Joona 1 - Vagla

Joona n vɛɛ Kɔraawiizi nua wia

¹ Kɔraawiizi faa ŋɔ wiarɛ tɛɛ Amitai biibaal Joona, di ŋɔ,

² “Izi la bolzeŋ Ninɛvɛ, di ga ŋɔ wia du u nɛra ni, dikuubɛɛwiai, ba wichɔgaa kannɔɔ werge n be.”

³ Ka Joona di nyiŋŋi ŋmɛnɛɛ ú la Taasis, ú faa wer chɔ lii Kɔraawiizi be. Uŋ ga hel Jɔpa muu nua, u na muugberzeŋ bɛl n na la Taasis. U turgi u chaaji, ka zuu ú la Taasis, di chɔ lii Kɔraawiizi be.

⁴ Uŋ zuuwɛ ba ra la la, Kɔraawiizi gil pezeŋ izi ra ta ba ni fuufuu, a muugberzeŋ ra nyiŋŋi u pergi.

⁵ Ɔnsii jaa lau a muugberzeŋ biini hina maa, bɛl maa ra yir u vug ú wa lɛɛu. Ba jaa ligzi ba bunni di ra ha a nii biini, ka a gberzeŋ wer du fug di kpa baa la. A saŋa di Joona waa tuuwo ga chɔɔ a muugberzeŋ zɛɛ, di ra chɔɔ dɔɔ werge maa, haali di waa zum wii la n na ɛɛ gba.

⁶ Denii a muugberzeŋ nabɔma tuu la bɔr la uŋ chɔɔwɛ, di ga lalluu di ŋɔ, “Izi! Ɛrɛɛ i ra chɔɔ dɔɔ werge saŋa naa dɔŋɛi? Izi suŋŋi i vug. Aŋhinabe, u daŋ na yaa sinyɛna di lɛɛ yaa, yaa wàá siuzi.”

⁷ Denii a muugberzeŋ biini huŋhunna maa ŋɔ, “Ií gil ya nyiŋŋi nɛr la n gillɛ siaahmu naa huuzi yaa keŋ.” Ba jaa ga ta kuna, bá zum a hiŋ, a chol Joona ni.

⁸ Ba ŋɔ u be, “Bagli yaa wii la n baani wia naa huuzi yaa keŋ. Anɛɛ hinnɛi? Bɛɛ humaa i ra hummɛi? Lee i liiyɛi? Hɛrbɛliirɛ i liiyɛi? Nɛbɛlii deere hinnɛi?”

⁹ Denii u ŋɔ ba be, “Hibru hinuurɛ miŋ, n na jaami Kɔraawiizi La N Na Di Kora Chiŋ la. Waabuu du chiŋ, di ta muuzeŋ ni hɛri la.”

¹⁰ Uŋ wa ŋɔ guŋ, ɔnsii lau baa werge maa, ba pɛɛzuu, “Ɛrɛɛ i ɛɛ gunnɛi?” Ba teŋ zummɔ lugɔ u chɔwɔɔrɛ, Kɔraawiizi gilɛɛ wer nau hum, dikuu gunla uŋ teŋ ŋɔ ba be la wia.

¹¹ Ka pekpeg haa ra ta werge maa. Ba pɛɛzuu, “Ɛrɛɛ ya ɛɛi, ka a pekpeg siigɛi?”

¹² U ŋɔ, “Ií kpaŋ ha a muu biini, ka bɔr chaani tɛɛ ia. N zummɔ lugɔ n benii a tɔɔrɔɔ naa lii di ra huuzi ia la.”

¹³ Ka a huŋhunna ɛɛ ania maa bá faa wer saa a muugbera di la a muunua di ga chi. Ka ba waa wette, dikuu a pekpeg n nyaŋŋɛɛ wia.

¹⁴ Denii ba suŋŋi wiizi, di ŋɔ, “Hoi, Kɔraawiizi, jaande maa, gilɛɛ gil ya siu dikuu baal naa kpui wia. Gilɛɛ gil ya di bilchɔg dikuu biinihuŋŋu hiŋ naa kpui wia. I kipar wiarɛ i ra duu siaahmu naa.”

¹⁵ Denii a nɛra jaa lau Joona, di kpau ta a nii biini. Baŋ wa tau tuŋ, a nii siigi kakpaŋ!

¹⁶ Ɔnsii lau baa, ba ra ɔm Kɔraawiizi werge maa, di lizi mbusu lizaa kuna tɛu, di kaa hɛɛhzi lugɔ ba danna jaamuu.

¹⁷ Denii Kɔraawiizi jaa gil nyinzeŋ bɛl ba, di wa lau Joona lil. U du a nyiŋ hia hɔpizaa ahoro ni hamuŋzi ahoro.