ซะคารียา 1 - ซูรัจ ปือมือเลา นะ ตูฮัดตูฮัด บลาโลก อิซราเอน บรี บราเลฮ ฮาตี 1 เดะ บูลัด ลาปัด_ ตาโฮด นู ดูวา_ ฮาดัจ นะ ดารีอัด_ ปือมือเลา นะ ตูฮัด บือซัยํ เดะ อาตัซ มาแรฮ กะ ซะคารียา_ ซือมียา ตูโดฮ ปือมือเลา นะ ตูฮัด_ นู ฌาดี นานะ นะ เบเรคียา_ ฌาดี จูจู นะ อิดโด_ จะ 2 “ตูฮัด บือซัยํ เดะ อาตัซ ญา มูซัยํ โตระ_ กะ โกะ บีลาแก นะ กาเญา. 3 กะฆีเตอ_ กือนา มือเลา ฌางัน กูญา จะ_ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา กะฆีนี เลอ_ กือนา ปาเระ มาแรฮ ซารี กู_ กู โปด_ นะ ปาเระ มาแรฮ ซารี กาเญา_ ตูฮัด นู มือฆัฮ ญา มือเลา กะฆีนี เลอ. 4 ฌางัน บรี ฌาดี ซือรูปา โกะ บีลาแก นะ กาเญา_ นู โกะ ซือมียา ตูโดฮ ปือมือเลา นะ ตูฮัด เดะ กาลา ดูลู_ บือเลฮ มือญาเระ กะ กูญา จะ_ ‘ตูฮัด บือซัยํ เดะ อาตัซ_ ตูฮัด นู มือฆัฮ ญา มือเลา กะฆีนี จะ “กือนา อาเลฮ เดะ ฌาลัด นู ฌาฮัจ นะ กาเญา_ เดะ ลาฆู ปือบูวัจ นู ฌาฮัจ นะ กาเญา.” ’ ตาปี กูญา เตด บือเลฮ ดืองัย_ เตด บือเลฮ มือนีงัย_ ตูฮัด มือเลา กะฆีนี เลอ 5 โกะ บีลาแก นะ กาเญา เตอ_ กูญา ดูโดะ ปัจ? ดีฮา โกะ ซือมียา ตูโดฮ ปือมือเลา นะ ตูฮัด? กูญา อาดา ฮีโดะ ปี ซือลาลู เฆอ? 6 ตาปี ปือมือเลา นะ กู_ ฌางัน ฮาดัจ ฮูโกบ นะ กู_ นู กู บือเลฮ ปือซัด กะ ซือมียา ตูโดฮ ปือมือเลา นะ กู_ นู ฌาดี ปราโซฮ นะ กู โปด_ โกะ ปือมือเลา อีตู ตูโรจ โกะ บีลาแก นะ กาเญา ดัด_ บูกัด เฆอ? ฌู กูญา บราเลฮ ฮาตี_ มือเลา จะ ‘ตูฮัด บือซัยํ เดะ อาตัซ_ ตูฮัด นู มือฆัฮ_ บือเลฮ บูวัจ กะ กามี_ ตูโรจ ลาฆู ปรางัย นะ กามี ดัฮ_ ฌาดี บือกะ นู ญา บือเลฮ บรีงัจ ดูลู_ นะ บูวัจ เลอ.’ ” ลาฆู มีปี นู ซา_ ปาซัน ซือมียา ญาแญะ กูดา 7 เดะ อารี ดูวา ปูโลฮ ปัจ_ บูลัด ซือบือลัซ_ นู ฌาดี บูลัด เชบัด_ เดะ ตาโฮด นู ดูวา_ ฮาดัจ นะ ดารีอัด_ ปือมือเลา นะ ตูฮัด บือซัยํ เดะ อาตัซ มาแรฮ กะ ซะคารียา_ ซือมียา ตูโดฮ ปือมือเลา นะ ตูฮัด_ นู ฌาดี นานะ นะ เบเรคียา_ ฌาดี จูจู นะ อิดโด. กะฆีเตอ ซะคารียา มือเลา จะ 8 “เดะ มาลับ อีตู_ กู บือเลฮ ตีญุง ลีฮัจ_ นี เลอ_ อาดา กีลากี ซืออูรัก_ ญาแญะ กูดา ซี มีรัฮ_ บือดีรี เดะ ซามา ตืองัฮ รือโปะ กายู มีญะ ฮีเฌา_ เดะ ลามัน จือลัฮ บูเกะ. โซะ บลากัก ญา_ อาดา กูดา ซี มีรัฮ_ ซี กูนิง บือตือแล_ ฌางัน ซี ปูเตฮ. 9 กะฆีเตอ_ กู ตาญา จะ_ ‘กือปาลา เออ_ บือนา อีนี ฌาดี นามา?’ ฮูลู บาลัก นะ ตูฮัด_ นู ตืองัฮ มือเลา ฌางัน กู_ มือญาเระ กะ กู จะ_ ‘กู นะ ปลีฮัจ บรี เกา ตาฮู_ จะ โกะ ซือบารัก อีนี ฌาดี นามา.’ 10 กะฆีเตอ_ กีลากี นู บือดีรี เดะ ซามา ตืองัฮ ปูโฮด กายู มีญะ ฮีเฌา_ มือญาเระ จะ ‘โกะ บือนา อีนี_ ฌาดี ซือมียา นู ตูฮัด บือซัยํ เดะ อาตัซ ซูโรฮ ปี มือญาซัจ ดือนียา.’ 11 กูญา อีตู_ ตีกัฮ กะ ฮูลู บาลัก นะ ตูฮัด บือซัยํ เดะ อาตัซ_ นู บือดีรี เดะ ซามา ตืองัฮ โกะ รือโปะ กายู มีญะ ฮีเฌา_ จะ ‘กามี บือเลฮ มือญาซัจ ดือนียา ดัฮ. ลีฮัจ เลอ_ ดือนียา โปด ดูโดะ ซืองะ.’ 12 กะฆีเตอ ฮูลู บาลัก นะ ตูฮัด มือเลา จะ_ ‘โอ ตูฮัด บือซัยํ เดะ อาตัซ_ ตูฮัด นู มือฆัฮ_ บราปา ลามา เลอ_ นู เกา นะ เตด ตือจีฮัด นังฆรี เยรูซาเลม_ ฌางัน โกะ นังฆรี นะ ลูมอฮ ยูดา_ นู เกา มูซัยํ ตูโฌฮ ปูโลฮ (70) ตาโฮด ดัฮ_ ตูฮัด เออ?’ 13 ตูฮัด บือซัยํ เดะ อาตัซ ตีกัฮ กะ ฮูลู บาลัก นู ตืองัฮ มือเลา ฌางัน กู_ ฌาดี ปือมือเลา นู อาดา ลาฆู ตือจีฮัด ลาฆู ปูโฌะ ฮาตี. 14 ฮูลู บาลัก นู ตืองัฮ มือเลา ฌางัน กู_ ญา มือญาเระ กะ กู จะ ‘กือนา บือซูระ จะ_ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา กะฆีนี จะ_ กู กือมูรู ฮาตี ซูโงฮ_ ปาซัน นังฆรี เยรูซาเลม ฌาดี จะ นังฆรี ซีโยน ซูโงฮ เลอ. 15 กู มูซัยํ กะ ลูมอฮ บักซา นู ดูโดะ ซือนัง บาฌิ_ ซาเบะ วะตู กู มูซัยํ กิดีกิ_ กูญา โปด_ บูวัจ ลาฆู ฌาฮานัม บาญะ โตระ. 16 กะฆีเตอ_ ตูฮัด บือซัยํ เดะ อาตัซ มือเลา จะ_ กู นะ บาลิ ปาเระ มาแรฮ กะ นังฆรี เยรูซาเลม_ ฌางัน ลาฆู ตือจีฮัด. ตูฮัด นู มือฆัฮ มือเลา จะ_ ฆาโดฮ บูวัจ รูมัฮ มือญือมัฮ นะ กู เดะ ตือปัจ อีตู. กือนา รือตัก ตาลี ปืออูโกยํ_ เดะ อาตัซ นังฆรี เยรูซาเลม. 17 กือนา บือซูระ ปูลัก จะ_ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา กะฆีนี จะ_ นังฆรี นะ กู นะ ปือนอฮ บาฌิ ฌางัน ลาฆู ซือนัง ซือลามัจ ปูลัก. ตูฮัด นะ ปูโฌะ ฮาตี นังฆรี ซีโยน_ นะ ปีเลฮ นังฆรี เยรูซาเลม ซือกาลี ปูลัก. ’ ” ลาฆู มีปี นู ดูวา_ ปาซัน ตาโนะ บือนาตัก ฌางัน ตูกัก บือซี 18 “กู ลางอฮ ปาลา ลีฮัจ_ นี เลอ บือฆารี อาดา ตาโนะ บือนาตัก ปัจ ตาโนะ. 19 กู ตาญา ฮูลู บาลัก นะ ตูฮัด นู ตืองัฮ มือเลา ฌางัน กู_ จะ_ ‘โกะ บือนา อีนี ฌาดี นามา?’ ญา ตีกัฮ กะ กู จะ_ ‘โกะ บือนา อีนี_ ฌาดี ตาโนะ บือนาตัก_ นู ตาโนะ ยูดา_ อิซราเอน_ ฌางัน เยรูซาเลม บรี จัฮบือลัฮ ดัฮ.’ 20 กะฆีเตอ_ ตูฮัด บือซัยํ เดะ อาตัซ ญา ปลีฮัจ บรี กู ลีฮัจ ตูกัก บือซี_ ปัจ อูรัก. 21 กู ตาญา จะ ‘โกะ ซือมียา อีนี มาแรฮ บีดา บูวัจ นามา?’ ญา ตีกัฮ จะ ‘ตาโนะ บือนาตัก อีนี_ บือเลฮ ตาโนะ ยูดา บรี จัฮบือลัฮ_ ฌู ฮอย ซาปา นะ ลางอฮ ปาลา บือเลฮ ปูลัก. โกะ ตูกัก อีนี_ มาแรฮ บูวัจ บรี ตาโนะ บือนาตัก ตาโกจ โตระ_ บีดา นะ รีวัก ตาโนะ บือนาตัก นะ ลูมอฮ บักซา อาซิก_ ตูโรด ปี_ นู อาเกะ ตาโนะ มาแรฮ ตาโนะ นังฆรี ยูดา_ บูวัจ บรี จัฮบือลัฮ ดัฮ.’ ” |