Еф 1 - У Согонь

1 ГЛАВА 1 Вӓшлимӹ шамаквлӓ. 3 Христос гач эргӹлыкеш нӓлмӓш. 15 Лыдшывлӓ пӓлӹмӓшӹм нӓлӹштӹ манын ыдылмаш.

¹ Йымын ирӹкшӹ семӹнь Иисус Христосын Апостолжы ылшы Павел гӹц Ефесӹштӹ ӹлӹшӹ дӓ Христос Иисус доно ушнен шалгымашты ӹнян святойвлӓлӓн.

² Мӓмнӓн Йымы Ӓтянӓ гӹц дӓ Господь Иисус Христос гӹц тӓлӓндӓ благодать дӓ тыр лижӹ.

³ Мӓмнӓн Господьна Иисус Христосын Йымыжы дӓ Ӓтяжӹ хвальымы лижӹ! Тӹдӹ пӹлгомыштышы сӓндӓлӹквлӓштӹ Шӱлӹшӹн улы благословайымыжы доно Христос гач мӓмнӓм благословаен.

⁴ Ӹшке анзылныжы мӓлӓннӓ святой лиӓш дӓ нимахань ситӹдӹмӓш гӹц пасна яратен ӹлӓш манын, сӓндӓлӹкӹм ӹштӹмешкок Тӹдӹ мӓмнӓм Христос гач айырен нӓлӹн.

⁵ Ӹшке пуры кымылжы дӓ ирӹкшӹ доно Иисус Христос гач Тӹдӹ мӓмнӓм ӹшке эргӹжӹ лиӓш пуйырен.

⁶ Тенгежӹ яратымы Эргӹжӹ гач мӓлӓннӓ подарымы лӹмлештӓрӓлтшӹ благодатьшы хвальымы лиэш.

⁷ Тӹдӹ гач, Тӹдӹн Вӹржӹ доно, мӓ ытарымы ылына, Йымы паян благодатьшы доно сулыкнам простен.

⁸ Ти благодатьшым Тӹдӹ цилӓ йиш кого ыш дӓ ынгылымаш доно мӓлӓннӓ пиш шукым пуэн.

⁹ Христос гач пӹтӓриок ӹштӓш шанымы ӹшке ирӹкшӹн тайныжым Тӹдӹ пуры кымылжы доно мӓлӓннӓ пӓлдӓрен.

¹⁰ Жеп цицмӓш шомыкы, Йымы тидӹм ӹштӓ, пӹлгомыштат, мӱлӓндӹ вӹлнӓт цилӓжӹмӓт, Христосын кид лӹвӓкӹжӹ пуэн, уша.

¹¹ Христос доно ушнен, мӓ наследник линнӓ, цилӓ ӹштен шоктышы Йымын ирӹкшӹ семӹнь тидӹлӓн анзыцок пӓлемдӹмӹ ылына. Тӹдӹн ирӹкшӹ дӓ шанымыжы семӹнь

¹² мӓ, сек пӹтӓриок Христослан уанаш тӹнгӓлшӹвлӓ, Йымын лӹмлештӓрӓлтмӹжӹлӓн хвальымашым кандышы ӹлӹмӓш доно ӹлӹшӓшлык ылына.

¹³ А лачокын шамакым, тӓлӓндӓ ытарымашым кандышы Пуры Уверӹм, колмыкыда дӓ Христослан ӹнянӹмӹкӹдӓ, Тӹдӹн доно ушнымашты тӓӓт сӧрӹмӹ Святой Шӱлӹш доно пӓлемдӹмӹ ылыда.

¹⁴ Тӹдӹ мӓмнӓн наследствынан залогшы, Тӹдӹм Йымын эдемвлӓжӹм ытараш пумы, тенге Йымын лӹмлештӓрӓлтмӹжӹ хвалялтеш.

¹⁵ Цилӓ тидӹ гишӓн мӹнь, Христос Иисуслан ӹнянӹмӹдӓ дӓ цилӓ святойвлӓм яратымыда гишӓн колмыкем,

¹⁶ ыдылмем годым тӓмдӓм соок ӓшӹндӓрем дӓ тӓ верцдӓ Йымылан цӓрнӹде таум ӹштем.

¹⁷ Мӓмнӓн Господьна Иисус Христосын Йымыжы, лӹмлештӓрӓлтшӹ Ӓтя, Тӹдӹм пӓлен нӓлӓшдӓ тӓлӓндӓ кого ыш дӓ пачмаш шӱлӹшӹм пужы.

^18-19 Мам уанен вычаш Йымын мӓмнӓм ӱжмӹм пӓлӹдӓ, махань пайдаан дӓ пиш яжо наследим Тӹдӹ святойвлӓжӹлӓн пуа, ынгылыда манын, дӓ Тӹдӹн кого силажы мӓмнӓн, Йымын мычашдымы силажын ӹштӹмӹжӹ доно ӹнянӹшӹвлӓн, кӧргӹштӹнӓ махань кого ылмым пӓлӹдӓ манын, тӓмдӓн йӓнг сӹнзӓвлӓдӓм пачшы.

²⁰ Силажым Христос вӹлнӹ анжыктен, Тӹдӹм колышывлӓ логӹц ӹлӹжтен кӹньӹлтен дӓ пӹлгомыштышы сӓндӓлӹквлӓштӹ Ӹшкежӹ гӹц вургымла монгыреш шӹнден.

²¹ Цилӓ Начальство, Власть, Сила, Хозаланымаш гӹц дӓ ти курымышты веле агыл, а анзыкылашы курымыштат сакой пумы лӹм гӹц Йымы Тӹдӹм кӱшкӹ шӹнден.

²² Христосын ял лӹвӓкӹжӹ Йымы цилӓ пиштен, дӓ Тӹдӹм цилӓ гӹц кӱшкӹ, Церкӹн вуйжылан шагалтен.

²³ Церкӹ – Тӹдӹн Кӓпшӹ, цилӓштӓт цилӓм Циц ӹштӹшӹн цицмӓшӹжӹ.