СВЯТОЙ АПОСТОЛ ПАВЕЛӸН ЕВРЕЙВЛӒЛӒН КОЛТЫМЫ СИРМӒШӸЖӸ 1 - У Согонь

1 ГЛАВА 1 Йымы эргӹжӹ гач попа. 5 Йымын эргӹжӹ Ангелвлӓ гӹц кӱшнӹ ылеш.

¹ Перви шукы гӓнӓ дӓ шукы статян пророквлӓ гач ӓтявлӓлӓн попышы Йымы

² ти остатка кечӹвлӓн мӓлӓннӓ Эргӹжӹ гач попен. Эргӹжӹм Йымы цилӓ ма ылмын наследникеш шагалтен, Тӹдӹ гачок курымвлӓм ӹштен.

³ Эргӹ Тӹдӹн лӹмлештӓрӓлтмӹжӹн валгалтмыжы, махань ылмыжын цицмӓш сӹнжӹ ылеш дӓ цилӓок силан шамакшы доно кыча. Ӹшкежӹ доно мӓмнӓм сулык гӹц ирӹктӹмӓшӹм эртӓрӹмӹкӹ, пӹлгом кӱкшӹцӹштӹ Эргӹ Пиш Кого Ылшын [престолжын] вургымла монгырешӹжӹ шӹнзӹн.

⁴ Нӓлмӹ лӹмжӹ Ангелвлӓн лӹмӹштӹ гӹц маняреш кӱшнӹ ылеш, тӹнӓреш Тӹдӹ нӹнӹ гӹц кого лин.

⁵ Ангелвлӓ логӹц кӱлӓн кынам Йымы келесен: «Тӹнь Мӹньӹн Эргем ылат, Мӹнь Тӹньӹм тагачы шачыктенӓм»? Дӓ эче: «Мӹнь Тӹдӹлӓн Ӓтя лиӓм, а Тӹдӹ Мӹлӓнем Эргӹ лиэш»?

⁶ Тенгеок Пӹтӓриш Шачшыжым сӓндӓлӹкӹш пыртымыжы годым манын: «Тӹдӹлӓн Йымын цилӓ Ангелжӹ кымалжы».

⁷ Ангелвлӓ гишӓн келесӓ: «Ангелвлӓжӹм шӱлӹшӹм ӹштӓ, служышывлӓжӹм – тыл салымым».

⁸ А Эргӹжӹ гишӓн: «Йымы, Тӹньӹн престолет курым-курымаш, Тӹньӹн кугижӓншетӹн скипетржӹ – тӧр ӹштӹмӓшӹн скипетржӹ.

⁹ Тӹнь тӧр ӹштӹмӹм яратенӓт, законде ӹштӹмӹм ужын керддӹмӹ линӓт. Седӹндон, Йымы, Тӹньӹм Йымет ӹвӹртӹмӓш ӱ доно сагаэт ылшывлӓ гӹц утларак шӹрен».

¹⁰ Эче попен: «Тӹнь, Господь, пӹтӓри мӱлӓндӹлӓн негӹцӹм ӹштенӓт, пӹлгомат – Тӹньӹн кидетӹн пӓшӓжӹ.

¹¹ Нӹнӹ ямыт, Тӹньжӹ соок ылат. Цилӓок выргем семӹнь тоштемеш,

¹² выргем семӹнь нӹнӹм вӹдӹл пиштет, дӓ нӹнӹ вашталтыт. Но Тӹнь со техеньок кодат, ӹлӹшӓшлык кечет ак пӹтӹ».

¹³ Ангелвлӓ логӹц кӱлӓн кынам Йымы келесен: «Тӹньӹн тышманвлӓэтӹм ял лӹвӓкет пиштӹмешкем, Мӹньӹн вургымла велнем шӹнзӹ»?

¹⁴ Цилӓ Ангел служышы шӱлӹш агыл ма? Ытарымашым нӓлшӓшлыквлӓлӓн палшаш нӹнӹм Йымы колтыде ма?