Izrɛl Hina Izaa Lii Ijip Hɛri Hɔŋ 1 - Vagla

Izrɛl hina sunnaa wia

¹ Jekɔb biibaala la n hiŋuu la Izrɛl sɔnaa keŋ, bɛl maa ni u haaŋ ni biizii laŋŋɛ.

² Rubin, Simɛɔn, Levi, Juda,

³ Isaka, Zɛbulɔn, Bɛnjamin,

⁴ Dan, Naftali, Gad ani Asɛ.

⁵ Jekɔb biizi ni u naanna maa du nɛra tokkoahoro ni fi. U biibaal Joosɛf waa teŋ faa du Ijip hɛrii.

⁶ Aŋ wa la see, Joosɛf ni u kpɛɛnna ni u niwee ni ba jimini hiŋ hina la maa siuzi,

⁷ ka ba lulla Izrɛl hina lawaa ra lul di ra wazi werge maa, di su hɛri la Ijip hina n tɛɛ baa la maa.

⁸ A saŋa hiŋ, koorifalii bɛl wa di kora a Ijip hɛri, ka u faa waa Joosɛf wiimaa zummɛ.

⁹ U faa ŋɔ u nɛra be, “Ií binni na, Izrɛl hina naa ra wazuu werge di kaa du kpeg ra jaa, guŋ wàá du wer tɛɛ yaa.

¹⁰ Aŋhinabe, di laal wa izi yaa ni yaa dɔma baaŋ, ba daŋ hiini baa, bá yoo yaa, ka na bɔr chɔ lii yaa hɛri naa. Awia, ii gil ya nyiŋŋi ŋmɛnɛɛ bɛl di ga de tɔ baa, bá gilɛɛ kaa ra wazi.”

¹¹ Awia, Ijip hina jaa lizi nɛra ba ra binni baa di ra fir baa ba ra hum. Ba jaa gil Izrɛl hina la ma bolzenaa aŋhina banna yir Pitɔm ni Ramɛsis tɛɛ a koori, á ɛɛ u diwee ni u kuna dauribɔra.

¹² Ka saŋa la Ijip hina n ɔɔ waa sunni Izrɛl hina werge la, a saŋa waarɛ ba ɔɔ ra wazi werge. A guŋ gil Ijip hina jaa hah Izrɛl hina la werge maa,

¹³ di ra sunni baa werge maa alugɔ yoma.

¹⁴ Ba ra sunni baa werge maa di gil ba ra mɔnni birkissizi di ra buu hɛɛhraa, di kaa gil ba ra hum ba kooni huma maa. Ba faa waa ɔɔ ra suŋ ba ni tama maa.

¹⁵ Denii Ijip koori la ŋɔ hahpaara la n na lau Hibru hina ba ra lul la, ba sɔna faa di Sifra ani Pua la be,

¹⁶ “Ŋmɛnɛ maa, di ii waa lau Hibru hina haaŋ maa u ra lul, di a bie haŋ wa ɛɛ biibaal, ií kpuu, ka di u wa ɛɛ biihaaŋ waa, ií giluu.”

¹⁷ Ama, a hahpaara n na ɔm Kɔraawiizi wia, ba waa sɛɛwɛ bá hiŋ a koori nua ka gil a biibaala maa dɔɔ miibɔɔni di du de.

¹⁸ A koori n wa zum guŋ, u hum ba ga yir a hahpaara ba, u pɛɛzi baa, “Ɛrɛɛ wiarɛ ii ra ɛɛ kennei? Ɛrɛɛ wiarɛ ii waa a biibaala ra kpuɛi?”

¹⁹ A haana ŋɔ u be, “A Hibru hina haana la waa ɛɛwɛ lugɔ Ijip hina haana. Ba lulaa waa tɔɔrɔɔ maa dɔɔwɛ, a ba luluu mɔɔ ka yaa bɛl maa haa la de.”

²⁰ Dikuu guŋ wia, Kɔraawiizi faa hiini a hahpaara, di gil Hibru hina wazi werge maa di jaa.

²¹ A hahpaara n faa ra ɔm Kɔraawiizi la wia, u gil ba ge himmaa ra lul, di dɔɔ ba himmaa diini hina.

²² A tuna, a koori du gbɔg bɛl di tɛɛ u nɛra maa, di ŋɔ, “Ií ɔɔ lɛɛ Hibru hina biifula la maa n ɛɛ baal di ga ha Muu Naal biini, ka gil banla waa n ɛɛ haana du de.”