Ezmäine kirjeine korinfalaižile 1 - Uz' Zavet

Tervhen- da kitändsanad

¹ Minä, Pavel, kudamb Jumalan tahton mödhe olen kuctud Iisusan Hristosan apostolaks, i uskondvel՚l՚ Sosfen

² oigendam tervhutesid Korinfan lidnas eläjale uskondkundale, nenile, keda Jumal kucui i valiči elämaha pühän rahvahan kartte ühtes Hristosan Iisusanke. Tervhutesid mugažo kaikile, ked kaikjal kucuba abuhu Ižandan Iisusan Hristosan nimed – heiden dai meiden Ižandan.

³ Armoid da mirud teile Jumalas, meiden Tataspäi da Ižandas Iisusas Hristosaspäi!

⁴ Minä kaiken kitän teiden tagut meiden Jumalad. Kitän händast hänen armoiš, kudambad teile om anttud Hristosas Iisusas.

⁵ Hänes tö olet bohattunuded kaikes, kaikuččes sanas dai kaikuččes tedos,

⁶ sikš ku todištuz Hristosan polhe om lujas jurdunu teihe.

⁷ Sikš teil ei ole mairišt nimiččes hengeližes lahjas varastades meiden Ižandan Iisusan Hristosan tulendad.

⁸ Jumal vahvištab teid lophusai, miše oližit vigatomin meiden Ižandan Iisusan Hristosan tulendpäivän.

⁹ Jumal om kucnu teid olda ühtes ičeze Poiganke Iisusan Hristosanke, meiden Ižandanke, i hän pidäb ičeze sanan.

Uskondkundan ridad

¹⁰ Velled, meiden Ižandan Iisusan Hristosan nimes pakičen teid: olgat üks՚meližed da algat jagakoiš gruppihe, i ühtenzoitkaha teid üks՚ mel՚ da heng.

¹¹ Ved՚ Hlojan kodinikoišpäi olen tedištanu, miše teiden keskes om ridoid.

¹² Ka minä pagižen sidä, midä erased teišpäi sanuba: «Minä olen Pavlan polel», a toižed: «Minä – Apollosan», «Minä – Kifan», «Minä – Hristosan».

¹³ Om-ik Hristos jagetud? Vai nece Pavel om nagloitud teiden tagut? Vai teid om valatadud Pavlan nimehe?

¹⁴ Kitän Jumalad, miše en valatand teišpäi nikeda, vaiše Krispan da Gaijan,

¹⁵ sikš niken ei voi sanuda, miše minä valatin minun nimehe.

¹⁶ Tozi sanuda, ka völ valatin Stefanan kanzan, a enambad en mušta nikeda, miše oližin valatanu.

¹⁷ Ved՚ Hristos om oigendanu mindai ei valatamha, a sanelemha hüväd vestid, no ei melevil paginoil, ika Hristosan rist kadotab ičeze vägen.

Hristos om Jumalan vägi da melevuz՚

¹⁸ Pagin ristas om tühj neniden mödhe, ked mäneba igähižihe mokihe, a meile, ked päzum, se om Jumalan vägi.

¹⁹ Ved՚ om kirjutadud: – Minä murendan melekahiden melevuden i tegen tühjaks el՚gendajiden el՚gendusen.

²⁰ Kus oma melekahad da openus mehed, kus oma nügüdläižen mirun tedajad? Ei-ik Jumal ole tehnu mirun melevut meletomudeks?

²¹ Jumal ozuti ičeze melevuden, no ku mir ičeze melevudel ei opendanus tundmaha Jumalad, ka Jumal kacui hüväks päzutada nenid, ked uskoba meiden saneltud meletomudehe.

²² Evrejalaižed pakičeba tundmuztegoid, grekalaižed eciba melevut.

²³ A mö sanelem ristha nagloitud Hristosan polhe. Evrejalaižile se om abid, a grekalaižile – meletomuz՚.

²⁴ No nenile, keda kuctihe tehtas Jumalan rahvahaks, kut evrejalaižile, muga grekalaižile-ki, ristha nagloitud Hristos om Jumalan vägi da melevuz՚.

²⁵ Jumalan meletomuz՚ om melekahamb mi rahvahan melevuz՚, a Jumalan vällüz՚ om vahvemb rahvahan väged.

²⁶ Meletagat, velled, miččed olit tö, keda kucui Jumal: rahvahan sil՚miš teiš ei olend äi melevut, äi painandvaldad da äi korktad rodud.

²⁷ No Jumal valiči mirun meletomut, miše huigenzoitta melekahid. Jumal valiči mirun vällüt, miše huigenzoitta vägekahid.

²⁸ Mi mirun sil՚miš ei ole korktas arvos, mi om tühj, sidä Jumal valiči, miše ozutada tühjaks sidä, mi hot՚ midä-ni om.

²⁹ Muga ni üks՚ mez՚ ei voi ülendeldas Jumalan edes.

³⁰ Teiden Hristosas Iisusas olend om lähtnu Jumalaspäi. Händast Jumal om andnu meile melevudeks, hänen kal՚t mö olem tehnus melekahikš, tozioiktoikš, pühikš da päzutadud valdale.

³¹ Ninga tuleb todeks kirjutuz: «Ken ülendelese, ülendelkahas Ižandal.»