ยูดา 1 - ซูรัจ ปือมือเลา นะ ตูฮัด

ปือมือเลา บือตีกัฮ-ตีกัฮ

¹ กู ยูดา_ ฌาดี ปราโซฮ นะ เยซู คริด_ ฌาดี อาดี เดะ ยากอบ ฌูฆา. กู กีเรบ ซูรัจ อีนี_ อาตัจ บรี กะ กาเญา_ นู ตูฮัด บือเลฮ ปาเงน ดัฮ. กาเญา ฌาดี ลูมอฮ ซือมียา นู ตูฮัด อาโปก เดะ อาตัซ ซายัก_ ซือมียา นู ญา ฌาฆา บีดา เยซู คริด.

² มีตา บรี ตูฮัด นะ ตือจีฮัด กะ กาเญา_ นะ ซายัก กะ กาเญา_ นะ บรี กาเญา ดูโดะ ซือนัง ซือลามัจ บือตามัฮ บรี บาญะ เลอ.

โกะ ซือมียา อาฌัยํ ลาฆู ซาลัฮ

³ กาเญา นู กู ซายัก เออ_ กู ฮาตี งูฆางู นะ ฆาแรฮ ซูรัจ รอจ กะ กาเญา_ ปาซัน ลาฆู นู กีตา ฮีโดะ ลือปัซ บาฌิ บือซามา. ตาปี จะ_ นี เลอ_ กู ฆาโดฮ ฆาแรฮ ซูรัจ ปรีงัจ กะ กาเญา_ บรี บือลาวัด ฌาฆา ลาฆู นู กีตา ปือจายา_ นู ตูฮัด บือเลฮ กีเรบ แนฮ ซือกาลี ดัฮ_ บรี กะ โกะ ซือมียา นู จรัฮ บาฌิ นะ ญา.

⁴ กรานา จะ_ อาดา ซือมียา ซือตืองัฮ จูรี มาโซะ มาแรฮ กะ ดาลับ ลูมอฮ กีตา ดัฮ_ นู เดะ ซูรัจ นะ ตูฮัด อาดา ฆาแรฮ ลามา ดัฮ จะ_ กูญา นะ ฆาโดฮ กือนา บือดะวา กรัจ ฮูโกบ กะฆีนี. ลาฆู นู ตูฮัด นะ กีตา_ ญา ฮาลัย บรี ซือลามัจ กะ กีตา เตอ_ โกะ ซือมียา ฌาฮัจ อีตู_ กูญา อาเมด ปี กาเลฮ ฌาดี ปาซัน บูวัจ ลาฆู ฌาฮัจ นู ฆาละ. กูญา บือเลฮ กีปัซ เยซู คริด_ ญา นู ฌาดี กือปาลา แนฮ ซา_ นู ฌาดี ตูฮัด นะ กีตา เลอ.

⁵ กะฆีเตอ_ มีเซ จะ_ กาเญา บือเลฮ ตาฮู ลาฆู ซือมูฮา ฮาบิฮ ซือกาลี ดัฮ โปด_ ตาปี กู บือคานะ นะ บรี กาเญา บรีงัจ กะ ลาฆู อีนี จะ_ ตูฮัด บือเลฮ ตูโลก บรี ลูมอฮ ซือมียา ซา บักซา_ ฮีโดะ ลือปัซ เดะ นังฆรี อียิบ ดัฮ. เดะ บลากัก_ ญา บือเลฮ บูวัจ บรี โกะ ซือมียา อีตู_ นู เตด ปือจายา_ บือนาซา ฮาบิฮ เลอ.

⁶ กะฆีเตอ ฌูฆา_ โกะ ฮูลู บาลัก อีตู_ นู เตด ซือนัง ฮาตี เดะ ลาฆู ฌาดี บือซัยํ นะ กูญา ตะอาซิก_ ตาปี บือเลฮ ตีงัน ตือปัจ ดูโดะ นู บาฌิ นะ กูญา เตอ_ ลูมอฮ ฮูลู บาลัก อีตู_ ตูฮัด บือเลฮ กานัก_ อีกัจ ฌางัน ราตัย นู เตด ดือละ ปูตุซ_ กานัก ตาโรฮ เดะ ตือปัจ กือลับ_ ตือดะ นะ รอจ กะ อารี กรัจ ฮูโกบ นู บือซัยํ อีตู.

⁷ ซือรูปา กะฆีเตอ เลอ_ โกะ ซือมียา นังฆรี โซโดม_ นังฆรี โฆโมรา_ ฌางัน โกะ ตูโปะ ปิกดาปิก เตอ_ กูญา บือเลฮ บูวัจ ตูโรจ กะ ลาฆู เตด บือฆูนา_ บือกะ ซือรูปา โกะ ฮูลู บาลัก ซีงี เตอ_ มาโบะ เดะ ลาฆู ฆาละ นู รูบือฮีรู. ตูฮัด ญา ฮูโกบ กูญา_ ฆาโดฮ ซูซัฮ โตระ_ เดะ อาปี นู เตด ดือละ ปาดับ เลอ_ บีดา ฌาดี จูตอ บรี กะ โกะ ซือมียา ซือมูฮา ลีฮัจ.

⁸ ตาปี มีเซ กะฆีเตอ โปด_ โกะ ซือมียา อาฌัยํ ลาฆู ซาลัฮ ซีงี_ กูญา บูวัจ ซือรูปา. กูญา มีปี ลาฆู แนฮฌือแนฮ_ นู อาโจบ กูญา บรี บูวัจ ลาฆู ตะอารัฮ เดะ ญาวา_ บรี กีปัซ ลาฆู ปือมือฆัฮ นะ ตูฮัด_ บรี มือเลา ตะอารัฮ กะ โกะ ฌิด นู ซัยํบือซัยํ เลอ.

⁹ ตาปี โซะ กือปาลา ฮูลู บาลัก มีคาเอน_ กาลา ญา บือลาวัด ฌางัน กือปาลา ฮาตู ซีตัด_ ลาฆู บาดัด นะ มูซา_ ญา โปด_ เตด บือเลฮ มือเลา ตะอารัฮ_ ฮูโกบ กะ กือปาลา ฮาตู ซีตัด ลาลู เตอ. ญา อูซิ มือเลา จะ_ “บรี กะ ตูฮัด บลารัก เกา เลอ.”

¹⁰ ตาปี โกะ ซือมียา ซีงี เตอ_ กูญา มือเลา ตะอารัฮ_ รอจ กะ ลาฆู มานามา นู อีซี กูญา ตะอาซิก เตด ตาฮู. โซะ โกะ ลาฆู นู กูญา ตาฮู บรีงัจ เตอ_ กูญา อูซิ ตูโรจ กะ ฮาดัจ นะ กูญา_ ซือรูปา บือกะ โกะ บือนาตัก_ นู ฮอย อากัน. ลาฆู อีตู เลอ_ นะ บูวัจ บรี กูญา บูโระ บูโซะ ดัฮ.

¹¹ กูญา นะ ฌาฮานัม เลอ_ กรานา จะ กูญา บือเลฮ ตูโรจ กะ ฌาลัด นะ คาอิน. กูญา บือเลฮ ปลือปัซ ญาวา ตะอาซิก_ ตูโรจ กะ ลาฆู ซาลัฮ นะ บาลาอัม_ กรานา ลีฮัจ กะ อูโตก. กะฆีเตอ กูญา นะ ฌาฮานัม ปี ดัฮ_ ซือรูปา กะ โครา_ ซือมียา นู มือเลา บือลาวัด ฌางัน มูซา เลอ.

¹² โกะ ซือมียา กะฆีนี ฌาดี ซือรูปา ตูกด_ เดะ ลาฆู บือมุน มากัด บือซามา นะ กาเญา. กูญา อาดา ฮาตี บรานี นะ อูซิ บรามัย บือซามา ฌางัน กาเญา_ ตาปี ซือมาตา ปือบือลา ญาวา นะ กูญา ตะอาซิก. กูญา ฌาดี ซือรูปา กือมูวัง นู ฮอย ฮูฌัด_ ฮาญอจ ตูโรจ กะ อาเงน เตอ. ซือรูปา โกะ ปูโฮด กายู นู ฮอย บูวัฮ_ เดะ มูเซด บือบูวัฮ เตอ_ กูญา มาตี ดูวา กาลี ดัฮ_ กือนา ซีตะ ฮาบิฮ ฌางัน โกะ ฌากัยํ ๆ.

¹³ กูญา ซือรูปา โกะ อูมะ บือซัยํ_ บือปือจัฮ เดะ บีดิก ลาโวจ_ บือกือเมาะ ตีโมน ลาฆู จือและ นะ กูญา ตะอาซิก. กูญา ซือรูปา บีตัก นู ฮาญอจ ซือซัจ ปี มาแรฮ_ นู ตูฮัด บือเลฮ ซียะ ตือปัจ กือลับ โตระ_ บรี กะ กูญา ดูโดะ ซือลาลู เลอ.

¹⁴ เอโนก_ ซือมียา นู ตูโฌฮ_ กีรา ตะเดะ อาดับ เตอ_ ญา โปด_ บือเลฮ มือเลา ตูโดฮ กะ ซือมียา กะฆีนี จะ_ “นี เลอ_ ตูฮัด ญา นะ มาแรฮ_ มารือมา ฌางัน โกะ ฮูลู บาลัก นู จรัฮ บาฌิ นะ ญา_ บาญะ รีบู อูรัก เลอ.

¹⁵ ญา มาแรฮ บีดา นะ บือดะวา กรัจ ฮูโกบ โกะ ซือมียา ซือมูฮา. ญา นะ ฮูโกบ ซือมียา ราตา ๆ กรานา โกะ ปือบูวัจ นู ฌาฮัจ_ นู กูญา บือเลฮ บูวัจ_ ตูโรจ กะ ฮาตี ฌาฮัจ นะ กูญา. ญา ฮูโกบ โกะ ซือมียา ฌาฮัจ นู บือดูซา_ กรานา โกะ ปือมือเลา กรัซ ซือมูฮา_ นู กูญา บือเลฮ มือเลา อูจะ กะ ตูฮัด.”

¹⁶ โกะ ซือมียา กะฆีนี ฌาดี ซือมียา ซือมาตา บือซูงุจ_ มือเลา งูงัมๆ เตอ_ ฌาดี ซือมียา บูวัจ ตูโรจ กะ ลาฆู ฆาละ นู ฌาฮัจ นะ ญาวา ตะอาซิก. กูญา ฌาดี ซือมียา มือเลา งันตืองัน มือโอจ กะ ญาวา ตะอาซิก_ ปูฌี กะ กาวัด ฌูฆา_ บีดา นะ บือเลฮ บาฌิ กะ ญาวา ตะอาซิก.

ลาฆู ปรีงัจ กะ โกะ ซือมียา ปือจายา

¹⁷ ตาปี กาเญา นู กู ซายัก_ กาเญา กือนา บรีงัจ รอจ กะ ปือมือเลา อีตู_ นู ลูมอฮ ปือญูโรฮ นะ เยซู คริด_ ตูฮัด นะ กีตา_ บือเลฮ มือเลา กาลา ดูลู.

¹⁸ กูญา บือเลฮ มือญาเระ กะ กาเญา จะ_ “เดะ กาลา ปือญูดัฮ นะ อาดา ซือมียา อาฆัฮ ฆือละ มาแรฮ_ นู นะ บูวัจ ตูโรจ กะ ลาฆู ฆาละ นู ฌาฮัจ นะ ญาวา ตะอาซิก.”

¹⁹ โกะ ซือมียา กะฆีนี เลอ_ ฌาดี ซือมียา นู บูวัจ บรี ปือจัฮ บือลัฮ_ ฌาดี ซือกาวัด ๆ_ นู ตูโรจ กะ ปรางัย เดะ ฮาตี นะ กูญา_ นู ฮอย ซือมืองัจ นะ ตูฮัด.

²⁰ ตาปี ลูมอฮ กาเญา นู กู ซายัก_ กือนา ตูโลก บือกรือฌา บือซามา_ บรี กาเญา นะ กือฌะ กือมัซ บือตามัฮ บาฌิ_ เดะ ลาฆู นู จรัฮ บาฌิ ซูโงฮ_ นู กาเญา ปือจายา ดัฮ. กือนา บือซาโวจ_ ตูโรจ บือกะ นู ซือมืองัจ นะ ตูฮัด นะ บาวา ปี.

²¹ กือนา ฌาฆา ญาวา_ บรี ดูโดะ ตือตู เดะ ลาฆู นู ตูฮัด ซายัก กาเญา เตอ_ ตืองัฮ กาเญา บือนาตี ลีฮัจ เยซู คริด_ ตูฮัด นะ กีตา_ นู นะ ตือจีฮัด กะ กาเญา_ บรี กาเญา อาดา ฮีโดะ ซูโงฮ ซือลาลู.

²² โซะ ซือมียา นู ฮาตี เตด ตือตู_ กือนา ตูโลก บรี กูญา ปือจายา ตือตู ดัฮ.

²³ โซะ ซือมียา อาซิก_ กือนา รือฆัก กูญา_ บรี ฮีโดะ ลือปัซ เดะ อาปี. โซะ ซือมียา อาซิก ปูลัก_ กือนา ตือจีฮัด กะ กูญา_ อาดา ฮาตี ตาโกจ เดะ ตูฮัด. ตาปี มีเซ จะ โกะ กาเยด บาฌู นะ กูญา_ นู บือซีมอยํ เดะ ลาฆู ฆาละ โซะ ญาวา_ กือนา บือชี เลอ.

ปือมือเลา บือซาโวจ_ ตูโดก ซูรัจ

^24-25 ปูฌี เลอ_ กะ ตูฮัด บือซัยํ เดะ อาตัซ_ ตูฮัด แนฮ ซา_ ญา เลอ_ นู บรี กีตา ฮีโดะ ลือปัซ บาฌิ. ญา มือฆัฮ_ บือเลฮ ฌาฆา กาเญา_ ตีเมา บรี กาเญา รือบัฮ เดะ ลาฆู ปือจายา_ บาวา กาเญา ปี รอจ กะ โซะ ฮือลด มูคา นะ ญา_ นู บือซรี บือซายา_ ฮอย ตือปัจ ตะอารัฮ ลาลู_ ตาปี อาดา ลาฆู ซูกา ฮาตี บาญะ ซูโงฮ เลอ. บือกะ เยซู คริด_ ตูฮัด นะ กีตา_ ญา ตูโลก กีตา_ กะฆีเตอ กีตา ปูฌี กะ ตูฮัด บือซัยํ เดะ อาตัซ_ ซาเบะ ญา เลอ_ นู บือซรี ซูโงฮ_ มือฆัฮ โตระ_ ฌาดี ราฌา ซัยํบือซัยํ ลือเบฮ เดะ มานามา_ ตะเดะ กาลา นูตู_ เดะ กาลา อีนี_ ปี ซือลาลู ซือมาญัก รอจ. อาเมน.