กีรา 1 - ซูรัจ ปือมือเลา นะ ตูฮัดกีรา ลูมอฮ อิซราเอน เดะ บูเกะ ซีนัย 1 เดะ อารี ซา_ บูลัด ดูวา_ ตาโฮด นู ดูวา_ กีรา ตะเดะ กูญา ตรือเบะ เดะ นังฆรี อียิบ_ ตูฮัด บือซัยํ เดะ อาตัซ_ ญา มือเลา ฌางัน มูซา_ เดะ รูมัฮ ซาเราะ บือฌาญี บือดาปัจ_ โซะ ตานัฮ ตูโฮยํ เดะ ซีนัย_ จะ_ 2 “เกา กือนา บูวัจ ซูรัจ มือญาซัจ ลูมอฮ อิซราเอน ซือมูฮา_ ตูโรจ กะ บือแนฮ_ ตูโรจ กะ ปือนามา นะ กีลากี ซือมูฮา เลอ. 3 เกา ฌางัน อาโรน_ กือนา กีรา ราตา ซือมียา เดะ อิซราเอน_ นู อูมอยํ นะ กูญา ตะเดะ ดูวา ปูโลฮ (20) ตาโฮด_ ญาแญะ ปี_ บือกาวัดกาวัด_ นู นะ บือปรัก บือเลฮ เตอ. 4 บรี อาดา กีลากี ราตา ปาลัฮ_ บือซามา ฌางัน กาเญา_ ซา ปาลัฮ ซา อูรัก_ ฌาดี กือปาลา รูมัฮ นะ กูญา เลอ. 5 อีนี ฌาดี ปือนามา นะ กีลากี_ นู นะ มาแรฮ ตูโลก กาเญา เตอ_ ฌาดี เอลีซู_ นานะ เชเดเออ_ เดะ ปาลัฮ รูเบน. 6 เชลูมีเอน_ นานะ ซูรีชัดดัย_ เดะ ปาลัฮ ซีเมโอน. 7 นาโชน_ นานะ อัมมีนาดับ_ เดะ ปาลัฮ ยูดา. 8 เนทันเอน_ นานะ ซูอาระ_ เดะ ปาลัฮ อีซาคา. 9 เอลียับ_ นานะ เฮโลน_ เดะ ปาลัฮ เซบูลุน. 10 ดาตัก เดะ บือแนฮ นะ โยเซบ_ อาดา เอลีชามา_ นานะ นะ อัมมีฮูด_ ดาตัก เดะ ปาลัฮ นะ เอฟราอิม_ อาดา ฌางัน กามาลีเอน_ นานะ นะ เปดาชู_ เดะ ปาลัฮ มานาเซฮ. 11 อาบีดัน_ นานะ กิเดโอนี_ เดะ ปาลัฮ เบนยามิน. 12 อาฮิเยเซอ_ นานะ อัมมีชัดดัย_ เดะ ปาลัฮ ดาน. 13 ปากีเอน_ นานะ โอคราน_ เดะ ปาลัฮ อาเซอ. 14 เอลียาซับ_ นานะ เดอูเอน_ เดะ ปาลัฮ กาด 15 อาฮีรา_ นานะ เอนัน_ เดะ ปาลัฮ นับทาลี. 16 โกะ ลูมอฮ ซือมียา อีนี_ ฌาดี ซือมียา นู กือนา ปีเลฮ ดัฮ_ เดะ ลูมอฮ บักซา อิซราเอน_ ฌาดี กือปาลา ปาลัฮ นะ กูญา_ ฌาดี กือปาลา เดะ บือแนฮ บักซา อิซราเอน เลอ.” 17 มูซา ฌางัน อาโรน_ บาวา โกะ ซือมียา อีนี_ นู กือนา ปีเลฮ ดัฮ_ ตูโรจ กะ ปือนามา นะ กูญา. 18 เดะ อารี ซา_ บูลัด ดูวา_ กูญา อีนี โปด_ บลาโลก โกะ ลูมอฮ บือมุน ซือมูฮา_ นู มาแรฮ บรี กือนา กีรา_ ตูโรจ กะ บือแนฮ_ ตูโรจ กะ ซือมียา เดะ ดาลับ ซือรูมัฮ นะ กูญา_ ตูโรจ กะ ปือนามา นะ ซือมียา_ ตะเดะ อูมอยํ ดูวา ปูโลฮ (20) ตาโฮด ญาแญะ ปี เลอ 19 ซือรูปา บือกะ นู ตูฮัด บือซัยํ เดะ อาตัซ_ ญา ปือซัด ฌางัน มูซา ดัฮ. กะฆีเตอ ญา กีรา โกะ ซือมียา_ เดะ ตือปัจ ตานัฮ ตูโฮยํ นู ลือฆา_ เดะ ซีนัย_ กะฆีนี เลอ. 20 บือแนฮ นะ รูเบน_ นานะ ซูโลก นะ อิซราเอน_ บือแนฮ บักซา นะ กูญา_ ตูโรจ กะ บักซา_ ตูโรจ กะ บือแนฮ_ ฮาโตย ฌาดี ซือมียา_ ตูโรจ กะ ปือนามา นะ โกะ กีลากี ซือมูฮา_ นู ตรือเบะ ปี บือปรัก บือเลฮ_ นู อาดา อูมอยํ ตะเดะ ดูวา ปูโลฮ (20) ตาโฮด ญาแญะ ปี เลอ 21 โกะ ซือมียา เดะ ปาลัฮ นะ รูเบน ซือมูฮา_ อาดา ปัจ ละซา นัม รีบู ลีมา ราตุซ (46,500) อูรัก เลอ. 22 บือแนฮ นะ ซีเมโอน_ ฌาดี โกะ ซือมียา บือกะฆีเตอ_ 23 เดะ ปาลัฮ นะ ซีเมโอน_ อาดา ลีมา ละซา ซือมีลัด รีบู ตีฆา ราตุซ (59,300) อูรัก. 24 บือแนฮ นะ กาด_ 25 เดะ ปาลัฮ กาด เตอ_ อาดา ปัจ ละซา ลีมา รีบู นัม ราตุซ ลีมา ปูโลฮ (45,650) อูรัก. 26 บือแนฮ นะ ยูดา_ 27 เดะ ปาลัฮ ยูดา_ อาดา ตูโฌฮ ละซา ปัจ รีบู นัม ราตุซ (74,600) อูรัก. 28 บือแนฮ นะ อีซาคา_ 29 เดะ ปาลัฮ อีซาคา_ อาดา ลีมา ละซา ปัจ รีบู ปัจ ราตุซ (54,400) อูรัก. 30 บือแนฮ นะ เซบูลุน_ 31 ปาลัฮ เซบูลุน_ อาดา ลีมา ละซา ตูโฌฮ รีบู ปัจ ราตุซ (57,400) อูรัก. 32 บือแนฮ บักซา โยเซบ_ ฌาดี จะ_ 33 เดะ ปาลัฮ เอฟราอิม_ อาดา ปัจ ละซา ลีมา ราตุซ (40,500) อูรัก. 34-35 เดะ ปาลัฮ บือแนฮ นะ มานาเซฮ_ อาดา ตีฆา ละซา ดูวา รีบู ดูวา ราตุซ 32,200 อูรัก. 36 บือแนฮ นะ เบนยามิน_ 37 เดะ ปาลัฮ เบนยามิน_ อาดา ตีฆา ละซา ลีมา รีบู ปัจ ราตุซ (35,400) อูรัก. 38 บือแนฮ นะ ดาน_ 39 เดะ ปาลัฮ ดาน_ อาดา นัม ละซา ดูวา รีบู ตูโฌฮ ราตุซ (62,700) อูรัก. 40 บือแนฮ นะ อาเซอ_ 41 เดะ ปาลัฮ อาเซอ_ อาดา ปัจ ละซา ซือรีบู ลีมา ราตุซ (41,500) อูรัก. 42 บือแนฮ นะ นับทาลี_ 43 เดะ ปาลัฮ นับทาลี_ อาดา ลีมา ละซา ตีฆา รีบู ปัจ ราตุซ (53,400) อูรัก. 44 โกะ ลูมอฮ อีนี ฌาดี ซือมียา นู มูซา ฌางัน อาโรน_ ฌางัน โกะ กือปาลา ดูวา บือลัซ (12) อูรัก นะ อิซราเอน_ นู ฆาตี ปาลัฮ นะ กูญา เตอ_ บือเลฮ กีรา ดัฮ 45 กะฆีเตอ ลูมอฮ อิซราเอน ซือมูฮา_ บือเลฮ กีรา_ ตูโรจ โกะ ซือมียา ซือรูมัฮ_ ตูโรจ กะ ซือมียา นู อาดา อูมอยํ ตะเดะ ดูวา ปูโลฮ (20) ตาโฮด_ ญาแญะ ปี_ ราตา อูรัก เดะ อิซราเอน นู ตรือเบะ บือปรัก บือเลฮ 46 โกะ ซือมียา ซือมูฮา_ อาดา นัม อูรัจ ตีฆา รีบู ลีมา ราตุซ ลีมา ปูโลฮ (603,550) อูรัก. กือนา ตืองะ ลูมอฮ เลวี บรี ฮัจลีฮัจ รูมัฮ มือญือมัฮ 47 ตาปี กูญา เตด บือเลฮ กีรา ซือกาลี ฌางัน โกะ ลูมอฮ เลวี_ ตูโรจ กะ ปาลัฮ นะ โกะ บีลาแก นะ กูญา_ 48 ซาเบะ ตูฮัด บือซัยํ เดะ อาตัซ_ บือเลฮ มือเลา ฌางัน มูซา_ จะ_ 49 “ซา ปาลัฮ เลวี_ เกา ฌางัน กีรา_ ฌางัน บีลัก บรี ตาฮู อาดา บราปา อูรัก_ บือซามา ฌางัน ลูมอฮ อิซราเอน. 50 ตาปี เกา กือนา ตืองะ ลูมอฮ เลวี_ บีดา ฮัจลีฮัจ รูมัฮ มือญือมัฮ_ ฌาดี รูมัฮ เดะ ปือมือเลา ฌาดี ซะซรี_ บีดา ฮัจลีฮัจ โกะ ซือบารัก นะ ซูโรฮ ราตา ฌือแนฮ_ เดะ ปาซัน รูมัฮ มือญือมัฮ. บรี กูญา บราโกจ รูมัฮ มือญือมัฮ_ ฌางัน โกะ ซือบารัก นู นะ บือกรือฌา เดะ รูมัฮ อีตู_ ตืองะ รูมัฮ กาฌัก กือลีลิก รูมัฮ มือญือมัฮ อีตู. 51 กาลา นะ อาเกะ รูมัฮ มือญือมัฮ อูบัฮ ปี_ ลูมอฮ เลวี นะ ฆาโดฮ ปรูโตฮ ดูลู. กาลา นะ ตืองะ รูมัฮ มือญือมัฮ โปด_ บรี กะ ลูมอฮ เลวี ฌาดี ซือมียา ตืองะ. ซือมียา วัยํลูวัยํ_ นู มาแรฮ ดาปิก รูมัฮ มือญือมัฮ_ ซือมียา อีตู นะ กือนา กรัจ ฮูโกบ รอจ กะ มาตี. 52 บรี กะ ลูมอฮ อิซราเอน_ ตืองะ รูมัฮ กาฌัก_ ตูโรจ บือกะ ซอก ซา กาวัด_ ซิกมาซิก ตูโรจ บือกะ ตือปัจ นะ กูญา_ ตูโรจ กะ ฆือนีรา ปาลัฮ นะ กูญา. 53 ตาปี บรี กะ ลูมอฮ เลวี_ ตืองะ รูมัฮ กาฌัก_ กือลีลิก รูมัฮ มือญือมัฮ นะ ปือมือเลา ซะซรี_ บีดา ตีเมา บรี ลาฆู มูซัยํ อาดา เดะ อาตัซ ลูมอฮ อิซราเอน. บรี กะ ปาลัฮ เลวี_ บือกรือฌา ฌาฆา รูมัฮ มือญือมัฮ นะ ปือมือเลา ซะซรี.” 54 ลูมอฮ อิซราเอน โปด_ บูวัจ กะฆีเตอ_ ตูโรจ บือกะ นู ตูฮัด บือซัยํ เดะ อาตัซ_ บือเลฮ ปือซัด มูซา ดัฮ_ ราตา ฌือแนฮ. |