มีคา 1 - ซูรัจ ปือมือเลา นะ ตูฮัด

¹ ปือมือเลา นะ ตูฮัด บือซัยํ เดะ อาตัซ_ นู มาแรฮ รอจ กะ มีคา_ ซือมียา ตูโปะ โมเรเชด_ เดะ ฮาดัจ นะ โยทาม_ อาฮาซะ_ ฌางัน เฮเซคียา_ ราฌา นะ นังฆรี ยูดา. ฌาดี ลาฆู นู ญา บือเลฮ ลีฮัจ ปาซัน ซะมาเรีย_ ฌางัน เยรูซาเลม.

ลาฆู กรัจ ฮูโกบ นังฆรี ซะมาเรีย

² โอ ลูมอฮ บักซา ซือมูฮา_ กาเญา เออ_ ราตา ซือมียา มือนีงัย เลอ_ ดือนียา ฌางัน ราตา โกะ ซือบารัก บรี กะ ตูฮัด_ จะ_ ตูฮัด บือซัยํ เดะ อาตัซ ฌาดี ซะซรี มือเลา ตูโดฮ กาเญา ฌาดี จะ ตูฮัด เดะ ตือปัจ รูมัฮ มือญือมัฮ นู จรัฮ บาฌิ นะ ญา.

³ ซาเบะ_ ลีฮัจ เลอ_ ตูฮัด บือซัยํ เดะ อาตัซ ตรือเบะ มาแรฮ ดาตัก เดะ ตือปัจ ดูโดะ นะ ญา นะ ตูโรด มาแรฮ กาจะ ตือปัจ ตีงี เดะ ดือนียา.

⁴ โกะ บูเกะ นะ ลัย เดะ บาวัฮ กากี นะ ญา ลาเฮา นะ กือนา บือลัฮ ซือรูปา กะ ลีเลด เดะ ฮือลด อาปี ซือรูปา อาเย นู อูแร มาแรฮ เดะ ตือปัจ ตีงี.

⁵ ลาฆู อีนี ซือมูฮา บือฌาดี_ กรานา ยาโกบ บูวัจ กือบลากัก ซาเบะ ลาฆู บือดูซา ซือมูฮา นะ บือแนฮ บักซา อิซราเอน. ลาฆู บูวัจ กือลือเบฮ นะ ยาโกบ เตอ_ ฌาดี นามา? ฌาดี นังฆรี ซะมาเรีย บูกัด เฆอ? ตือปัจ กรามัจ อาตัซ บูเกะ นะ ลูมอฮ ยูดา ฌาดี นามา? ฌาดี นังฆรี เยรูซาเลม_ บูกัด เฆอ?

⁶ กะฆีเตอ กู นะ บูวัจ บรี ซะมาเรีย ฌาดี ลูโงะ ซือบารัก นู บือปาตัฮ-ปาตัฮ เดะ ตือปัจ ตานัฮ ฮอย นามา ฌาดี ตือปัจ บีดา ตานัม กือโบด บูวัฮ อางุน. กู นะ อูแร กือโตน บาตู นู บูวัจ นังฆรี อีตู_ ตูโรด เดะ จือลัฮ บูเกะ นะ บรี ลีฮัจ บือฆารี ตือปัจ มือนาฮัด นะ นังฆรี.

⁷ ฆามัยํ บราลา ซือมูฮา นะ นังฆรี_ นะ กือนา กาเตาะ ฌาดี ซือกูตกๆ รือฆา อูปัฮ ซือมูฮา นะ นังฆรี อีตู นะ กือนา ตูนู เดะ อาปี บราลา ซือมูฮา นะ นังฆรี อีตู นะ กือนา ตีงัน บูวัก ซาเบะ นังฆรี อีตู บือมุน โกะ ฆามัยํ บราลา มาแรฮ ดาตัก เดะ รือฆา อูปัฮ นะ นีบีนี ฌาลัก ญา นะ ปาเระ ฌาดี รือฆา อูปัฮ นะ นีบีนี ฌาลัก ปูลัก เลอ.

โกะ ตูโปะ เดะ นังฆรี ยูดา นะ กือนา บูวัจ บรี บือนาซา

⁸ ซาเบะ กะฆีนี_ กู มือนาแงฮ บือปาโตด กู นะ อูฆัย ปะตาปะ_ บือฌาลัด ปี ญักตือลาญัก ซือวารา มือนาแงฮ บือปาโตด นะ กู_ นะ ซือรูปา ซือวารา อาซู ฮูตัด ซือวารา บือปาโตด ซือรูปา บูโรก ฮาตู.

⁹ ซาเบะ บือกัซ ลูกา นะ นังฆรี ซะมาเรีย อีตู ปือบือลา เตด ลือฆา งรือลา มาแรฮ รอจ กะ ยูดา มาแรฮ รอจ กะ ปีตู นังฆรี นะ ลูมอฮ ซือมียา นะ กู ฌาดี จะ รอจ กะ นังฆรี เยรูซาเลม.

¹⁰ ฌางัน มือญาเระ ลาฆู อีนี เดะ นังฆรี กัด ฌางัน นะ มือนาแงฮ เลอ กือนา ฆรือลิก ญาวา เดะ ฮาบู เดะ นังฆรี เบด-เลอาฟรา.

¹¹ ลูมอฮ นังฆรี ชาฟีระ เออ กือนา ลาลู ปี ตูโรจ ฌาลัด นะ เกา ญาวา ญักตือลาญัก_ จือและ มาตา เลอ. โกะ ลูมอฮ นังฆรี ซานัน เตด บือเลฮ ตรือเบะ มาแรฮ เลอ. นังฆรี เบด-เอเชน มือนาแงฮ ญา นะ อาเมด ตือปัจ บือซานัยํ นะ ญา_ ปี เดะ เกา.

¹² ซาเบะ จะ_ ลูมอฮ นังฆรี มาโรด ฆาโดฮ ฮาตี_ นาตี ลาฆู บาฌิ ตาปี ลาฆู ฌาฮานัม ตูโรด มาแรฮ ดาตัก เดะ ตูฮัด บือซัยํ เดะ อาตัซ รอจ กะ ปีตู นังฆรี เยรูซาเลม.

¹³ ลูมอฮ นังฆรี ลาคีด เออ_ กือนา อีกัจ กูดา มาโซะ ซือตรี บือปรัก. เกา ฌาดี ตือปัจ ฮืนตะ นะ ลาฆู ดูซา บรี กะ นานะ นีบีนี นะ ซีโยน ซาเบะ ลาฆู บูวัจ กือบลากัก นะ อิซราเอน ดาปัจ เดะ เกา ดัฮ.

¹⁴ กะฆีเตอ_ เกา ฆาโดฮ บรี ซือบารัก บูวัจ บรี บรีงัจ กะ ตูโปะ โมเรเชด-กัด. โกะ รูมัฮ นะ อักซิบ นะ ฌาดี ลาฆู นู ตีปู กะ โกะ ลูมอฮ ราฌา นังฆรี อิซราเอน.

¹⁵ ลูมอฮ นังฆรี มาเรชัฮ เออ กู นะ บาวา ซือมียา ฌือนัฮ มาแรฮ อาตัซ เกา ปูลัก ลาฆู บือซรี นะ ลูมอฮ อิซราเอน นะ มาแรฮ กะ อาดุลาม.

¹⁶ กือนา กูโกยํ โบะ กูโกยํ มีซัย กูโกยํ บาโวะ เลอ บีดา บูวัจ ลาฆู บรีงัจ ซูซัฮ กะ นานะ นู เกา ซายัก โตระ กือนา บูวัจ บรี ปาลา กรือลิ_ ซือรูปา บูโรก อีแรก ซาเบะ กูญา ซือมูฮา ตีงัน เกา ปี ฌาดี ปราโซฮ ดัฮ.