Juud 1 - Vagla

¹ Mìŋ́ Juud la n ɛɛ Yeesu Kristo balii, di kaa ɛɛ Jems niwee labuu ra sɛbi hɔnnaa, di ra jaami ii banla yaa Mɛɛ Kɔraawiizi n yittɛ ii ba u be, di wa ɛɛ u nɛnɔŋŋaa, Yeesu Kristo ge ra binni ii ni la.

² Kɔ́raawiizi suŋ ii ni, di tɛɛ ia bampirsɔna, di nɔŋŋi ia werge ra jaa.

Baglikara hina wia

³ N nɛnɔŋŋaa, n faa ra nyiŋŋuu werge maa lugɔ n sɛbi hɔŋ bɛl tɛɛ ia, á hɔŋ bagli ia yaa lɛɛi wia maa ani gunla yaa maa n ninna hiŋ la. Denii n bir binni lugɔ a dɛkkɔɔ min niŋ sɛbi hɔnnaa, di ŋɔ ii be lugɔ ií maa ra naa ii hiŋaa naa naari. Kɔraawiizi faa bagli u biinanaarɛ gunla ban niŋ hiŋ. Gunla uŋ faa ŋɔwɛɛ la waa birgaa dɔɔwɛ.

⁴ N na fɔrgi iabuu, dikuubɛɛwiai, nɛra baŋhina suahzɔɔrɛ zuu ii biini. Ba waa Kɔraawiizi ra hiŋ, ka ra ŋɔ lugɔ nɛra daŋ wer ra ɛɛ wikuna, dikuu Kɔraawiizi n na suŋ nɛra ni wia. Ba kaa ra hɔɔ yaa Nabɔma Yeesu Kristo wia. U bɛnnɛ ɛɛ yaa Dɔɔri. Ba sɛbi nɛra naa wiarɛ Kɔraawiizi Hɔŋ biini saŋa maa, di ŋɔ lugɔ Kɔraawiizi daŋ di baa seriya, bá chol.

⁵ Ii teŋ zum wia naa min niŋ ŋɔ naabuu, ka n ŋɔ ń liizi iabuu lugɔ Kɔraawiizi faa lɛɛ Jus hina la maanii, di kpa baa lii Ijip hɛri. Ka baŋhina waa u wia sɛɛwɛ, u bir kpu baa.

⁶ U mɛlikazi aŋhina gba du denii uŋ vɔɔzi yɔlɔzi, di tɔa bɔbiri biini, á du de ú Hɔpizizeŋ la wa hel. Denii ú dia seriya, á chol. Aŋ vɛɛ huma la uŋ kpawɛɛ tɛɛa di kaa gil a duuribɔr la wiarɛ u vɔɔzaa yɔlɔzi la.

⁷ Nɛra la n faa du Sɔdɔm ni Gɔmɔra ani boljigzi la n du a kɛraa la faa ra sɛmuu, di ra ɛɛ wikuna dizi n chummɛ werge. Awiarɛ Kɔraawiizi faa kpa niŋ di du ba ni, ú tɔɔri baa di hanna la, nɛ́ra zum lugɔ Kɔraawiizi ɔɔ ra tɔɔri nɛchɔgaarɛ dikuu ba wichɔgaa wia.

⁸ Ka gunla faala hina la n faa ɛɛwɛ Kɔraawiizi tɔɔri baa la, gunnɛ nɛchɔgaa la n du ii biini haa vɛɛ ra ɛɛ la. Ba waa nfɛrɛ dɔɔwɛ, di kpa ba bɔrahɔŋ ra ɛɛ wikuna, di kaa ra vɛɛ nabɔnzi nuuzi, di ra gbɛlli mɛlikazi.

⁹ Kɔraawiizi mɛlikazi maa nabɔma Maikil la ni Sitaani n faa ra di hɔɔzi alugɔ unla n niŋ kpa Moosis bɔrahɔŋ la, a Maikil faa waa bampirii dɔɔwɛ ú wer hau u ni di chagzuu, ka ŋɔ, “Yaa Dɔɔrii niŋ jugmii.”

¹⁰ Ka nɛra naa ɔɔ ra gbɛlli wia la baŋ waa a biini zummɛɛ. Ba waa nfɛrɛ dɔɔwɛ di ɛɛ lugɔ sela. Wia la ba ni sela maa n zummɛ labuu ba ra ɛɛ manaŋ, a ra chɔgi baa.

¹¹ Wia daŋ wa huuzi baa. Ŋmɛnɛɛ la Keen n faa hiŋŋɛ labuu ba ge ra hiŋ la. Gunla Balaam la ge n faa aah siwii dikuu kebee wia di ɛɛ wichɔgaa la, gunnɛ ba ge kuu kebee wia di ra ɛɛ wichɔgaa la. Gunla Kɔra la n faa dɔɔ sikpegii di vɛɛ nabɔnzi la, gunnɛ ba ge gba dɔɔ sikpegii di ra ɛɛ la, Kɔ́raawiizi wa kpu baa gunla uŋ faa kpu Kɔra la.

¹² Iiŋ ɔɔ chaali di ŋɔ ií di ii Dɔɔri diwee la, nɛra la du ii biinii lugɔ doŋa di ra chɔgi ia. Ba waa hiihzi ka ra di, di ra binni ba bɛŋ wia. Ba ɛɛwɔɔ lugɔ baama la n waa dooŋ dɔɔwɛ, peu taau ra kaali la, di kaa ɛɛ kumpɛɛri ni kunsiwaa lugɔ daazi aŋhina nɔnaa saŋa n ɔɔ wa hel ka a waa nɔŋ, ka du de pɛɛ ba wigzaa a siuzi jaa la,

¹³ di kaa ɛɛ lugɔ muuzeŋ nii peu n ta u ni, u izi ra chogli, di ra izi fufuudoŋa la. Ba wichɔgaa ɔɔ ra liiu guŋ di ra du baa hiihzi. Ba kaa ɛɛ lugɔ chinchiŋwilaa n kpuzɛɛ di ra la á ga chol, di zuu bɔbiri, á du de di ra la la.

¹⁴ Andama naanatɛɛ ge naanatɛɛ bie Ɛnɔk la faa ŋɔ ba wiarɛ Kɔraawiizi fɔŋŋa biini saŋa maa, di ŋɔ, “Ií nuu ɛŋ, yaa Dɔɔri daŋ ba ni u mɛlikananaa kpila maa,

¹⁵ di wa di nɛra maa seriya. Banla n ɛɛ wichɔgɛɛra di vɛɛ Kɔraawiizi nua labuu ú di seriya bá chol, ú tɔɔri baa dikuu ba wichɔgaa la baŋ vɛɛu ka ɛɛ la ni ba wiŋɔzi la maa baŋ ŋɔwɛɛ di gbɛlluu la wia.”

¹⁶ Nɛra naa ɔɔ nuumuu ra du dɔŋa, di ra ɛɛ wii la maa ba kunnyiŋŋichɔgaa n tɛɛ baa bá ra ɛɛ la, di ɔɔ ra chɔli bahinaa, di kaa ra du nɛra ge nyuuni, bá wer na ba kipar ba be.

Karfaazi ni baglaazi wia

¹⁷ Ka n biinɔŋŋaa, ií ra liizi wia la yaa Dɔɔri Yeesu Kristo huŋhunna la n faa ŋɔwɛɛ u fɔŋŋa biini la.

¹⁸ Ba faa ŋɔ ii benii “Di durnya tuna wa hello, baŋhina daŋ lii di ra ɛɛ ia chɛɛtɛ, di ra ɛɛ wia la ba kunnyiŋŋichɔgaa n tɛɛ baa bá ra ɛɛ la.”

¹⁹ Nɛra naa dizi ra chɔgi nuukpaŋ dɔɔirɛ, di ra bargi ia dɔŋa ni. Durnya wiarɛ ba ra hiŋ. Kɔraawiizi Duma waa hoo ba ni.

²⁰ Ka, n nɛnɔŋŋaa, iáwaa aah siwii di du iihinaa bɔkpega ii hinnaniinanii naa biini. Ií ɔɔ ra suŋŋuu u Dumnanii fɔŋŋa biini,

²¹ di gilɛɛ waa ɛɛ wiimaa di ra lizi iihinaa Kɔraawiizi nɔŋŋaa la biini, ka ɔɔ ra hiŋuu ani tamii la yaa n na ɛɛ yaa Dɔɔri Yeesu Kristo la lugɔ u daŋ wa suŋ yaa ni, yá wer na u miibɔɔ la n waa tunaa dɔɔwɛ la.

²² Ií ra na banla n na aani la sinyɛna, di ra hiini baa,

²³ di kaa lɛɛ baŋhina lugɔ baŋ ɔɔ too kuŋ niŋ biini, á niŋ gilɛɛ waa diu la. Baŋhina ge, ii danna na ba sinyɛna, di ra hiini baa ka ra dazi, bá wichɔgaa la gilɛɛ waa buu ia.

Chɔlaa wiisuŋŋaa wia

²⁴ Too. Ií ra kpa Kɔraawiizi girme. Waabuu dɔɔ fɔŋŋa un niŋ wer hiini ia, ií gil wichɔgaa ɛɛi wer kpa ia ba u be, ií wer na u girme di chi u be, wichɔgaa maa wàá pɛli ia, ií bɔra sɔɔni ia werge maa.

²⁵ U bɛnnɛ ɛɛ Kɔraawiizi. Waabuu lɛɛ yaa ha dikuu yaa Dɔɔri Yeesu Kristo wia. Ií ra tɔgzuu di ra tɛu sɔŋ, di ra sɛɛ u fɔŋŋa ni u dɔɔra. A maanii u dɔɔ saŋa maa la. U daŋ haa dɔɔa saŋa maa di ra la. Ami.