Luk 1 - Itang

Luk angɛr ukwagh Jizɔs ukaa ungun kɔ Tiyofilus

¹ Iyɔr tsɛng vɛ anɔngu ungɛrɛn ukwagh arɔm ghɛ akaa angan a ɛr kɔ atɛ uwas.

² Vɛ angɛr akaa angan vɛ ɔɔr ghu ɔs angan iyɔr mahɛ vɛ ɛn ase avo ashigh vɛ va a ɔɔrɔyi urɛhɛ hun.

³ Ne mɔ, mɛkɛr shisha akaa angɛrɛn hun tra kɔ mhiye una, ne mɛ ɛn na ghɛka ukwagh usɛ ungwen mɛ ungɛr uwɛ ukwagh arɔm hun ghu umɔm-umɔm, Unom Tiyofilus.

⁴ Mɛ ɛr man ɛn ufɔ na akaa angan vɛru vɛ tsoghyi mɔ anga jing.

Udugɛr una Aonz aram ɛchi Aonz umar Jon ɔr minden iyɔr kɔ ijɔr

⁵ Ukpɛ ungwen Hɛrɔd aru Unom kɔ utar Judiya, Ɔr ipɛɛn una Aonz ungwen vɛ tayi Zakaraya, aru ɔr umɔm kɔ apɛɛnɛv anav Aonz urɔng ghu amban vɛ tayi na Abija mɔ. Ukwas una Ɛlizabɛ kpa, aru kɔ itum ina Arɔn.

⁶ Zakaraya ghɛ Ɛlizabɛ vɛru gbɛngang kɔ ase Aonz, vɛru ghi ibɛrɛn ina uzɔ Aonz Uwun ghɛ mɛnna amem jing.

⁷ Vɛru ghu uwan gha, itiyo ikaa Ɛlizabɛ aru ikem ukwas, avo amem vɛ abe iyɔr shisha.

⁸ Ghɛ ɛru ihɔ ingin urɔng Zakaraya vɛru amban vɛ ɛr utom kɔ itumbɛ Aonz, ne Zakaraya aru ghi ɛrɛn utom apɛɛnɛv kɔ ghi ishigh Aonz.

⁹ Apɛɛnɛv anav Aonz Uwun vɛ tsuwa Zakaraya ghu udo, mɔ vɛ ɛrɛyi kpem-kpem, na aza hin aza song ukwagh uhuman ushiyan kɔ itumbɛ Uwun Aonz imin.

¹⁰ Mɔ ukpɛ ungwen aru ghi isongnun ukwagh uhuman hun, isum iyɔro iru atire kɔ uwen, ghi iramen ghu Aonz.

¹¹ Ne Udugɛr una Aonz Uwun aduwe kɔ Zakaraya, atire kɔ upav ayan hɔ ghɛ atso ukwagh human ushiyan mɔ.

¹² Mɔ Zakaraya a ɛnɛn ana, ikira-kas igbire un iyɔr ghɛtser un.

¹³ Kpa Udugɛr una Aonz akaa ghu un na, “Zakaraya, ka chiya gha! Aonz amgba ghi iram uwow. Ukwas uwow Ɛlizabɛ, amar uwɛ uwan unombos, una un itiye na Jon.

¹⁴ Aru ukwagh ushiyan ghɛ isighan kɔ awɛ, iyɔr tsɛng ghɛshiya avo ghu umar una,

¹⁵ aru itargɛr ɔr hɔ ishigh Aonz Uwun. Aka maayi masɔrum ghɛ masɔrum matarɛnɛm gha. Aru ayiv Ajingɛjing una Aonz, tete ta umar una.

¹⁶ Un ne ahire iyɔr Izrɛl tsɛng kɔ Aonz Uwun uvo.

¹⁷ Un ne agba ishigh ghu Aonz Uwun, ghi Ajingɛjing ghɛ ikɔw una Ɛlaja. Un ne agɛma asima utir kɔ ghi myem ghɛ vɛ hɛmbanɛv atogh kɔ ghu mfɔ amban amba gbɛngang, ɛn vɛ wa iyɔr, iyɔr ghu Uwun uvo.”

¹⁸ Zakaraya apine udugɛr una Aonz na, “Nan mfɔ na ukwagh ungwen ɔɔrum mɔ ava a ɛrɛ? Mbɛ iyɔr ukwas uwam kpa abe iyɔr.”

¹⁹ Udugɛr una Aonz akaa ghu un na, “Mɛ ngwe Gɛbɛrɛ. Mɛ tiren kɔ ishigh Aonz, un ne atindim na, mɛ va ɔɔr uwɛ urɛhɛ usɛ.

²⁰ Ne uru swɛng uku ube uram gha kpem ihɔ ingin akaa angan a ɛr, itiyo ikaa una isima ibɛrɛn ghɛ amuu a aam gha, angan ava a ɛr ghɛ ahɔ ana.”

²¹ Ukpɛ ungumɔ, iyɔr amban vɛru ghi tabɛrɛn Zakaraya kɔ ghu uwen, ka kond avo ghi iyɔr ɛnmɔ ahɛmba ghi ishin kɔ itumbɛ Aonz.

²² Mɔ aduwen mɔ, aka abe ghi iramen ghɛ avo gha. Vɛ gbayi ifɔn na a ɛn asan kɔ itumbɛ Aonz, itiyo ikaa aram ghɛ avo ghɛ avo abe ghi iramen gha.

²³ Kpɛ ungwen Zakaraya abɛɛn utom kɔ itumbɛ Aonz mɔ, ayov kɔ achiya una.

²⁴ Katsa tsɛng gha ukwas una, Ɛlizabɛ, awa uyav iwɔɔr itan ayɛr iyɔr ina kɔ achiya.

²⁵ Ɛlizabɛ akaa na, “Aonz Uwun a ɛrɛm kwagh usɛ. Ahɔ angan awaiko ghɛ amwe. Atɛng ihoon iyam kɔ ase iyɔro.”

Udugɛr aram ɛchi Aonz kɔ ghu Mɛri umar ɔ Jizɔs

²⁶ Mɔ uyav Ɛlizabɛ unɔr iwɔɔr atsindar, Aonz atind Udugɛr una Gabɛrɛ kɔ ihiye Nazarɛ, kɔ Galili.

²⁷ Vɛ tind un kɔ inuhun ukwas ingin iru ghi itɔnd uzɔ ɔzun ɔr ungwen vɛ tayi na Josɛf uwan kɔ itum ina Dɛvid. Inuhun ukwas hun vɛ tayi na Mɛri.

²⁸ Udugɛr hun aza kɔ Mɛri akaa ghu un na, “Mkaa ghu uwɛ, ukwas ungwen Ibɛrɛn Aonz Uwun ingi ghɛ ana!”

²⁹ Ghɛza Mɛri iyɔr kɔ amuu hun, aru ghi imburun zan kine ikaan nana?

³⁰ Kpa Udugɛr una Aonz akaa ghu un na, “Ka chiya gha, ukor ibɛrɛn kɔ ghɛ Aonz.

³¹ Uwa uyav umar uwan unombos, uta un itiye na Jizɔs.

³² Aru itargɛr ɔr vɛ va tayi un na Ihɛmban Uwan una Aonz. Aonz Uwun ana un ikɔnogh utorogh inagh tir una Dɛvid.

³³ Ghɛ urun utor kɔ itum ina Jakob kpem-kpem; Utorov unav ube gha.”

³⁴ Mɛri apine Udugɛr una Aonz na, “Kɛ nan sɛ akaa angan a ɛrɛ? Mɔ mɛgwe inuhun mana?”

³⁵ Udugɛr una Aonz arumun ghu un na, “Ajingɛjing una Aonz ava kɔ ghɛ awɛ, ikɔw Uhɛmban kɔisa aku ghɛ awɛ. Ta ghi itsangna uwan ungwen umar mɔ vɛ atayi un na Uwan una Aonz.

³⁶ Kas, Ɛlizabɛ kɔ urɔng uwon ɛr amar uwan mɔ abe iyɔr, ungwen iyɔr vɛ akaa na atsa ghi ikem angwe ghu uyav iwɔɔr atsindar.

³⁷ Itiyo-ikaa kas imu umɔm una Aonz agba ghi inya gha.”

³⁸ Mɛri arumun na, “Mɛgwe uwan-utom ukwas una Aonz Uwun, ukwagh ungwen ukaa a ɛr ghɛ amwe.” Ne Udugɛr una Aonz ayov.

Mɛri aza ɔ ɛnɛn Ɛlizabɛ

³⁹ Ukpɛ ungumɔ, Mɛri aza ayuyu kɔ ahiye ugoo kɔ utar Judiya.

⁴⁰ Mɔ anɔr ghi itumbɛ ina Zakaraya ne akaa ghɛ Ɛlizabɛ.

⁴¹ Mɔ Ɛlizabɛ amgban ikaan ina Mɛri, uwan atsuwe un kɔ ghu usagh, ne Ajingɛjing una Aonz ayiv ghɛ ana.

⁴² Ne Ɛlizabɛ aram ghi imo gbong kɔ Mɛri na, “Ibɛrɛn iru ghɛ awɛ ghu akasɛv amem, ibɛrɛn iru ghu uwan ungwen umar mɔ!

⁴³ Mɛgwe kine sɛ vɛ atughum man ungwen ungɔ Uwun uwam ava kan ghu umwe?

⁴⁴ Mɔ mgban ikaan iyow mɔ, uwan atsuwem kɔ usagh ghi isighan.

⁴⁵ Ibɛrɛn iru kɔ ghu ukwas ungwen ana isima ibɛrɛn ina na, Aonz Uwun a ɛr itɔnd uzɔ ingiyen a ɔɔr un mɔ!”

Mɛri asigha Aonz

⁴⁶ Ne Mɛri akaa na, “Umuwa uwam atugh Aonz Uwun

⁴⁷ ajingɛjing uwam asigha Aonz Ɔr arǝn uwam,

⁴⁸ itiyo ikaa awa ikɔ ghu ukwas utom una ugban jimɛ. Hiye hanagen za kɔ ishi ichend imem iva itam ghi ibɛrɛn,

⁴⁹ Uhɛmban a ɛr akaa ataan ghɛ amwe itiye ina ingi tsangna.

⁵⁰ Ishon makɔrum ina isambɛr kɔ amban vɛ wa un iko, ichend ghi ichend.

⁵¹ Aonz a ɛr itom itaan ghɛ avo ana; atas iyɔr ugaga tra kɔ ghu mɛmbur uvo.

⁵² Aonz ashire ator kɔ ikɔnuv ivov ne akond amban vɛ gba ɛjimɛ.

⁵³ Ayiv ijonov ghɛ akaa asɛ ne azɛnda iyɔr utorov vɛ yov avo avo.

⁵⁴ Awa itomov anav Izrɛl uvogh, a umbur utɛsɛn ishon makɔrum ina.

⁵⁵ Kɔ Abɛraham ghɛ myem anav kpem, ɛnmɔ ana utir avasɛv atsɛv itɔnd uzɔ.”

⁵⁶ Mɛri atsa kɔ Ɛlizabɛ ukpemberen kɔ iwɔɔr itar tete ne ahire kɔ achiya una.

Vɛ mar Jon ɔr minden iyɔr kɔ ijɔr

⁵⁷ Ne ukpɛ ungwen ghɛ kuma ungwen Ɛlizabɛ amar, amar uwan unombos.

⁵⁸ Iyɔr amban hɔ ahiye una ghɛ urɔngu una vɛ mgba na Aonz Uwun akɔr ishon ghɛ ana shisha, vɛ asigha ghu un.

⁵⁹ Ahɔ akinkini, vɛ va ghi itsengɛn uwan hun, vɛru unan un itiye utir una Zakaraya,

⁶⁰ ne ungɔ una akaa na, “Inga! Vɛ ata un na Jon.”

⁶¹ Vɛ akaa ghu un na, “Ɔr angwe kɔ itum uyon ungwen arumunun itiye ingimɔ gha.”

⁶² Ne vɛ ɛr utir una ikav ghɛ avo upinen itiye ingin ana uwan una.

⁶³ Zakaraya apine ukpand, ne angɛr na, “Itiye ina ingi Jon,” ghɛ kond hanamɔ ɔr ghi iyɔr.

⁶⁴ Kɛsmɛ mɔ Zakaraya ahir ghi iramen va, usighan Aonz.

⁶⁵ Ka kond iyɔr ghi iyɔr amem amban vɛru hɔ ahiye hun, ne iyɔr vɛru ghi iramen akaa angan a ɛr mɔ, hɔ ghi ihiye ugoo kɔ utar Judiya hun.

⁶⁶ Hanamɔ ɔr ungwen amgba akaa angan vɛ umbur kɔ ghɛ asima, upinen na, “Uwan ungwen ava aru kɛ nana?” Itiyo ikaa ikɔw una Aonz Uwun angwe ghɛ ana.

Zakaraya aram ɛchi Aonz ghɛ usighan Aonz

⁶⁷ Ne Zakaraya utir una, Ajingɛjing una Aonz ayiv kɔ ghɛ ana ne aram ɛchi Aonz na:

⁶⁸ “Isighan iru kɔ ghɛ Aonz Uwun, Aonz una Izrɛl, itiyo ikaa ava kan iyɔr anav ɔ arǝn avo.

⁶⁹ Ana ɔs Ɔr Arǝn Ikɔw ungwen aduwe kɔ itum ɔr tom una Dɛvid,

⁷⁰ Ɛnmɔ aram ghu aramenɛv ɛchi Aonz amban amba tsangna avo atsɛ.

⁷¹ Na ar ɔs kɔ ihomov avasɛv ghɛ ikɔw amban vɛ tsɔn ɔs.

⁷² A ɛr mɔ ɛn atɛs ishon makɔrum kɔ utir avasɛv atsɛv ghɛ umburun ikur iyan ina ghi itsangna.

⁷³ Ikur iyan ingiyen azɛm kɔ utir uwas Abɛraham,

⁷⁴ na adu ɔs kɔ uvogh ihomov avasɛv, ɛnmɔ ghi ɛr un utom ghu uchiyagh gha.

⁷⁵ A ɛr mɔ ɛn ghi iru tsangna ghɛ gbɛngang, kɔ ghi ishigh inagh kpem ahɔ aas abe.

⁷⁶ Uwɛ, uwan uwam, vɛ ata uwɛ na, ɔr uramen ɛchi Aonz Uwun una Uhɛmban. Uwɛ ne ugba Uwun kɔ ishigh utɔr un ihang.

⁷⁷ Uwɛ ɔ ɛr mɔ, ɔ ɔɔrun iyɔr anav na, ghi arǝn iru tas ɔ ɛn Aonz aguwe akaa abe avo.

⁷⁸ Kɛ na, Aonz angwe ghi ishon makɔrum kaka. Kɛ mɔ ne Ɔr arǝn ɛn ighang uturu iyam ghu ɔs tra kɔisa,

⁷⁹ iyam ghu amban amba kɔ imiye ghɛ amban kɔ umɛrɛmɛ ukuu, ghɛ ukɛghɛn avɔr aas kɔ ghi ihang umakun.”

⁸⁰ Jon aves ɔr, atar kɔ Ajingɛjing; ne aruyi kɔ vɛ tim gha kpem, tete ne ahiye utom una Aonz gbɛngang kɔ iyɔr Izrɛl.