Еф 1 - У Сугынь

1 ГЛАВА 1-2 Саламлымаш. 3-14 Христос гоч эргылыкыш пуртымаш. 15-23 Лудшо-влак шинчымашым налышт манын кумалмаш.

¹ Юмын эрыкше почеш Иисус Христосын Апостолжо лийше Павел деч Ефесыште илыше да Христос Иисус дене ушнен шогымаште ӱшанле святой-влаклан.

² Мемнан Юмо Ачана деч да Господь Иисус Христос деч тыланда порылык да тыныслык лийже.

³ Мемнан Господьна Иисус Христосын Юмыжо да Ачаже моктымо лийже! Тудыжо пылпомышто Шӱлышын уло суапландарымыж дене Христос гоч мемнам суапландарен.

⁴ Шкенжын ончылныжо мыланна святой да шылталаш амалдыме лияш манын, тӱням шочыктымо деч ончычак Тудо мемнам Христос гоч ойырен налын. Шке йӧратымыж дене,

⁵ шке поро кумылжо да эрыкше дене Иисус Христос гоч Тудо мемнам шке эргыже лияш ончылгоч палемден.

⁶ Тыгеже йӧратыме Эргыж гоч мыланна пӧлеклыме чапланыше порылыкшо моктымо лиеш.

⁷ Тудын гоч, Тудын Вӱржӧ дене, ме тӱлен налме улына, Юмо поян порылыкшо дене сулыкнам кудалтен.

⁸ Тиде порылыкшым Тудо чыла тӱрлӧ уш-акыл да умылымаш дене мыланна лыҥ пӧлеклен.

⁹ Христос гоч ондакак ямдылыме тайныжым Тудо поро кумылжо дене мыланна палдарен.

¹⁰ Жап тичмашлыкышкыже шумеке, Юмо тидым шукта: пылпомыштат, мланде ӱмбалнат чылажымат, Христосын кид йымакыже пуэн, уша.

¹¹ Тудын дене ушнен, ме наследник лийынна, чылам шуктышо Юмын эрыкше почеш тидлан ончылгоч палемдыме улына. Тудын эрыкше да каҥашыж почеш

¹² ме, эн ондак Христослан ӱшаннам пыштыше-влак, Юмын чапшылан моктымашым кондышо илыш дене илышаш улына.

¹³ А чын шомакым, тыланда утарымашым кондышо Поро Уверым, колмекыда да Тудлан ӱшанымекыда, Христос дене ушнымаште теат сӧрымӧ Святой Шӱлыш дене палемдыме улыда.

¹⁴ Тудо мемнан наследствынан залогшо, Тудым Юмын еҥже-влакым тӱлен налмылан пуымо, тыге Юмын чапше мокталтеш.

¹⁵ Чыла тидлан кӧра мый, Господь Иисуслан ӱшанымыда да чыла святой-влакым йӧратымыда нерген колмекем,

¹⁶ кумалмем годым тендам эре шарнем да тендан верч Юмылан чарныде таум ыштем.

¹⁷ Мемнан Господьна Иисус Христосын Юмыжо, чапланыше Ача, Тудым пален налмаште тыланда уш-акыл да почмаш шӱлышым пуыжо.

^18-19 Мом ӱшанен вучаш Юмо мемнам ӱжмым палыза, Тудын святой-влаклан пуышаш чапле наследствыже могай поян улмым умылыза да Тудын вий-куатше мемнан дене, ӱшаныше-влак дене, таҥастараш лийдыме могай кугу улмым те палыза манын, Юмо тендан шӱм шинчадам волгалтарыже. Тиде кугу вий-куатшым

²⁰ Христос гоч ончыктен, Тудым колымаш гыч ылыжтен да пылпомышто Шкенжын пурла могырышкыжо шынден.

²¹ Христосым Юмо чыла тӱҥалтыш, власть, куат да озаланымаш деч кӱшкӧ, тиде курымышто веле огыл, а шушаш курымыштат пуымо чыла лӱм деч кӱшкӧ шынден.

²² Юмо чылажымат Христосын йол йымакыже пыштен да Тудым чыла деч кӱшкӧ Черкын вуйжылан шогалтен.

²³ Черкыже Тудын Капше – чылаштат чылам тичмашым Ыштышын тичмашлыкше.