1 Tɛsalɔnika 1 - Vagla

¹ Mìŋ́ Pɔɔl ni Silvanus ni Timotii ra sɛbi hɔnnaa ra tɛɛ ii banla n ɛɛ Yeesu hiŋra di du Tɛsalɔnika di ra sɛɛ yaa Mɛɛ Kɔraawiizi ni yaa Dɔɔri Yeesu Kristo dɔɔra la. Kɔ́raawiizi hiini ia di tɛɛ ia bampirsɔna.

Tɛsalɔnika hina de dui ni ba yarda wia

² Yaa ra tɛɛ yaa mɛɛ Kɔraawiizii jaaŋ saŋa maa dikuu ii maa wia di ɔɔ ra suŋŋuu ra tɛɛ ia

³ di ŋɔ ra tɛu gunla iiŋ ɔɔ ra hum u huma dikuu iiŋ yarduu wia, di ra kuuh u kuuhni dikuu iin nɔŋŋuu werge wia, di ra hiŋuu ni kanyitti dikuu iinna ɛɛ yaa Dɔɔri Yeesu Kristo tamii wia.

⁴ Yaabalaa, ii banla Kɔraawiizi n nɔŋŋɛɛ la, yaa zummɔ lugɔ Kɔraawiizii lizi ia tɛɛ u hiŋ,

⁵ dikuubɛɛwiai, a hɔl la iiŋ faa nuu yaa amaniyesuma la, a faa waa wiŋɔdumazi ɛɛwɛ ii be. A dɔɔ fɔŋŋaa. Kɔraawiizi Dumnaniirɛ tɛɛ a wiŋɔzi hiŋ fɔŋŋa. Ii bɛl maa waa wette ú kaa aanaa tama maa. Ii faa ra na yaa wiɛɛlaa maa yaa n faa ra ɛɛu di ra bagli ia,

⁶ di hiŋ yaa ni yaa Dɔɔri. Iin sɛɛ a wiŋɔzi la wia, ba tɔɔri ia werge. Ka Kɔraawiizi Dumnanii gil ii bɔra sɔɔni ia werge maa.

⁷ Awia, banla maa n yardi Yeesu di du Masɛdɔnia ni Akaaya la ra hiŋ gunla iinna hiŋuu.

⁸ Ii benii ba nuu yaa Dɔɔri wia. Ba bɛŋ lɛi nuu yaa Dɔɔri wia ii be. Yemmaanii nɛra du di ra nuu ii wia lugɔ ii yardi Kɔraawiizii. A waa kaa ɛɛ lugɔ ya ŋɔ ii wia tɛɛ nɛra.

⁹ A nɛra maa ɔɔ ra bagli yaabuu gunla iin nuu yaa be di gil vuga kuaraa ka bir ra hiŋ Kɔraawiizi la n ɛɛ Kɔraawiizi himmaa di dɔɔ miibɔɔ la ra hum u huma

¹⁰ di ra kpaŋ u bie la n niŋ wa lii chiŋ ba la. Waabuu Yeesu la uŋ faa lalli siu biini la. Waabuu niŋ lizi yaa Kɔraawiizi baaŋ la n niŋ ŋmɛnɛ wa fuuh di chɔgi nɛra la biini.