Ин 1 - У Согонь

1 ГЛАВА 1 Шамак кӓпӓнгӹн. 19 Крестӹшӹ Иоаннын Иисус гишӓн келесӹмӹжӹ. 35 Иисусын сек пӹтӓриш тыменьшӹвлӓжӹ. 43 Иисус Филипп дон Нафанаилӹм ӱжеш.

¹ Тӹнгӓлтӹшӹштӹ Шамак ылын. Шамак Йымы доно ылын, дӓ Шамак Йымы ылын.

² Тӹнгӓлтӹшӹшток Тӹдӹ Йымы доны ылын.

³ Ма ӹштӓлтӹн, цилӓ Тӹдӹн гач лин, Тӹдӹн гӹц пасна нимат ӹштӓлтде.

⁴ Тӹдӹн кӧргӹштӹжӹ ӹлӹмӓш ылын, а ӹлӹмӓш – эдемвлӓлӓн соты.

⁵ Соты пӹцкемӹшӹштӹ валгалтеш дӓ тӹдӹм пӹцкемӹш леведде.

⁶ Теве Йымы эдемӹм колтен, тӹдӹн лӹмжӹ Иоанн.

⁷ Цилӓн Соты гишӓн уверӹм колышты дӓ ӹнянӹштӹ манын, Иоанн Соты гишӓн пӓлдӹртӓш толын.

⁸ Ӹшкежӹ тӹдӹ Соты ылде, Сотым пӓлдӹртӓш колтымы ылын.

⁹ Но лачок Соты ылын. Тӹдӹ сӓндӓлӹкӹш толшы цилӓ эдемӹмӓт сотемдӓрӓ.

¹⁰ Сӓндӓлӹкӹштӹ Тӹдӹ ылын, сӓндӓлӹк Тӹдӹн гач ӹштӓлтӹн, но сӓндӓлӹк Тӹдӹм пӓлӹде.

¹¹ Тӹдӹ ӹшкӹмӹнвлӓжӹ докы толын, но ӹшкӹмӹнвлӓжӹ Тӹдӹм пурын вӓшлиделыт.

¹² А кӱвлӓ Тӹдӹм пурын вӓшлинӹт дӓ Тӹдӹн лӹмжӹлӓн ӹняненӹт, нӹнӹлӓн Йымын тетяжӹ лиӓш властьым пуэн.

¹³ Нӹнӹ вӹр гӹц агыл, кӓп кымыл гӹц агыл, пӱэргӹ кымыл гӹц агыл, а Йымы гӹц шачыныт.

¹⁴ Шамак кӓпӓнгӹн дӓ мӓ лоштына ӹлен. Мӓ Тӹдӹн лӹмлештӓрӓлтмӹжӹм, Ӓтян Ик Ӹшкет Эргӹжӹн гань лӹмлештӓрӓлтмӹжӹм ужынна. Тӹдӹ пуры дӓ лачок доно темӹн ылын.

¹⁵ Иоанн, Тӹдӹ гишӓн пӓлдӹртен, чӹнь попен: «Мӹнь попенӓм: мӹнь паштекем Толшы мӹнь анзылнем ли, вет Тӹдӹ мӹнь гӹцем андак ылын. Тидӹ – Тӹдӹ».

¹⁶ Тӹдӹн цицмӓш пурылыкшы гӹц мӓ цилӓн пуры вӹлӓн пурым нӓлӹннӓ:

¹⁷ закон Моисей гач пуалтын, а пуры дон лачок Иисус Христос гач толыныт.

¹⁸ Йымым иктӓт нигынамат ужде, Ӓтян кӧргӹштӹ ылшы Ик Ӹшкет Эргӹ Тӹдӹм пӓлдӓрен.

¹⁹ Иоаннын пӓлдӹртӹмӹжӹ теве техень. Иудейвлӓ тӹдӹ гӹц кӱ ылат манын ядаш Иерусалим гӹц священниквлӓм дӓ Левий йых гӹц эдемвлӓм колтенӹт.

²⁰ Тӹдӹ, нимат шӹлтӹде, тӧрӧк келесен, мӹнь Христос ам ыл манын увертӓрен.

²¹ Нӹнӹ ядыныт: «Тӹнь ӹне кӱ ылат? Тӹнь Илия ылат?» «Агыл», – тӹдӹ манын. «Тӹнь тӹ пророк ылат?» «Агыл», – келесен тӹдӹ.

²² Нӹнӹ попенӹт: «Тӹнь кӱ ылат? Мӓмнӓм ядаш колтышывлӓлӓн вӓшештӹшӓшлык ылына. Тӹнь ӹшке гишӓнет мам келесет?»

²³ Иоанн пророк Исаиян шамакшы доно келесен: «Господьлан корным тӧрӹм ӹштӹдӓ манын, пустыньышты саслышын юкшы ылам».

²⁴ А колтымы эдемвлӓжӹ фарисейвлӓ логӹц ылыныт.

²⁵ Нӹнӹ Иоанн гӹц ядыныт: «Тӹнь Христосат, Илияат, тӹ пророкат ат ыл гӹнь, малын эдемвлӓм крестет?»

²⁶ Иоанн келесен: «Мӹнь вӹд доно крестем, но тӓ лоштыда Весӹ улы – тӓ Тӹдӹм ада пӓлӹ,

²⁷ Тидӹ Тӹдӹ, кӱ мӹнь паштекем толеш дӓ мӹнь анзылнем лин, мӹнь Тӹдӹн ялеш чимӹ хӓдӹржӹн кӓндӹрӓжӹмӓт шӱтӓш ам яры».

²⁸ Тидӹ цилӓ Вифаварышты, Иордан рекӓ вес велнӹ, ылын. Тӹштӹ Иоанн халыкым крестен.

²⁹ Вес кечӹн тӹдӹн докы толшы Иисусым Иоанн ужын дӓ попен: «Теве Йымын Патяжы, Тӹдӹ сӓндӓлӹкӹн сулыкшым Ӹшке вӹкӹжӹ нӓлеш!

³⁰ Мӹнь паштекем толшы Эдем мӹнь гӹцем андак ылын, седӹндон Тӹдӹ мӹнь анзылнем манын, кӱ гишӓн мӹнь попенӓм, тидӹ – Тӹдӹ ылеш.

³¹ Кӱ Тӹдӹ, мӹнь ӹшкеӓт пӓлӹделам, но Израильлӓн пӓлӹмӹ лижӹ манын, мӹнь вӹд доно крестӓш толынам».

³² Иоанн ужмыжы гишӓн пыт попен: «Пӹлгом гӹц кӓдӹ гань Шӱлӹш валымым дӓ Тӹдӹн доно кодмым мӹнь ужым.

³³ Кӱ Тӹдӹ, мӹнь ӹшкеӓт пӓлӹделам, но мӹньӹм вӹд доно крестӓш Колтышы келесӹш: ”Шӱлӹш кӱн вӹкӹ валымым дӓ кӱ доран кодмым ужат, Тӹдӹ Святой Шӱлӹш доно крестӹшӹ ылеш”.

³⁴ Мӹнь тидӹм ужынам дӓ попенӓм: Тӹдӹ – Йымын Эргӹ».

³⁵ Вес кечӹн Иоанн угӹц тӹшток шалген, тӹдӹн сагажы кок тыменьшӹжӹ ылыныт.

³⁶ Тӹшток кешӹ Иисусым ужмыкы, Иоанн келесен: «Теве Йымын Патяжы!»

³⁷ Тидӹм колмыкы, Иоаннын кок тыменьшӹжӹ Иисус паштек кенӹт.

³⁸ Иисусшы, сӓрнӓлӹн, паштекшӹ кемӹштӹм ужын дӓ манын: «Тӓлӓндӓ ма келеш?» Нӹнӹ ядыныт: «Равви, кышты Тӹнь ӹлет?» «Равви» шамакшы «тымдышы» манмы лиэш.

³⁹ Тӹдӹ нӹнӹлӓн келесен: «Анжалаш толда». Жеп лу цӓш нӓрӹ ылын. Нӹнӹ Тӹдӹ сага кенӹт, кышты ӹлӹмӹжӹм ужыныт дӓ кечӹ мыч Тӹдӹн доны ылыныт.

⁴⁰ Иоаннын попымыжым колшы дӓ Иисус паштек кешӹ кокты гӹц иктӹжӹ Симон-Петрӹн Андрей шоляжы ылын.

⁴¹ Тӹдӹ сек анзыц Симон ӹзӓжӹм кӹчӓл мон дӓ тӹдӹлӓн келесен: «Мӓ Мессийӹм монна». «Мессий» шамакшы Христос манмы лиеш.

⁴² Вара тӹдӹм Иисус докы канден. Иисус вӹкӹжӹ анжалын дӓ келесен: «Тӹнь Ионан Симон эргӹжӹ ылат. Но тӹньӹм Кифа манаш тӹнгӓлӹт». Ти лӹмжӹ Петр, вес семӹньжӹ «кӱ» манмым анжыкта.

⁴³ Вес кечӹн Иисус Галилейӹш кеӓш шанен. Тӹдӹ Филиппӹм вӓшлин дӓ келесен: «Мӹнь паштекем ке!»

⁴⁴ Филипп Вифсаида хала гӹц ылын, кышец Андрей дон Петрӓт ылыныт.

⁴⁵ Филиппшӹ Нафанаилӹм мон дӓ тӹдӹлӓн келесен: «Кӱ гишӓн Моисей законеш сирен дӓ кӱ гишӓн пророквлӓӓт сиренӹт, мӓ Тӹдӹм монна. Тидӹ Назарет гӹц Иисус, Иосифӹн эргӹжӹ».

⁴⁶ Нафанаил тӹдӹлӓн попен: «Назарет гӹц иктӓ-ма пуры лин кердеш ма?» Филипп тӹдӹлӓн келесен: «Тол дӓ анжы».

⁴⁷ Иисус, Ӹшке докыжы лишемшӹ Нафанаилӹм ужмыкы, тӹдӹ гишӓн келесен: «Теве тидӹ лачокшы Израиль эдем, тӹдӹн нимахань алталымашыжат уке».

⁴⁸ Нафанаил ядын: «Тӹнь мӹньӹм кышец пӓлет?» Иисус тӹдӹлӓн манын: «Филипп тӹньӹм ӱжмешкок Мӹнь тӹньӹм смоква пушӓнгӹ лӹвӓлнӹ ужынам ыльы».

⁴⁹ Нафанаил келесен: «Равви, Тӹнь Йымын Эргӹ ылат, Тӹнь Израильӹн Кугижӓжӹ ылат!»

⁵⁰ Иисус тӹдӹлӓн попен: «Тӹньӹм смоква пушӓнгӹ лӹвӓлнӹ ужынам манын келесенӓмӓт, седӹндон ӹнянет. Тӹнь тишец когоракымат ужаш тӹнгӓлӓт».

⁵¹ Иисус попен: «Лачок, лачок тӓлӓндӓ попем: тӹлец вара пачылтшы пӹлгомым дӓ Йымын Ангелвлӓн Эдем Эргӹ докы валымыштым дӓ кузымыштым ужыда лиэш».