Gbɔgni 1 - Vagla

Moosis n ŋɔ Izrɛl hina lii Bizeŋ Sinaai wia

¹ Moosis wiŋɔɔlaarɛ keŋ, uŋ ŋɔwɛɛ tɛɛ Izrɛl hina maa, saŋa la baŋ du hɛribɔduma Jɔɔdan muu wiifurii paga la. Jɔɔdan Waluu la n dugli Suf la biinii ba faa du. De faa du bol bɛl banna yir Paran ni bola naa, Tɔfɛl, Laban, Hazɛrɔf ani Dizahab baambaannɛ.

² Hɔpizaa fidikpannɛ nɛr ɔɔ di ŋmɛnɛɛ, di u lii Bizeŋ Sinaai di ga Bizeŋ Sɛɛ ŋmɛnɛɛ di ra la Kadɛs Bania.

³ Ba Ijip lii binni tokkoanɛɛhiŋ, baagu fidikpaŋhiŋ lugli hɔpizii la hɔllɛ, Moosis ŋɔ wia la maa Kɔraawiizi n ŋɔ ú ŋɔ tɛɛ baa la, di tɛɛ baa.

⁴ Kɔraawiizi faa gillɔɔ ba kpegli Amɔri hina Koori Sihɔn n faa du Hɛsbɔn ni Ɛdrɛi, di ra di kora ani Basan Koori Ɔɔg n faa du Astarɔf, di ra di kora mɔɔ, ka u ŋɔ wia naa tɛɛ baa.

⁵ Baŋ wa du Jɔɔdan muu wiifurii la n ɛɛ Moab hina hɛri la saŋaa Moosis jaa faari di ra bagli baa Kɔraawiizi Gbɔgni la wia nɛnnɛ, di ŋɔ,

⁶ “Kɔraawiizi la yaa n na hum la, ŋɔ yaa benii saŋa la yaa n du Bizeŋ Sinaai labuu, di ŋɔ, ‘Ii jaa du bizeŋ naa nyuurɛ birgi,

⁷ awia, ií izi di zuu Amɔri hina hɛri giŋgimee bɔr. Ií ra la banla maa n du Jɔɔdan Waluu biini, banla maa n du bizenaa nyuuni ni wiicholii giŋgimee zɛɛzi, banla maa n du Nɛgɛv la ani banla maa n du muuzeŋ nua biini. Ií ra la Keenan hina ani Lɛbanɔn hina hɛssi, di ga hel Muu Yufretis.

⁸ Hɛri naa maanii mìŋ́ Kɔraawiizi ŋɔ nua lugɔ n daŋ kpa tɛɛ ii naabaala, Abraham, Aizik, Jekɔb ani ba naanna maa la. Ií zuu lɔ baa ka foozi a hɛri, ú birgi ii hor.’ ”

Moosis n lizi sitɔɔra wia

⁹ Moosis faa ŋɔ Izrɛl hina be, “Yaa n faa du Bizeŋ Sinaai la, n ŋɔ ii benii lugɔ ii wikpoglaa siili n ninɛɛ werge, n bɛŋ wàá wer kpoglaa.

¹⁰ Kɔraawiizi la iinna hum la gillɔɔ ii wazi werge, di du kpil lugɔ chinchiŋwilaa zinaa.

¹¹ Kɔ́raawiizi la ii naabaala n na hum la gil ii wazi bukagboŋ di jaa, di kissi ia, gunla uŋ ŋɔ nua lugɔ u daŋ ɛɛ la.

¹² Ka ɛrɛɛ n bɛŋ ɛɛ di chi ii buntɔga naa, di ra kuari ii wia maanɛi?

¹³ Ií lizi baala la n dɔɔ nunzuma, di ra nuu wia zɛɛ, ba ra tɔgzi baa, di lii ii dizi la maa biine. N daŋ gil bá ra binni ii ni.

¹⁴ Ii faa sɛɛ lugɔ guŋ wessoo.

¹⁵ Awia, n faa lizi sitɔɔra di lii ii dizi la biine, ba ɛɛ nunzunna, ba ra tɔgzi baa, di gil baŋhina ɛɛ nɛra kagboŋa binna, baŋhina ɛɛ nɛra kalfazi binna, baŋhina ɛɛ nɛra tokkoanɛɛ ni fizi ani fizi binna, di gil ba ɛɛ dizi nabɔnzi.

¹⁶ Kenne n faa ŋɔ ba be, ‘Ií ɔɔ ra nuu ii lulla kaluzi wia nɛnnɛ, di ra di baa seriya gunla n dɛkkɛ, di ii nɛra bɛnnɛ gɛɛ di ii ni hɔɔhraa, ka ii ra dia guŋ.

¹⁷ Ií gilɛɛ waa di seriya ni nɔŋŋaa. Ií ɔɔ nuu ra tɛɛ nɛdumazi ni nɛzenaa maa. Ií gilɛɛ waa ɔm nɛr maa, dikuubɛɛwiai, Kɔraawiizi bɛnnɛ ra di nɛra seriya. Di wii bɛl wa kpollo werge ii be, ií kpau di ba n be, ń binni u biini.’

¹⁸ A saŋa, n faa bagli iabuu wia la maa n dɛkkɛ lugɔ ií ra ɛɛ.”

Baŋ hum baala bá ga daani giŋgimee hɛri la

¹⁹ “Denii yaa jaa izi Bizeŋ Sinaai zɛɛ di ra la Amɔri hina hɛri la n dɔɔ giŋgimee la, gunla Kɔraawiizi la yaa n na hum n ŋɔ yaa be la. Yaa faa ga hɛribɔduma la n kannɛ, u wia faa kaa dɔɔ ɔnsii werge labuu, ii himmaa siwee na mɔɔ, ka yaa wa hel Kadɛs Bania.

²⁰ Denii n ŋɔ ii be, ‘Ii jaa hel Amɔri hina giŋgimee hɛri la Kɔraawiizi la yaa n na hum la n na tɛɛ yaa labuu.

²¹ Ií na, Kɔraawiizi la iinna hum la kpa a hɛrii tɛɛ ia. Ií izi zuu de di foozuu ú birgi ii hor, gunla Kɔraawiizi la ii naabaala n na hum la n ŋɔ ii be la. Ií gilɛɛ gil ɔnsii ni bɔhuaih lau ia.’

²² Ka ii ba n be di wa ŋɔ, ‘Gil ya lizi baala, bá tɔ see di ga daani a hɛri di na. Di ba wa bittɔ ba, ba daŋ bagli yaa ŋmɛnɛɛ la n dɛkkɛ yaa n niŋ ga, di kaa gil yá zum gunla ba bolzenaa n duwɛɛ.’

²³ Ii wiŋɔzi naa faa parimbuu, awia, n lizi baala fidibanɛɛ, bɛl maa lii ii dizi la biini.

²⁴ Denii ba zuu giŋgimee hɛri la ga hel Ɛskɔl Waluu, di gaagi daani de maa nɛnnɛ.

²⁵ Ba faa bittɔɔ ba di wa tɛɛ yaa de daazi nɔna, ka ŋɔ yaa be, ‘A hɛri la Kɔraawiizi la yaa n na hum la n na tɛɛ yaa naa, summɔɔ werge.’ ”

²⁶ “Ka ii faa waa nyiŋŋi de zuui, di vɛɛ Kɔraawiizi la iinna hum la nua.

²⁷ Ii faa du ii tanti diinii di nuumi ra du dɔŋa di ŋɔ, ‘Kɔraawiizi hah yaabuu. Awiarɛ u lizi yaa di lii Ijip hɛri, ú kpa yaa du Amɔri hina nonee biini, bá chɔgi yaa.

²⁸ Lee ya lanɛi? Yaa lulla gillɔɔ ɔnsii lau yaa. Yaa bɔra huah dikuu amaniye la baŋ tɛɛ yaa la wia. A nɛra kpekkoo di kaa ɛɛ nɛjaŋra di kaali yaa. Ba bolzenaa kannɔzii, a koŋlaa la chiŋ di gaa chug baama. Anak naanna la n helle kpabaa, di dɔɔ fɔŋŋa werge labuu ba na de!’

²⁹ Denii n ŋɔ ii be, ‘Ií gilɛɛ ra ɔm baa, ii bɔra ra sa.

³⁰ Kɔraawiizi la iinna hum la daŋ tɔ ii see, di naa tɛɛ ia gunla uŋ ɛɛwɛ Ijip hɛri

³¹ ani hɛribɔduma, ii sibɔɔ la. Ii na gunla uŋ kpogli iabuu nɛnnɛ di ba ɛŋ, wiimaa waa ia huuzee, gunla biibaal mɛɛ n ɔɔ kpogluu la.’

³² Haali miŋ ŋɔ wia naa di tɛɛ ia la gba, ka ii faa waa Kɔraawiizi yardɛɛ.

³³ Waabuu ɔɔ faa tɔ ii see, di ɛɛ lugɔ niŋ hamuŋa ni, di kaa ɛɛ lugɔ baama bɔchaaŋ ge, di ra bagli ia bɔr la iin niŋ chɔɔ ani bɔr la iin niŋ ga.”

³⁴ “Kɔraawiizi n wa nuu ii nuumaa la, u baaŋ fuuh, u hɛɛhzi ni biinichɔg di ŋɔ,

³⁵ ‘Nɛkpaŋ maa wàá ka di lii ii zinaa wichɔgɛɛra naa biini, un niŋ zuu hɛrsum la miŋ ŋɔ nua lugɔ n daŋ kpa tɛɛ ii naabaala la.

³⁶ Jɛfunɛ biibaal Kalɛb bɛnnɛ niŋ zuu de, dikuubɛɛwiai, u faa ra hiŋimbuu ni biinihuŋŋu. U daŋ na a hɛri, ń tɛɛ u ni u naanna bɔr la maa uŋ kpa u naazi jag, saŋa la uŋ faa zuu de u daanuu na la.’

³⁷ Dikuu ii wia, Kɔraawiizi baaŋ faa fuuh n ge gba ninɛɛ, u ŋɔ, ‘I ge gba wàá zuu de.

³⁸ Ka i hiini Nun biibaal Josuarɛ niŋ zuu de. A duu bɔkpega, dikuubɛɛwiai, waabuu niŋ tɔ Izrɛl hina see, bá ga lɛɛ a hɛri dɔɔ.’

³⁹ Denii Kɔraawiizi ŋɔ yaa maa be, ‘Ii biizi la n haa waa wia zummɛ labuu niŋ zuu de. Baabuu ii ŋɔ ii dɔma daŋ wa lauri laal biini la. N daŋ kpa a hɛri di tɛɛ baa, ú birgi ba kapɛttɛ kuŋ.

⁴⁰ Ka iawaa, ií bir har di ra la hɛribɔduma, di hiŋ ŋmɛnɛɛ la n na la Muuzeŋaahmu la.’

⁴¹ Denii ii bir ŋɔ, ‘Yaa ɛɛ wichɔgaarɛ di zuu Kɔraawiizi ni. Yaa daŋ la, di ga lɔ baa gunla Kɔraawiizi la yaa n na hum, n ŋɔ yá ɛɛ la.’ Awia, ii bɛl maa jaa kpa u dɔŋkuna di laali, di ra fɛ lugɔ a giŋgimee hɛri laŋaa waa kpol.

⁴² Ka Kɔraawiizi ŋɔ n be, ‘Ŋɔ ba be lugɔ bá gilɛɛ waa la gaa lɔ baa, dikuubɛɛwiai, màá du ba be. Ba dɔma daŋ kpegli baa.’

⁴³ N faa ŋɔ ii benii gunla Kɔraawiizi n ŋɔwɛɛ la, ka ii vɛɛ u nua. Ii diu mmɔri, dikuu ii kpoŋaa wia, di izi zuu a giŋgimee hɛri.

⁴⁴ Denii Amɔri hina la n du de la lii lugɔ huuhbee, di duŋŋi ia lii Sɛɛ guŋŋ di ga hel bolzeŋ Hɔma.

⁴⁵ Denii ii bir ba, di wa wii du Kɔraawiizi, ka waa ia hagzɛɛ.

⁴⁶ Awia, ii faa du Kadɛs di birgi.”