ฟีลิบปี 3 - ซูรัจ ปือมือเลา นะ ตูฮัด

นะ บาฌิ ตือปัจ ฌางัน ตูฮัด

¹ โกะ ดีบราดี นะ กู เออ_ โซะ ปือญูดัฮ_ บรี กาเญา ซูกา ฮาตี_ กรานา ตูฮัด เลอ. นู กู นะ ฆาแรฮ ลาฆู อีนี กะ กาเญา ปูลัก_ เตด ฌาดี ลาฆู ปายัฮ นะ กู โปด_ ตาปี นะ บรี กาเญา ลือปัซ_ เตด บือนาซา ดัฮ.

² บรี กาเญา ฌาฆา เลอ_ ลูมอฮ ซือมียา นู ซือรูปา กะ อาซู. ฌาฆา เลอ_ ซือมียา นู บูวัจ ลาฆู ฌาฮัจ. ฌาฆา เลอ_ ซือมียา นู ซายัจ ลูลู เดะ ญาวา.

³ บูกัด กูญา อีตู_ ตาปี กีตา นี เลอ_ นู ซาโมจ ลาฆู กรัจ นู ซูโงฮ เตอ. ซาเบะ กีตา เลอ_ นู มือญือมัฮ กะ ตูฮัด เดะ อาตัซ_ บือกะ ซือมืองัจ นะ ญา บาวา เตอ_ นู ซูกา ฮาตี บือตืองัน ลาฆู นะ เยซู คริด เตอ_ นู เตด ตือตู ฮาตี เดะ ลาฆู โซะ ญาวา เตอ.

⁴ ตาปี กู เลอ_ บือเลฮ ตือตู ฮาตี เดะ ลาฆู โซะ ญาวา. ดัฮ อาดา ซือมียา อาซิก อีงัจ จะ_ ญา บือเลฮ ตือตู ฮาตี เดะ ลาฆู โซะ ญาวา_ กู โปด_ ลือเบฮ เดะ ญา.

⁵ ฌาดี จะ_ กู ซาโมจ ลาฆู กรัจ_ วะตู อูมอยํ นะ กู ลาปัด อารี ดัฮ เตอ_ กู บือฌาดี ดัฮ_ ฌาดี ซือมียา บักซา อิซราเอน เตอ_ ฌาดี ซือมียา เดะ บือแนฮ นะ เบนยามิน_ ฌาดี ซือมียา บักซา ฮีบรู ซูโงฮ เตอ. เดะ ลาฆู ตูโรจ กะ ปือมือเลา ฮูโกบ นะ ตูฮัด เตอ_ กู ฌาดี ซือมียา ลูมอฮ ฟาริซี นู ตูเฮะ ซูโงฮ ดัฮ.

⁶ นู กู ตูเฮะ ซือซูโงฮ_ ฌู ยอม ปรือกัด โกะ ลูมอฮ นะ ตูฮัด เตอ. ดัฮ ซือมียา นะ บาฌิ ตือปัจ บือเลฮ_ ซาเบะ ญา ตูโรจ กะ ปือมือเลา ฮูโกบ เตอ_ กู เลอ_ ฌาดี ซือมียา นู ฮอย ซาลัฮ ดัฮ.

⁷ ตาปี บือนา อีตู_ นู กู ดือละ อีงัจ ดัฮ_ บือนา ตือปากัย เตอ_ บารู กู อีงัจ จะ_ ฌาดี บือนา นู ฮอย เตด ตือปากัย_ กรานา เยซู คริด เตอ เลอ.

⁸ ซูโงฮ เลอ_ กู อีงัจ จะ_ บือนา ซือมูฮา_ ฌาดี บือนา นู ฮอย เตด ตือปากัย ดัฮ. ซาเบะ กู กีรา จะ_ นู นะ กราลา เยซู คริด_ ตูฮัด นะ กู เตอ_ บาฌิ ซูโงฮ_ ลือเบฮ เดะ บือนา อาซิก ซือมูฮา. กรานา เยซู เตอ_ กู กือนา ซรัฮ ตีงัน บูวัก บือนา ซือมูฮา อีตู_ กีรา จะ_ บือนา ซือมูฮา อีตู_ ฌาดี บือนา รูบือฮีรู_ นู ฮอย เตด ตือปากัย_ บรี กู นะ บือเลฮ เยซู คริด_

⁹ นะ บรี ลีฮัจ จะ_ กู อาดา ลือกัจ บือซามา ฌางัน ญา เลอ. กะฆีเตอ กู ฌาดี ซือมียา นู บาฌิ ตือปัจ ฌางัน ตูฮัด_ บูกัด ซาเบะ กู ตะอาซิก บูวัจ ตูโรจ กะ ปือมือเลา ฮูโกบ เตอ_ ตาปี ซาเบะ กู ปือจายา กะ เยซู คริด ดัฮ. กะฆีเตอ_ ตูฮัด เดะ อาตัซ_ บูวัจ บรี ฌาดี ซือมียา บาฌิ ตือปัจ_ ซาเบะ ปือจายา ดัฮ.

¹⁰ กะฆีเตอ_ กู บือคานะ นะ กราลา เยซู คริด เตอ_ นะ กราลา ลาฆู ปือมือฆัฮ_ นู ญา ฮีโดะ ปาเระ เดะ มาตี ดัฮ เลอ. กู บือคานะ นะ อาดา บาฮาเฆด เดะ ลาฆู_ นู ญา ตาฮัด ซูซัฮ ดัฮ_ ฌาดี จะ_ กู ยอม มาตี ซือรูปา บือกะ เยซู เตอ_

¹¹ จาดัก จะ_ กะฮามีๆ เลอ_ กู นะ รอจ กะ ลาฆู ฮีโดะ ปาเระ เดะ มาตี ฌูฆา.

ญา บลารี รอจ กะ ตือปัจ ญา ตือนอง อีตู

¹² บูกัด จะ_ กู รอจ ดัฮ. บูกัด จะ_ กู ซุจ บาฌิ ดัฮ. ตาปี เยซู คริด ญา จาปัย ปือฆัก กู ดัฮ_ นะ บรี กู รอจ กะ ลาฆู ฮีโดะ ปาเระ เดะ มาตี อีตู. กะฆีเตอ_ กู บลารี ปี_ ตือนอง รือมักๆ_ บีดา กู นะ จาปัย ปือฆัก ลาฆู อีตู บือเลฮ.

¹³ ดีบราดี เออ_ กู เตด อีงัจ จะ_ นู กู จาปัย บือเลฮ ฮาบิฮ ดัฮ_ ตาปี กู บูวัจ ซา ลาฆู อีนี_ ฌาดี จะ_ บือนา นู ลือปัซ ดัฮ_ กู เตด อาเมด มาแรฮ อีงัจ ปูลัก_ ตาปี บือนา นู โซะ ฮือลด อีตู_ กู นะ กือวาซา อาเงา ตางัน อาเมด เลอ.

¹⁴ กู ตืองัฮ บลารี ตือนอง ปี รือมักๆ_ นะ รอจ กะ กือนีรา_ บีดา นะ บือเลฮ รังวัน. รังวัน อีตู ฌาดี กะฆีนี จะ_ นู ตูฮัด เดะ อาตัซ ญา ซูโรฮ เยซู คริด ปาเงน กู_ บรี ดูโดะ เดะ อาตัซ ลาแงะ.

¹⁵ กะฆีเตอ_ บรี กีตา นู ฌาดี ซือมียา บือซัยํ_ อาดา กีรา กะฆีเตอ. ดัฮ กาเญา อีงัจ ลาฆู อาซิก_ เดะ ลาฆู นามา โปด_ ตูฮัด เดะ อาตัซ_ นะ บูวัจ บรี กาเญา ลีฮัจ_ ลาฆู อีตู ซัฮ ดัฮ.

¹⁶ ตาปี กีตา รอจ กะ ตือกอซ ดีฮา ดัฮ_ บรี กีตา ตูโรจ ฌาลัด ปี_ เดะ โซะ อีตู เลอ.

¹⁷ ดีบราดี เออ_ บรี กาเญา บือซามา ตูโรจ กะ จูตอ นะ กู เลอ. กือนา บือฮีมัจ กะ โกะ ซือมียา_ นู บูวัจ ตูโรจ ลาฆู อีนี_ ซือรูปา กาเญา อาดา ลูมอฮ กามี ฌาดี จูตอ ดัฮ.

¹⁸ นู กู มือญาเระ กะ กาเญา_ ซือกาลี ดัฮ_ วะตู อีนี_ กู มือญาเระ ปูลัก_ ซาแมน มือนาแงฮ_ มือเลา จะ_ อาดา ซือมียา บาญะ_ นู ฌาดี ซือตรู บือลาวัด ฌางัน กายู ปลีตัก นะ เยซู คริด.

¹⁹ โซะ ฮูโฌก ฌาลัด_ กูญา นะ รอจ กะ ฌาฮานัม. กูญา บูวัจ ซือรูปา โปรจ กูญา ฌาดี ตูฮัด นะ กูญา. กูญา อาเมด ลาฆู ปือจือและ นะ กูญา มาแรฮ_ บือตืองัน กะ ลาฆู อีตู. กูญา ซือมาตา อีงัจ ลาฆู โซะ ดือนียา อีนี เลอ.

²⁰ ตาปี กีตา อีนี_ ฌาดี ซือมียา นังฆรี โซะ ลาแงะ. กีตา บือนาตี ซือมียา นู นะ ตูโลก บรี ลือปัซ_ นู นะ มาแรฮ ดาตัก เดะ โซะ อาตัซ. ญา เตอ เลอ_ ฌาดี เยซู คริด_ ตูฮัด นะ กีตา.

²¹ ญา นะ ซาเลด ญาวา นู ลือมัฮ นะ กีตา อีนี_ บรี ฌาดี บารู_ ซือรูปา ญาวา นู บือซรี นะ ญา. ญา มือฆัฮ โตระ_ นะ บูวัจ กะฆีเตอ_ ซือรูปา บือกะ นู นะ บูวัจ บรี บือนา ซือมูฮา_ อาดา เดะ บาวัฮ ฮูโกบ นะ ญา.