2 Tɛsalɔnika 1 - Vagla

¹ Mìŋ́ Pɔɔl, Silvanus ani Timotii ra sɛbi hɔnnaa ra tɛɛ Yeesu hiŋra la n du Tɛsalɔnika, di ɛɛ yaa Mɛɛ Kɔraawiizi ni yaa Dɔɔri Yeesu Kristo hora la.

² Yáa Mɛɛ Kɔraawiizi ni yaa Dɔɔri Yeesu Kristo hiini ia di tɛɛ ia bampirsɔna.

Jaantɛɛi ni wiisuŋŋaa wia

³ Yaa ɔɔ ra tɛɛ Kɔraawiizii jaaŋ dikuu ii wia, yaabalaa. Ii dɛg gunnɛ, dikuubɛɛwiai, ii yarda la iiŋ yardi Kɔraawiizi la ra jaau werge maa. Nɔŋŋaa la ii bɛl maa n nɔŋŋi dɔŋa ge gba ra jaa werge.

⁴ Yaa himmaa ɔɔ ra ŋɔ ii wiarɛ Yeesu hiŋra la n du bɔr maa la be di ra chɔli ia di ra ŋɔ gunla baŋ tɛɛ ia tɔɔrɔɔ kpila a nuu ia werge maa, ka ii di kanyitti ka haa vɛɛ ra hiŋ di yardi Yeesu la.

⁵ Ii wiɛɛlaa naa ra bagluu nɛnnɛ lugɔ seriya la Kɔraawiizi n diwee tɛɛ ia la deŋloore. Iinna di tɔɔrɔɔ dikuu u kora wia filaŋkennaa, guŋ daŋ gil ii dɛg u Kora la biini zuui.

⁶ Ka banla n na tɔɔri ia lawaa, Kɔraawiizi daŋ turgi baa a kim. U guŋ deŋloore. U tɛɛ baa ge tɔɔrɔɔ,

⁷ ka gil ií ge heezi. Yaa ni ii maanii niŋ na heezaa u be saŋa la un niŋ gil ya na yaa Dɔɔri Yeesu Kristo la n niŋ lii chiŋ ni u mɛlikakpega ni ninlau ba la.

⁸ Un niŋ wa ba la, u daŋ turgi banla n waa Kɔraawiizi zummɛ, ba waa sɛɛwɛ bá nuu yaa Dɔɔri Yeesu Kristo amaniyesuma la ba wichɔgaa kim

⁹ di bargi baa u be. Ba wàá na u girme ni u fɔŋŋazeŋ la, ka u daŋ kpa chɔgaa la n waa tunaa dɔɔwɛ ta ba ni

¹⁰ u hɔpizizenzeŋ la un niŋ ba wa na girme u biinanaa be la. Banla maa n faa yarduu, ii ni ba maanii niŋ nau di chɔluu a hɔl, dikuubɛɛwiai, yaa n faa bagli ia u wia la, ii faa sɛɛ yaa daansɛɛ la yaa n diwee tɛɛ ia labuu.

¹¹ Yeesu balaa naa wiarɛ yaa ɔɔ ra suŋŋi wiizi ra tɛɛ ia, ú hiini ia ií wer dɛg hiŋaa naa uŋ yir ia ii ra hiŋ naa, di tɛɛ ia fɔŋŋa ií wer ɛɛ winanaa la maa n du ii bampiree ani wii la maa iiŋ ŋɔ ií ɛɛ dikuu iiŋ yardi Kɔraawiizi wia.

¹² Yaa ra suŋŋi Kɔraawiizii guŋ yáa Dɔɔri Yeesu sɔŋ wer na girme lii ii wia biini, ií ge gba wer na girme lii u ge wia biini. Yaa Mɛɛ Kɔraawiizi ni yaa Dɔɔri Yeesu Kristo n suŋ yaa ni, di hiini yaa wiarɛ annii maa wa wer ɛɛ la.