เลวี 1 - ซูรัจ ปือมือเลา นะ ตูฮัดซือบารัก ตูนู มือญือมัฮ 1 ตูฮัด บือซัยํ เดะ อาตัซ_ ญา บลาโลก มูซา_ มือเลา ฌางัน ญา_ ดาตัก เดะ รูมัฮ ซาเราะ บือฌาญี บือดาปัจ_ จะ 2 “กือนา มือเลา ฌางัน ลูมอฮ อิซราเอน_ มือญาเระ กะ กูญา จะ_ กาลา ซือมียา ดีฮา_ เดะ ลูมอฮ กาเญา_ บาวา ซือบารัก มาแรฮ อาเกะ มือญือมัฮ กะ ตูฮัด บือซัยํ เดะ อาตัซ_ บรี บาวา โกะ บือนาตัก ปือบือลา_ ฌาดี ซือบารัก มือญือมัฮ นะ กาเญา มาแรฮ_ ดาตัก เดะ กาวัด ลือมู_ เฆอ จะ_ กาวัด แบะ กาวัด กาเมก. 3 “ ดัฮ ซือบารัก มือญือมัฮ อีนี_ ฌาดี ซือบารัก ตูนู มือญือมัฮ_ มาแรฮ ดาตัก กาวัด ลือมู โปด_ บรี ญา บาวา ลือมู บาปา_ นู ฮอย ปะออย_ บาวา มาแรฮ กะ โซะ ปีตู รูมัฮ ซาเราะ บือฌาญี บือดาปัจ_ บีดา บรี ญา นะ ฌาดี ซือมียา นู ตูฮัด บือซัยํ เดะ อาตัซ_ กือนา เดะ ฮาตี เลอ. 4 บรี ซือมียา อีตู ตืองะ ตางัน_ เดะ อาตัซ ปาลา บือนาตัก นู ฌาดี ซือบารัก ตูนู มือญือมัฮ. กะฆีเตอ_ บือนาตัก อีตู_ นะ ฌาดี ตือปัจ นู ตูฮัด กือนา เดะ ฮาตี_ บีดา บาโซฮ ลาฆู ซาลัฮ นะ ซือมียา อีตู. 5 กะฆีเตอ_ บรี กูญา บูนอฮ ลือมู บาปา อีตู_ โซะ ฮือลด มูคา นะ ตูฮัด บือซัยํ เดะ อาตัซ. โกะ นานะ นะ อาโรน_ นู ฌาดี ซามี_ นะ อาเมด ดารัฮ มาแรฮ ปรือจิ_ กือลีลิก เดะ ตือปัจ มือญือมัฮ_ นู อาดา เดะ โซะ ปีตู รูมัฮ ซาเราะ บือฌาญี บือดาปัจ. 6 บรี ญา กูแซะ กูเละ ซือบารัก ตูนู มือญือมัฮ อีตู_ กรัจ บรี ฌาดี ซือกูตกๆ. 7 โกะ นานะ นะ อาโรน_ นู ฌาดี ซามี_ นะ รูโมด อาปี เดะ ตือปัจ มือญือมัฮ_ ฮาโตย กายู เดะ อาตัซ อาปี. 8 โกะ ลูมอฮ ซามี_ นู ฌาดี นานะ นะ อาโรน_ กูญา นะ ตืองะ กือโตน ลูลู_ ฌางัน ปาลา_ ฌางัน ลือมะ นะ บือนาตัก ซือมูฮา_ เดะ อาตัซ กายู_ อาตัซ อาปี เดะ ตือปัจ มือญือมัฮ. 9 ตาปี บรี กูญา อาเมด อาเย บาโซฮ โกะ กือลือกะ ดาลับ_ ฌางัน กากี บือนาตัก. กะฆีเตอ_ ซามี นะ ตูนู โกะ ซือบารัก ซือมูฮา_ เดะ อาตัซ ตือปัจ มือญือมัฮ_ บรี ฌาดี ซือบารัก ตูนู มือญือมัฮ_ ฌาดี ซือบารัก มือญือมัฮ ฌางัน อาปี_ ฌาดี ซือบารัก บือบาวู_ นู ตูฮัด บือซัยํ เดะ อาตัซ ซูกา เลอ. 10 “ ดัฮ ซือบารัก มือญือมัฮ นู ซือมียา ดีฮา นะ ซูโรฮ_ ฌาดี ซือบารัก ตูนู มือญือมัฮ_ มาแรฮ ดาตัก เดะ กาวัด กาเมก_ เฆอ จะ กาวัด แบะ_ บรี กะ ซือมียา อีตู อาเมด บือนาตัก บาปา นู ฮอย ปะออย 11 บูนอฮ บือนาตัก อีตู_ เดะ บีดิก ตือปัจ มือญือมัฮ_ ซือบือลัฮ ตารา_ โซะ ฮือลด มูคา นะ ตูฮัด บือซัยํ เดะ อาตัซ. โซะ โกะ ซามี_ นู ฌาดี นานะ นะ อาโรน_ กูญา นะ อาเมด ดารัฮ บือนาตัก อีตู_ มาแรฮ ปรือจิ ราตา บือลัฮ เดะ ตือปัจ มือญือมัฮ. 12 บรี ญา บาโฮะ บือนาตัก อีตู_ ฌาดี ซือกูตกๆ_ ฌางัน ปาลา_ ฌางัน โกะ ลือมะ ฌูฆา. โกะ ซามี นะ ตืองะ ซือบารัก อีตู ซือมูฮา_ เดะ อาตัซ กายู_ อาตัซ อาปี เดะ ตือปัจ มือญือมัฮ. 13 ตาปี กือลือกะ ดาลับ_ ฌางัน กากี เตอ_ กือนา นะ บาโซฮ ฌางัน อาเย ดูลู. บรี กะ ซามี อาเมด ซือบารัก ซือมูฮา อีนี_ ตูนู มือญือมัฮ ซือมูฮา_ เดะ อาตัซ ตือปัจ มือญือมัฮ_ ฌาดี ซือบารัก ตูนู มือญือมัฮ_ ฌาดี ซือบารัก มือญือมัฮ ฌางัน อาปี_ ฌาดี ซือบารัก บือบาวู_ นู ตูฮัด บือซัยํ เดะ อาตัซ ซูกา. 14 “ ดัฮ ซาปา นะ บาวา บูโรก มาแรฮ มือญือมัฮ_ ฌาดี ซือบารัก ตูนู มือญือมัฮ กะ ตูฮัด บือซัยํ เดะ อาตัซ โปด_ บรี กะ ซือมียา อีตู ปีเลฮ บูโรก ตูตรู_ เฆอ จะ บูโรก ปาตี นู เตด ตูฮา_ บาวา มาแรฮ มือญือมัฮ. 15 กือนา บรี กะ ซามี บาวา บูโรก อีตู_ มาแรฮ กะ ตือปัจ มือญือมัฮ_ ลือกับ ปาลา ดัฮ_ ตูนู เดะ อาตัซ ตือปัจ มือญือมัฮ. บรี กะ ดารัฮ มือนีแลฮ บรี ฮาบิฮ_ บีดิก ตือปัจ มือญือมัฮ. 16 กือนา จูลัด มือนาโรฮ_ จูลัด อาเมด ซือบารัก มากัด เดะ มือนาโรฮ ตรือเบะ_ บูวัก เดะ บีดิก ตือปัจ มือญือมัฮ โซะ อาตัซ มาตา อารี_ เดะ ตือปัจ นู กือนา บูวัก ฮาบู. 17 บรี ญา จูลัด เดะ ซายะ_ ตาปี ฌางัน บรี ปูตุซ เดะ ญาวา. กะฆีเตอ_ ซามี นะ ตูนู บูโรก อีตู_ เดะ อาตัซ ตือปัจ มือญือมัฮ_ เดะ ลูโงะ กายู อาตัซ อาปี_ ฌาดี ซือบารัก ตูนู มือญือมัฮ_ ฌาดี ซือบารัก มือญือมัฮ ฌางัน อาปี_ ฌาดี ซือบารัก บือบาวู_ นู ตูฮัด บือซัยํ เดะ อาตัซ ซูกา. |