ปลีฮัจ 1 - ซูรัจ ปือมือเลา นะ ตูฮัด

ปือมือเลา มือญาเระ ดูลู

¹ ซูรัจ อีนี มือญาเระ ลาฆู นู เยซู คริด บือเลฮ ปลีฮัจ_ ฌาดี ลาฆู นู ตูฮัด เดะ อาตัซ ปลีฮัจ บรี กะ ญา_ บีดา ญา นะ บรี ตาฮู กะ โกะ ปราโซฮ นะ ญา จะ_ เตด ลามา อีนี_ อาดา ลาฆู นามา_ ฆาโดฮ นะ บือฌาดี. ลาฆู กะฆีเตอ_ เยซู ซูโรฮ ฮูลู บาลัก นะ ญา_ ปี บรี ลีฮัจ กะ โยฮัน_ ซือมียา นู ฌาดี ปราโซฮ นะ ญา.

² โยฮัน เตอ_ บือเลฮ มือญาเระ ฌาดี ซะซรี_ ปาซัน เดะ ลาฆู นู ญา บือเลฮ ลีฮัจ ซือมูฮา_ ฌาดี จะ_ ลาฆู ปือมือเลา นะ ตูฮัด_ ฌางัน ปือมือเลา ซะซรี_ นู เยซู คริด บือเลฮ บรี ตาฮู.

³ ซือนัง ซือลามัจ เลอ_ ซือมียา นู บาจา ซูรัจ ปือมือเลา ตูโดฮ อีนี. ซือนัง ซือลามัจ เลอ_ โกะ ซือมียา ซือมูฮา นู ดืองัยํ_ นู มือนีงัย บูวัจ ตูโรจ_ กะ ลาฆู นู อาดา ฆาแรฮ เดะ ซูรัจ อีนี. กรานา จะ_ วะตู นู ตูฮัด บือเลฮ ตืองะ_ ดาปิก นะ รอจ ดัฮ เลอ.

⁴ กู โยฮัน_ ฆาแรฮ ซูรัจ อีนี_ อาตัจ บรี กะ โกะ ลูมอฮ นะ ตูฮัด กือตูโฌฮ ตือปัจ_ นู อาดา เดะ นังฆรี เอเซีย. มีตา เดะ ตูฮัด เดะ อาตัซ_ นะ ฮาลัย บรี ซือลามัจ กะ กาเญา_ บรี กาเญา นะ ดูโดะ ซือนัง ซือลามัจ ซูโงฮ. ตูฮัด เตอ_ ญา เลอ นู อาดา เดะ วะตู อีนี_ นู อาดา เดะ กาลา ดูลู_ นู นะ มาแรฮ เดะ วะตู โซะ ฮือลด. มีตา เดะ ซือมืองัจ นะ ตูฮัด_ จะ ซือมืองัจ กือตูโฌฮ_ นู อาดา เดะ โซะ ฮือลด ปาปัด กรือซี ตือปัจ ดูโดะ นะ ตูฮัด เตอ_ นะ บรี ซือลามัจ กะ กาเญา กะฆีเตอ.

⁵ มีตา เดะ เยซู คริด ฌูฆา_ ญา นู ฌาดี ซะซรี รือมัก ซูโงฮ_ นู ฌาดี ซือมียา ลามูลา_ นู ฮีโดะ ปาเระ เดะ มาตี ดัฮ_ ฌาดี ซือมียา นู ฮูโกบ โกะ ราฌา เดะ ดือนียา ราตา เตอ. มีตา บรี ญา นะ บรี ซือลามัจ กะ กาเญา กะฆีเตอ ฌูฆา เลอ. กือนา บรี ซือลามัจ กะ เยซู คริด_ ญา เลอ นู ซายัก กีตา_ นู ยอม มาตี ดารัฮ มือนีแลฮ_ บีดา นะ บูวัจ บรี กีตา ลือปัซ เดะ ดูซา ดัฮ.

⁶ ญา บือเลฮ ตืองะ กีตา บรี ฌาดี ลูมอฮ ซือมียา นะ ญา_ ฌาดี ลูมอฮ ซามี นู นะ มือญือมัฮ กะ ตูฮัด เดะ อาตัซ_ นู อาโปก เดะ ญา. มีตา บรี เยซู นะ บือซรี บือซายา_ นะ มือฆัฮ ซือลาลู_ ซือมาญัก รอจ. อาเมน.

⁷ ลีฮัจ เลอ_ เยซู นะ มาแรฮ_ ดูโดะ เดะ อาตัซ โกะ กือมูวัง. มาตา ราตา บีฌี_ นะ ลีฮัจ บือฆารี ญา. โกะ ซือมียา อีตู นู ตีกับ ญา_ กูญา นะ บือเลฮ ลีฮัจ ญา เตอ เลอ. โกะ อูมัจ ซือมียา ราตา บือแนฮ เดะ ดือนียา_ นะ มือนาแงฮ บือปาโตด กรานา ญา. กือนา บรี ฌาดี กะฆีเตอ เลอ. อาเมน.

⁸ ตูฮัด บือซัยํ เดะ อาตัซ_ นู มือฆัฮ ลือเบฮ เดะ มานามา_ ญา นู อาดา เดะ วะตู อีนี_ นู อาดา เดะ กาลา ดูลู_ นู นะ มาแรฮ เดะ วะตู โซะ ฮือลด เตอ_ ญา มือเลา จะ_ “กู นี เลอ_ ฌาดี นู ลามูลา ฌางัน นู ปือญูดัฮ.” ญา จะ.

ตูฮัด เยซู มาแรฮ ปลีฮัจ กะ โยฮัน

⁹ กู โยฮัน_ ฌาดี ดีบราดี นะ กาเญา_ ฌาดี กาวัด นู ตูโรจ กะ เยซู บือซามา ฌางัน กาเญา. กะฆีเตอ กู โปด_ ฆาโดฮ ตาฮัด เดะ ลาฆู ซูซัฮ ปายัฮ_ บือกะ ฌาดี ซือมียา เดะ ลูมอฮ นะ ตูฮัด บือซามา ฌูฆา. กู กือนา อาตัจ ปี กานัก เดะ ปูเลา ปือนามา ปัดมอด_ ซาเบะ กู บือเลฮ มือญาเระ ปือมือเลา นะ ตูฮัด_ ฌางัน ปือมือเลา ซะซรี นู เยซู บือเลฮ บรี ตาฮู ดัฮ.

¹⁰ เดะ อารี นะ ตูฮัด เตอ_ ซือมืองัจ นะ ตูฮัด ญา บือกรือฌา เดะ ฮาตี นะ กู. กะฆีเตอ กู ดืองัยํ บูงี_ บือกะ ซือวารา ซือลูนัย_ โซะ บลากัก นะ กู_

¹¹ มือเลา จะ_ “ลาฆู นู เกา นะ บือเลฮ บือฆารี_ กือนา ฆาแรฮ ตาโรฮ เดะ ซูรัจ เลอ_ กีเรบ อาตัจ_ บรี กะ โกะ ลูมอฮ นะ ตูฮัด_ กือตูโฌฮ ตือปัจ_ เดะ โซะ นังฆรี เอเซีย_ ฌาดี จะ_ นังฆรี เอเฟซัด_ นังฆรี ซะมรือนา_ นังฆรี ปือฆามัม_ นังฆรี ทียาตีรา_ นังฆรี ซาดิด_ นังฆรี ฟีลาเดนเฟีย_ ฌางัน นังฆรี เลาดีเซีย.”

¹² กู กรือเลฮ มาแรฮ_ บีดา นะ ลีฮัจ ซาปา นู มือเลา ฌางัน กู. กะฆีเตอ_ กู บือเลฮ ลีฮัจ ตือปัจ ตืองะ ปลีตา มีญะ_ ตูโฌฮ บาตัก_ นู บูวัจ ฌางัน มัซ.

¹³ เดะ ตืองัฮ โกะ ตือปัจ ตืองะ ปลีตา อีตู_ อาดา ซืออูรัก_ ซือรูปา กะ ซือมียา_ นู บือปากัย บาฌู ซรือโกะ ญาวา รอจ กะ กากี_ อาดา กาเยด มัซ บือเละ ตาฮะ ดาดา.

¹⁴ โบะ เดะ ปาลา นะ ญา ปูเตฮ มรือแจว_ ซือรูปา กะ ซายา กือมูวัง_ ปูเตฮ บือกะ กาปัซ เลอ. มาตา นะ ญา ซือรูปา ญาลา อาปี.

¹⁵ กากี นะ ญา บือกะ ตือมาฆา_ นู กือนา ปือลัย เดะ อาปี_ ฆีเญฮ บรี บือตือแล_ บือซายา บาฌิ ดัฮ. ซือวารา นะ ญา บูงี_ บือกะ อาเย ฆูโฆยํ ตะเดะ อาตัซ บูเกะ เลอ.

¹⁶ ตางัน โซะ กานัน นะ ญา ปือฆัก บีตัก ตูโฌฮ บีฌี. อาดา ปือดัก_ ตาฌับ ดูวา บือลัฮ_ ตรือเบะ เดะ มูโลจ. มูคา นะ ญา โปด_ บือซายา บือกะ มาตาอารี นู ซูโลฮ จรัฮ โตระ.

¹⁷ ตานา กู ลีฮัจ ญา_ กู รือบัฮ เดะ โซะ กากี นะ ญา_ ซือรูปา กะ ซือมียา มาตี ดัฮ. ตาปี ญา อาเงา ตางัน โซะ กานัน นะ ญา_ กือนา เดะ ญาวา นะ กู_ มือเลา จะ_ “ฌางัน ตาโกจ เลอ_ กู ฌาดี โซะ ปรือดู ฌางัน โซะ ฮูโฌก เตอ.

¹⁸ กู ฌาดี ซือมียา นู อาดา ฮีโดะ ซือลาลู. กู มาตี ดัฮ_ ตาปี นี เลอ_ กู อาดา ฮีโดะ ซือลาลู ซือมาญัก รอจ. กู นี เลอ_ ปือฆัก กูจี_ นู นะ บูกา บรี โกะ ซือมียา มาตี_ โซะ นังฆรี ฮาตู นะ ฮีโดะ ปาเระ.

¹⁹ กะฆีเตอ เลอ_ กือนา ฆาแรฮ เดะ ซูรัจ_ ลาฆู นู เกา นะ ลีฮัจ_ ลาฆู นู บือฌาดี เดะ วะตู อีนี_ ฌางัน ลาฆู นู ฆาโดฮ นะ บือฌาดี โซะ ฮือลด ฌูฆา.

²⁰ ลาฆู ดาลับ ซูโงฮ อีตู_ ปาซัน โกะ บีตัก กือตูโฌฮ บีฌี_ นู เกา ลีฮัจ เดะ ตางัน โซะ กานัน นะ กู เตอ_ ฌางัน ตือปัจ ตืองะ ปลีตา มีญะ_ ตูโฌฮ บาตัก_ ฌาดี กะฆีนี เลอ. นู บีตัก ตูโฌฮ บีฌี_ ฌาดี ฮูลู บาลัก_ นู ฌาฆา โกะ ลูมอฮ นะ ตูฮัด กือตูโฌฮ ตือปัจ. นู ตือปัจ ตืองะ ปลีตา_ ตูโฌฮ บาตัก โปด_ ฌาดี ลูมอฮ นะ ตูฮัด นู กือตูโฌฮ อีตู เลอ.” ตูฮัด ญา จะ.