โยเอน 1 - ซูรัจ ปือมือเลา นะ ตูฮัด1 ปือมือเลา นะ ตูฮัด บือซัยํ เดะ อาตัซ_ นู มาแรฮ รอจ กะ โยเอน_ นานะ นะ เปทูเอน. ลาฆู บือปาโตด ปาซัน นังฆรี ฌาฮานัม ( บราเกะ ลารี 10.1-20 ) 2 โกะ อูรัก ตูฮา เออ_ กือนา มือนีงัย ลาฆู อีนี ราตา อูรัก นู ดูโดะ เดะ นังฆรี_ กือนา จีเฮะ ตลีงา มือนีงัย ลาฆู กะฆีนี ดือละ บือฌาดี ดัฮ เฆอ_ เดะ ฮาดัจ นะ กาเญา? เฆอ จะ เดะ ฮาดัจ นะ โกะ บีลาแก นะ กาเญา? 3 กือนา มือญาเระ บรี โกะ นานะ นะ กาเญา ตาฮู บรี กะ นานะ มือญาเระ กะ จูจู บรี กะ จูจู มือญาเระ กะ จีแจะ ปี ซือรูโลยํ เลอ. 4 ซือบารัก นามา นู ลือเบฮ เดะ บลาลัก บารู นะ บือฌาลัด มากัด บลาลัก นู บารู นะ ตรือบัก โปด นะ มากัด ฮาบิฮ ซือบารัก นามา นู ลือเบฮ เดะ บลาลัก บารู นะ ตรือบัก มากัด บลาลัก บารู นะ มือลูปัจ นะ มากัด ฮาบิฮ ซือบารัก นามา นู บลาลัก บารู นะ มือรากะ โปด นะ มากัด ฮาบิฮ. 5 โกะ ซือมียา นู ลือกัจ อาระ เออ_ บีกัซ มือนาแงฮ เลอ บือปาโตด เลอ_ กาเญา_ ลูมอฮ ฮาตู อาระ เออ กรานา อาระ อางุน มาแนฮ ซาเบะ ญา นะ กือนา กรัจ บรี ปูตุซ เดะ มูโลจ นะ กาเญา ดัฮ. 6 ซาเบะ จะ อาดา ซา บักซา บือเลฮ มาโซะ มาแรฮ บือลาวัด ฌางัน นังฆรี นะ กู ญา ตือฆัยํ อูรัจ โตระ_ กีรา เตด ตือตู ฆีฆี นะ ญา ซือรูปา กะ ฆีฆี นะ ซีงา ซีโยก นะ ญา ซือรูปา กะ ซีโยก นะ ซีงา อายา. 7 ญา บือเลฮ ปรูโตฮ อากัยํ ปูโฮด บูวัฮ อางุน นะ กู บือเลฮ ปือเลาะ กูเละ ปูโฮด กรายา บูดี นะ กู ญา กูแซะ กูเละ ตรือเบะ บูวัก ดัฮ โกะ ดาฮัด นะ ญา โปด ลีฮัจ ปูเตฮ ฮาบิฮ. 8 กือนา บือปาโตด ซือรูปา บือกะ นีบีนี เตด บือเลฮ ลากี ลาฆี นู อีกัจ กาเยด ฆูนี ตาโรฮ เดะ ปีงัก นู บูวัจ ลาฆู ซูซัฮ บรี กะ เจาบาว นะ ญา นู บือเลฮ เดะ กาลา ราดารา. 9 โกะ ตาโระ ราตา ฌือแนฮ นู อาเกะ มือญือมัฮ ฌางัน ซือบารัก โอะ นู อาเกะ มือญือมัฮ กือนา กรัจ บูวัก ดัฮ เดะ รูมัฮ มือญือมัฮ นะ ตูฮัด บือซัยํ เดะ อาตัซ. ซามี โปด ซูซัฮ ฮาตี ฌาดี จะ โกะ ซือมียา นู บือกรือฌา กะ ตูฮัด เดะ อาตัซ. 10 บือนัก โปด ฮอย นามา บือตูโมฮ ตือปัจ ตานัฮ โปด_ ซูซัฮ ฮาตี ซาเบะ โกะ ปาดี กือนา ปรูโตฮ ฮาบิฮ อาระ อางุน บารู โปด_ ฮอย มีญะ กือดูโนด_ ปูตุซ ดัฮ เลอ. 11 โกะ ซือมียา กรือฌา บือนัก เออ_ กือนา มือนาแงฮ เลอ ซือมียา ปือตัด อากัยํ ปูโฮด บูวัฮ อางุน เออ_ กือนา บือปาโตด กรานา จะ บรัซ ซาลี ฌางัน บรัซ บาลี ซาเบะ บูวัฮ เดะ บือนัก โปด_ กือนา ปรูโตฮ ฮาบิฮ. 12 อากัยํ ปูโฮด บูวัฮ อางุน_ ญา จีรอจ ปูโฮด กรายา บูดี โปด_ ตูโฮยํ ดัฮ ปูโฮด บูวัฮ ลีมา_ ปูโฮด อินทะพาลัม_ ฌางัน ปูโฮด บูวัฮ แอบเปิน โกะ ปูโฮด เดะ บือนัก ซือมูฮา โปด_ จีรอจ ฮาบิฮ. ซูโงฮ_ ลาฆู ซูกา ฮาตี โปด_ ฮาบิฮ ลือแงะ เลอ_ เดะ โกะ อูมัจ ซือมียา. บลาโลก กูญา บรี บราเลฮ ฮาตี บือซาโวจ 13 โกะ ลูมอฮ ซามี เออ_ กือนา ปากัย กาเยด ฆูนี_ ซาแมน บือปาโตด กาเญา ซือมียา นู บือกรือฌา เดะ ตือปัจ มือญือมัฮ กือนา บือปาโตด เลอ กาเญา ซือมียา บือกรือฌา กะ ตูฮัด นะ กู_ กือนา มาโซะ ปี ปือแญะ กาเยด ฆูนี ตีโนะ ซือมาลับ ซาเบะ จะ โกะ ตาโระ มือญือมัฮ ฌางัน โกะ ซือบารัก โอะ มือญือมัฮ ญา ปูตุซ ดัฮ_ เดะ รูมัฮ มือญือมัฮ นะ ตูฮัด นะ เกา. 14 กือนา ซียะ บูวัจ ลาฆู บือตาฮัด นาซี กือนา บลาโลก บือมุน นู ซีดี กือนา บือมุน โกะ ซือมียา ซัยํบือซัยํ ฌางัน โกะ ลูมอฮ เดะ นังฆรี ซือมูฮา ปี กะ รูมัฮ มือญือมัฮ นะ ตูฮัด บือซัยํ เดะ อาตัซ_ ตูฮัด นะ กาเญา บือซูระ กะ ตูฮัด บือซัยํ เดะ อาตัซ เลอ. 15 จือลากา เลอ_ อารี อีตู ซาเบะ อารี นะ ตูฮัด บือซัยํ เดะ อาตัซ ดาปิก มาแรฮ ดัฮ อารี อีตู นะ มาแรฮ บือกะ ลาฆู ฌาฮานัม ดาตัก เดะ นะ ตูฮัด นู มือฆัฮ. 16 ซือบารัก มากัด กือนา ซือกัจ ดัฮ โซะ ฮือลด มูคา มาตา นะ ลูมอฮ กีตา ลาฆู บรามัย ซูกา ฮาตี โปด ปูตุซ ดัฮ เดะ รูมัฮ มือญือมัฮ นะ ตูฮัด นะ กีตา ดัฮ_ บูกัด เฆอ? 17 บีฌี ตาโระ_ ตูโฮยํ มาตี เดะ บาวัฮ ตานัฮ ดาเงา โปด_ ฮอย นามา รูมัฮ บอฮ ปาดี รูโตฮ ฮาบิฮ ซาเบะ ปาดี ตูโฮยํ ดัฮ 18 บือนาตัก ปือบือลา โปด_ บือซูระ มือรายู ดัฮ เลอ กาวัด ลือมู บือฌาลัด ปี มาแรฮ ซาเบะ จะ ฮอย ลามัน รูโปจ บรี กะ กูญา. มีเซ จะ กาวัด แบะ กาวัด กาเมก โปด_ รือมัย เดะ ฮาตี. 19 โอ ตูฮัด บือซัยํ เดะ อาตัซ_ กู บือซูระ กะ เกา ซาเบะ จะ_ อาปี บือเลฮ ตูนู ปาดัก รูโปจ เดะ ตานัฮ ตูโฮยํ นู ลือฆา ญาลา อาปี บือเลฮ ปือลัฮ ฮางอซ ดัฮ_ โกะ ปูโฮด เดะ ปาดัก รูโปจ_ ปือลัฮ ฮาบิฮ ดัฮ. 20 มีเซ จะ บือนาตัก เดะ ฮูตัด โปด_ บือซูระ กะ ตูฮัด ฌูฆา ซาเบะ จะ อาเย เดะ ลูนัก กริก ดัฮ อาปี โปด บือเลฮ ตูนู ปาดัก รูโปจ เดะ ตานัฮ ตูโฮยํ นู ลือฆา เลอ. |