บือปาโตด 1 - ซูรัจ ปือมือเลา นะ ตูฮัด

ลาฆู ซูซัฮ นะ ซีโยน นู ฌาดี ปราโซฮ

¹ นังฆรี นู ปือนอฮ ฌางัน โกะ ลูมอฮ ซือมียา มาแรฮ ดูโดะ กรือแงม บือเลฮ เฆอ? นังฆรี นู กายา ดูโดะ เดะ ซามา ตืองัฮ ลูมอฮ บักซา ซือมูฮา มาแรฮ ฌาดี บือกะ นีบีนี ฌานา เฆอ? นังฆรี นู ฌาดี บือกะ ราฌา นีบีนี ซามา ตืองัฮ นังฆรี ซือมูฮา โปด ปาเระ ฌาดี บือกะ ปราโซฮ นะ กูญา ดัฮ.

² นังฆรี อีตู มือนาแงฮ ฆาฆิ_ เดะ วะตู มาลับ อาเย มาตา นะ ญา บาซัฮ ปีปี. เดะ ซามา ตืองัฮ ซือมียา นู ซายัก ญา ฮอย ซาปา นู นะ ปูโฌะ ญา ลูมอฮ กาวัด นะ ญา บือเลฮ บูวัจ กือบลากัก กะ ญา กูญา ซือมูฮา ปาเระ ฌาดี ซือตรู นะ ญา.

³ นังฆรี ยูดา กือนา กือโปก บือปี ฌาดี ปราโซฮ_ ซูซัฮ ปายัฮ ดัฮ ฆาโดฮ บือกรือฌา บือกะ ปราโซฮ ญา ฆาโดฮ ดูโดะ ซามา ตืองัฮ ลูมอฮ บักซา เตด ดาปัจ ตือปัจ บราดู รือมัย ซืองะ เลอ โกะ ซือมียา ปรือกัด บือเลฮ อูเซ ดัด ญา กาลา วะตู ญา ซูซัฮ ฮาตี.

⁴ โกะ ฌาลัด ปี กะ นังฆรี ซีโยน_ มือนาแงฮ ซูซัฮ ซาเบะ ฮอย ซาปา บือฌาลัด ปี กะ ลาฆู บรามัย โกะ ปีตู นังฆรี นะ ญา_ ฮอย นามา ลาลู ดัฮ โกะ ลูมอฮ ซามี นะ ญา ปาคัจ บือญาวา บือซัยํ โกะ นีบีนี ราดารา นะ ญา_ มือนาแงฮ บือปาโตด อีซี ญา ตะอาซิก โปด_ ดือมิ ฮาตี โตระ.

⁵ ลูมอฮ เตด กือนา บูกู นะ ญา_ อาเลฮ ฌาดี กือปาลา ลูมอฮ ซือตรู นะ ญา_ บือตามัฮ โกะ ซือบารัก บาญะ ซือรูโลยํ กรานา จะ_ ตูฮัด บือซัยํ เดะ อาตัซ บูวัจ บรี ญา ซูซัฮ ดัฮ ซาเบะ ลาฆู บูวัจ กือบลากัก นู บาญะ นะ ญา โกะ นานะ นะ ญา ปี ฮาบิฮ ดัฮ ฌาดี ปราโซฮ โซะ ฮือลด มูคา นะ ซือมียา เตด กือนา บูกู.

⁶ ลาฆู บือฆาจะ โตระ ซือมูฮา กือนา ราปัซ ปี_ เดะ นังฆรี ซีโยน ดัฮ โกะ กือปาลา นะ ญา_ ฌาดี บือกะ กาวัด กีฌัก บาปา นู ซารี ปาดัก รูโปจ มากัด_ เตด ดาปัจ บือลารี ฮอย อูรัจ ปี เลอ โซะ ฮือลด ซือมียา นู อูเซ ญา.

⁷ เยรูซาเลม_ ซูซัฮ ฮาตี_ บักซัจ ปี มาแรฮ ญา จับ อีงัจ กะ ลาฆู นู บาฌิ_ บรือฆา บาญะ นู ญา ดือละ อาดา เดะ กาลา นูตู อีตู. ญา จับ กาลา อีตู_ นู ลูมอฮ ซือมียา ฆูโฆยํ เดะ ตางัน นะ ซือตรู ฮอย ซาปา ตูโลก ญา เลอ ลูมอฮ ซือตรู ลีฮัจ ญา ดัฮ อาฆัฮ ฆือละ กะ ลาฆู ฌาฮานัม นะ ญา.

⁸ เยรูซาเลม บูวัจ ดูซา นู บือซัยํ โตระ ดัฮ ซาเบะ กะฆีนี ญา ฌาดี ตือปัจ อาฆัฮ ฆือละ โกะ ซือมียา นู ดือละ มือโอจ กะ ญา_ บือเลฮ มือฌัฮ ญา ซาเบะ กูญา ลีฮัจ ญา ญักตือลาญัก เออ อีซี ญา_ บือญาวา บือซัยํ อาเลฮ มูคา นะ ญา ปี เลอ.

⁹ ลาฆู ตะอารัฮ นะ ญา_ อาดา ลือกัจ กระ เดะ กาเยด ญา เตด บรีงัจ กะ ลาฆู โซะ ฮือลด นะ ญา เลอ กะฆีเตอ ญา บือนาซา_ บูวัจ บรี ซือมียา ตาโกจ โตระ ฮอย ซาปา นะ ปูโฌะ ญา “โอ ตูฮัด บือซัยํ เดะ อาตัซ_ มีตา ตีญุง ลาฆู ซูซัฮ ฮาตี นะ กู ซาเบะ ซือตรู บือเลฮ ฌือนัฮ เดะ กู ดัฮ.”

¹⁰ ลูมอฮ ซือตรู บือเลฮ อาเงา ตางัน ราปัซ โกะ ซือบารัก นู บรือฆา นะ ญา ญา บือเลฮ ลีฮัจ ลูมอฮ บักซา อาซิก มาโซะ มาแรฮ เดะ ตือปัจ มือญือมัฮ นะ ญา ฌาดี ซือมียา นู ตูฮัด บือเลฮ บลารัก ตีเมา บรี มาโซะ กะ ตือปัจ บือมุน ลูมอฮ ซือมียา นะ ตูฮัด.

¹¹ โกะ ลูมอฮ นังฆรี อีตู บือญาวา บือซัยํ กาลา กูญา มือโซะ ซารี บารัก มากัด กูญา อาเมด โกะ ซือบารัก บรือฆา นะ กูญา_ รีบัย ซือบารัก มากัด บีดา นะ บรี ญาวา ตือฆัยํ อูรัจ. “โอ ตูฮัด บือซัยํ เดะ อาตัซ_ มีตา ตีญุง ลีฮัจ ซาเบะ กู ฌาดี ตือปัจ กือนา มือฌัฮ ดัฮ เลอ.”

¹² “โอ กาเญา นู บือฌาลัด ลาลู ปี เออ_ กาเญา เตด ปือดูลี เฆอ? นี เลอ_ ลีฮัจ เลอ อาดา ลาฆู ซูซัฮ นามา ซือตืองัฮ เฆอ_ นู ซือรูปา ลาฆู ซูซัฮ นะ กู นู มาแรฮ กือนา เดะ กู เลอ ฌาดี ลาฆู ซูซัฮ นู ตูฮัด บือซัยํ เดะ อาตัซ บือเลฮ บูวัจ กะ กู เดะ อารี นู ญา มูซัยํ บืออีเซด กะ กู เตอ?

¹³ “ตูฮัด บือเลฮ อาตัจ อาปี_ ตูโรด มาแรฮ ดาตัก เดะ โซะ อาตัซ บรี มาโซะ ปี เดะ ตูลัก นะ กู ตูฮัด บือเลฮ ดือดี ปือญรัจ_ ซือกัจ กากี นะ กู บูวัจ บรี กู ฆาโดฮ อาเลฮ ปาเระ ตูฮัด ญา บูวัจ บรี กู ฮอย ตือปัจ จาดัก ลือมัฮ ลือเตฮ ซียัก มาลับ.

¹⁴ “นู กู ซัจๆ บูวัจ กือลือเบฮ เตอ_ กือนา บือมุน ซือกาลี ฌาดี ปืองานัยํ นู ตางัน นะ ตูฮัด ญา อีกัจ รือโกฮ ตาโรฮ ปืองานัยํ อีตู ฌือรอจ กือลีลิก ลีเฮ นะ กู บูวัจ บรี อูรัจ นะ กู อูโนยํ ฮาบิฮ ตูฮัด บือเลฮ ซรัฮ กู บรี ดูโดะ เดะ ตางัน นะ โกะ ซือมียา นู กู นะ ลาวัด ฮอย เตด บือเลฮ.

¹⁵ “ตูฮัด บือเลฮ กีปัซ โกะ ลูมอฮ ตาฮัน นะ กู_ ซามา ตืองัฮ กู. ตูฮัด ปาเงน ลูมอฮ ซือมียา มาแรฮ บือลาวัด กู บีดา นะ กือปิ โกะ อูรัก มูดา นะ กู บรี ฮาโจยํ. ตูฮัด บือซัยํ เดะ อาตัซ บือเลฮ กาจะ ลูมอฮ นังฆรี ยูดา บือกะ กาจะ บูวัฮ อางุน เดะ ตลาฆา กาจะ บูวัฮ.

¹⁶ “กรานา ลาฆู กะฆีนี เลอ_ กู มือนาแงฮ มาตา นะ กู_ เออ มาตา นะ กู อาดา อาเย มาตา มือนีแลฮ บาญะ ซาเบะ ซือมียา ปูโฌะ ฮาตี ดูโดะ ฌาโวฮ เดะ กู ฌาดี ซือมียา นู อาโซฮ ฮาตี นะ กู. โกะ นานะ นะ กู ฮอย ตือปัจ จาดัก ซาเบะ โกะ ซือตรู บือเลฮ ฌือนัฮ ดัฮ.”

¹⁷ นังฆรี ซีโยน อาเงา ตางัน ดูวา บือลัฮ_ ปูโฌะ มีตา ตาปี ฮอย ซาปา นู นะ ปูโฌะ ญา บือเลฮ. ตูฮัด บือซัยํ เดะ อาตัซ_ ญา บือเลฮ ปือซัด ปาซัน ยาโกบ จะ บรี โกะ กาวัด รูมัฮ นะ ฌาดี ซือตรู นะ ญา. นังฆรี เยรูซาเลม ฌาดี ซือบารัก ตะอารัฮ_ ซามา ตืองัฮ กูญา อีตู.

¹⁸ “ตูฮัด บือซัยํ เดะ อาตัซ_ บาฌิ ตือปัจ ดัฮ ซาเบะ กู บือเลฮ ลาวัด ปือมือเลา นะ ญา กาเญา ลูมอฮ บักซา ซือมูฮา เออ_ มีตา ดืองัยํ เลอ มีตา มาแรฮ ลีฮัจ ลาฆู ซูซัฮ นะ กู โกะ นีบีนี ราดารา ฌางัน โกะ อูรัก มูดา นะ กู บือเลฮ ปี ฌาดี ปราโซฮ ดัฮ.

¹⁹ “กู บลาโลก โกะ ซือมียา นู กู ซายัก ตาปี กูญา บือเลฮ มืออูปัย กะ กู โกะ ลูมอฮ ซามี ฌางัน ลูมอฮ ซือมียา ซัยํบือซัยํ นะ กู มาตี ฮาบิฮ เดะ ตืองัฮ นังฆรี กาลา กูญา ปี ซารี บารัก มากัด บีดา บรี ญาวา ตือฆัยํ อูรัจ.

²⁰ “ลีฮัจ เลอ_ โอ ตูฮัด บือซัยํ เดะ อาตัซ เออ_ กู ซูซัฮ ปายัฮ ฮาตี นะ กู ซือบะ ฮาตี นะ กู บรีงัจ แจะบีแระ ซาเบะ กู ตือฆัยํ ฮาตี_ บาตัฮ โตระ โซะ ลูวัยํ รูมัฮ_ โกะ ซือมียา มาตี ฌางัน ปือดัก เดะ ดาลับ รูมัฮ โปด_ ซือรูปา ลาฆู มาตี.

²¹ “กูญา ดืองัยํ จะ กู บือญาวา บือซัยํ กะฮามี ฮอย ซาปา ปูโฌะ ฮาตี กู เลอ. โกะ ซือตรู นะ กู_ ดืองัยํ ลาฆู ฌาฮัจ นู กือนา เดะ กู กูญา ปาคัจ ซูกา ฮาตี_ นู ตูฮัด บือเลฮ บูวัจ กะฆีนี. มีตา ตูฮัด บาวา วะตู นู ตูฮัด มือญาเระ ดัฮ เตอ_ บรี มาแรฮ รอจ บรี กูญา อีตู ฌาดี บือกะ นู กู ฌาดี เลอ.

²² “มีตา บรี โกะ ลาฆู ฌาฮัจ ซือมูฮา นะ กูญา_ ปลีฮัจ กะ เกา มีตา บรี บูวัจ กะ กูญา ซือรูปา นู เกา บือเลฮ บูวัจ กะ กู ซาเบะ ลาฆู บูวัจ กือลือเบฮ ซือมูฮา นะ กู เลอ กรานา ลาฆู บือญาวา บือซัยํ นะ กู เตอ_ อาดา บาญะ ฮาตี นะ กู โปด_ ลือมัฮ ลือเตฮ โตระ ดัฮ.”