JUDA 1 - PATHIAN LEKHABU THIANGTHO (BSI)

Hotu Diklote

¹ Juda, Jesu Khrista suak leh Jakob suapipa hin, ko ah um, Pa Pathian doitak leh Jesu Khrista vên bit ah umte kiang ah chun,

² jangaina leh chamna leh hepina chu buting tak in um ta hen.

³ Doitakte haw, I kikop uh hukdamna thu la kiang ua tha nuam tak ah zik ka guat lai in, mithiangthote kiang ah ginna vopsak ah umsa thu’n phatchuamngai tak ah pang ding ah tilkhauna thu gen ngai zaw ta’n ka hia’i.

⁴ Mi kuate a hem a gûk in la lak un a hung lut un, amau chu malai ah kipat thiamlo chang ding ah guatsa, Pathian ngaisak lo mi, I Pathian uh hepina chu hûkna chansakte leh I Hotuu leh I Lalpau, Jesu Khrista kihiatlosakte a hiu hi.

⁵ Bangkim chu khatvei hesuak maleu chun, Aigupta gam ah kipat Lalpa‘n a mite a hukdaw ah, zia nung ah chun a gingchalote a sukmanthai dan kha hun hiatsak kit ka nuam hi.

⁶ Chuleh, vansawlchâkte, amau hi’na zui lo ah, a umna mun uh nusiate chu, ni lopi ah vaihawmna â dingin thim nuai ah kumtuang kolbul in hensa’n a koihe tai.

⁷ Zia gual ma chun, Sodom leh Gomorrah leh a kîmvêl ah khuate tawh, buakna ah kipumpiak ah, hûkna vâl talua a del tâk ziak un, kumtuang mei ah phuba lâk ah um in, khang kihilna a umdan uh kha hezing un.

⁸ Zia gual ma chun, amau hinle a taksau chu a hibuak un, thuneina musit in, a lopi tak takte haw chu a gensia sek ui.

⁹ Himaleh, vansawlchâk chungnung pen Mikael in bawn, diabol tawh Mosi luang a kichu lai ua khan, a chung thu gen piak in ama chu a gensia ngam pua’n, “Lalpa‘n hun vau ta hen!” a ti zaw tai.

¹⁰ Ahi’n la, zia mite hin chu a het lo taphot uh a gensiau ah, ngaituana nei lo ganchate gual ah hetna pianpi a neiteu chun a susia sek uh ahi.

¹¹ A chung uh a gik hi! Kaina lampi a zui un, lawkna del ah Balaam dik lona chun ha’tai in a tai un; Korah helna chun a mangthai khawm tau hi.

¹² Ziate hi la hepina ankuangteu sumelsia chu a hiu hi; launa châng helo in a hung kivâkvâ sek ui. Amau chu sûm tui paw lo, hui in a taw lumlet leh thing a ga hun ah ga lo, nivei thisa, a zung ah kikaldokte gual a hiu in,

¹³ tuisuagiat kinawk phuan gual ah amau mualphona kilang leh, kumtuang ah thim nuai ah um ding ah kikhêk aksi sawmlêngte gual a hiu hi.

¹⁴ Adam ah kipat suan sagina Enok chun, ziate chungchâng chu a la genlawk a: “En un, Lalpa chu a mithiangtho a sâng têl tawh a hung hi;

¹⁵ mi zosia chung ah vaihawm intin, mi zosia’n Pathian ngaisak lo tak ah, Pathian ngaisak lona thil a bawl zosiau leh, migilo, Pathian ngaisaklote’n a chung ah khau tak ah a gen zosiau mawchansak in a,” ti in.

¹⁶ Ziate hi mi phunchiak leh lungawi theilote a hiu ah; a hûkna gual un a um un; thu lopi takte gen in, a lawkna ding un mite a pakcha sek uh ahi.

Vauhilna

¹⁷ Himaleh, doitakte haw, nang un vang I Lalpa Jesu Khrista apostolte thu genlawkte kha hezing un.

¹⁸ “Hun nunung ah chun Pathian ngaisak lo lam ah a nopna gual gual ua um ziang, nuisan hatte hung um in au,” ti’n la kiang un a gen tangal un.

¹⁹ Zia khawvel mi, Thagau neilote hin pawl chuam chuam a siamdok sek ui.

²⁰ Himaleh, doitakte haw, nang uh vang la ginna thiangtho chung ua chun kilemto unla, Thagau Thiangtho ah pauchap unla,

²¹ Pathian hepina ah um zing unla, kumtuang hinna ah pui tung thei I Lalpa Jesu Khrista hepina chu ngâk zing tau in.

²² A ginglel khenkhat umte chung in jangai unla;

²³ khenkhat chu meikuang ah kipat ladok in hukdok un; khenkhat a taksa buakkainau sil leh chênteu chu ki’dak leh lau kawm in, a chung un jangai un.

²⁴ Tu’hin, kipûk lo ding ah hun vengthei leh, a lopina ma ah demna bei leh kipak tak ah koi theipa,

²⁵ Pathian tak bep I Hukdampau kiang in, I Lalpau Jesu Khrista jal in, lopina, lalna, thilhitheina leh thuneina, hun chiasa leh tu’hun leh kumtuang in um zing ta hen. Amen.