ฟีลิบปี 1 - ซูรัจ ปือมือเลา นะ ตูฮัด1 กู เปาโล ฌางัน ทิโมที_ นู ฌาดี ปราโซฮ นะ เยซู คริด กามี ฆาแรฮ ซูรัจ อีนี_ กีเรบ บรี กะ กาเญา_ นู ฌาดี โกะ ซือมียา นะ ตูฮัด_ ลือกัจ บือซามา ฌางัน เยซู คริด_ นู ดูโดะ เดะ นังฆรี ฟีลิบปี เตอ_ กะ โกะ ซือมียา ปือบือลา ลูมอฮ กาเญา_ ฌางัน ลูมอฮ ซือมียา มือนูโลก นะ กาเญา ซามา. 2 มีตา เดะ ตูฮัด_ อาโปก นะ กีตา_ ฌางัน ตูฮัด เยซู คริด_ นะ บรี ซือลามัจ กะ กาเญา_ นะ บรี กาเญา ดูโดะ ซือนัง ซือลามัจ เลอ. เปาโล บือซาโวจ บีดา ลูมอฮ นะ ตูฮัด เดะ นังฆรี ฟีลิบปี 3 บีลัก กาลี_ นู กู อีงัจ กะ กาเญา_ กู บรี ซือลามัจ กะ ตูฮัด นะ กู. 4 บีลัก กาลี_ นู กู บือซาโวจ บีดา กาเญา ซือมูฮา_ กู บือซาโวจ_ ซูกา ฮาตี ซูโงฮ_ 5 ซาเบะ ตะเดะ อารี ลามูลา รอจ กะ อารี อีนี_ กาเญา บือซามา ฌางัน กู_ เดะ ลาฆู มือญาเระ บรีตา นู บาฌิ นะ เยซู. 6 กู ตือตู ฮาตี จะ_ ตูฮัด นู ฮึนตะ นะ บูวัจ กรือฌา นู บาฌิ_ เดะ ฮาตี นะ กาเญา ดัฮ_ ญา นะ บือกรือฌา_ ตือดะ ซุจ ดัฮ_ เดะ อารี นะ เยซู คริด เลอ. 7 นู กู ตือตู ฮาตี กะฆีเตอ_ บาฌิ ดัฮ_ ซาเบะ กู ซายัก กาเญา_ ปือนอฮ เดะ ฮาตี_ ราตา ซือมียา. กรานา เตด จะ กู กือนา ดูโดะ เดะ ปือฌารา_ เฆอ จะ อาดา จือลัฮ นะ ฌาฆา บรีตา นู บาฌิ นะ ตูฮัด_ บูวัจ บรี ญา ตืองะ กือฌะ กือมัซ ตือตู ดัฮ เตอ_ กาเญา ซือมูฮา บือเลฮ ซาโมจ บาฮาเฆด_ บือซามา ฌางัน กู ดัฮ_ เดะ ลาฆู นู ตูฮัด ฮาลัย บรี ซือลามัจ กะ กู เตอ เลอ. 8 ตูฮัด ฌาดี ซะซรี_ นู กู อีงัจ ฌิราซา กะ กาเญา_ ซือรูปา บือกะ เยซู คริด ซายัก กาเญา. 9 กะฆีเตอ_ กู บือซาโวจ กรานา กาเญา_ นะ บรี กาเญา ซายัก บือตามัฮ พรัด บาญะๆ เลอ_ นะ บรี กาเญา ปานัย อากัน เตอ_ ตาฮู ราตา มาจับ จะ_ นู ดีฮา บาฌิ_ นู ดีฮา ฌาฮัจ. 10 กะฆีเตอ_ กาเญา นะ บือเลฮ บรีงัจ ดูลู_ ลาฆู นามา นู บาฌิ เดะ กาวัด_ บูวัจ บรี กาเญา นะ ฌาดี ซือมียา ฮาตี จรัฮ ซูโงฮ เตอ_ ฮอย ลาฆู นู นะ กือนา มือฌัฮ เตอ_ เดะ อารี นะ เยซู คริด อีตู. 11 กะฆีเตอ_ กาเญา นะ อาดา บูวัฮ_ นู ฌาดี ลาฆู บาฌิ ตือปัจ_ ปือนอฮ เดะ ฮาตี. เยซู คริด นะ บูวัจ บรี ฌาดี กะฆีเตอ_ นะ บรี ลูมอฮ ซือมียา มือโอจ กะ ตูฮัด เดะ อาตัซ_ นะ ปูฌี กะ ญา. นู กู ฮีโดะ ฌาดี นามา? ฌาดี เยซู คริด เตอ เลอ 12 ดีบราดี เออ_ กู บือคานะ นะ บรี กาเญา ตาฮู จะ_ ลาฆู นามา ซือมูฮา_ นู กู กือนา ดัฮ_ บูวัจ บรี บรีตา นู บาฌิ นะ ตูฮัด_ กรือจัย ปี ราตา. 13 กะฆีเตอ_ ลูมอฮ ตาฮัน เดะ บาลัย นะ ราฌา ซือมูฮา_ ฌางัน ซือมียา อาซิก ปัจ อีนี_ ซือมูฮา_ ตาฮู บรี ซัฮ จะ_ นู กู อาดา เดะ ราตัย ดัฮ_ กรานา เยซู คริด เตอ. 14 ลาฆู นู กู กือนา ราตัย_ บูวัจ บรี ลูมอฮ ดีบราดี นู บาญะ_ ตือตู ฮาตี เดะ ตูฮัด_ บูวัจ บรี กูญา พรัด บรานี_ นู นะ มือญาเระ ปือมือเลา นะ ตูฮัด_ เตด ตาโกจ เดะ ซาปา เลอ. 15 ซูโงฮ_ อาดา ซือตืองัฮ นู มือญาเระ_ ลาฆู นะ เยซู คริด_ ฌางัน ฮาตี ดือกี_ ฮาตี บือตือฆัฮ. ตาปี อาดา ซือตืองัฮ นู มือญาเระ_ ฌางัน ฮาตี บาฌิ. 16 กูญา อีนี บูวัจ กะฆีเตอ_ ซาเบะ ซายัก กะ กู_ ลีฮัจ จะ_ กู อาดา ปัจ อีนี_ บรี อูฆัย ลาฆู_ นู กูญา อาดู ปาซัน บรีตา นู บาฌิ นะ ตูฮัด. 17 กูญา อีตู_ นู มือญาเระ ลาฆู นะ เยซู คริด ซีงี_ อีงัจ นะ บือเลฮ บาฌิ เดะ กาวัด_ ฮาตี กูญา เตด รือมัก เลอ. กูญา อีงัจ นะ บรี กู กือนา ซูซัฮ บือตามัฮ ลาฆี_ วะตู นู กู อาดา ดูโดะ เดะ ราตัย กะฆีนี. 18 ดัฮ กะฆีเตอ_ เตด ฌาดี นามา เลอ. กูญา ตืองัฮ บรี ตาฮู ลาฆู นะ เยซู คริด. อาดา นู ฮาตี เตด รือมัก ซือตืองัฮ_ ฮาตี รือมัก ซือตืองัฮ. ตาปี กู ซูกา ฮาตี_ ซาเบะ กูญา มือญาเระ ลาฆู นะ เยซู_ ราตา มาจับ. ซูโงฮ_ กู นะ ซูกา ฮาตี โตระ โซะ ฮือลด_ 19 กรานา กู ตาฮู จะ_ นู กาเญา บือซาโวจ เตอ_ นู ซือมืองัจ นะ เยซู คริด ตูโลก เตอ_ นะ ตูโลก กู บรี ลือปัซ ดัฮ. 20 กู อีงัจ ซือซูโงฮ_ จาดัก จะ_ กู นะ ฮอย เตด จือและ มานามา โปด. ซือรูปา ดูลู_ นู กู ฮาตี บรานี_ บูวัจ บรี กูญา มือโอจ กะ เยซู คริด เตอ_ บรี กู ฮาตี บรานี กะฆีเตอ_ วะตู อีนี ฌูฆา. เตด จะ_ ญาวา กู นะ ฮีโดะ_ นะ มาตี โปด_ เตด นามา. 21 นู กู ฮีโดะ ฌาดี นามา? ฌาดี เยซู คริด เลอ. นู กู มาตี โปด_ บีดา นะ บือเลฮ อูโตก เลอ. 22 ดัฮ ญาวา กู นะ ฮีโดะ ลาฆี_ บาฌิ เลอ_ กู นะ บือกรือฌา บรี อาดา บูวัฮ บาญะ. ตาปี กู อีงัจ เตด กือนา_ นะ ปีเลฮ โซะ ดีฮา. 23 กู ฆาโดฮ ฮาตี_ เดะ โซะ ดูวา ฌาลัด อีนี. โซะ อีนี_ กู ซูกา ฮาตี นะ มือนีงัน_ ปี ดูโดะ บือซามา ฌางัน เยซู คริด. นะ ฌาดี กะฆีเตอ_ ซูโงฮ_ บาฌิ ลาฆี เลอ. 24 ตาปี โซะ อาซิก_ กู ฆาฆัฮ นะ ฮีโดะ เดะ ญาวา อีนี ลาฆี_ บรี กู นะ บือเลฮ ตูโลก กาเญา ปูลัก. 25 กู ตือตู ฮาตี กะฆีนี ดัฮ. กะฆีเตอ_ กู ตาฮู จะ_ กู นะ ฮีโดะ ลาฆี_ นะ ฮีโดะ บือซามา ฌางัน กาเญา_ บรี กาเญา นะ ปือจายา บาฌิ ซือรูโลยํ_ นะ ซูกา ฮาตี เดะ ลาฆู ปือจายา อีตู เลอ. 26 กะฆีเตอ_ วะตู กู มาแรฮ ดาปัจ กาเญา ปูลัก_ กาเญา นะ บือเลฮ งันตืองัน เดะ เยซู คริด ลือเบฮ บาญะ_ ซาเบะ ลาฆู นะ กู. 27 กะฆีเตอ เลอ_ บรี กาเญา บูวัจ ตูโรจ_ บือกะ นู ปาโตจ ฌางัน บรีตา นู บาฌิ นะ เยซู คริด. กะฆีเตอ_ เตด จะ กู นะ มาแรฮ ดาปัจ กาเญา_ เตด มาแรฮ ดาปัจ โปด_ ตาปี กู นะ ดืองัยํ ลาฆู นะ กาเญา จะ_ นู กาเญา ซือรูปา ลูมอฮ ตาฮัน นู บือดีรี บือซามา_ ฮาตี รือมัก เตอ_ นู บือซามา ฮาตี บือลาวัด_ กรานา บรีตา นู บาฌิ_ นู กาเญา ปือจายา ดัฮ_ 28 นู เตด ตาโกจ นามา_ เดะ ลูมอฮ ซือตรู เตอ. นู บูวัจ กะฆีนี_ นะ ฌาดี ปือนานา_ บูวัจ บรี กูญา ลีฮัจ จะ_ กูญา นะ บือนาซา_ กาเญา นะ ฮีโดะ ลือปัซ บาฌิ. ฌาดี ตูฮัด เดะ อาตัซ_ นู บรี ลือปัซ กะฆีเตอ. 29 กรานา ญา เตอ_ ฮาลัย บรี กาเญา นะ ตูโรจ กะ เยซู คริด_ บูกัด ซา ปือจายา กะ ญา เตอ_ ตาปี บรี ตาฮัด ซูซัฮ กรานา ญา ฌูฆา. 30 กะฆีเตอ_ กาเญา นะ บือลาวัด_ ซือรูปา นู กาเญา ลีฮัจ กู บือลาวัด ดัฮ_ บือกะ กาเญา ดืองัยํ จะ_ กู ตืองัฮ บือลาวัด เดะ วะตู อีนี. |