เยเรมียา 1 - ซูรัจ ปือมือเลา นะ ตูฮัด

¹ ปือมือเลา นะ เยเรมียา_ นานะ นะ ฮีละคียา. เยเรมียา ฌาดี ซือมียา ซืออูรัก_ เดะ ลูมอฮ ซามี_ ซือมียา นู ดูโดะ เดะ ตูโปะ อานาโทด_ เดะ นังฆรี นะ ปาลัฮ เบนยามิน.

² ปือมือเลา นะ ตูฮัด บือซัยํ เดะ อาตัซ มาแรฮ รอจ กะ เยเรมียา_ เดะ ฮาดัจ นะ โยซียา_ นานะ นะ อาโมน_ ราฌา นังฆรี ยูดา_ เดะ ตาโฮด ตีฆา บือลัซ (13)_ เดะ ลาฆู ปือบือลา ฌาดี ราฌา นะ ญา.

³ อาดา เดะ ฮาดัจ นะ เยโฮยาคิม_ นานะ นะ โยซียา_ ราฌา นะ ยูดา_ ฌู รอจ กะ ฮูโฌก ตาโฮด ซือบือลัซ (11)_ เดะ ฮาดัจ นะ เซเดคียา_ นานะ นะ โยซียา_ ราฌา นะ ยูดา_ กาลา อาดา ลาฆู กือโปก ลูมอฮ เยรูซาเลม_ บือปี ฌาดี ปราโซฮ_ เดะ บูลัด นู ลีมา.

ตูฮัด บลาโลก เยเรมียา_ บรี ญา บือกรือฌา กะ ตูฮัด

⁴ ปือมือเลา นะ ตูฮัด บือซัยํ เดะ อาตัซ_ มาแรฮ รอจ กะ กู_ จะ

⁵ “กู บือเลฮ กราลา เกา_ ดูลู เดะ กู นะ บือฌาดี เกา_ เดะ ดาลับ โปรจ ดูลู เดะ เกา นะ ดูโดะ เดะ อาปี_ กู โปด_ บือเลฮ ปีเลฮ ตืองะ เกา ดัฮ กู บือเลฮ อาเกะ ตืองะ เกา_ ฌาดี ซือมียา ตูโดฮ ปือมือเลา นะ กู_ บรี กะ โกะ ลูมอฮ บักซา ซือมูฮา.”

⁶ กะฆีเตอ_ กู บือเลฮ มือญาเระ จะ_ “โอ ตูฮัด บือซัยํ เดะ อาตัซ_ ตูฮัด นะ กู_ ลีฮัจ เลอ_ กู มือเลา เตด ปานัย_ ซาเบะ จะ กู ฌาดี อูรัก มูดา ลาฆี.”

⁷ ตาปี ตูฮัด บือซัยํ เดะ อาตัซ มือเลา ฌางัน กู จะ_ “ฌางัน มือเลา จะ ‘กู ฌาดี อูรัก มูดา ลาฆี.’ ซาเบะ_ เกา ฆาโดฮ ปี ซารี ราตา ซือมียา_ นู กู ซูโรฮ เกา ปี กู ปือซัด เกา กะฮามี_ เกา ฆาโดฮ มือเลา กะฆีเตอ เลอ.

⁸ ฌางัน ตาโกจ เดะ ลูมอฮ กูญา เลอ ซาเบะ กู ดูโดะ บือซามา ฌางัน เกา_ บีดา นะ ตูโลก เกา เลอ. ตูฮัด บือซัยํ เดะ อาตัซ มือเลา กะฆีนี เลอ.”

⁹ กะฆีเตอ_ ตูฮัด บือซัยํ เดะ อาตัซ_ ญา อาเงา ตางัน นะ ญา_ ปือเตาะ เดะ มูโลจ นะ กู_ มือเลา ฌางัน กู จะ “นี เลอ_ กู อาเมด โกะ ปือมือเลา นะ กู_ บอฮ เดะ มูโลจ นะ เกา.

¹⁰ ลีฮัจ เลอ_ อารี อีนี กู บือเลฮ ตืองะ เกา_ เดะ อาตัซ โกะ ลูมอฮ บักซา ซือมียา_ อาตัซ โกะ นังฆรี บีดา นะ ซีตะ ตรือเบะ_ บีดา นะ ปรูโตฮ บีดา นะ บูวัจ บรี ฌาฮานัม_ นะ จรือเกาะ บูวัก บีดา นะ บือฌาดี_ บีดา นะ ตานัม.”

¹¹ ปือมือเลา นะ ตูฮัด บือซัยํ เดะ อาตัซ_ มาแรฮ รอจ กะ กู_ มือเลา จะ “เยเรมียา เออ_ เกา ลีฮัจ นามา?” กู มือญาเระ จะ “กู นี_ ลีฮัจ ดาฮัด นะ ปูโฮด อาละมอน.”

¹² กะฆีเตอ_ ตูฮัด มือเลา ฌางัน กู จะ “เกา ลีฮัจ กือนา ดัฮ_ ซาเบะ กู นาตี ลีฮัจ ปือมือเลา นะ กู_ บีดา บูวัจ บรี ซุจ.”

¹³ ปือมือเลา นะ ตูฮัด บือซัยํ เดะ อาตัซ_ มาแรฮ รอจ กะ กู_ ซือกาลี ลาฆี จะ_ “เกา ลีฮัจ นามา?” กู มือญาเระ จะ_ “กู นี_ ลีฮัจ ปีโยะ ซือบีฌี_ ตืองัฮ มือนีเดฮ_ อาเลฮ มูคา มาแรฮ ดาตัก เดะ โซะ ตารา.”

¹⁴ กะฆีเตอ ตูฮัด มือเลา ฌางัน กู จะ_ “ลาฆู ฌาฮัจ นะ บรือโตฮ_ ดาตัก โซะ ตารา_ มาแรฮ อาตัซ ลูมอฮ ซือมียา เดะ นังฆรี อีนี ซือมูฮา.

¹⁵ ซาเบะ อีนี เลอ_ กู ตืองัฮ บลาโลก ปาลัฮ ซือมูฮา เดะ โกะ นังฆรี โซะ ตารา”_ ตูฮัด บือซัยํ เดะ อาตัซ มือเลา กะฆีนี เลอ_ “กูญา ซือมูฮา นะ มาแรฮ_ ซิกมาซิก นะ ตืองะ ตือปัจ ดูโดะ นะ กูญา_ เดะ โซะ ฌาลัด นะ มาโซะ กะ ปีตู นังฆรี เยรูซาเลม_ บีดา บือลาวัด ฌางัน ดีนิง นู กือลีลิก_ บือลาวัด ฌางัน โกะ นังฆรี ซือมูฮา นะ ยูดา.

¹⁶ กู นะ มือเลา ปือมือเลา กรัจ ฮูโกบ นะ กู_ กะ ซือมียา เดะ นังฆรี อีตู_ กรานา ลาฆู ฌาฮัจ นะ กูญา. กูญา ตีงัน กู ดัฮ_ ปี อาซะ กือมียัน กะ โกะ บราลา_ มือญือมัฮ ซือบารัก นู ตางัน นะ กูญา บือเลฮ บูวัจ ดัฮ.

¹⁷ ตาปี โซะ เกา_ กือนา ปือแญะ ญาวา ซียะ นะ บือกรือฌา_ บีกัซ ปี_ มือญาเระ ราตา ฌือแนฮ_ นู กู ปือซัด เกา_ บรี กูญา ดืองัยํ. ฌางัน ตือกือฌุจ ตาโกจ เดะ กูญา เลอ_ เตด กะฆีเตอ กู นะ บูวัจ บรี เกา ตือกือฌุจ โซะ ฮือลด มูคา นะ กูญา.

¹⁸ โซะ กู_ ลีฮัจ เลอ_ เดะ อารี อีนี กู บูวัจ บรี เกา ฌาดี นังฆรี_ นู อาดา รูมัฮ บือปรัก_ ฌาดี จาวัก บือซี_ ฌาดี ดีนิง มัซ ซือวะซา_ บีดา บือลาวัด ฌางัน โกะ ราฌา นังฆรี ยูดา_ ฌางัน ตกเก_ ฌางัน ซามี_ ฌางัน โกะ ซือมียา เดะ นังฆรี อีนี.

¹⁹ กูญา นะ บือลาวัด ฌางัน เกา_ ตาปี นะ เตด ฌือนัฮ เดะ เกา_ ซาเบะ กู อาดา ดูโดะ บือซามา ฌางัน เกา_ บีดา ตูโลก เกา. ตูฮัด บือซัยํ เดะ อาตัซ มือเลา กะฆีนี เลอ.”