Ester 1 - Intas Etipup

Nuarin tas alupas 1.

I Et auaretha alupas a Ahasuirus. 10 Et abraig pan hal aien vai Vastai, ja et esjum, aien um eti han ehelen. 13 Vai intas o Memyukan et tas alep a Ahasuirus mika eri esjilid a ilpu atamaig.

¹ AN nopan umoh u Ahasuirus, (aien is atimarid aien ahes Intia um yetpan Idiopia irai uari pece is wun huntret im twente seven:)

² an nopan iyehki is wat ateuc a Ahasuirus natimarid irai dorona u nelcau o un an maliyum Susan, is eteuc nimnim atimi iran,

³ is atimarid aien irai mesese is ero, ja par auanetha vai ilpu atimi alupas asega o un im ilpu aheca o un; eris amen ehelen a ilpu atimi esjilid Persia im Mitia, ilpu atimarid im ilpu atimi alupas marom irai uari pece:

⁴ is ehvaig nikni itai an nelcau esjilid o un aien im inupene va natimi alupas esjilid o un ira adiat is ahinag, idim ira adiat is wun huntret im eete.

⁵ Is wat ti pan itac nadiat iji ehki, is auanetha a natimarid vai atimi asega eris amen ara an maliyum Susan, is eteuc nimnim atimi iran, vai ilpu atimi alupas im ilpu ihki atimi ira adiat is seven, anliin nokoro u nimnim atimi;

⁶ eris aijcai eahki apelumai ahi, im napelumai emilmat, im napelumai apig; eris athai apelumai iji ehki irai ya yilyil im inya cap u rig irai silver im oboatau hat ahi: eris ago intinan irai colt im silver, eris ateuc an nehledhat is cap, um emilmat, um ahi, um apig.

⁷ Eris umwig irai ipjiitai colt ara, (is acheiachei jipe ipjiitai,) im lep waina u natimarid is alupas, is idivaig nedo u natimarid.

⁸ Eris umwig ara is idivaig eris ati; is eti imiisjis tah: is idim asaig a natimarid ehele ilpu aheca asega an nimnim o un, mika eri ago et idivaig inmerit u atimi asega.

⁹ Is lep auanetha a Vastai natimarid takata vai ilpu takata anliin nimnim atimi, neom u Ahasuirus marom.

¹⁰ Is wat ti pan itac niji adiat is siks, is wat imiacitak inliinmopoi natimarid vai waina, is asaig aien ehele Mehuman, im Bisda, im Harbona, im Bicda, im Abacda, im Sidar, im Karkaa, ilpu aheca esjilid is seven eris auanaheca an nuhup u Ahasuirus natimarid ara,

¹¹ mika eri imiapam Vastai an nuhup u natimarid ara, im korona va natimi alupas o un, mika yi ehvaig neklim upene u nesganimtan ehele atimi, im lep ehele ilpu atimi alupas: is idim eklim upene nes-ganimtan aien.

¹² Ja is esjum a Vastai, um eti imiaiji intas o natimarid eris asaig irai ilpu aheca esjilid o un: va nitai inigki is edemda alupas a natimarid, is esjilid intavaitap o un.

¹³ Is tas a natimarid ehele ilpu atimi arapakau eris ato itai ara, (is uco nedo o natimarid va atimi asega eris ato intas alep ara im nedo atoh:

¹⁴ Is esjilid aien ja eris par apitac Karsiina, im Sidur, im Atmada, im Tarsis, im Mires, im Marsena, im Memyukan, eris ilpu atimi alupas Persia im Mitia ara sji igki is seven, um alum nesganimtai natimarid, um esjilid irai atimi asega an nelcau;)

¹⁵ um ika, Intupu ago inhe akaija vai Vastai natimarid takata, et idivaig er asuptecnaig an tas alep, va nedo o un, nikavaig, is eti imiaiji intas alep u Ahasuirus natimarid aien, eris asaig irai ilpu aheca iji ehki?

¹⁶ Is tas a Memyukan an nuhup u natimarid im ilpu atimi alupas, um ika, Is eti ago nedo imipalea a Vastai vai natimarid ache, is ago nedo imipalea vai ilpu atimi alupas asega aien, im tup atimi asega, era amen ara irai uari pece asega u Ahasuirus natimarid.

¹⁷ Etpu apaahni irai ilpu takata asega intas va nedo inigki u natimarid takata, erupu amcel vai ilpu atamnyu ura ara, uhu wit asuptecnaig, um ika, Is asaig a Ahasuirus natimarid mika eri imiapan Vastai an nuhup o un, ja is eti apan aien.

¹⁸ Uhu wit atahaijeg vaig nedo inigki u natimarid takata, inyi lep uco intas o ilpu takata esjilid an pece Persia im Mitia an nadiat inig, ehele ilpu atimi alupas asega u natimarid. Etpu atupun namcel inyi ahinag acen im nedemda.

¹⁹ El et upene irai natimarid, etmu asaig intas alep va natimi alupas o un aien, uhmu lep aged pan irai tas alep u nup u Persia im nup u Mitia, va yi jim eche, nikavaig; inyi eti lep apam a Vastai an nuhup u Ahasuirus natimarid; im lep inig, etmu alupai tah et esjilid iran a natimarid niji itai o un va natimi alupas o un.

²⁰ Etu wit apaahni irai uari pece, (et idim ahinag,) intas alep etpu asaig a natimarid, erupu ecen vai ilpu atumnyu ura a ilpu takata asega, vai ilpu atimi alupas im tup atimi.

²¹ Is upene irai natimarid im ilpu atimi alupas intas iyehki; is ago a natimarid is idivaig intas o Memyukan:

²² is imiapan nitaasviitai aien irai uari pece asega u natimarid, irai uari pece asega is idivaig naged itai vaig iran, im lep ehele nup urai uari pece asega is idivaig intas ura, nikavaig, eri esjilid irai up urai imnim ura a ilpu atamaig asega; im lep inig, eri tas ara irai tas irai iji pece asega ura.