Мк 2 - У Сугынь

2 ГЛАВА 1-12 Иисус йыжыҥдыме еҥым паремда. 13-17 Иисус Левийым ӱжеш. 18-22 Пӱтӧ нерген йодыш. 23-28 Иисус да шуматкече.

¹ Икмыняр кече гыч Иисус уэш Капернаумыш толын, да еҥ-влак мӧҥгыштӧ улмыж нерген колыныт.

² Вашке тушко тунар калык погынен, омса воктенат вер кодын огыл. Иисус нунылан Юмын шомакым ойлен.

³ Тудын деке ныл пӧръеҥ йыжыҥдыме еҥым нумал конден.

⁴ Калык шуко улмылан кӧра Иисус деке лишемын кертын огытылат, Тудын тураште пӧрт леведышым ронченыт, вакшышыште кийыше черле еҥым рож гыч волтеныт.

⁵ Иисус нунын ӱшанымыштым ужын да йыжыҥдыме айдемылан каласен: «Эргым, тыйын языкет кудалтыме лиеш!»

⁶ Тушто законым туныктышо икмыняр еҥ шинчен. Нуно шке семынышт шоненыт:

⁷ «Молан Тудо тыге Юмым мыскылен ойла? Юмо деч моло кӧ айдемын языкшым кудалтен кертеш?»

⁸ Нунын тыге шонымыштым Иисус шке шӱлышыж дене тунамак шижын да нунылан каласен: «Шӱмыштыда молан тыге шонеда?

⁹ Можо куштылгырак? Йыжыҥдыме еҥлан ”Тыйын языкетым Юмо кудалта” але ”Кынел, вакшышетым нал да ошкыл” манмыже?

¹⁰ Но те пален лийза: Айдеме Эргын мланде ӱмбалне языкым кудалташ властьше уло». Иисус йыжыҥдыме еҥлан каласен:

¹¹ «Тыланет ойлем: кынел, вакшышетым нал да мӧҥгышкет кай».

¹² Чылан ончылно тудо тунамак кынелын, вакшышыжым погалтен да лектын каен. Тиде чылам чот ӧрыктарен, еҥ-влак Юмым чапландареныт да ойленыт: «Тыгайым ме нигунам ужын огынал!»

¹³ Иисус угыч теҥыз деке лектын. Уло калык Тудын деке толын, да Иисус нуным туныктен.

¹⁴ Йозак оксам погымо вер воктеч эртен кайымыж годым Иисус тушто Алфейын Левий эргыже шинчымым ужын да тудлан каласен: «Почешем мий». Левий кынелын да Тудын почешыже каен.

¹⁵ Вара Иисус Левийын пӧртыштыжӧ кочкын. Тудын да тунемшыж-влак дене пырля йозак погышо да моло языкан еҥ-влакат шукын кочкыныт, вет Тудын почеш коштшо коклаште тыгайже шуко лийын.

¹⁶ Нунын дене пырля Иисусын кочмыжым ужмекышт, закон туныктышо ден фарисей-влак Тудын тунемшыж-влаклан ойленыт: «Кузе Тудо йозак погышо да языкан-влак дене пырля кочкеш да йӱэш?»

¹⁷ Иисус тидым колын да нунылан каласен: «Таза еҥлан огыл эмлызе кӱлеш, а черлылан. Мый чын ыштыше-влакым огыл, языкан-влакым языкыштым касарыкташ да Юмо деке савырнаш ӱжаш толынам».

¹⁸ Иоаннын да фарисей-влакын тунемшышт пӱтым кученыт. Иисус деке толыныт да ойленыт: «Молан Иоанн ден фарисей-влакын тунемшышт пӱтым кучат, а Тыйын тунемшет-влак огыт кучо?»

¹⁹ Иисус нунылан вашештен: «Сӱан пайремыште каче дене пырля лийше уна-влак пӱтым кучен кертыт мо? Нунын пеленышт каче але улмо годым пӱтым кучен огыт керт.

²⁰ Но тугай жап толын шуэш, кунам каче нунын деч налалтеш, тунам, тудо кечылаште, пӱтым кучат.

²¹ Тошто вургемеш ошемдыдыме куэм дене тумышым нигӧ ок шынде. Тыгай тумыш туртеш да вургемым кушкедеш. Рож утларак кугемеш.

²² Тошто шувышыш шуын шудымо йошкар аракам нигӧ ок опто, тыгай арака тошто шувышым кушкедеш. Аракажат йоген пыта, шувышыжат йӧрдымӧ лиеш. Шуын шудымо аракам у шувышыш оптат».

²³ Икана шуматкечын Иисус шурно пасу гоч эртен. Тунемшыже-влак, кайышыштла, шурно парчам кӱраш тӱҥалыныт.

²⁴ Фарисей-влак Иисуслан ойленыт: «Ончо, мом нуно ыштат! Тидым шуматкечын ышташ ок лий».

²⁵ Иисус вашештен: «Кунам Давид да пеленже лийше-влак шуженыт да кочкашышт нимо лийын огыл, тунам тудын мом ыштымыж нерген те лудын огыдал мо?

²⁶ Надыр киндым иерей-влаклан веле кочкаш лиеш гынат, Авиафар архиерей годым Давид Юмын пӧртыш пурен да тиде киндым кочкын, пырля лийше-влакланат пуэн».

²⁷ Вара Иисус каласен: «Шуматкече айдемылан, а айдеме шуматкечылан огыл.

²⁸ Тыгеже Айдеме Эрге шуматкечыланат оза!»