamoya yadi awatalatalaina amine hida a vehimeya gavele. Mena venuwa'atai-dina agaidiya leme unanuhagana be togiyomatana yamumuna amine yada Kaiwabu yana gaviya againe unafifaiwala.

¹⁹ Kadu Keliso ana vetumagana againe unaluluve'avina ada tauni una'itave'avi be nuwafou yegayegana Yaubada matane unamiyami tu unalulugaviya. Kaliva tufoidi nuwafoudiya togahe keke hidavenogaleni ada au yadi vetumagana hinuhegena.

²⁰ Badi tobe'u agaidiya kaliva sa'eyana ana egana Haimeniyo kadu sa'eyana Alekisanida. Badi adi egana gayawelina ada Setani againe gahegenauwedi be higa vita hina'ayauneni-yo halamana hinavaina be'ena Kaiwabu keke hinahawatagoni.