Kɔlɔsi 1 - Vagla

¹ Mìŋ́ Yeesu Kristo huŋhunni Pɔɔllɛ ra sɛbi hɔnnaa ń tɛɛ ia. A par Kɔraawiizii u tɛŋ a huma.

² N ni yaa dɔŋhiŋ Timotii ra jaami yaabalaa la n du Kɔlɔsi di ɛɛ Kɔraawiizi biinanaa di ra hiŋuu ani wibii la. Yáa Mɛɛ Kɔraawiizi hiini ia di tɛɛ ia bampirsɔna.

Jaantɛɛi ni wiisuŋŋaa wia

³ Yaa ɔɔ ŋɔ ii wiarɛ ra tɛɛ yaa Dɔɔri Yeesu Kristo Mɛɛ Kɔraawiizi la, di ɔɔ ra jaamuu dikuu ii wia werge maa,

⁴ dikuubɛɛwiai, yaa nuuwɔ lugɔ ii dɔɔ Yeesu Kristo yardaa nɛnnɛ di kaa nɔŋŋi Kɔraawiizi biinanaa la maa nɛnnɛ,

⁵ dikuu iin dɔɔ Kɔraawiizi bol ani suma la maa un dau ia de la tamii wia. Ii faa nuu Kɔraawiizi bol suma wiarɛ lii saŋa la Ɛpafras n felee ba ii be wa lizi amaniyesuma la n ɛɛ wibii tɛɛ ia la.

⁶ Amaniyesuma wia ra yaaruu, nɛra ra sɛɛ a wia bɔkpila maa di jaa ra ɛɛ winanaa gunla ii ge n faa sɛɛ a wia di ra ɛɛ winanaa saŋa la iiŋ felee nuu a wia ii siwee pilli ii zum lugɔ Kɔraawiizi suŋ ii ninɛɛ di hiini ia wibii maa la.

⁷ Ɛpafras la n faa lizi amaniyesuma la tɛɛ ia la, u ni yaabuu kpauwɛ ra hum huma naa biini. Yaa nɔŋŋuubuu werge. U ɛɛ Kristo balii bɛl wia n dɔɔ wibiire di ra hiini yaa.

⁸ Waabuu bagli yaa gunla Kɔraawiizi Dumnanii n na hiini ia ii wer nɔŋŋi dɔŋa.

⁹ Awia, uŋ wa bagli yaa ii wia la, yaa ɔɔ jaa suŋŋi wiizi ra tɛɛ ia, di lii a saŋa hiŋ alugɔ ú Duma ra bagli ia u wia maa nɛnnɛ, di haa ra pilli ii siwee, ií wer zum wia la maa n ɛɛ Kɔraawiizi kipar,

¹⁰ di wer ra hiŋ gunla n dɛkkɛ yaa Dɔɔri hiŋra n ninna hiŋ la, ií wiimaa wer paruu ií wer ra ɛɛ winanaa nɛnnɛ, di ɔɔ wer zum Kɔraawiizi ra jaa,

¹¹ di wer dɔɔ fɔŋŋa nɛnnɛ lii u himmaa fɔŋŋazeŋ la n dɔɔ girme werge la biini. N na suŋŋi Kɔraawiizii ú hiini ia guŋ, ií wer dɔɔ kanyitti ani wiimaa biini. Di ii wa na tɔɔrɔɔ maa, ka ii haa wer vɛɛ ra di a tɔɔrɔɔ ani bɔsɔna,

¹² di wer tɛɛ yaa Mɛɛ Kɔraawiizi jaam. Waabuu gillɛ yaa dɛg lugɔ yáa ni u biinanaa maa wer kpau di di u kapɛttɛ, saŋa la yaa n niŋ zuu u bolnanii la n na chaani la biini.

¹³ Kɔraawiizi lɛɛ yaabuu lii bɔbiri fɔŋŋa be, di kpa yaa ga du u Biinɔŋŋii kora biini.

¹⁴ U Biinɔŋŋii labuu turgi yaa kim di lɛɛ yaa Sitaani fɔŋŋa biini, di gil yaa wichɔgaa ge tɛɛ yaa la.

Yeesu Kristoo kummaa nabɔma

¹⁵ Yaa waa wette ra na Kɔraawiizi. Ka gunla Kɔraawiizi n duwɛɛ, gunnɛ u Biibaal ge du. U Biibal hiŋ faa du denii ka kummaa haa wa du de.

¹⁶ Kɔraawiizi gillɔɔ kummaa lii u Biibaal la fɔŋŋa biini. Kuna la maa n du hɛri ani kuna la maa n du chiŋ, anla yaa n na na ani anla yaa n waa na, aliizinakpega ani fɔŋŋazi ni a dizi maa. A maa maanii u ta a du de ú ɛɛa u kipar.

¹⁷ Saŋa la annii bɛl maa faa waa hoo ka u du de. U fɔŋŋa wiarɛ a maa haa wer du de filaŋkennaa la.

¹⁸ U kaa ɛɛ u hiŋra maa nyuu. Ba ge ɛɛ u bɔrahɔŋ. U ɛɛ kummaa luglii. Waabuu feli nɛra maa di izi siu biini, dikuubɛɛwiai, a dɛkkɔɔ un niŋ tɔ see di ɛɛ nabɔma wiimaa biini.

¹⁹ Kɔraawiizi kipar wiarɛ Yeesu ɛɛ Kɔraawiizi himmaa, u maa wa du u ni.

²⁰ U ɛɛ gunnɛ Yeésu wer kuari u ni kuna la maa n du chiŋ ni hɛri wia. U gillɔɔ u Biibaal Yeesu siu daakaŋlii la ni, ú chal wer kuari a wia maa, néwee ni Kɔraawiizi wer dɔɔ nuukpaŋ.

²¹ Ii faa waa Kɔraawiizi zummɛ ka ɛɛ u haahra dikuu nfɛrchɔgaa la iiŋ faa fɛwɛɛ ra du u ni la ani wichɔgaa la iiŋ faa ra ɛɛ la wia.

²² Ka filaŋkeŋ, Kɔraawiizi Biibaal n siuwɛ naa, u kuari ii nuu wiarɛ, ií wer ɛɛ nɛnanaa la n waa doŋa maa dɔɔwɛ, di dɔɔ biinihuŋŋu bɛŋ, bá nyiŋŋi wichɔgii maa huhzi bá chug ia, ka ú ŋmɛnɛ wer kpa ia zuu Kɔraawiizi be.

²³ Di ii haa vɛɛwɔ dɔɔ ii hiŋaa fɔŋŋa, di lau kiŋkiŋ di ra hiŋ, kummaa waa ia ra bir har, ka ii ɔɔ dɔɔ tamii lii amaniyesuma la baŋ lizɛɛ tɛɛ ia, ii nuu la biini alugɔ nɛr maa waa wette ú chɔg ii tamii la, amɔ, ii daŋ zuu Kɔraawiizi be. Ba ra lizi amaniyesuma naabuu bɔkpila maa. N gba ra ɛɛ gunnɛ dikuu Kɔraawiizi n tɛŋ a huma wia.

Pɔɔl kuuhni dikuu Yeesu hiŋra wia

²⁴ N lɛɛ ii bɔttɛ ra di tɔɔrɔɔ filaŋkeŋ, ka n bɔra sɔɔnɔɔrɛ. Tɔɔrɔɔ du de Kristo n niŋ haa di tɛɛ u hiŋra la n ɛɛ u bɔrahɔŋ la. Awia, n bɔra sɔɔnɔɔrɛ min niŋ di tɔɔrɔɔ la n kawɛɛ la aŋhina á wer tuŋ.

²⁵ Kɔraawiizi gillɔɔ n hum ra tɛɛ u hiŋra, á wer lii suma tɛɛ ia. U himmaanii tɛŋ a huma di ŋɔ ń na bagli u wiŋɔɔlaa la maa wa tuŋ.

²⁶ U wiŋɔzi hiŋ zɛɛ faa ɛɛ wisuahliirɛ faala hina maa be. Ka filaŋkennaa, Kɔraawiizi pilli a maanii tɛɛ u biinanaa

²⁷ gunla uŋ faa ra nyiŋŋi u ɛɛ la, bá wer zumaa di na gunla anna hum banla n waa Jus hina ɛɛwɛ la biini, di ɛɛ winanaa werge maa la. U wisuahlii labuu keŋ. Kristo du ii biinee. Un du ii biine la, ii dɔɔ u tamiirɛ lugɔ ii daŋ ŋmɛnɛ wa na girme u be.

²⁸ Yaabuu wiŋɔzi maanii Kristo la. Yaa ra karfi nɛr maanii di ra bagli baa ani nunzuma maa, ya ŋmɛnɛ wer kpa baa bagli Kɔraawiizi ani baŋ dirmɛɛ nɛnnɛ ga tuŋ, dikuu ba ni Kristo n kpauwɛ wia.

²⁹ Awiarɛ n aah siwii ra hum di ra ɛɛ ania werge maa, Kristo ge ra jaaŋ fɔŋŋa werge maa n wer ra hum guŋ.