СВЯТОЙ АПОСТОЛ ПАВЕЛӸН ТИТЛӒН КОЛТЫМЫ СИРМӒШӸЖӸ 1 - У Согонь

1 ГЛАВА 1 Вӓшлимӹ шамаквлӓ. 5 Титӹн Критӹштӹ ӹштӹшӓшлык пӓшӓжӹ.

¹ Мӹнь, Павел, Йымын цоражы дӓ Иисус Христосын Апостолжы, тӹлӓт шӓлӓм колтем. Йымы айырен нӓлмӹ эдемвлӓлӓн Христослан ӹнянӓш дӓ лачокым пӓлен нӓлӓш палшаш мӹнь колтымы ылам, ти лачокшы Йымым шотеш пиштен ӹлӹмӹм шачыкта.

² Тенге нӹнӹ курымаш ӹлӹмӓшӹм уанен вычен кердӹт. Тӹдӹм Йымы сӓндӓлӹкӹм ӹштӹмӹ яктеок сӧрен, а Йымы нигынамат ак алталы.

³ Ӹшке жепӹштӹжӹ Тӹдӹ увертӓрен тымдымаш гач шамакшым пӓлдӹртен, а Йымын, мӓмнӓн Ытарышынан, шӱдӹмӹжӹ доно ти пӓшӓм мӹлӓм ӹнянен пумы.

⁴ Тит, ӹнянӹмӓшнӓ иктӹ ылешӓт, тӹнь туан эргӹм гань линӓт. Тӹлӓт Йымы Ӓтя дӓ мӓмнӓм Ытарышы Господь Иисус Христос гӹц благодать, жӓлӓйӹмӓш дӓ тыр лижӹ!

⁵ Ӹштӹшӓшлык пӓшӓнӓм мычашкы шокташ дӓ цилӓ халавлӓштӹ пресвитервлӓм мӹнь шӱдӹмем семӹнь шагалташ манын, мӹнь тӹньӹм Критеш коденӓм.

⁶ Пресвитервлӓ йӓтлӓш лидӹмӹ, ик гӓнӓ веле ӹдӹрӹм нӓлшӹ лишӓшлык ылыт. Тетявлӓштӹ Йымылан ӹнянӹшӹ лиштӹ, шотдымы кайыш дӓ шамакым колыштдымы гишӓн ӹнжӹштӹ вырсалтеп.

⁷ Йымын церкӹлӓн пӓшӓм ӹштӓш епископлан ӹнянен пумы, седӹндон тӹдӹ йӓтлӓш лидӹмӹ лишӓшлык. Тӹдӹ ӹшке шанымыжы семӹнь ӹштӹлшӹ, йӹле шӹдешкӹшӹ, ӓрӓкӓм йӱӓш яратышы, кредӓл каштшы, ӹшкӹлӓнжӹ пайдам кӹчӓлшӹ ӹнжӹ ли,

⁸ а корныгешӹвлӓлӓн палшышы, пурым яратышы, ышан-шотан, тӧр ӹштӹшӹ, Йымым шотеш пиштӹшӹ дӓ ӹшкӹмжӹм кычен мыштышы лижӹ.

⁹ Епископ тымдымашын ӹнян шамакшым пингӹдӹн кычышашлык. Тӹнӓм тӹдӹ эдемвлӓм шотан тымдымаш доно виктӓрен дӓ ваштареш шалгышывлӓн самынь шанымыштым анжыктен кердеш.

¹⁰ Вет шамак колыштдымы, такешӹм попен каштшы дӓ алталышы, айыртемӹнок пӹчмӓнвлӓ лошты, шукы.

¹¹ Нӹнӹн ышмаштым питӹрӓш келеш. Намысланыде, ӹшкӹлӓнӹштӹ пайдам нӓлӓш манын, акелӹм тымден, семнявлӓм цилӓге лыгат.

¹² Нӹнӹ логӹц иктӹжӹ, ӹшкӹмӹштӹнок пророкышты, келесен: «Соок алталышы, шӹдӹ зверь, ялахай шык мӹшкӹрвлӓ ылыт критянвлӓ».

¹³ Тӹдӹн пӓлдӹртен попымыжы лачок ылеш. Седӹндон нӹнӹлӓн пингӹдӹн пелештӹ, нӹнӹ шотан ӹнянӹмӓшӹм перегӹштӹ,

¹⁴ иудейвлӓн шанен лыкмы шамак-ямакыштым дӓ лачок гӹц карангшывлӓн шӱдӹмӹштӹм шотыш ӹнжӹштӹ нӓлеп.

¹⁵ Иревлӓлӓн цилӓ ире, а яктаралтшы дӓ ӹнянӹдӹмӹвлӓлӓн ире нимат уке, нӹнӹн ышыштат, совестьӹштӓт яктаралтыныт.

¹⁶ Нӹнӹ Йымым пӓленӓ маныт, но цилӓ пӓшӓштӹ доно Йымым пӓлӹдӹмӹштӹм анжыктат, йӹрнӹк дӓ шамак колыштдымы, нимахань пурым ӹштен мыштыдымы ылыт.