Daniɛl 1 - Vagla

Daniɛl ni u dammuzi bahoro wia

¹ Juda Koori Jɛhɔyakim kora dii binni ahorohiŋ biinii, Babilɔn Koorizeŋ Nɛbukadnɛɛza faa ba, di wa fɔɔ Jɛrusalɛm ni laal.

² Kɔraawiizi faa gil u kpegli Juda Koori Jɛhɔyakim, di lawuu, di paagi Kɔraawiizi Dia kuna aŋhina jaa, di kpaa la Babilɔn ga du u vuga dia daama kuna dauribɔr.

³ Denii a koorizeŋ faa gil Aspɛnaz la n faa ɛɛ u nabɔnzi nabɔma, lizi biipɔllaa baŋhina lii Izrɛl hina la baŋ kpoglee ba la biini, banla n ɛɛ kooridiire ni domeezi nabɔnzi biizi.

⁴ Bá ɛɛ biipɔllaa la n kpekke nɛnnɛ, di ɛɛ bunɔɔna, di dɔɔ nfɛrɛ, bá dɛɛzi baa nɛnnɛ, bá wer di ra helli wia manamanaŋ, guŋ gil bá wer di ra hum a kooridia biini. A dɛkkɔɔ Asfɛnaz bagli baa Babilɔn hina mɔɔri karmaa ni sɛbaa.

⁵ A koorizeŋ ŋɔ bá ra tɛɛ baa diwee ni siŋ la u himmaa n ɔɔ ra di, di ra nyɔɔ la. Binni ahoroo ú kpa di bagli baa, mɔɔ ka ba jaa zuu a kooridia di ra humuu.

⁶ Banniibuu faa jaa banla baŋ faa lizɛɛ lii Juda dee biini, Daniɛl, Hanania, Misɛl ani Azaria.

⁷ A koorizeŋ nabɔnzi nabɔma faa bir dauri baa sɔŋfalaa. U dau Daniɛl, Bɛltisaaza, di dau Hanania, Sadrak, di dau Misɛl, Mɛsak, di dau Azaria ge Abɛdnigo.

⁸ Ka Daniɛl faa ŋɔ lugɔ wàá di a kooridia diwee gɛɛ di nyɔɔ a siŋ, di waa doŋ u hiŋ Kɔraawiizi be. Denii u suŋŋi a koorizeŋ nabɔnzi nabɔma a guŋ wia.

⁹ Kɔraawiizi faa gil Daniɛl wia par a nabɔma, u suŋ u ni,

¹⁰ ka a nabɔma ŋɔ u be, “N na ɔm n dɔɔri koorizenne. Waabuu bagliŋ kuna la iin ninna di, di ra nyɔɔ. Di u wa nai, di haa pɔllɛ di dɔɔ alaanfia lugɔ i dɔŋahina, u daŋ kpuŋ.”

¹¹ Awia, Daniɛl ga ŋɔ nɛr la Asfɛnaz n faa lizɛɛ u ra binni u ni Hanania, Misɛl ani Azaria ni la be,

¹² “N dɔɔri, jaande maa, ka ɛɛ yaa na hɔpizaa fi maga. A tɛɛ yaa diwee la n waa ol dɔɔwɛ yá ra di ani nii bɛŋ.

¹³ Denii í kpa yaa duula mɛgzi yaa dɔŋahina la n na di koorizeŋ diwee la di na, ka na gunla hin niŋ ɛɛ.”

¹⁴ Awia, a baal sɛɛ, di ɛɛ baa guŋ hɔpizaa fi di na.

¹⁵ Hɔpizaa fihiŋ la tuna, u na lugɔ baabuu dɔɔ alaanfia nɛnnɛ, di dɔɔ bɔra kaali banla n na di a koorizeŋ diwee la.

¹⁶ Awia, baal la n na binni ba ni la jaa kpa a koorizeŋ diwee ni siŋ la ban niŋ faa ra di la, ka hanna tɛɛ baa diwee la n waa ol dɔɔwɛ bɛŋ.

¹⁷ Denii Kɔraawiizi tɛɛ biipɔllaa banaazu naa nunzuma ni wia zɛɛ zumaa, karmaa, sɛbaa maa iri ni a hellaa. Di kaa kpa jaa, u faa tɛɛ Daniɛl wipillaa ni deeza zɛɛzi zumaa.

¹⁸ Binni ahoro la Koorizeŋ Nɛbukadnɛɛza n dauwɛ la tuna n wa helle, a koorizeŋ nabɔnzi nabɔma la faa kpogli a biipɔllaa maa la a koorizeŋ be.

¹⁹ A koorizeŋ ni baa ŋɔ wia, u na lugɔ bɛl maa dɔŋ lɛi Daniɛl, Hanania, Misɛl ani Azaria. Awia, baawaa faa ra hum a koorizeŋ.

²⁰ Di lii wikpoglaa maa ni wia zɛɛ zumaa biini, ni gunla koorizeŋ n ɔɔ pɛɛzi baa, u na lugɔ ba haŋ kaali u vugra ni hilaa bufi, u kora diiribɔr maa biini.

²¹ Daniɛl du de guŋŋ di ga hel Pɛsia Koorizeŋ Sairus kora dii lugli bina biini.