Ɛfɛsus 1 - Vagla

¹ Mìŋ́ Yeesu Kristo huŋhunni Pɔɔllɛ a sɛbi hɔnnaa ń tɛɛ ia. A par Kɔraawiizii u tɛŋ a huma. N na jaami ii banla n du Ɛfɛsus, di ɛɛ Kɔraawiizi biinanaa di ra hiŋ Yeesu Kristo ani wibii la.

² Yáa Mɛɛ Kɔraawiizi ni yaa Dɔɔri Yeesu Kristo hiini ia, di tɛɛ ia bampirsɔna.

Suma nuui lii Kristo be wia

³ Ií ra tɛɛ yaa Dɔɔri Yeesu Kristo Mɛɛ Kɔraawiizi sɔŋ. U hiini yaabuu ni winanaa la maa n lii u Dumnanii be, di gil yaa ra di suma u be, dikuu yaa ni Kristo n kpauwɛ wia. Yaa ni Kristo n kpauwɛ la, yaa nuu maanii du Kɔraawiizi be, u bɔr, di ra di suma la.

⁴ Kɔraawiizi faa feloore lizi yaa tɛɛ u hiŋ, saŋa la uŋ faa haa waa durnya gba tawɛɛ la, di ŋɔ u daŋ gil yáa ni Kristo kpau, ya wer ɛɛ u biinanaa di gilɛɛ dɔɔ doŋa maa u be, ka nɔŋŋi dɔŋa ge.

⁵ Uŋ faa felee lizi yaa tɛɛ u hiŋ la, u ŋɔwɔɔrɛ lugɔ u daŋ ŋmɛnɛ wa kpa yaa birgi u himmaa biizi, dikuu Yeesu Kristo wia. U kipar wiarɛ u dau yaa wia guŋ,

⁶ ya ŋmɛnɛ wer chɔli u nɛsunaa dɔɔi ni u hiinaa la n wesse werge la. U Biinɔŋŋii hiŋ wiarɛ ú suŋ yaa ni di hiini yaa la.

⁷ Uŋ siuwɛ tɛɛ yaa la, u challɛ yau yaa ha, Kɔraawiizi wer gil yaa wichɔgaa tɛɛ yaa, dikuu un suŋ yaa ni werge maa wia,

⁸ di haa hiini yaa werge, yá wer dɔɔ sichaana ni nunzuma.

⁹ Gunla maa uŋ faa dau Yeesu Kristo wia u kipar biini, faa suahwɔɔ yaa be. Ka u jaa pilli a maanii tɛɛ yaa, yá wer zum gunla maa am paruu u dau u wia saŋa maa,

¹⁰ a wa ɛɛ saŋa la un dauwɛ la. U faa dau u wiarɛ lugɔ u daŋ wa gil chiŋ ni hɛri kummaa kaa birgi kpaŋ, di sɛɛ Kristo dɔɔra.

¹¹ Yaa ni Kristo n niŋ wa kpau la wiarɛ u lizi yaa tɛɛ u hiŋ. Kɔraawiizi la n ɔɔ ra dau gunla wiimaa n niŋ wa ɛɛ la, waabuu felee lizi yaa tɛɛ u hiŋ guŋ,

¹² nɛ́ra wer chɔli u zenni lii yaa banla n felee dɔɔ Kristo tamii la wia biini.

¹³ Baŋ faa bagli ia wibii di lii amaniyesuma la n dɔɔ lɛɛi ii be la biini, ii gba sɛɛwɔɔ tɛu, Kɔraawiizi kpa u Dumnanii la tɛɛ ia gunla uŋ faa ŋɔ nua la. U Dumnanii la gillɔɔ ii birgi Kɔraawiizi hora.

¹⁴ U Dumnanii labuu ya feli dɔɔ mɔɔ lii kapɛttɛ la Kɔraawiizi n dauwɛ tɛɛ yaa, ka ya ŋmɛnɛ wa dɔɔ a maa, saŋa la Kɔraawiizi n niŋ wa lɛɛ u kuna la maa ha tuŋ, di na sɔŋ tɛɛ u hiŋ ni u zenni la.

Pɔɔl wiisuŋŋaa wia

¹⁵ Awia, miŋ nuuwɛ gunla iin dɔɔ yaa Dɔɔri Yeesu Kristo yarda, di nɔŋŋi Kɔraawiizi biinanaa la maa la,

¹⁶ n jaa ra tɛɛ Kɔraawiizii jaaŋ saŋa la maa minna suŋŋuu di ra tɛɛ ia la.

¹⁷ Yaa Dɔɔri Yeesu Kristo Mɛɛ Kɔraawiizi la n dɔɔ girme werge maa la, ú hiini ia ií wer zum u wia ra jaa saŋa maa, á birgi nunzuma ni sichaana tɛɛ ia,

¹⁸ di pilli ii siwee, ií wer zum tamii la dee Kɔraawiizi n yir ia ií wer dɔɔ la ani gunla u biizi kapɛttɛ n kannɛ werge di ɛɛ kunnaniinanii bɛl werge maa la,

¹⁹ di kaa zum fɔŋŋa la dee Kɔraawiizi n dɔɔwɛ, ú hiini yaa banla n yarduu, gunla aŋ ɛɛ fɔŋŋazeŋ werge maa wa bɛri la. Ií liizi gunla uŋ faa ɛɛ Kristo u fɔŋŋa biini, di zum lugɔ a fɔŋŋa himmaanii ú kpa hiini yaa.

²⁰ U lalluubuu lii siu biini di kpau la u be, u ga so u nabɔmbɔr u be de,

²¹ di dɔɔ fɔŋŋa werge maa kaali fɔŋŋa dɔɔra lugɔ tinnanni ni vuga dee maa, di dɔɔ nyuu kaali nɛr maa n du de filaŋkennaa ani banla n niŋ haa wa du de durnya naa harbɔɔ la.

²² Kɔraawiizi gillɔɔ kummaa sɛɛ u dɔɔra, di gil u ɛɛ Yeesu hiŋra la maa nyuu,

²³ ba ge ɛɛ u bɔrahɔŋ. Unla n kannɛ werge di wer su durnya naa maa gba la, ka waabuu du Yeesu hiŋra la biine.