มือญาญี นะ ซาโลมอน 1 - ซูรัจ ปือมือเลา นะ ตูฮัด1 ลาฆู บือญาญี นู บาฌิ โตระ อีนี ฌาดี นะ ซาโลมอน. ลาฆู บือญาญี ลามูลา เจาเซา 2 มีตา บรี ญา จีโยบ กู ฌางัน มูโลจ นะ ญา ซาเบะ จะ ลาฆู ซายัก นะ เกา บาฌิ เดะ อาระ อางุน 3 มีญะ บาวู ลือมัยํ นะ เกา บาวู ซูโงฮ ปือนามา นะ เกา บาวู ซือรูปา มีญะ บาวู นู อูแร ดัฮ ซาเบะ กะฆีเตอ โกะ ราดารา ซายัก เกา เลอ 4 มีตา บาวา กู ปี ฌางัน เกา_ บรี กีตา ฆางู ปี เลอ ราฌา บาวา กู ปี กะ รูวัก นู ลือฆา นะ ญา กู นะ มือลูปัจ ซูกา ฮาตี กรานา เกา กู นะ มือโอจ กะ ลาฆู ซายัก นะ เกา ลือเบฮ เดะ อาระ อางุน นู โกะ ราดารา ซายัก เกา เตอ_ บือฆูนา ดัฮ 5 โอ นานะ นีบีนี นะ เยรูซาเลม เออ กู ญาวา ตับฮีตับ ตาปี บือฆาจะ บือดาบู บือกะ รูมัฮ กาฌัก นะ ลูมอฮ เกดาระ บือกะ กาเยด ดีนิง นะ ซาโลมอน 6 ฌางัน ฌือลิก มาตา กะ กู ซาเบะ กู ญาวา ฮีตับ กรานา ซายา มาตา อารี ซูโลฮ กู. โกะ กากา กีลากี เดะ กู_ กูญา มูซัยํ กะ กู. กูญา ซูโรฮ กู ปี ฮัจลีฮัจ กือโบด บูวัฮ อางุน ตาปี กือโบด บูวัฮ อางุน นะ กู ตะอาซิก_ กู เตด บือเลฮ ฮัจลีฮัจ 7 เออ เกา นู กู ซายัก_ มีตา มือญาเระ กะ กู จะ เกา ปือบือลา กาวัด บือนาตัก ปัจ ดีฮา? เดะ วะตู ตืองัฮ อารี เกา บรี ญา ตีโนะ ปัจ ดีฮา? บูวัจ นามา กู ฆาโดฮ ซรือโกะ มูคา ซือลูนี ปี ตูโรจ กาวัด บือนาตัก นะ ลูมอฮ กาวัด นะ เกา? เจาเบา 8 โอ นีบีนี นู บือฆาจะ เดะ กาวัด_ ดัฮ เกา เตด ตาฮู กือนา ปี ตูโรจ บือกัซ ตาปะ กากี นะ กาวัด แบะ กาวัด กาเมก กือนา ปือบือลา กาวัด แบะ กาวัด กาเมก นะ เกา บีดิก ซาเราะ กาฌัก นะ ลูมอฮ ปือบือลา กาเมก เลอ. 9 โอ ซือมียา นู กู ซายัก เออ_ กู นะ ปือซามา เกา บือกะ กูดา เดะ ซือตรี นะ ราฌา ฟาโร 10 ปีปี ดูวา บือลัฮ นะ เกา_ บือฆาจะ ฌางัน บารัก ปากัย เกา ปากัย ลีเฮ นะ เกา ฌางัน ราตัย อีตัด เลอ. 11 ลูมอฮ กามี นะ บูวัจ โกะ บารัก ปากัย มัซ อาดา ฌางัน ตือปัจ บือฆาจะ ปีระ ฌูฆา. เจาเซา 12 กาลา ราฌา ตืองัฮ ดูโดะ เดะ ตือปัจ ตีโนะ มีญะ บาวู นาระดา นะ กู โปด_ บาวู ปี ราตา 13 ซือมียา นู กู ซายัก ฌาดี บือกะ ตือปัจ บูกุซ มดยอบ นู ฆาโตก เดะ ซามา ตืองัฮ ดาดา นะ กู 14 ซือมียา นู กู ซายัก เตอ ญา ฌาดี บือกะ รืองอย บูงา บาวู บาฌิ ดูโดะ เดะ กือโบด บูวัฮ อางุน เอนเกดี. เจาเบา 15 โอ นีบีนี นู กู ซายัก เออ_ เกา บือฆาจะ ซูโงฮ โอ เกา บือฆาจะ โตระ เลอ มาตา ดูวา บือลัฮ นะ เกา_ บือกะ บูโรก ปาตี. เจาเซา 16 โอ ซือมียา นู กู ซายัก เออ_ เกา ฌาดี ซือมียา บือฆาจะ ซูโงฮ เลอ เกา บือฆาจะ โตระ เลอ ตือปัจ ตีโนะ นะ กีตา_ ฮีเฌา ซูโงฮ 17 จาวัก รูมัฮ นะ กามี บูวัจ ฌางัน กายู รู ซีดา กายู กือมูโบก นะ กีตา บูวัจ ฌางัน กายู รู ดาโวด ตีฆา ลามัย. |