СВЯТОЙ АПОСТОЛ ПАВЕЛӸН ФИЛИППӸШТӸ ӸЛӸШӸВЛӒЛӒН КОЛТЫМЫ СИРМӒШӸЖӸ 2 - У Согонь

2 ГЛАВА 1 Икышын лимӓш. Христосын корныжы. 12 Ытаралтмаш верц цацыда. 19 Тимофей дон Епафродит.

¹ Тенгежӹ, Христос доно ушнымаш тӓмдӓм кымылангда гӹнь, Тӹдӹн яратымашыжы тӓмдӓм ладнангдара гӹнь, Шӱлӹш доно ушнымаш улы гӹнь, пуры кымыл дӓ жӓлӓйӹмӓш улы гӹнь,

² мӹньӹн сусуэм цицмӓшӹм ӹштӹдӓ: цилӓн ик семӹнь шаныда, икань яратымашан, икышын дӓ ик кымылан лидӓ.

³ Ӹшкӹлӓн пользым кӹчӓлмӹ ӓль ӹшкӹмдӓм хвальымы гишӓн нимат идӓ ӹштӹ, а иктӹ-весӹдӓм ӹшке гӹцдӓ когоракеш смирнӓн шотлыда.

⁴ Каждый ӹшке гишӓнжӹ веле агыл, а вес эдемвлӓ гишӓнӓт шытырланыжы.

⁵ Тӓмдӓн шанымашда дӓ шӱм шижмӓшдӓ Христос Иисусын ганьок лижӹ.

⁶ Тӹдӹ, Йымы цӹреӓн ылмыжы вӹлец, Йымы доно иктӧр лиӓш цацыде,

⁷ а Ӹшкӹмжӹм Ӹшке лапемден, цоран цӹрежӹм нӓлӹн, эдем гань лин, Тӹдӹм цилӓн эдем цӹреӓнӹм ужыныт.

⁸ Тӹдӹ Ӹшкӹмжӹм Ӹшке изиэш лыктын, колымыжы якте, крестеш колымы яктеӓт, шамакым колыштшы ылын.

⁹ Седӹндон Йымы Тӹдӹм кӱшкӹ лӱктӓлӹн, цилӓ лӹм гӹцӓт кӱшнӹ шалгышы лӹмӹм пуэн.

¹⁰ Тенгелӓ, пӹлгомыштышы, мӱлӓндӹштӹшӹ дӓ мӱлӓндӹ лӹвӓлнӹшӹ цилӓн Иисус лӹмеш сукалтышашлык ылыт,

¹¹ каждый йӹлмӹ, Ӓтя Йымылан лӹмлештӓрӓлтмӓшӹм кандаш манын, Иисус Христосым Господь манын пачын попышашлык.

¹² Тенгелӓ, яратымы шӱмбелвлӓэм, тӓ донда ылмем годым кыце мӹньӹм соок колыштында, ӹнде тӓ дорцда мӹндӹрнӹ ылмем годым эчеӓт утларак колыштда: лӱдӹн дӓ цӹтӹрен ӹшке ытаралтмашдам йӓмдӹлен шоктыда.

¹³ Йымы Ӹшкеок тӓ кӧргӹштӹдӓ пӓшӓм ӹштӓ, тенгежӹ тӓ Тӹдӹн пуры ирӹкшӹ доно келшӹшӹ пӓшӓм ӹштӹнедӓ дӓ ӹштедӓ.

^14-15 Локтылалтшы дӓ шӓхӓрлӓнӹшӹ роды-йых лошты тӓ йӓтлӓш лидӹмӹ, ире, Йымын вуйнаматдымы тетяжӹ лиӓш манын, цилӓок ӧпкӓлӹде дӓ коктелӓнен шаныде ӹштӹдӓ. Техень роды-йых лошты тӓ сӓндӓлӹкӹштӹ шӹдӹр семӹнь йӹлгӹжӹдӓ,

¹⁶ ӹлӹмӓш шамакым кычедӓ. Цилӓ тидӹ гишӓн Христосын кечӹнжӹ мӹнь хвален кердӓм, вет тидӹжӹ мӹньӹн такеш агыл цацымем дӓ такеш агыл пӓшӓм ӹштӹмем анжыкта.

¹⁷ Но ӹнянӹмӓшдӓ верц жертвӹм пуэн эртӓрӹмӹ служымашты вӹрем йога ыльы гӹнят, мӹнь ӹвӹртем, цилӓдӓ доно иквӓреш ӹвӹртем.

¹⁸ Тенгеок тӓӓт ӹвӹртӹдӓ, мӹнь сагаэм иквӓреш сусу лидӓ.

¹⁹ Тӓмдӓн кыце ӹлӹмӹдӓ гишӓн пӓлен нӓлӹн, мӹньӹнӓт кымылем кузыжы манын, тӓ докыда Тимофейӹм йӹле колтен кердмемлӓн Господь Иисус доно ушнен ӹнянем.

²⁰ Тӹдӹ семӹнь йӓнг вашт тӓ верцдӓ цацышы мӹньӹн иктӓт весӹ уке,

²¹ вет цилӓн Иисус Христосын пӓшӓжӹ верц агыл, а ӹшкӹмӹштӹн пӓшӓштӹ верц веле цацат.

²² А Тимофейлӓн ӹнянӓш лиэш манын, тӓ пӓледӓ: Пуры Уверлӓн тӹдӹ мӹнь донем тенге пӓшӓм ӹштен, кыце ӓтяжӹ доно эргӹ ӹштӓ.

²³ Тенгежӹ, мӹнь донем ма лишӓшлыкым пӓлен нӓлмӹкем, тӹдӹм тӹнӓмок колтен кердӓм манын ӹнянем.

²⁴ Мӹнь ӹшкежӓт шукышты агыл тӓ докыда толам манын, Господь мӹлӓнем ӹнянӹмӓшӹм пуа.

²⁵ Но Епафродитӹм, мӹнь донем иквӓреш пӓшӓлӹшӹ дӓ цацышы шӱмбелнӓм, мӹлӓнем келмӹ годым палшаш колтымы эдемдӓм, тӓ докыда колташ керӓлеш шотлем.

²⁶ Тӹдӹ тӓмдӓм цилӓдӓм пишок ужнежӹ дӓ церлӓнӹмӹжӹ гишӓн уверӹм колмыланда тыргыжлана.

²⁷ Епафродит лачокат колышаш гань церлӹ ылын, но Йымы тӹдӹм жӓлӓен, дӓ тӹдӹм веле агыл – мӹлӓнем ойхы вӹлӓн ойхы ӹнжӹ шукем манын, ӹшкӹмемӹмӓт жӓлӓен.

²⁸ Тенгежӹ тӓлӓндӓ, тӹдӹм угӹц ужмыкы, сусу лижӹ, а мӹлӓнем чӹдӹрӓк ойхы лижӹ манын, мӹнь тӹдӹм йӹлерӓк колтем.

²⁹ Тӹдӹм Господь доно ушнымашты ӹвӹртен вӓшлидӓ дӓ тӹдӹ гань эдемвлӓм жеплӹдӓ.

³⁰ Тӹдӹжӹ Христосын пӓшӓжӹ гишӓн изиш веле колыде. Махань палшыкым тӓ мӹлӓнем пуэн кердделда, тӹдӹм пуаш манын, ӹлӹмӓшӹжӹмӓт жӓлӓйӹде.