Мф 1 - У Согонь

1 ГЛАВА 1 Иисус Христосын йыхшы. 18 Иисус Христосын шачмыжы.

¹ Авраам йых Эргӹн, Давид йых Эргӹн Иисус Христосын роды важшы:

² Авраам гӹц Исаак шачын, Исаак гӹц Иаков, Иаков гӹц Иуда дон шӱмбелвлӓжӹ шачыныт,

³ Иуда гӹц Фарес дон Зара шачыныт – нӹнӹн ӓвӓштӹ Фамарь ылын, Фарес гӹц Есром шачын, Есром гӹц Арам,

⁴ Арам гӹц Аминадав, Аминадав гӹц Наассон, Наассон гӹц Салмон,

⁵ Салмон гӹц Вооз шачын – ӓвӓжӹ Рахав ылын, Вооз гӹц Овид шачын – ӓвӓжӹ Руфь ылын, Овид гӹц Иессей шачын,

⁶ Иессей гӹц Давид кугижӓ шачын. Давид кугижӓ гӹц Соломон шачын – ӓвӓжӹ Урийӹн вӓтӹжӹ ылын,

⁷ Соломон гӹц Ровоам шачын, Ровоам гӹц Авий, Авий гӹц Аса,

⁸ Аса гӹц Иосафат, Иосафат гӹц Иорам шачын, Иорам гӹц Озий,

⁹ Озий гӹц Иоафам, Иоафам гӹц Ахаз, Ахаз гӹц Езекий шачын,

¹⁰ Езекий гӹц Манассий, Манассий гӹц Амон, Амон гӹц Иосий,

¹¹ Иосий гӹц Иоаким шачын, Иоаким гӹц Иехоний дӓ тӹдӹн шӱмбелвлӓжӹ шачыныт. Тидӹжӹ халыкым Вавилоныш ваштымы годым ылын.

¹² Вавилоныш нӓнгемӹкӹ, Иехоний гӹц Салафиил шачын, Салафиил гӹц Зоровавель,

¹³ Зоровавель гӹц Авиуд, Авиуд гӹц Елиаким шачын, Елиаким гӹц Азор,

¹⁴ Азор гӹц Садок, Садок гӹц Ахим, Ахим гӹц Елиуд шачын,

¹⁵ Елиуд гӹц Елеазар, Елеазар гӹц Матфан, Матфан гӹц Иаков шачын,

¹⁶ Иаков гӹц Иосиф, Мариян марыжы, шачын, а Мария гӹц Христос манмы Иисус шачын.

¹⁷ Тенге, Авраам гӹц тӹнгӓлӹн, Давид якте цилӓжӹ луатнӹл ежӹнг. Давид гӹц тӹнгӓлӹн, Вавилоныш ваштымешкӹ, луатнӹл ежӹнг. Вавилоныш ваштымы гӹц тӹнгӓлӹн, Христос якте луатнӹл ежӹнг.

¹⁸ Иисус Христосын шачмыжы тенге ылын: Тӹдӹн Мария Ӓвӓжӹ Иосифлӓн сӧрӹмӹ ылын. Ушнымешкӹштӹ, Мариян Святой Шӱлӹш гӹц нелеммӹжӹ пӓлӹ лин.

¹⁹ Мариям марлан нӓлшӓшлык Иосиф, пуры дӓ тӧр ӹштӹшӹ эдем ылынат, Ӹдӹрӹм намысыш пырташ агыл манын, Тӹдӹм йӹвӹрт колтынежӹ ылын.

²⁰ Но кынам тидӹ гишӓн шанен, Господьын Ангелжӹ тӹдӹлӓн омынешӹжӹ кайын дӓ келесен: «Иосиф, Давид шачышын эргӹжӹ, тӹлӓт сӧрӹмӹ Мариям ӹшке докет нӓлӓш ит лӱд. Тӹдӹн кӧргӹштӹ ӹлянӹшӹжӹ Святой Шӱлӹш гӹц ылеш.

²¹ Мария Эргӹм ӹштӓ, дӓ Тӹдӹлӓн Иисус лӹмӹм пуэт, вет Тӹдӹ ӹшке халыкшым сулыквлӓжӹ гӹц ытара».

²² Господьын пророк гач келесӹмӹжӹ шокталтшы манын, цилӓ тидӹ лиӓлтӹн. Пророк попен:

²³ «Теве Ӹдӹр мӹшкӹрӓн лиэш дӓ Эргӹм ӹштӓ, дӓ Тӹдӹлӓн Еммануил лӹмӹм пуат». Ти лӹмжӹ «Йымы мӓ сагана» манмым анжыкта.

²⁴ Амален кӹньӹлмӹкӹжӹ, Иосиф Господьын Ангелжӹ шӱдӹмӹ семӹнь цилӓ ӹштен: Мариям ӹшке докыжы нӓлӹн,

²⁵ но Мария Пӹтӓриш Тетяжӹм, Эргӹм, ӹштӹмешкӹ, Тӹдӹм пӓлӹде. Эргӹжӹлӓн Иисус лӹмӹм пуэн.