ฮาดัจ 1 - ซูรัจ ปือมือเลา นะ ตูฮัด

¹ โกะ ฮาดัจ ปือมือเลา อาฌัยํ นะ ซาโลมอน_ นานะ นะ ดาวิด_ ราฌา นะ ลูมอฮ อิซราเอน.

ปือมือเลา มือญาเระ ดูลู

² โกะ ฮาดัจ ปือมือเลา อาฌัยํ อีนี ตืองะ ดัฮ บีดา บรี กราลา ลาฆู ปานัย อากัน_ อาดา ลาฆู อาฌัยํ นู บาฌิ มาโซะ เดะ ฮาตี_ ตาฮู ลาฆู ปือมือเลา ดาลับ ซูโงฮ เลอ.

³ บีดา ซาโมจ ปือมือเลา อาฌัยํ_ นู บูวัจ บรี ปานัย ปาซัน ลาฆู นู บาฌิ ตือปัจ_ นู รือมัก ซูโงฮ_ นู กือนา ลาฆู เลอ.

⁴ บีดา นะ บือเลฮ บรี กะ ซือมียา ตาฮู ดีกิ_ นะ ตาฮู บาฌิ บีดา นะ บรี กะ อูรัก มูดา_ นะ ตาฮู_ นะ ปานัย บือกีรา.

⁵ บรี กะ ซือมียา ปานัย อากัน_ นะ บือเลฮ ดืองัยํ บือตามัฮ_ เดะ ลาฆู บลาฌัยํ บรี ตาฮู_ ซือมียา นู มาโซะ เดะ ฮาตี_ นะ บือตามัฮ ลาฆู ปานัย ซูโงฮ เลอ.

⁶ บีดา บรี มาโซะ เดะ ฮาตี_ กะ ฮาดัจ ปือมือเลา อาฌัยํ_ กะ ลาฆู จรือตา นู ปือซามา_ ฌางัน ปือมือเลา นะ ซือมียา ปานัย อากัน_ ฌางัน ลาฆู ตูโดฮ ลาฆู บูนี_ เดะ ปือมือเลา นะ กูญา.

⁷ นู นะ บรีงัจ ตาโกจ เดะ ตูฮัด บือซัยํ เดะ อาตัซ_ บูวัจ บรี บือฌาดี_ ลาฆู ตาฮู นู ซูโงฮ. โกะ ซือมียา บูดอ เตอ_ กูญา มือเลา มือฌัฮ กะ ลาฆู ปานัย อากัน_ ฌางัน ลาฆู อาฌัยํ เลอ.

ปือมือเลา ปรีงัจ_ บรี ฌาฆา กาวัด นู เตด บาฌิ

⁸ โอ_ นานะ กู เออ_ กือนา มือนีงัย กะ ปือมือเลา ปรีงัจ นะ ปะ เดะ เกา เกา ฌางัน นะ ตีงัน_ ปือมือเลา อาฌัยํ นะ มะ เดะ เกา ฌูฆา.

⁹ ซาเบะ โกะ ปือมือเลา อีตู_ ฌาดี กือจูบุก นู บือฆาจะ_ นู นะ ซรือโกะ เดะ ปาลา นะ เกา ฌาดี อาโฆะ_ นู ฆาโตก เดะ ลีเฮ นะ เกา.

¹⁰ นานะ นะ กู เออ_ ดัฮ ซือมียา บือดูซา_ ตีปู บาอาฌะ เกา เตอ_ ฌางัน นะ ตูโรจ ปี กะ กูญา เลอ.

¹¹ ดัฮ กูญา มือเลา จะ_ “มาแรฮ ฌางัน กามี เลอ_ บรี กีตา นาตี บูนอฮ ซือมียา เตอ. บรี กีตา มือฮือนะ นาตี ซือกัจ_ ซือมียา นู ฮอย ซาลัฮ_ ซิอูซิ เลอ.

¹² บรี กีตา ตือลัด กูญา_ โดะฮีโดะ_ ซือรูปา นังฆรี ฮาตู นะ ตือลัด ซือมียา ตือลัด ญาวา กูญา บรี ฮาบิฮ_ บือกะ โกะ ซือมียา อีตู_ นู ตูโรด ปี กะ ลูบัก ซือมียา มาตี เลอ.

¹³ กีตา นะ ดาปัจ โกะ ซือบารัก_ นู รือฆา มาฮัน_ ราตา ฌือแนฮ กีตา นะ อาเมด_ โกะ ซือบารัก นู ซามุน เดะ กูญา_ บอฮ เดะ รูมัฮ นะ กีตา_ บรี ปือนอฮ.

¹⁴ กือนา มาโซะ บือซามา ฌางัน กามี กีตา ซือมูฮา นะ อาดา ดูเวะ_ ซา ตือปัจ อีตู เลอ.”

¹⁵ นานะ นะ กู เออ_ ฌางัน นะ บือฌาลัด เดะ ฌาลัด อีตู_ บือซามา ฌางัน กูญา เลอ กือนา บลารัก ตาปะ กากี นะ เกา_ ตีเมา บรี ตูโรจ ปี กะ ฌาลัด นะ กูญา.

¹⁶ ซาเบะ ตาปะ กากี นะ กูญา_ บลารี ปี ซารี ลาฆู ฌาฮัจ กูญา นะ ฆางู ปี_ บูวัจ บรี ดารัฮ มือนีแลฮ เลอ.

¹⁷ กรานา จะ_ นะ กือตัก ปูกัจ วะตู บูโรก ตืองัฮ ตีญุง ลีฮัจ โปด นะ ฮอย เตด ฌาดี นามา เลอ.

¹⁸ ตาปี โกะ ซือมียา อีนี_ ซือรูปา กูญา ตือมะ นาตี_ นู นะ บูนอฮ ญาวา นะ ตะอาซิก ซือรูปา กูญา อาดา มือฮือนะ นาตี_ ซือกัจ ญาวา นะ ตะอาซิก เลอ.

¹⁹ ฌาลัด นะ ซือมียา นู มียา อูโตก_ เดะ ลาฆู ฌาฮัจ เตอ_ ฌาดี กะฆีนี เลอ ฌาดี จะ_ กูญา บรี กะ ญาวา นะ กูญา ตะอาซิก_ มาตี เลอ.

ลาฆู ปานัย อากัน_ ญา บลาโลก

²⁰ ลาฆู ปานัย อากัน_ ญา บือซูระ บูริ_ เดะ ฌาลัด บือซัยํ ญา บือซูระ_ เดะ ลามัน นังฆรี ฌูฆา.

²¹ ญา บือซูระ_ เดะ ตือปัจ จีปัก_ นู อาดา ซือมียา บาญะ ญา มือเลา_ เดะ ฌาลัด นู นะ มาโซะ_ กะ ปีตู นังฆรี_ จะ

²² “โกะ ซือมียา บูดอ เออ_ กาเญา นะ ซายัก ลาฆู บูดอ นะ กาเญา ปี_ ลามา ตารา ดีฮา? โกะ ซือมียา นู อาฆัฮ ฆือละ_ กูญา นะ ซูกา ฮาตี เดะ ลาฆู อาฆัฮ ฆือละ นะ กูญา_ ลามา ตารา ดีฮา? โกะ ซือมียา บูดอ_ นะ บือชี กะ ลาฆู ปานัย อากัน ลามา ตารา ดีฮา เลอ?

²³ กือนา อาเลฮ มาแรฮ_ ตือตู ฮาตี เดะ ลาฆู ปรีงัจ นะ กู นี เลอ_ กู นะ อูแร ลาฆู บรีงัจ นะ กู_ บรี กะ กาเญา กู นะ บรี กะ ปือมือเลา นะ กู_ กือนา มือญาเระ บรี กะ กาเญา.

²⁴ กรานา กู บือเลฮ บลาโลก ดัฮ_ ตาปี กาเญา กีปัซ กู ดัฮ เลอ กู เตอ_ ลามัย กาเญา ดัฮ_ ตาปี ฮอย ซาปา บอฮ เดะ ฮาตี.

²⁵ กาเญา เตด ปือดูลี กะ ลาฆู อาฌัยํ นะ กู กาเญา ตีเมา ซาโมจ ลาฆู ปรีงัจ นะ กู เลอ.

²⁶ โซะ กู นะ อาฆัฮ ฆือละ_ ปาซัน ลาฆู ฌาฮานัม นะ กาเญา กู นะ อาฆัฮ ฆือละ_ กาลา อาดา ลาฆู ตาโกจ_ มาแรฮ รอจ กะ ญาวา นะ กาเญา.

²⁷ กาลา ลาฆู ตาโกจ_ มาแรฮ รอจ กะ ญาวา นะ กาเญา_ บือกะ รีโบจ ลาฆู ฌาฮานัม นะ กาเญา_ รอจ บือกะ ตือบีโยก กาลา ลาฆู ซูซัฮ ฮาตี_ นู ปายัฮ โตระ_ ญา มาแรฮ รอจ กะ กาเญา.

²⁸ กะฆีเตอ_ กูญา นะ บลาโลก กะ กู_ ตาปี กู ฮอย เตด ตีกัฮ กูญา นะ ซารี กู_ ตาปี ฮอย เตด ดาปัจ กู เลอ.

²⁹ กรานา กูญา บือชี กะ ลาฆู ตาฮู บาฌิ ตีเมา ปีเลฮ_ กะ ลาฆู นู บรีงัจ ตาโกจ เดะ ตูฮัด บือซัยํ เดะ อาตัซ.

³⁰ กูญา ตีเมา ซาโมจ_ ปือมือเลา อาฌัยํ นะ กู เลอ ตาปี อาเลฮ มาแรฮ มือฌัฮ_ กะ ปือมือเลา บลารัก นะ กู.

³¹ กะฆีเตอ กูญา นะ มากัด บูวัฮ_ เดะ ฌาลัด นะ กูญา ตะอาซิก กูญา นะ กือญัง_ เดะ ลาฆู ปือบูวัจ นะ กูญา.

³² กรานา โกะ ซือมียา ตาฮู ดีกิ_ นะ กือนา บูนอฮ_ ซาเบะ กูญา อาเลฮ ตีงัน_ ฌาลัด นู รือมัก บาฌิ เลอ โกะ ซือมียา บูดอ_ นู ซือซัจ_ บรามัย ซูกา ฮาตี เตอ โปด_ กือนา บูวัจ บรี ฌาฮานัม ดัฮ.

³³ ตาปี โกะ ซือมียา นู มือนีงัย กะ กู เตอ_ อาดา ดูโดะ ซือนัง ซือลามัจ กูญา อาดา ลาฆู ดูโดะ ซืองะ บาฌิ_ ฮอย เตด บรีงัจ บาญะ_ กะ ลาฆู ฌาฮัจ เลอ.”