โยนา 1 - ซูรัจ ปือมือเลา นะ ตูฮัดโยนา กือวาซา ซือลูนี ลารี เดะ ตูฮัด 1 ปือมือเลา นะ ตูฮัด บือซัยํ เดะ อาตัซ_ มาแรฮ รอจ กะ โยนา นานะ นะ อามิดทัย_ มือเลา จะ_ 2 “บีกัซ ปี เลอ_ กะ นีนะเว_ นังฆรี บือซัยํ_ กือนา บือซูระ มือเลา ตูโดฮ กะ นังฆรี อีตู_ ซาเบะ ลาฆู ฌาฮัจ นะ กูญา_ บือเลฮ มาแรฮ รอจ กะ กู ดัฮ.” 3 ตาปี โยนา บือเลฮ บีกัซ_ บีดา นะ ลารี ปี กะ นังฆรี ทาระซิด_ บรี ลือปัซ เดะ มูคา นะ ตูฮัด บือซัยํ เดะ อาตัซ. ญา ตูโรด ปี กะ ตือเปด ยาฟา_ ดาปัจ กาปัน ซา บูวัฮ_ นู ตืองัฮ นะ ปี กะ นังฆรี ทาระซิด. กะฆีเตอ_ ญา บายัยํ รือฆา กาปัน_ ญาแญะ กาปัน ปี บือซามา ฌางัน กูญา กะ นังฆรี ทาระซิด_ บรี ลือปัซ เดะ มูคา นะ ตูฮัด. 4 ตาปี ตูฮัด บือซัยํ เดะ อาตัซ บูวัจ บรี อาเงน ตีโยะ โซะ ลาโวจ. กะฆีเตอ_ อาดา อาเงน รีโบจ โซะ ลาโวจ อีตู_ ฌู บราซา ตาโกจ กาปัน นะ ตาลับ. 5 กะฆีเตอ โกะ อานะ กูลี โปด_ ปาคัจ ตาโกจ_ ซิกมาซิก บือซูระ มีตา ตูโลก เดะ โกะ ตูฮัด นะ กูญา. กูญา ตูโฮะ โกะ ซือบารัก เดะ ดาลับ กาปัน_ บูวัก กะ ลาโวจ_ บีดา นะ บรี กาปัน รีฮัน. ตาปี โยนา ญา มาโซะ ปี กะ ดาลับ รูวัก กาปัน_ ตีโนะ ลีนา ดัฮ. 6 แตกอก กาปัน มาแรฮ ซารี ญา_ มือเลา ฌางัน ญา จะ_ “เกา ซือมียา ตีโนะ มืองือโลก เออ_ กะฮามี เลอ_ กือนา บีกัซ เลอ_ บือซูระ มีตา ตูโลก เดะ ตูฮัด นะ เกา_ อาซัน จะ ตูฮัด อีตู นะ บรีงัจ กะ ลูมอฮ กีตา ซือตืองัฮ_ บีดา นะ บูวัจ บรี กีตา ฮอย เตด ฌาฮานัม.” 7 กูญา ซือมูฮา ปาคัจ มือเลา ซามา กูญา จะ_ “มาแรฮ เลอ_ บรี กีตา ปาคัจ ยิบละ_ บีดา กีตา นะ ตาฮู จะ_ ลาฆู ฌาฮานัม อีนี มาแรฮ บือฌาดี เดะ กีตา กรานา ซาปา.” กะฆีเตอ กูญา โปด ปาคัจ ยิบละ_ ยิบละ อีตู โปด กือนา เดะ โยนา. 8 กูญา มือเลา ฌางัน โยนา จะ_ “กือนา มือญาเระ กะ กามี เลอ จะ_ ลาฆู ฌาฮานัม นู บือฌาดี ฌางัน กามี เตอ_ มาแรฮ กรานา ลาฆู นามา? เกา ซารี มากัด เดะ ฌาลัด ดีฮา? เกา มาแรฮ ดาตัก ปัจ ดีฮา? นังฆรี นะ เกา ปือนามา นามา? เกา ฌาดี ลูมอฮ บักซา ดีฮา?” 9 กะฆีเตอ ญา ตีกัฮ กะ กูญา จะ_ “กู ฌาดี ซือมียา ลูมอฮ ฮีบรู_ กู บรีงัจ ตาโกจ เดะ ตูฮัด บือซัยํ เดะ อาตัซ ลาแงะ_ ญา นู บือฌาดี ลาโวจ ฌางัน ตานัฮ ตูโฮยํ.” 10 โกะ ซือมียา อีตู โปด ตาโกจ โตระ_ ตาญา กูญา จะ_ “เกา บูวัจ ลาฆู นามา กะฆีนี เลอ?” ซาเบะ โกะ ซือมียา อีตู เตอ_ ตาฮู ดัฮ จะ_ ญา ลารี เดะ มูคา นะ ตูฮัด บือซัยํ เดะ อาตัซ_ กรานา เกา มือญาเระ กะ กูญา กะฆีเตอ ดัฮ. 11 กูญา มือเลา ฌางัน ญา จะ_ “กามี บือฆูนา นะ บูวัจ กะฮามี กะ เกา_ บีดา ลาโวจ นะ ซืองะ_ บีดา กามี?” กรานา อาเงน เดะ ลาโวจ ญา ตือฆัยํ ซือรูโลยํ_ อูมะ บือซัยํ โปด. 12 ญา ตีกัฮ กะ กูญา จะ_ “กือนา รีฆะ กู_ ตูโฮะ กะ ลาโวจ เลอ_ นะ บูวัจ บรี ลาโวจ ญา ซืองะ บีดา กาเญา_ ซาเบะ กู ตาฮู ดัฮ จะ_ รีโบจ ตือฆัยํ กะฆีนี มาแรฮ อาตัซ กาเญา กรานา ญาวา นะ กู ตะอาซิก.” 13 มีเซ กะฆีเตอ_ โกะ ลูมอฮ อานะ กูลี โปด_ ปาคัจ บราวัจ ตือฆัยํ อูรัจ_ นะ บาวา กาปัน มาโซะ กะ ปาตัย_ ตาปี ฮอย เตด บือเลฮ_ กรานา จะ_ อาเงน ตือฆัยํ_ อูมะ บือซัยํ บาญะ ซือรูโลยํ_ บือลาวัด กูญา. 14 กะฆีเตอ_ กูญา บือซูระ มีตา ตูโลก เดะ ตูฮัด จะ_ “โอ_ ตูฮัด บือซัยํ เดะ อาตัซ_ กามี มีตา ปูโฌะ ตูฮัด_ ฌางัน บรี กามี นะ ฌาฮานัม กรานา ซือมียา อีนี เลอ. มีตา ฌางัน กรัจ ฮูโกบ_ บรี กะ ดารัฮ นะ ซือมียา นู ฮอย ลาฆู ซาลัฮ_ ฆูโฆยํ เดะ อาตัซ กามี_ ตูฮัด เออ_ ซาเบะ ตูฮัด เกา บูวัจ ลาฆู นู เกา ซูกา เดะ ฮาตี.” 15 กะฆีเตอ_ กูญา รีฆะ โยนา_ ตูโฮะ กะ ลาโวจ. โกะ อาเงน รีโบจ เดะ ลาโวจ โปด ซืองะ ดัฮ. 16 โกะ ลูมอฮ ซือมียา อีตู โปด_ ตาโกจ โตระ เดะ ตูฮัด บือซัยํ เดะ อาตัซ. กูญา อาเกะ บือนาตัก มือญือมัฮ กะ ตูฮัด_ บือนียัจ ดัฮ. 17 ตูฮัด บือซัยํ เดะ อาตัซ บูวัจ บรี อีกัด บือซัยํ ซา อีโกยํ ตือลัด โยนา ดัฮ. กะฆีเตอ โยนา โปด_ ดูโดะ เดะ ดาลับ โปรจ นะ อีกัด บือซัยํ อีตู_ ตีฆา อารี ตีฆา มาลับ. |