ซูรัจ นะ รูด 1 - ซูรัจ ปือมือเลา นะ ตูฮัดโกะ นะบรานะ นะ เอลีเมเลก ปี กะ นังฆรี โมอับ 1 เดะ ฮาดัจ ดูลู_ กาลา โกะ ซือมียา กรัจ ฮูโกบ กูญา ปือบือลา นังฆรี เตอ_ อาดา ลาฆู บือตาฮัด นาซี_ เดะ นังฆรี คานาอัน. อาดา กีลากี ซืออูรัก_ ฌาดี ซือมียา ตูโปะ เบดเลเฮม_ เดะ โซะ นังฆรี ยูดา_ ญา ปี มือนูปัก ดูโดะ เดะ นังฆรี โมอับ_ ฌาดี จะ_ อีซี ญา_ ฌางัน บีนี_ ฌางัน โกะ นานะ กีลากี ดูวา อูรัก. 2 กีลากี อีตู_ อาดา ปือนามา เอลีเมเลก_ บีนี นะ ญา ปือนามา นาโอมี_ นานะ ดูวา อูรัก ปือนามา มาโลน ฌางัน คิลิโอน. กูญา ฌาดี ลูมอฮ เอฟราทา_ มาแรฮ ดาตัก เดะ ตูโปะ เบดเลเฮม_ เดะ ยูดา. กูญา ซือมูฮา บือฌาลัด มาโซะ กะ นังฆรี โมอับ_ ดูโดะ เดะ ตือปัจ อีตู. 3 ตาปี เอลีเมเลก_ ลากี นะ นาโอมี_ มาตี ดัฮ. นาโอมี โปด_ กือนา ตีงัน_ บรี ดูโดะ ฌางัน นานะ กีลากี_ ดูวา บราดี. 4 นานะ กีลากี ดูวา อูรัก อีนี โปด_ บือเลฮ บีนี ลูมอฮ โมอับ. ซืออูรัก ปือนามา โอระปา_ นู ซืออูรัก ปือนามา รูด. กูญา ซือมูฮา_ ดูโดะ เดะ ตือปัจ อีตู_ บือเลฮ ฆามะ ซือปูโลฮ ตาโฮด. 5 กะฆีเตอ_ มาโลน ฌางัน คิลิโอน_ กือดูวา อูรัก โปด_ มาตี ดัฮ. นีบีนี อีตู โปด_ ดูโดะ ฮอย ซาปา_ ซาเบะ ลากี_ ฌางัน นานะ กีลากี ดูวา อูรัก นะ ญา_ มาตี ปี ดัฮ. นาโอมี ฌางัน มือนาตู ดูวา อูรัก 6 กะฆีเตอ นีบีนี อีตู_ ฌางัน มือนาตู ดูวา อูรัก โปด_ บือฌาลัด ตรือเบะ เดะ นังฆรี โมอับ_ ซาเบะ จะ_ กาลา ดูโดะ เดะ นังฆรี โมอับ เตอ_ ญา บือเลฮ ดืองัยํ บรีตา จะ_ ตูฮัด บือซัยํ เดะ อาตัซ บือเลฮ บรีงัจ ลีฮัจ กะ ลูมอฮ บักซา นะ ญา_ บรี โกะ ซือบารัก มากัด กะ กูญา ซือมูฮา 7 ญา ตรือเบะ เดะ ตูโปะ นู ญา ดูโดะ_ มารือมา ฌางัน โกะ มือนาตู ดูวา อูรัก_ บือฌาลัด ปี_ เดะ ฌาลัด นู นะ บาวา กูญา บาลิ ปี กะ นังฆรี ยูดา. 8 ตาปี นาโอมี มือเลา ฌางัน มือนาตู ดูวา อูรัก จะ_ “ปี เลอ_ บรี กะ ซิกมาซิก บาลิ ปี_ กะ รูมัฮ นะ มะ เดะ กาเญา. มีตา บรี ตูฮัด บือซัยํ เดะ อาตัซ_ ปลีฮัจ ลาฆู ซายัก นู กือฌะ กือมัซ กะ กาเญา ดูวา อูรัก_ บือกะ กาเญา บือเลฮ ซายัก กือฌะ กือมัซ กะ ซือมียา นู มาตี ดัฮ_ ฌางัน มะ ฌูฆา เลอ 9 มีตา เดะ ตูฮัด_ บรี กาเญา ซิกมาซิก บือเลฮ ดาปัจ ตือปัจ บราดู ซือนัง_ เดะ รูมัฮ นะ ลากี บารู.” กะฆีเตอ_ นาโอมี จีโยบ มือนาตู ดูวา อูรัก_ ซิกมาซิก ปาคัจ มือนาแงฮ ซือวารา บูริ. 10 มือนาตู ดูวา อูรัก_ มือเลา ฌางัน มะ มือตูฮา จะ_ “ฌางัน เลอ_ กามี ดูวา อูรัก นะ บาลิ ปี ฌางัน มะ_ ปี รอจ กะ ลูมอฮ บักซา นะ มะ.” 11 ตาปี นาโอมี ตีกัฮ จะ_ “นานะ เออ_ กือนา บาลิ ปี เลอ_ นะ ปี ฌางัน มะ บูวัจ นามา เลอ? มะ นะ อาดา นานะ กีลากี เดะ โปรจ ปูลัก_ บรี ฌาดี ลากี นะ กาเญา บือเลฮ เฆอ? 12 นานะ เออ_ บาลิ ปี เลอ_ บาลิ ปี ตูโรจ ฌาลัด นะ กาเญา. มะ ตูฮา ดัฮ_ เตด บือฆูนา นะ บือเลฮ ลากี เลอ. มีเซ จะ_ มะ อาดา ตือปัจ จาดัก_ มีเซ นะ บือเลฮ ลากี มาลับ อีนี_ บือเลฮ โกะ นานะ กีลากี เตอ_ 13 กาเญา นะ นาตี_ บรี ตือดะ นานะ กีลากี อีตู บือซัยํ_ บือเลฮ เฆอ? กาเญา นะ ตาฮัด ฮาตี_ เตด บือนีกัฮ บือเลฮ เฆอ? ฌางัน เลอ_ นานะ เออ_ ซาเบะ ลาฆู นะ มะ ซูซัฮ ปายัฮ_ ลือเบฮ เดะ ลาฆู นะ กาเญา. อาดา ตางัน นะ ตูฮัด บือซัยํ เดะ อาตัซ_ ญา บูวัจ กะ มะ กะฆีนี.” 14 กะฆีเตอ ซิกมาซิก ปาคัจ มือนาแงฮ ปูลัก. โอระปา โปด_ จีโยบ ตีงัน มะ มือตูฮา_ ตาปี รูด อาดา ลาบัด กรด มะ มือตูฮา ลาฆี. 15 นาโอมี มือเลา จะ_ “ลีฮัจ เลอ_ กากา อีปัย เดะ เกา_ ญา บาลิ ปี ซารี ลูมอฮ บักซา นะ ญา_ ซารี โกะ ตูฮัด นะ ญา ดัฮ. เกา กือนา บาลิ ตูโรจ กากา อีปัย เดะ เกา เลอ.” 16 ตาปี รูด ตีกัฮ จะ_ “มีตา ฌางัน บรี มะ_ ปูโฌะ บรี กู ตีงัน มะ_ เฆอ จะ_ อูโนยํ ปาเระ_ เตด ตูโรจ มะ เลอ. ซาเบะ จะ_ มะ นะ ปี กะ ดีฮา_ กู นะ ปี ฌูฆา. มะ นะ ดูโดะ ปัจ ดีฮา_ กู นะ ดูโดะ ตือปัจ อีตู ฌูฆา. นะบรานะ นะ มะ_ นะ ฌาดี นะบรานะ นะ กู. ตูฮัด นะ มะ_ นะ ฌาดี ตูฮัด นะ กู. 17 มะ มาตี ปัจ ดีฮา_ กู นะ มาตี ตือปัจ อีตู_ นะ มีตา บรี ตานัม บาดัด นะ กู_ เดะ ตือปัจ อีตู ฌูฆา. ดัฮ อาดา ลาฆู นามา_ บูวัจ บรี กู บือตีงัน ฌางัน มะ_ ลือเบฮ ซา ลาฆู มาตี โปด_ มีตา บรี ตูฮัด บือซัยํ เดะ อาตัซ กรัจ ฮูโกบ กู_ บรี โตระ เลอ.” 18 กาลา นาโอมี ลีฮัจ จะ_ รูด ตือตู ฮาตี ซูโงฮ ดัฮ_ ญา โปด_ เตด มือเลา นามา ลาฆี เลอ. 19 กะฆีเตอ กูญา ดูวา อูรัก โปด_ ปี รอจ กะ ตูโปะ เบดเลเฮม. กาลา กูญา รอจ กะ ตูโปะ เบดเลเฮม ดัฮ_ โกะ ลูมอฮ ซือมียา ปาคัจ ตือกือฌุจ_ ซาเบะ นีบีนี ดูวา อูรัก. โกะ ลูมอฮ นีบีนี มือเลา จะ_ “อีนี นาโอมี_ ซูโงฮ เฆอ?” 20 นาโอมี ตีกัฮ กะ กูญา จะ_ “มีตา ฌางัน บลาโลก กู จะ_ นาโอมี เลอ. บลาโลก กู จะ_ มารา เลอ_ ซาเบะ จะ_ ตูฮัด นู มือฆัฮ_ ญา บูวัจ บรี กู ซูซัฮ ฮาตี. 21 กาลา ตรือเบะ เดะ ตูโปะ อีนี_ กู อาดา ฆือนะ ราตา ฌือแนฮ. ตูฮัด บือซัยํ เดะ อาตัซ บาวา กู บาลิ_ ซา ญาวา. กาลา ตูฮัด บูวัจ บรี กู ซูซัฮ ฮาตี กะฆีนี_ ตูฮัด นู มือฆัฮ บรี กู บือตือโปฮ ลาฆู ฌาฮัจ กะฆีนี_ นะ บลาโลก กู จะ_ นาโอมี_ บูวัจ นามา เลอ?” 22 กะฆีเตอ_ นาโอมี ญา บาลิ มาแรฮ_ บือซามา ฌางัน รูด_ มือนาตู นะ ญา_ ซือมียา ลูมอฮ โมอับ โปด_ นู บาลิ มาแรฮ ดาตัก เดะ นังฆรี โมอับ. กูญา ดูวา อูรัก_ มาแรฮ รอจ กะ ตูโปะ เบดเลเฮม เดะ มูเซด กือตับ ปาดี บาลี เลอ. |