มาลาคี 1 - ซูรัจ ปือมือเลา นะ ตูฮัด1 ปือมือเลา นู บรัจ_ ฌาดี ปือมือเลา นะ ตูฮัด บือซัยํ เดะ อาตัซ_ นู ญา ซูโรฮ มาลาคี บรี มือเลา ฌางัน อิซราเอน. ตูฮัด ซายัก อิซราเอน บาญะ ลือเบฮ เดะ เอโดม 2 ตูฮัด บือซัยํ เดะ อาตัซ มือเลา จะ_ “กู บือเลฮ ซายัก ลูมอฮ กาเญา.” ตาปี กาเญา มือเลา จะ_ “เกา บือเลฮ ซายัก กามี กะฮามี?” ตูฮัด มือเลา จะ_ “เอซาว ฌาดี กากา เดะ ยาโกบ บูกัด เฆอ? ตาปี กู เตอ_ บือเลฮ ซายัก ยาโกบ เลอ 3 กู บือชี กะ เอซาว เลอ. กู บือเลฮ บูวัจ บรี โกะ บูเกะ นะ กูญา ฌาดี ตือปัจ ฮอย นามา_ บรี ปือซากา นะ ญา กะ อาซู ฮูตัด เดะ ตือปัจ ตานัฮ ตูโฮยํ นู ลือฆา. 4 กาลา เอโดม มือเลา จะ_ ‘กามี กือนา บูวัจ บรี ฌาฮานัม ดัฮ_ ตาปี นะ ปาเระ มาแรฮ บูวัจ ตือปัจ นู รูโตฮ อีนี บรี บารู’ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ ‘กูญา นะ บูวัจ โปด บือเลฮ_ ตาปี กู นะ ปรูโตฮ ฌู โกะ ลูมอฮ ซือมียา นะ บลาโลก กูญา จะ_ นังฆรี ฌาฮัจ_ ฌาดี ลูมอฮ บักซา นู ตูฮัด มูซัยํ ปี ซือลาลู.’ 5 มาตา นะ กาเญา นะ ลีฮัจ ลาฆู อีนี_ กาเญา นะ มือเลา จะ_ ‘ตูฮัด บือซัยํ เดะ อาตัซ อีนี_ ญา บือซัยํ ซูโงฮ_ มีเซ ลือปัซ ตือกอซ นะ อิซราเอน.’ ลาฆู บือนาซา ซือรูโลยํ นะ โกะ ลูมอฮ ซามี 6 “นานะ โปด มือโอจ กะ ปะ เดะ ญา_ โกะ ปราโซฮ ฌูฆา มือโอจ กะ ตกเก นะ กูญา. ดัฮ กู ฌาดี อาโปก_ ลาฆู มือโอจ นะ กู ดูโดะ ปัจ ดีฮา? ดัฮ กู ฌาดี ตกเก_ ลาฆู บรีงัจ ตาโกจ ดูโดะ ปัจ ดีฮา? นี เลอ_ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา ฌางัน กาเญา กะฆีนี_ โอ_ โกะ ลูมอฮ ซามี นู มือฌัฮ ปือนามา นะ กู. กาเญา มือเลา จะ_ ‘กามี มือฌัฮ ปือนามา นะ ตูฮัด กะฮามี?’ 7 นู กาเญา บาวา ซือบารัก มากัด นู ตะอารัฮ_ มาแรฮ อาเกะ มือญือมัฮ อาตัซ ตือปัจ มือญือมัฮ นะ กู_ กะฆีเตอ เลอ. กาเญา มือเลา จะ_ ‘กามี บูวัจ บรี ญา ตะอารัฮ กะฮามี?’ กะฆีนี เลอ_ นู กาเญา บรีงัจ จะ_ ปาปัด โตะ ตือปัจ มือญือมัฮ นะ ตูฮัด บือซัยํ เดะ อาตัซ เตอ_ ฌาดี ตือปัจ นู นะ มือฌัฮ บือเลฮ_ กะฆีเตอ เลอ. 8 กาลา กาเญา บาวา บือนาตัก มาตา บูตา มาแรฮ_ ฌาดี บือนาตัก อาเกะ มือญือมัฮ_ ปือบูวัจ กะฆีเตอ ฮอย เตด ซาลัฮ เฆอ? กาลา กาเญา อาเกะ มือญือมัฮ บือนาตัก จาเปะ_ เฆอ จะ_ เตด ซือนัง_ ปือบูวัจ กะฆีเตอ เตด ซาลัฮ เฆอ? ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ อาดู บาวา โกะ ซือบารัก กะฆีเตอ บรี กะ กือปาลา นังฆรี นะ กาเญา ลีฮัจ_ ญา นะ ซูกา ฮาตี เฆอ? นะ อาดา บูวัจ บาฌิ ฌางัน กาเญา เฆอ? 9 กะฆีเตอ เลอ_ กือนา มือเลา ปูโฌะ มีตา ลาฆู ซายัก เดะ ตูฮัด_ บีดา ตูฮัด ญา นะ อาดา ลาฆู ตือจีฮัด กะ ลูมอฮ กามี. กรานา โกะ ซือบารัก มือญือมัฮ กะฆีนี เดะ ตางัน นะ กาเญา_ ญา นะ ซูกา กะ กาเญา ซืออูรัก เฆอ? ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา กะฆีนี เลอ. 10 เออ_ กู บือคานะ นะ บรี ซือมียา ซืออูรัก เดะ ลูมอฮ กาเญา_ นะ กาปุซ ปีตู รูมัฮ มือญือมัฮ ดัฮ_ ตีเมา บรี กาเญา นะ รูโมด อาปี เดะ ตือปัจ มือญือมัฮ นะ กู เปลาๆ. ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ กู ฮอย เตด ซูกา กะ กาเญา_ นะ เตด ซาโมจ โกะ ซือบารัก มือญือมัฮ ดาตัก เดะ ตางัน นะ กาเญา. 11 ตูฮัด นู มือฆัฮ มือเลา จะ_ ตะเดะ โซะ มาตา อารี ญาแญะ_ รอจ กะ โซะ มาตา อารี ฆูโฆยํ_ ปือนามา นะ กู บือซัยํ โตระ เดะ ตืองัฮ โกะ ลูมอฮ บักซา. กูญา อาเกะ มือญือมัฮ กือมียัน ฌางัน ซือบารัก นู จรัฮ บาฌิ_ เดะ ปือนามา นะ กู เดะ ราตา ตือปัจ_ ซาเบะ ปือนามา นะ กู บือซัยํ โตระ_ เดะ ตืองัฮ โกะ ลูมอฮ บักซา เลอ. 12 ตาปี กาลา กาเญา มือเลา จะ_ ‘ปาปัด โตะ ตือปัจ มือญือมัฮ นะ ตูฮัด_ ญา ตะอารัฮ_ นะ มือเลา มือฌัฮ กะ ซือบารัก นู อาเกะ มือญือมัฮ อีตู โปด บือเลฮ’ กาเญา โปด_ บือเลฮ บูวัจ บรี กะ ปือนามา อีตู ฌาดี ลาฆู ตะอารัฮ ดัฮ. 13 ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ กาเญา มือเลา จะ_ ‘นี ฌาดี ลาฆู ปือฆาโดฮ กะฮามี เลอ.’ กาเญา บูวัจ บรี กู ซือบะ_ บาวา โกะ ซือบารัก นู ราปัซ มาแรฮ_ เฆอ จะ_ ซือบารัก นู จาเปะ_ นู เตด ซือนัง. โกะ ซือบารัก อีนี กาเญา บาวา มาแรฮ ฌาดี ซือบารัก มือญือมัฮ. ตูฮัด บือซัยํ เดะ อาตัซ มือเลา จะ_ กู นะ ซาโมจ ซือบารัก อีตู ดาตัก เดะ ตางัน นะ เกา เฆอ? 14 ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ ซาปา นู อาดา บือนาตัก บาปา_ เดะ กาวัด บือนาตัก นะ ญา_ นู บือเลฮ บือนียัจ เตอ_ ตาปี ญา บาวา บือนาตัก นู อาดา ปะออย ปี อาเกะ มือญือมัฮ กะ ตูฮัด_ ซือมียา นู กีจอฮ อีตู เตอ_ นะ กือนา ซูปัฮ อาโบยํ. กรานา กู ฌาดี ราฌา บือซัยํ_ ปือนามา นะ กู ฌาดี นู โกะ ลูมอฮ บักซา ซือมูฮา บรีงัจ ตาโกจ เลอ. |