Мк 1 - У Согонь

1 ГЛАВА 1 Крестӹшӹ Иоанн. 9 Иисусым крестӹмӓш дӓ тергӹмӓш. 14 Пӹтӓриш тыменьшӹвлӓжӹ. 21 Капернаумыштышы синагогышты. 29 Иисус шукы эдемӹм паремдӓ. 35 Иисус Галилейӹштӹ увертӓрен тымда. 40 Проказа церӓнӹм паремдӹмӓш.

¹ Йымын Эргӹ Иисус Христосын Евангелижӹн тӹнгӓлтӹшӹжӹ.

² Пророквлӓн книгӓвлӓштӹ тенге сирӹмӹ: «Теве Тӹнь гӹцет анзыц Мӹнь ӹшкӹмемӹн Ангелем колтем, тӹдӹ Тӹлӓт корным йӓмдӹлӓ.

³ Пустыньышты саслышын юкшы шакта: ”Господьлан корным йӓмдӹлӹдӓ! Тӹдӹн ялгорныжым тӧрӹм ӹштӹдӓ!”»

⁴ Иоанн толын. Тӹдӹ эдемвлӓм пустыньышты крестен дӓ, сулыкышты простялтышты манын, сулык гӹц карангаш крестӓлтӓш тымден.

⁵ Тӹдӹн докы улы Иудей мӱлӓндӹ дӓ Иерусалимӹштӹшӹ халык толыныт. Нӹнӹ ӹшке сулыкышты гишӓн йӓнгӹм пачын попенӹт. Иоанн цилӓштӹм Иордан рекӓэш крестен.

⁶ Иоанн верблюд миж гӹц выргемӹм чиэн каштын. Кӹдӓлӹштӹжӹ шӹштӹ ӹштӹ ылын, тӹдӹ ныр цӹрцӹкӹм дӓ хир мӱкшӹн мӱжӹм качкын ӹлен.

⁷ Иоанн тенге увертӓрен: «Паштекем мӹнь гӹцем Силанрак толеш. Мӹнь, пӱгӹнен, Тӹдӹн ялеш чимӹ хӓдӹржӹн кӓндӹрӓжӹмӓт шӱтӓш ам яры.

⁸ Мӹнь тӓмдӓм вӹд доно крестем, а Тӹдӹ тӓмдӓм Святой Шӱлӹш доно крестӓш тӹнгӓлеш».

⁹ Тӹ жепӹн Галилейӹштӹшӹ Назарет хала гӹц Иисус толын дӓ Иоаннлан Ӹшкӹмжӹм Иордан рекӓэш крестӹктен.

¹⁰ Вӹд гӹц лӓкмӹжӹ годым Иисус пачылтшы пӹлгомым дӓ вӹкӹжӹ кӓдӹ гань валышы Святой Шӱлӹшӹм ужын.

¹¹ Пӹлгом гӹц юк шактен: «Тӹнь Мӹньӹн яратымы Эргем ылат, Тӹнь вӹлнет Мӹньӹн пуры кымылем!»

¹² Тидӹн паштек тӧрӧк Святой Шӱлӹш Иисусым пустыньыш колтен.

¹³ Тӹштӹ, пустыньышты, Тӹдӹ нӹллӹ кечӹ ылын, дӓ сатана Тӹдӹм терген. Иисус зверьвлӓ лошты ӹлен, Тӹдӹлӓн Ангелвлӓ служенӹт.

¹⁴ Иоанным кычен питӹрӹмӹкӹ, Иисус Галилейӹш толын дӓ Йымын Кугижӓншӹн Пуры Увержӹм шӓрен.

¹⁵ Тӹдӹ попен: «Жеп шон, Йымын Кугижӓншӹ ӹнде лишемӹн. Сулык гӹц карангын, Йымы докы мелӹн сӓрнӓлдӓ дӓ Евангелилӓн ӹнянӹдӓ!»

¹⁶ Галилей тангыж сир доно каштмыжы годым Иисус вӹдӹшкӹ вӓпшӹм кӹшкӹшӹ Симон дӓ тӹдӹн Андрей шоляжым ужын. Нӹнӹ коллоэц ылыныт.

¹⁷ Нӹнӹлӓн Иисус келесен: «Паштекем кедӓ, Мӹнь тӓмдӓм эдем лошым ӹштем!»

¹⁸ Нӹнӹ тӹнӓмок вӓпшвлӓштӹм коденӹт дӓ Тӹдӹн паштек кенӹт.

¹⁹ Пакырак кемӹкӹ, Иисус Зеведейӹн Иаков дон Иоанн эргӹвлӓжӹм ужын. Нӹнӹ пышышты шӹнзенӹт дӓ вӓпшвлӓм тумыштенӹт.

²⁰ Иисус нӹнӹмӓт тӧрӧк ӱжӹн. Нӹнӹ, тӓрлӹмӹ пӓшӓзӹвлӓ дон Зеведей ӓтяштӹм пышеш коден, Тӹдӹн паштек кенӹт.

²¹ Иисус тыменьшӹвлӓжӹ доно Капернаумыш толын. Пӹтӓриш кукшыгечӹнок синагогыш толын дӓ тымден.

²² Тымдымыжылан цилӓн ӧрӹнӹт. Тӹдӹ нӹнӹм закон тымдышывлӓ семӹнь агыл, а властян ылшы семӹнь тымден.

²³ Тӹнӓмок тӹштӹшӹ синагогышты худа шӱлӹш доно мутьымы эдем ылын. Тӹдӹ сӹгӹрӓл колтен:

²⁴ «Назарет гӹц Иисус, Тӹнь мам мӓ донна ӹштӹнет? Тӹнь мӓмнӓм пӹтӓрӓш толынат? Тӹнь кӱ ылметӹм мӹнь пӓлем, Тӹнь Йымын Святойжы ылат!»

²⁵ Но Иисус худа шӱлӹшлӓн цӓрен келесен: «Шӹп ли! Тӹдӹн кӧргӹжӹ гӹц лӓк!»

²⁶ Худа шӱлӹш тӹ эдемӹм цӹтӹрӹктен дӓ, когон сӹгӹрӓлӹн, тӹдӹн кӧргӹжӹ гӹц лӓктӹн.

²⁷ Цилӓн когон лӱдӹнӹт дӓ иктӹ-весӹштӹ гӹц ядыштыныт: «Ма тидӹ? Тидӹ махань у тымдымаш? Ти Эдем худа шӱлӹшвлӓлӓнӓт власть доно шӱдӓ, а нӹнӹжӹ Тӹдӹм колыштыт».

²⁸ Иисус гишӓн шамак цилӓ Галилей мычкы йӹле шӓрлен.

²⁹ Синагог гӹц лӓктӹн, тӹнӓмок нӹнӹ Иаков дӓ Иоанн доно иквӓреш Симон дон Андрейӹн пӧртӹшкӹ кенӹт.

³⁰ Симонын кувыжы шокшымыж доно церлӹ киэн. Тӹдӹ гишӓн тӧрӧк Иисуслан келесенӹт.

³¹ Иисус тӹдӹн докы толын, кидшӹм кычен дӓ кӹньӹлӓш палшен. Шокшымыж тӹнӓмок пӹтен, дӓ кувы хынавлӓм анжаш тӹнгӓлӹн.

³² Вадеш, кечӹ шӹцмӹ годым, Иисус докы церлӹвлӓм дӓ иӓ мутьымывлӓм цилӓштӹмӓт канденӹт.

³³ Амаса анзылны цилӓ хала погынен.

³⁴ Иисус сакой йиш цер доно ясыланышывлӓм шукым паремден. Тӹдӹ шукы иӓм поктен лыктын, но нӹнӹлӓн попаш шӱдӹде, вет Тӹдӹн Христос ылмыжым нӹнӹ пӓленӹт.

³⁵ Иисус ирок когон ирӹ кӹньӹлӹн, лӓктӹн, йӓрӓ вӓрӹш кен дӓ тӹштӹ ыдылын.

³⁶ Симон дӓ тӹдӹн доно иквӓреш лишӹвлӓ Иисус паштек кӹчӓл кенӹт.

³⁷ Тӹдӹм момыкы, келесенӹт: «Цилӓн Тӹньӹм кӹчӓлӹт».

³⁸ Иисус нӹнӹлӓн келесен: «Ӓлдӓ вес лишӹл солавлӓшкӹ дӓ халавлӓшкӹ кенӓ. Мӹлӓнем тӹштӓт увертӓрен тымдаш келеш. Тидӹлӓнок Мӹнь толынам».

³⁹ Тӹдӹ цилӓ Галилей мычкы каштын, синагогвлӓштӹ увертӓрен тымден, иӓвлӓм поктен лыктын.

⁴⁰ Иисус докы проказа церӓн эдем толын. Тӹдӹн анзылан сукалтен вазын дӓ сарвален ядын: «Паремдӹнет гӹнь, мӹньӹм ирӹктен кердӓт».

⁴¹ Иисус тӹдӹм ӹжӓлӓен. Кидшӹм виктӓлтен, тӹдӹм тӹкӓлӹн дӓ келесен: «Паремдӹнем, ирӹктӓлт!»

⁴² Иисус тенге келесӹмӹкӹ, тӹ эдемӹн проказа цержӹ тӹнӓмок пӹтен, тӹдӹ иреэмӹн.

⁴³ Тӹ эдемӹм Иисус тӧрӧк поктен колтен, но тишец анзыц тӹдӹлӓн пингӹдӹн келесен:

⁴⁴ «Анжы, тидӹ гишӓн иктӹлӓнӓт нимамат ит попы. Ке дӓ ӹшкӹметӹм священниклӓн анжыкты. Иреэммет лӹмеш Моисейӹн шӱдӹмӹ жертвӹм нӓнге. Тидӹн доно тӹнь паремметӹм анжыктет».

⁴⁵ Но тӹдӹ кен дӓ ма лимӹ гишӓн цилӓлӓн шайышташ тӹнгӓлӹн. Седӹндон эдемвлӓ анзыкы Иисус халашкы пырен кердде. Тӹдӹ халавлӓ гӹц ӧрдӹжӹштӹ, йӓрӓ вӓрвлӓштӹ ылын. Иисус докы халык цилӓ вӓрвлӓ гӹц толын.