โยซูวา 1 - ซูรัจ ปือมือเลา นะ ตูฮัดตูฮัด ปือซัด โยซูวา_ บรี ซียะ มาโซะ นังฆรี คานาอัน 1 กาลา มูซา_ ปือญูโรฮ นะ ตูฮัด_ มาตี ดัฮ_ ตูฮัด บือซัยํ เดะ อาตัซ มือเลา ฌางัน โยซูวา_ นานะ นะ นูน_ นู ฌาดี ซือมียา ตูโลก มูซา. ตูฮัด ญา จะ 2 “มูซา_ ปือญูโรฮ นะ กู_ มาตี ดัฮ. กะฆีเตอ_ เกา ฌางัน ลูมอฮ บักซา อิซราเอน ซือมูฮา_ กือนา บีกัซ ฌรือมัก ซูงัย จอแดน อีนี_ ปี มาโซะ กะ นังฆรี นู กู นะ บรี กะ ลูมอฮ กูญา. 3 ราตา ตือปัจ_ นู ตาปะ กากี นะ กาเญา นะ กาจะ_ ตือปัจ อีตู กู นะ บรี กะ กาเญา_ บือกะ นู กู บือเลฮ บือฌาญี ดัฮ ฌางัน มูซา. 4 ตือกอซ นังฆรี นะ กาเญา เตอ_ นะ อาดา ตะเดะ ปาดัก ตานัฮ ตูโฮยํ นู ลือฆา อีนี_ รอจ กะ บูเกะ เลบานอน อีตู เตอ_ ตะเดะ ซูงัย บือซัยํ ยูเฟรติด_ รอจ กะ อารอก บือซัยํ โซะ บารัจ เตอ_ นู นังฆรี ซือมูฮา นะ บักซา เฮด เตอ_ ญา นะ ฌาดี นังฆรี นะ กาเญา เลอ. 5 ฮอย ซาปา นะ บือเลฮ ลาวัด เกา_ ตือดะ ฮาบิฮ อูมอยํ นะ เกา. กู อาดา บือซามา ฌางัน มูซา กะฮามี_ กู อาดา บือซามา ฌางัน เกา กะฆีเตอ เลอ. กู เตด ลือปา เกา_ เตด ตีงัน เกา เลอ. 6 เกา กือนา ตือฆัยํ อูรัจ_ ฮาตี บรานี เลอ_ กรานา เกา นะ บาวา ลูมอฮ บักซา อีนี_ บรี ซาโมจ นังฆรี อีตู_ ฌาดี ปือซากา นะ กูญา. กู บือซูปัฮ ฌางัน ญังมูญัง นะ กูญา_ นะ บรี นังฆรี อีตู กะ กูญา. 7 เกา กือนา ตือฆัยํ อูรัจ_ ฮาตี บรานี ซูโงฮ เลอ. เกา กือนา ฌาฆา บูวัจ ตูโรจ ปือมือซัด ฮูโกบ ซือมูฮา นู มูซา_ ปือญูโรฮ นะ กู_ ปือซัด เกา ดัฮ_ ราตา มาจับ. ฌางัน อาเลฮ ปี กีรี กานัน_ เดะ ปือมือซัด ฮูโกบ อีตู. กะฆีเตอ_ เกา นะ ปี โซะ ดีฮา โปด_ เกา นะ ซือนัง ซือมูฮา. 8 ฌางัน บรี ซูรัจ ปือมือเลา ฮูโกบ อีนี_ ปูตุซ เดะ มูโลจ นะ เกา เลอ. กือนา บือฮีมัจ เดะ ซูรัจ อีนี_ ซียัก มาลับ. กือนา บูวัจ ตูโรจ ลาฆู นู ฆาแรฮ ปัจ อีตู ซือมูฮา. กะฆีเตอ เกา นะ ดูโดะ ซือนัง_ บูวัจ ซุจ ดัฮ ซือมูฮา. 9 กู นี_ บือเลฮ ปือซัด เกา_ บูกัด เฆอ? กือนา ตือฆัยํ อูรัจ_ ฮาตี บรานี เลอ. ฌางัน นะ ตาโกจ เลอ. ฌางัน ตือกือฌุจ เลอ. กรานา เกา_ นะ ปี ปัจ ดีฮา_ ตูฮัด บือซัยํ เดะ อาตัซ_ ตูฮัด นะ เกา_ นะ ปี ซามา” ตูฮัด ญา จะ. 10 กะฆีเตอ โยซูวา_ ปือซัด ฌางัน โกะ กือปาลา นะ ลูมอฮ ซือมียา ซือมูฮา จะ_ 11 “กาเญา เลอ_ ปี กะ โกะ รูมัฮ กาฌัก กาเยด ราตา_ ปือซัด กูญา_ บรี ซียะ บารัก มากัด. จะ ตีฆา อารี ลาฆี_ กาเญา ซือมูฮา นะ ฌรือมัก ซูงัย จอแดน อีนี_ บีดา นะ มาโซะ ปี ราปัซ นังฆรี อีตู. ตูฮัด บือซัยํ เดะ อาตัซ_ ตูฮัด นะ กาเญา_ ญา นะ บรี นังฆรี อีตู_ ฌาดี ปือซากา นะ กาเญา” ญา จะ. 12 กะฆีเตอ โยซูวา มือเลา ฌางัน ลูมอฮ รูเบน_ ลูมอฮ กาด_ ฌางัน ลูมอฮ มานาเซฮ ซือตืองัฮ ปาลัฮ จะ 13 “กือนา จับ ปือมือเลา นู มูซา_ ปือญูโรฮ นะ ตูฮัด_ ปือซัด ฌางัน กาเญา ดัฮ_ นู จะ_ ตูฮัด บือซัยํ เดะ อาตัซ_ ตูฮัด นะ กาเญา_ ญา นะ บรี กาเญา อาดา ตือปัจ ดูโดะ ซือนัง_ นะ บรี นังฆรี อีนี กะ กาเญา. 14 บรี บีนี นะ กาเญา_ นานะ นะ กาเญา_ กาวัด บือนาตัก นะ กาเญา_ ดูโดะ เดะ นังฆรี อีนี_ นู มูซา บรี กะ กาเญา ดัฮ_ โซะ อาตัซ มาตา อารี นะ ซูงัย จอแดน. ตาปี บรี ลูมอฮ กีลากี นู ปานัย บือปรัก_ นู ฮาตี บรานี เตอ_ อาเมด โกะ ซือนาตา_ ฌรือมัก ปี โซะ ฮือลด ลูมอฮ นะบรานะ นะ กาเญา_ บีดา ตูโลก โกะ อาดี บราดี นะ ญา_ 15 ฌู ตือดะ ตูฮัด บือซัยํ เดะ อาตัซ_ ตูฮัด นะ กาเญา_ นะ บรี ตือปัจ ดูโดะ ซือนัง_ กะ ลูมอฮ นะบรานะ นะ กาเญา_ บือกะ ญา บรี กะ กาเญา ดัฮ. กะฆีเตอ_ กูญา นะ บือเลฮ ราปัซ นังฆรี อีตู_ นู ตูฮัด บือซัยํ เดะ อาตัซ_ ตูฮัด นะ กาเญา_ ญา อาเกะ บรี ฌาดี ปือซากา นะ กูญา. ลือปัซ อีตู_ กาเญา นะ บาลิ ปาเระ ปี_ กะ นังฆรี นู กาเญา_ ราปัซ อาเมด ฌาดี ปือซากา_ ฌาดี จะ_ นังฆรี นู มูซา_ ปือญูโรฮ นะ ตูฮัด_ บือเลฮ บรี กะ ลูมอฮ กาเญา_ โซะ ซรือบัก ซูงัย จอแดน ซรือบัก อาตัซ มาตา อารี ตรือเบะ.” โยซูวา ญา มือเลา จะ. 16 กะฆีเตอ กูญา ซือมูฮา ตีกัฮ โยซูวา จะ “บือนา ซือมูฮา นู เกา ปือซัด ลูมอฮ กามี ดัฮ_ กามี นะ บูวัจ ตูโรจ ซือมูฮา. เกา ซูโรฮ กามี ปี ปัจ ดีฮา โปด_ กามี นะ ปี ฮาปา. 17 กามี มือนีงัย กะ มูซา ราตา ฌือแนฮ กะฮามี_ นะ มือนีงัย กะ เกา กะฆีเตอ เลอ. มีตา จะ_ ตูฮัด บือซัยํ เดะ อาตัซ_ ตูฮัด นะ เกา_ ดูโดะ ฌางัน เกา_ บือกะ นู ญา บือเลฮ ดูโดะ ฌางัน มูซา เลอ. 18 ซาปา นู บือลาวัด ปือมือเลา ซูโรฮ นะ เกา_ เตด มือนีงัย ปือมือเลา นะ เกา_ เตด จะ เกา นะ ซูโรฮ กูญา กะฮามี_ ซือมียา อีตู นะ ฆาโดฮ กือนา ฮูโกบ บรี มาตี. อาซัน จะ ญา กือนา ตือฆัยํ อูรัจ_ ฮาตี บรานี เลอ” กูญา จะ. |