Ап.пӓш 1 - У Согонь

1 ГЛАВА 1 Анзыл шамак. 6 Иисусын пӹлгомыш кузен кемӹжӹ. 12 Иуда вӓреш вес Апостолым айырымаш.

^1-3 Пуры Феофил, орланен колымыжы паштек Иисус живой ылмыжым айырен нӓлмӹ Апостолвлӓжӹлӓн шукы семӹнь ӹняндӓрен анжыктен, нӹллӹ кечӹ нӹнӹлӓн кайын дӓ Йымын Кугижӓншӹ гишӓн шайыштын. Нӹнӹлӓн Святой Шӱлӹш гач шӱдӹмӓшӹжӹм кодымыкы, Иисус пӹлгомыш кузен кен. Тӹнгӓлтӹш гӹцок ти кечӹ якте мам ӹштӹмӹжӹ дӓ мам тымдымыжы гишӓн цилӓ пӹтӓришӹ книгӓштӹ сиренӓм.

⁴ Кынам Иисус Апостолвлӓ доно иквӓреш погынен, нӹнӹлӓн шӱден: «Иерусалим гӹц идӓ ке, Ӓтян сӧрӹмӹжӹн шокталтмым вычыда. Ти сӧрӹмӹ гишӓн тӓ Мӹнь гӹцем колында.

⁵ Вет Иоанн вӹд доно крестен, а тӹлец вара икманяр кечӹштӹ тӓ Святой Шӱлӹш доно крестӹмӹ лидӓ».

⁶ Тенге, иквӓреш ылмышты годым Апостолвлӓ Иисус гӹц ядыныт: «Господь, ти жепӹн ма Израиль кугижӓншӹм угӹц ӹштет?»

⁷ Иисус нӹнӹлӓн келесен: «Ӓтян ӹшке властьшы доно пӓлемдӹмӹ жеп дон кечӹм тӓлӓндӓ пӓлӓш ак кел,

⁸ но кынам тӓ вӹкӹдӓ Святой Шӱлӹш вала, тӓ силам нӓлӹдӓ дӓ Иерусалимӹштӓт, улы Иудей дӓ Самари мычкат, мӱлӓндӹ тӹр яктеӓт Мӹньӹн свидетелем лидӓ».

⁹ Тенге манмыкы, Апостолвлӓн сӹнзӓ анзылнышток Иисус пӹлгомыш кузен кен, дӓ пӹл Тӹдӹм нӹнӹн сӹнзӓ ужмышты гӹц нӓнген.

¹⁰ Тӹдӹн кузен кемӹжӹ годым нӹнӹ пӹлгомышкы тусарен анженӹт. Трӱк нӹнӹ докы ош выргемӓн кок пӱэргӹ толын шагалын,

¹¹ нӹнӹ келесенӹт: «Галилейӹн эдемвлӓжӹ, мам тенге пӹлгомышкы анжен шалгедӓ? Тӓ дорцда ти Иисусын пӹлгомышкы кузен кемӹжӹм ужында. Кыце Тӹдӹ кеен, тенгеок пӧртӹлеш».

¹² Тӹнӓм Апостолвлӓ Елеон манмы кырык гӹц Иерусалимӹш пӧртӹлӹнӹт, кырыкшы Иерусалим гӹц мӹндӹрнӹ агыл, кукшыгечшӹ корны нӓрӹ ӧрдӹжӹштӹ ылеш.

¹³ Иерусалимӹш толмыкышты, кӱшӹл пачаш кӹдежӹш Петр дон Иаков, Иоанн дон Андрей, Филипп дон Фома, Варфоломей дон Матфей, Алфейӹн Иаковшы дон Зилот манмы Симон дӓ Иаковын Иудажы пыренӹт. Ти жепӹн тишӓк погынат ылын.

¹⁴ Нӹнӹ цилӓнӓт икышын со ыдылыныт дӓ Йымым сарваленӹт, нӹнӹ доно иквӓреш икманяр ӹдӹрӓмӓш, Иисусын Мария Ӓвӓжӹ дӓ Тӹдӹн шӱмбелвлӓжӹ ылыныт.

^15-16 Ик кечӹн, кынам шӱдӹ коклы нӓрӹ эдем погынен ылын, Петр тыменьшӹвлӓ лошкы лӓктӹн шагалын дӓ келесен: «Шӱмбелвлӓ! Иисусым кычен нӓнгешӹвлӓм видӹшӹ Иуда гишӓн Святой Шӱлӹш Писаништӹ Давид гач мам анзыцок келесен, тӹдӹ шокталтшашлык ылын.

¹⁷ Иуда мӓ логӹцнӓ иктӹжӹ ылын, дӓ тӹдӹлӓнӓт ти служымы пӓшӓ вӓрештӹн».

¹⁸ Худам ӹштӹмӹлӓн нӓлмӹ оксажы доно мӱлӓндӹм нӓлӹн, но шынгалт вазынат, мӹшкӹржӹ шелӹн, цилӓ кӧргӹжӹ лӓктӹн вазын.

¹⁹ Тидӹ гишӓн Иерусалимӹштӹ ӹлӹшӹвлӓ цилӓн пӓлен нӓлӹнӹт, тенге ти мӱлӓндӹжӹмӓт ӹшкӹмӹштӹн йӹлмӹштӹ доно Акелдама манын лӹмденӹт, вес семӹньжӹ «Вӹрӓн мӱлӓндӹ» лиэш.

²⁰ «Псалтирь книгӓштӹ сирӹмӹ: ”Тӹдӹн пӧртшӹ охыр лижӹ, Тӹштӹ иктӓт ӹнжӹ ӹлӹ”, дӓ тенгеок сирӹмӹ: ”Тӹдӹн вӓржӹм весӹ нӓлжӹ”.

^21-22 Седӹндон Господь Иисусын лоштына ӹлӹмӹжӹ годым сагана ылшы эдемвлӓ гӹц иктӹжӹ мӓ донна иквӓреш Тӹдӹн ӹлӹж кӹньӹлмӹжӹн свидетельжӹ лишӓшлык. Тӹдӹжӹ, Иоаннын крестӓш пыртымыжы гӹц тӹнгӓлӹн, Иисусын мӓ дорцна пӹлгомыш кузен кемӹ кечӹ якте со сагана каштшы эдем лишӓшлык».

²³ Коктым шагалтенӹт: Варсава манмы Иосифӹм, тӹдӹм эче Иуст маныныт, дӓ Матфийӹм.

^24-25 Погынышывлӓ тенге попен ыдылыныт: «Тӹнь, Господь, цилӓн шӱмӹштӹм пӓлет. Иуда, вӓрештшӓшлык вӓрӹшкӹжӹ кеӓш манын, служымы пӓшӓжӹм, Апостол вӓржӹм шуэн. Ти кок эдем логӹц кыдыжым вӓрешӹжӹ айыренӓт, мӓлӓннӓ анжыкты».

²⁶ Вара нӹнӹ шӹвӓм ӹштенӹт, шӹвӓ Матфийлӓн вӓрештӹн, дӓ тӹдӹм луатик Апостол докы ушенӹт.