2 Kɔrint 1 - Vagla

¹ Mìŋ́ Yeesu Kristo huŋhunni Pɔɔllɛ ra sɛbi hɔnnaa ń tɛɛ ia. A par Kɔraawiizii u tɛŋ a huma. N ni yaa dɔŋhiŋ Timotii ra jaami ii banla n ɛɛ Yeesu hiŋra du Kɔrint ani Kɔraawiizi biinanaa la maa n du Akaaya la.

² Yáa Mɛɛ Kɔraawiizi ni yaa Dɔɔri Yeesu Kristo hiini ia di tɛɛ ia bampirsɔna.

Pɔɔl n tɛɛ Kɔraawiizi jaaŋ wia

³ Ií ra tɛɛ yaa Dɔɔri Yeesu Kristo Mɛɛ Kɔraawiizi la sɔŋ. U ɛɛ mɛɛ la n na na nɛra sinyɛnaa werge maa di kaa ɛɛ Kɔraawiizi la n na tig nɛra bampiree werge.

⁴ Waabuu ra tig yaa bampiree. Saŋa maa, di tɔɔrɔɔ haŋ wa huuzi yaa, ɔɔ ra tig yaa bampiree ka yáa ge wer tig yaa dɔŋahina la n na di tɔɔrɔɔ maa bampiree, gunla un tig yaa ge bampiree la.

⁵ Yaa n na di tɔɔrɔɔ werge lugɔ Kristo n faa diwee la, gunnɛ yaa kaa ra na bampirsɔna werge dikuu u wia.

⁶ Di yaa ra di tɔɔrɔɔ, ii hiinaa wiarɛ yaa ra dia, yá wer tig ii bampiree di lɛɛ ia. Di Kɔraawiizi kaa wa tig yaa bampiree la, ii hiinaa wiarɛ u kaa tig yaa bampiree, ka ya wer hiini ia ií wer dɔɔ kanyitti saŋa la iin niŋ waa di yaa tɔɔrɔɔ la dɔŋ.

⁷ Yaa dɔɔ Kɔraawiizi tamiirɛ werge maa dikuu ii wia, dikuubɛɛwiai, yaa zummɔ lugɔ di yaa ra di tɔɔrɔɔ, yaa ni ii maanii niŋ na bampirsɔna la.

⁸ Yaabalaa, yaa ra nyiŋŋuu ii zum tɔɔrɔɔ la yaa n faa diwee Eesia hɛri la wia. A tɔɔrɔɔ faa siili yaa ninɛɛ werge maa, di lɔ yaa dau. Yaa faa waa tamii ɛɛwɛ lugɔ yaa daŋ lii u biini ani miibɔɔ.

⁹ Yaa faa zumɔɔ lugɔ yaa daŋ faa siu de gba. Ka guŋ ɛɛwɔɔ ya gilɛɛ dɔɔ yaa hinaa tamii, ka dɔɔ Kɔraawiizi la n wette lalli nɛra siu biini la tamii.

¹⁰ U faa lɛɛ yaabuu siuchɔgii biini, di haa ra lɛɛ yaa. Yaa dɔɔ u tamiirɛ lugɔ u daŋ haa lɛɛ yaa gba.

¹¹ A dɛkkɔ ii gba n niŋ hiini yaa di ra suŋŋi wiizi, di Kɔraawiizi wa nuuwɔ, nɛ́kpila wer tɛu jaam dikuu ba suŋŋaa la ba maa n suŋŋɛɛ tɛɛ yaa u nuu di hiini yaa la wia.

Pɔɔl n bir u jinazi wia

¹² Wii la yaa n niŋ kpa chɔli yaa hinaarɛ keŋ. Yaa zummɔ yaa biine lugɔ yaa wiɛɛlaa maa wessoo wa tuŋ. Yaa ɛɛabuu biinihuŋŋu la Kɔraawiizi n tɛɛ yaa la ni. Newea nunzuma lɛi yaa kpa ɛɛa. Kɔraawiizi hiinaa biinii yaa ɛɛ a wia maa durnya maa ani ii be.

¹³ Yaa n sɛbi hɔna ra tɛɛ ia naa, wiimaa waa hoo a biini iiŋ waa wette ii karmi zum a zɛɛ maa nɛnnɛ di wa tuŋ.

¹⁴ Ii faa zum yaabuu tama. N kaa ra nyiŋŋuu lugɔ ii wer zum yaa nɛnnɛ, di zum lugɔ yaa danna jigsi dikuu ii wia, ii ge ra jigsi dikuu yaa wia, yaa Dɔɔri Yeesu Kristo Hɔpizii la hɔl.

¹⁵ Miŋ faa dɔɔ ii tamii gunla wiarɛ saŋa la miŋ faa ra la Masɛdɔnia hɛri la n faa ra nyiŋŋi lugɔ n feli ba ii be mɔɔ ií wer na hiinaa bunɛɛ la.

¹⁶ N faa ra nyiŋŋuu lugɔ n ga ii be ra la. Denii di n kaa waa nyiŋŋi lugɔ ń bir ba, ń kaa ga ii be di wer du ii be ka ií kaa taŋ ŋmɛnɛɛ ń la Juda hɛri.

¹⁷ Too. Miŋ faa ra fɛ u guŋ nfɛrɛ la, maa guŋ kpawɛɛ fugzi. Newea daŋ wer ŋɔ nua ka vɛɛ guŋ, ka miŋwaa waa guŋ duwɛɛ.

¹⁸ Kɔraawiizi la wia n dɔɔ wibii la di yaa daansɛɛrɛ lugɔ yaa wiŋɔzi waa guŋ ɛɛwɛ. Yaa waa ɔɔ ra sɛɛ wia ani nua ka ra vɛɛa.

¹⁹ Kɔraawiizi Biibaal Yeesu Kristo la n ni Timoti ni Silvanus n bagli u wia tɛɛ ia la dɔɔ wibiire. Waa dɔɔwɛ lugɔ ŋmɛnɛbɛl ú ŋɔ “ɛɛh,” ŋmɛnɛbɛl ú kaa ŋɔ, “Akai.” Di waabuu haŋ ŋɔ wii, u ŋɔwɔɔrɛ.

²⁰ Nuuzi la maa Kɔraawiizi n ŋɔwɛɛ tɛɛ yaa la, Yeesu Kristo ninɛɛ yaa chi zum lugɔ a ɛɛ wibiire. U wiarɛ ya wer ŋɔ, “Ami!” Kɔraawiizi wer na sɔŋ.

²¹ Kɔraawiizii gillɛ yaa ni ii maa wer lau Yeesu Kristo nɛnnɛ di ra hiŋ di kpa u Dumnanii du yaa ni,

²² u ra bagli lugɔ yaa ɛɛ Kɔraawiizi horaa, di kaa ra bagli lugɔ u daŋ ŋmɛnɛ lɛɛ yaa di wa tuŋ.

²³ N na yir Kɔraawiizi la n zum n biini maa la sɔnnɛ ú ɛɛ n daansɛɛ hiŋ ani wiŋɔzi naa biini. Miŋ faa waa Kɔrint ballɛ la, ii tɔɔraarɛ n faa waa nyiŋŋi wiarɛ maa ballɛ.

²⁴ A waa lugɔ yaa ra nyiŋŋuu ya bagli fɔŋŋa ii ni ii hiŋaa naa biini. Guŋ lɛi. Ii himmaa lauwɔɔ di ra hiŋ nɛnnɛ. Ka yaa ra nyiŋŋi ya wer hiini ia ií wer dɔɔ bɔsɔna.