Markus 1 - Intas Etipup

Nuarin-tas alupas 1.

¹ NATUPUN intas-upene vai Iesu Kristo, Inhal o Atua;

² et idivaig eris upyi aged a ilpu profeta, um ika, “Ek idim abrai naheca unyak ainyak mika yi uhup iram, etpu ahped nefalaig vai euc aien:”

³ “Nohran tah et ethi etpu ahlaig aien an namasacen, um ika, Akumu ahped nefalaig vai Ihova aijaua, um ago yi atoh efalaig vai yin.”

⁴ Is um baptiso ira atimi a Joanes an namasacen, um asuptecnaig nabaptiso, mika eri adumoij anliinmopura, va uhpu eti aru nedo has ura.

⁵ Eris ahtag pan ehelen a nupu Jutaia asega, im nupu Jerusalem, is baptiso ira ra asega aien an nofowai Jortan, eris um asuptecnaig nedo has ura ara.

⁶ Is aso yin a Joanes an napelumai alau irai kamela, um ahid narasi kurimatau; um caig inheled im hune.

⁷ Is efehtas aien, um ika, Etpu yetpam tah inyi ethi, inyi esjilid irak aien, par apitac nyak, ek eti upene ainyak par atpuse, um ahiyi nehtit an cedpun eduon:

⁸ ek idim baptiso iramia ainyak an wai: ja etpu baptiso iramia aien an Nesgan Upene.

⁹ An naopan iyehki is ahes a Iesu an Nasared an pece Calili, um apan ehele Joanes, is um baptiso iran aien an nofowai Jortan.

¹⁰ Is wat ahes u inwai aien um atga o un, is um ecetai nohatag aien nasalgeivaig, is asuolse iran a Nesgan Upene is idivaig nalaupa:

¹¹ eris ahgei nohran tah an nohatag, is ika, Nai Halav cop unyak aiek, ek imyiacitak euc ainyak.

¹² Is auroauro um imyiapan yin a Nesgan Upene an namasacen.

¹³ Is amen aien eahki an namasacen ira adiat is forte, is um oop yin a Satana; is echim amen aien im niji itai aleg; eris aheca o un a ilpu agelo.

¹⁴ ERIS wat ati Joanes anliin neom ipjin, is apan Calili a Iesu, um asuptecnaig intas-upene va nelcau o Atua,

¹⁵ um ika, Eh mun ti pan itac ehni naopan iyehki, et mun ubutpotet nelcau o Atua: akumu adumoij anliinmopomia aijaua, um eteuc an tas-upene.

¹⁶ Is wat atga aien ubutpotet u injop Calili, um ecet Saimona im Antrius etoan, erus ana nopoig an jop arau: erus atimi ahilek mu arau.

¹⁷ Is um ika ehele rau a Iesu, Arumu ahced nyak aijaurau, ekpu ati caurau ainyak mika aru ahilek atimi aijaurau.

¹⁸ Erus auroauro arau um ude opoig urau, um ahced yin.

¹⁹ Is ahes eahki aien um eti elvatga, um lep ecet Jakobus inhal o Sebetaius im Joanes etoan, erus amen arau an nelcau, um uhpuri opoig urau.

²⁰ Is auroauro aien um ahlaig vai rau: erus um ude etmarau arau Sebetaius an nelcau im ilpu aheca, um ahced yin.

²¹ Eris apan ara Kaperneum; is apan aien anliin neom alaigaheni irai iji adiat atumop, um esege.

²² Eris um imyiali nesege o un ara: is esege imi ra aien is idivaig tah eris alupai yin nemda, um eti idivaig ilpu atimi esege.

²³ Is amen anliin neom alaigaheni ura natimi is ethi, is amen iran nagelo has; is um ahlaig ijinies aien,

²⁴ um ika, Ude cama; nai merit aiek vanhe ehelema, ak Iesu nup an Nasared? na mun ham aiek mika an auahas cama, ka oʼo? ek ato euc ainyak, na Atimi Upene o Atua aiek.

²⁵ Is acaiji yin a Iesu, um ika, Jim tas aiek, um atceijai yin.

²⁶ Is auohuoh yin a nagelo has, um ahlaig ijinies, um atceijai yin.

²⁷ Eris um imyiali ara asega, um tas jipe ehele ra, um ika, Inhe ineigki? nev esege mat ineigki? et esjilid aien irai ilpu agelo has, et acaiji ra aien, era um imyiaiji intas o un ara.

²⁸ Is um auroauro um apaahni intas vai yin an pece ri Calili asega.

²⁹ Eris auroauro ara, um ahes anliin neom alaigaheni, um alau ijo, um ahced Jakobus im Joanes, um apan anliin neom o Saimona im Antrius.

³⁰ Is asjeuc a risi ehgai Saimona va nemehe ihlup; eris auroauro ara um asuptecnaig yin ehelen.

³¹ Is um han aien um arahpan va nikman, um imyiatidai yin; is auroauro um edoaijaig iran nemehe ihlup, is um aheca ura aien.

³² Is wat jupura, wat ete nagesega, eris imyiapan ra asega ehelen ara eris emehe ara, im lep ra eris amen ira ra a ilpu agelo has.

³³ Eris um asjapicnaig an neucse neom a nup an nuarin-pece iyehki asega.

³⁴ Is ago cehcehe atimi is ahinag aien, is acheiachei jipe nemehe ira ra, um ahlo ilpu agelo has is ahinag; um acaiji ilpu agelo has mika eri jim aniv yin.

³⁵ Is wat athut nadiat an tak apnyin, is aiji aien, um alau ijo, um apan an nuarin namasacen, um alaigaheni eahki.

³⁶ Is apitac yin a Saimona im lep ra eris amen ehelen ara.

³⁷ Eris wat ecet yin ara, eris ika ehelen ara, Era ahilek euc natimi asega.

³⁸ Is um ika ehele ra aien. Ti apan akaija irai iji uari-pece ubutpotet, ki asuptecnaig intas ehele ra ainyak: kis ham ainyak va nauritai ineigki.

³⁹ Is esege aien irai eom alaigaheni ura an pece Calili asega, um ahlo ilpu agelo has.

⁴⁰ Is han ehelen natimi lepros is ethi, um ugni yin, um atpuse an nuhup o un, um ika ehelen, EI et merit aiek, na emda aiek par ago adicinadicin nyak.

⁴¹ Is aiheuc vai yin a Iesu, um adan nikman, um atcei pan yin, um ika ehelen, Ek merit ainyak; namu adicinadicin aiek.

⁴² Is wat tas aien, is um auroauro naleprose um edoaijaig iran, is um adicinadicin aien.

⁴³ Is acaiji emda yin aien, um abrai yin mika yi atga o un;

⁴⁴ um ika ehelen, Jim asuptecnaig ehele atimi aiek: jam atga unyum aiek, um apan, um ehvai euc ehele natimi ahlap, um ahlap irai itai iji eigki is asaig a Moses, vai incehcehe unyum, nitai asuptecnaig imi ra.

⁴⁵ Ja is wat alau ijo aien, is tas alupas aien um asuptecnaig nitai ineigki, va nedo ineigki is ehka vai Iesu napanvaig an nuarin-pece iyehki an nuhup u atimi, ja is amen aien irai uari amasacen; eris ahes irai iji uari pece asega natimi, um ahtag pan ehelen.