นาฮูม 1 - ซูรัจ ปือมือเลา นะ ตูฮัด

¹ ปือมือเลา นู บรัจ ปาซัน นังฆรี นีนะเว_ ฌาดี ซูรัจ ปาซัน ลาฆู มีปี นะ นาฮูม_ ซือมียา ลูมอฮ ตูโปะ เอนโคชะ.

ลาฆู มูซัยํ บืออีเซด นะ ตูฮัด

² ตูฮัด บือซัยํ เดะ อาตัซ_ ฌาดี ตูฮัด นู ซายัก โตระ_ นู บูวัจ บาลัซ ตูฮัด ญา บูวัจ บาลัซ_ ญา อาดา ลาฆู มูซัยํ ตูฮัด บือซัยํ เดะ อาตัซ ญา บาลัซ กะ ซือตรู นะ ญา ญา เตด รือดา ลาฆู มูซัยํ บรี กะ ซือตรู นะ ญา.

³ ตูฮัด บือซัยํ เดะ อาตัซ ญา มูซัยํ ลามัจ_ ตาปี ญา มือฆัฮ โตระ ตูฮัด ญา นะ เตด ปลือปัซ บรี ซือมียา ซาลัฮ เตด ฆาโดฮ กือนา กรัจ ฮูโกบ. ฌาลัด นะ ญา อาดา เดะ อาเงน ตือบีโยก_ เดะ รีโบจ บือซัยํ กือมูวัง ฌาดี ฮาบู เดะ ตาปะ กากี นะ ญา.

⁴ ญา บลารัก ลาโวจ_ บูวัจ บรี ญา กริก บูวัจ บรี กะ ซูงัย ซือมูฮา ตูโฮยํ ดัฮ. บาซาน ฌางัน คาระเมน โปด_ จีรอจ ฌามัยํ ดามูดา นะ เลบานอน โปด_ ลายู เลอ.

⁵ โซะ ฮือลด มูคา นะ ตูฮัด_ โกะ บูเกะ บรีเงาะ บีดิก บูเกะ โปด_ ลือปัฮ ดือนียา โปด_ บือฆาญัยํ_ โซะ ฮือลด มูคา นะ ตูฮัด จะ ดือนียา ฌางัน ราตา ซือมียา นู ดูโดะ เดะ ดือนียา ฌูฆา.

⁶ ซาปา นะ ตาฮัด ลาฆู มูซัยํ นะ ตูฮัด บือเลฮ? นู ญา บืออีเซด_ ซาปา นะ ตาฮัด ลาฆู ฮางัจ บือเลฮ? ลาฆู มูซัยํ นะ ญา ตรือเบะ บาญะ บือกะ อาปี ญา บูวัจ บรี โกะ บาตู ปือจัฮ ฮาโจยํ.

⁷ ตูฮัด บือซัยํ เดะ อาตัซ ญา บาฌิ ซูโงฮ ฌาดี ตือปัจ ลีนง นู กือฌะ กือมัซ เดะ วะตู ซูซัฮ ปายัฮ ญา ฌาฆา ฮัจลีฮัจ ซือมียา นู มาแรฮ บือลีนง เดะ ญา.

⁸ ตาปี ญา นะ บูวัจ บรี ซือตรู นะ ญา ลือแงะ ปี ฮาบิฮ ฌางัน อาเย อาโปฮ นู มือนีแลฮ ปือนอฮ ดัฮ นะ โปรฮ บรี ซือมียา นู ลาวัด ญา มาโซะ ปี เดะ ลาฆู กือลับ.

⁹ กาเญา บรีงัจ ลาฆู ตีปู นามา ลาวัด ตูฮัด บือซัยํ เดะ อาตัซ? ตูฮัด นะ บูวัจ บรี ฌาฮานัม ปี ฮาบิฮ ฮอย ซือตรู นะ ตีโมน ญาแญะ มาโซะ กะ ดูวา กาลี.

¹⁰ กูญา ซือรูปา กะ อากัยํ ปูโฮด บือดูรี นู บือจาเกาะ-จาเกาะ ซือรูปา ซือมียา มาโบะ อาระ กูญา นะ กือนา ตูนู ฮางอซ ฮาบิฮ บือกะ ตูโงน ปาดี นู ตูโฮยํ.

¹¹ ดือละ อาดา ซือมียา ซืออูรัก มาแรฮ ดาตัก เดะ ลูมอฮ กาเญา นู บรีงัจ ลาฆู ตีปู นู ฌาฮัจ กะ ตูฮัด บือซัยํ เดะ อาตัซ นู บรีงัจ ตูโญะ ลาฆู ซาลัฮ.

บรีตา บาฌิ บีดา ยูดา

¹² ตูฮัด บือซัยํ เดะ อาตัซ มือเลา กะฆีนี จะ “มีเซ ลูมอฮ อีตู นะ ตือฆัยํ อูรัจ_ อาดา บาญะ โตระ กูญา โปด นะ กือนา กรัจ ฮาบิฮ_ นะ ลือแงะ ปี ดัฮ มีเซ จะ กู บือเลฮ บรี เกา ซูซัฮ ฮาตี ดัฮ ตาปี กู นะ เตด บรี เกา ซูซัฮ ฮาตี ลาฆี.

¹³ วะตู อีนี กู นะ ปรูโตฮ ปืองานัยํ นะ ญา บรี ตรือเบะ เดะ เกา นะ บูวัจ บรี โกะ ราตัย นู อีกัจ เกา ปาตัฮ ปี ฮาบิฮ.”

¹⁴ ตูฮัด บือซัยํ เดะ อาตัซ_ ญา ปือซัด ปาซัน ลาฆู นะ เกา จะ “ปือนามา นะ เกา นะ เตด กือนา กรือจัย ปี ดัฮ กู นะ บูวัก โกะ ฆามัยํ จูแตก ฌางัน ฆามัยํ นู ปือลัย บรี ตรือเบะ เดะ รูมัฮ มือญือมัฮ นะ ตูฮัด นะ เกา นะ กาลี ลูบัก บาดัด บรี กะ เกา_ ซาเบะ เกา เตด ฌาดี นามา เลอ.”

¹⁵ ลีฮัจ เลอ_ กากี นะ ซือมียา นู บาวา บรีตา บาฌิ มาแรฮ กะ อาตัซ บูเกะ ซือมียา นู มือญาเระ ปือมือเลา ลาฆู ซือนัง ซือลามัจ. โอ ยูดา เออ กือนา ตูโรจ กะ ลาฆู มากัด บรามัย นะ เกา กือนา ปลือปัซ นียัจ นะ เกา เลอ ซาเบะ จะ_ ซือมียา ฌาฮัจ นะ เตด มาแรฮ บือฆาโดฮ เกา ปูลัก กูญา กือนา โปรฮ ฮาบิฮ ดัฮ.