Failimɔn 1 - Vagla

¹ Mìŋ́ Pɔɔl la n du nɛra tɔi dia dikuu Yeesu Kristo wia la ni yaa dɔŋhiŋ Timotii ra sɛbi hɔnnaa di ra tɛɛ yaa nɛnɔŋŋii Failimɔn la n ɔɔ ra hiini yaa huma naa biini la.

² Yaa ra jaami i ni Yeesu hiŋra maa n ɔɔ chaali i dia biini, yaa niuhambie Afia la ani Aakipus la n ɛɛ yaa dɔŋhiŋ laallɔɔri.

³ Yáa Mɛɛ Kɔraawiizi ni yaa Dɔɔri Yeesu Kristo hiini ia di tɛɛ ia bampirsɔna.

Jaaŋ tɛɛi ni wiisuŋŋaa wia

⁴ Saŋa maa, di n waa nyiŋŋi n suŋŋi n Mɛɛ Kɔraawiizi, aŋ suŋŋuu tɛi di ra jaamuu,

⁵ dikuubɛɛwiai, n nuu i wiarɛ gunla hiŋ nɔŋŋi Kɔraawiizi biinanaa la maa, di yardi yaa Dɔɔri Yeesu nɛnnɛ la.

⁶ Awia, n na suŋŋi Kɔraawiizii lugɔ ú gil nuukpaŋ dɔɔi la i ni Kɔraawiizi biinanaa la n dɔɔwɛ dikuu ii Kɔraawiizi yarda wia la ú wer lii tɔna tɛɛ ia, ií wer zum suma la maa iin dɔɔwɛ Kristo hiŋaa naa biini.

⁷ N niwee, i nɛnɔŋŋaa naa gillɔɔ n bɔra sɔɔni werge di ra tig n bampirii, dikuubɛɛwiai, Kɔraawiizi biinanaa ra na hiinaa ni bɔsɔnaa werge lii i be.

Suŋŋaa tɛɛ Ɔnɛsimɔs wia

⁸ Awia, miŋ dɔɔ fɔŋŋa Kristo hiŋaa naa biini lugɔ min niŋ wer bagli kpegzi i ni, di ŋɔ í ɛɛ wii la n dɛkkɛ naa, ka màá sɛɛ ɛɛ guŋ.

⁹ Miŋ nɔŋŋii keŋ wiarɛ n ŋɔ n daŋ gil guŋ ka ra suŋŋii wii naa. Minuu Yeesu Kristo huŋhunni Pɔɔl la baŋ tɔ dia dikuu u wia la. Ka màá kuu guŋ wia di di kpegzi i ni.

¹⁰ N na suŋŋiibuu di ra tɛɛ n bie bɛl. U sɔnnɛ Ɔnɛsimus. Minuu luluu Kristo wia biini di n du nɛra tɔi dia biini.

¹¹ U faa waa wikuarii maa dɔɔwɛ i be. Ka filaŋkennaa, u dɔɔ wikuariirɛ werge maa i be, di dɔɔ wikuarii n ge gba be.

¹² Ka n humuubuu ú bir ba i be filaŋkeŋ, dikuubɛɛwiai, n bampirii lawuubuu.

¹³ N faa ra nyiŋŋuu u du n be, ú wer lɛɛ i bɔr di hiiniŋ nɛra tɔi dia naa baŋ tɔŋ dikuu amaniyesuma la wia biini.

¹⁴ Ka n faa waa nyiŋŋi n ɛɛ wii naa di maa nuuwɛ lii i be mɔɔ. Di i himmaa biini tɛi lugɔ í hiiniŋ guŋ, amɔ, í hiiniŋ. Ka maa nyiŋŋi i ɛɛ winanaa dikuu miŋ firii wia.

¹⁵ Onɛsimus n lii i nonii biini tama naa, aŋhinabe, guŋ ɛɛwɔɔ ka í kaa wer nau, ú du i be saŋa maa di ra la.

¹⁶ Ama, filaŋkennaa, wàá ka ɛɛ lugɔ i yom bɛnnɛ. U jaa ɛɛu lugɔ i maa bie ni i nɛnɔŋŋii. Miŋ nɔŋŋuu naa, ka hiŋwaa daŋ nɔŋŋuu werge dikuu uŋ ɛɛ i yom di kaa ɛɛ i dɔŋhiŋ yaa Dɔɔri hiŋaa naa biini wia.

¹⁷ Di n nii ɛɛ kpaŋ, amɔ, í lɛɛu gunla hin niŋ lɛɛŋ la.

¹⁸ Di u faa ɛɛi wichɔgii maa gɛɛ di u di i kinnɛ, gil tɛu ka kpaa ra pɛɛziŋ.

¹⁹ Mìŋ́ Pɔɔllɛ sɛbɛɛ bɔnnaa. N daŋ turgii. Ama, i ge gba di n kinnɛ, dikuu min lɛɛ i miibɔɔ wia.

²⁰ Awia, n niwee, gil n ge na hiinaa tama i be yaa Dɔɔri huma naa biini. A duŋ bɔkpega dikuu yaa maa ni Kristo n kpauwɛ wia.

²¹ Minna sɛbi naa, n dɔɔ i tamiirɛ lugɔ i daŋ ɛɛ gunla maa miŋ ŋɔwɛɛ naabuu di kaa jaa gba.

²² Too. Wii bɛl haa du de min niŋ suŋŋii. Ɛɛ chɔɔri bɔr bɛl sirya tɛŋ ń na ba, dikuubɛɛwiai, n dɔɔ Kɔraawiizi tamiirɛ lugɔ u daŋ nuu ii suŋŋaa la di gil n ba di wa du ii be.

²³ N ni Ɛpafras maanii ba tɔ dia ɛŋ dikuu Yeesu Kristo wia. U ra jaamii.

²⁴ Maak, Aristakus, Dɛmas ani Luuk la n ni baa n na hum la, ge gba ra jaamii.

²⁵ Yáa Dɔɔri Yeesu Kristo nɛsunaa ni u hiinaa du i be.