ซือมียา กรัจ ฮูโกบ 1 - ซูรัจ ปือมือเลา นะ ตูฮัดปาลัฮ ยูดา ฌางัน ปาลัฮ ซีเมโอน รีฆะ อาโดนี-เบเซก ( โยซูวา 15.13-19 ) 1 กาลา โยซูวา มาตี ดัฮ_ ลูมอฮ อิซราเอน ตาญา ตูฮัด บือซัยํ เดะ อาตัซ จะ “ซาปา เดะ ลูมอฮ กามี ซือมูฮา_ นะ ญาแญะ ปี ดูลู_ บีดา บือปรัก ฌางัน ลูมอฮ คานาอัน?” 2 ตูฮัด มือเลา จะ “ปาลัฮ ยูดา นะ ญาแญะ ปี. ลีฮัจ เลอ_ กู บือเลฮ ซรัฮ นังฆรี อีตู_ บรี ดูโดะ เดะ ตางัน นะ กูญา ดัฮ.” 3 กะฆีเตอ ยูดา มือเลา ฌางัน ซีเมโอน_ นู ฌาดี จา เดะ กูญา_ จะ “บรี กาเญา ญาแญะ ปี_ มารือมา ฌางัน กามี_ เดะ ตือกอซ บาฮาเฆด นะ กามี_ บีดา กีตา นะ บือเลฮ บือปรัก บือซามา_ ฌางัน ลูมอฮ คานาอัน. ลือปัซ อีตู_ กามี นะ ปี บือปรัก เดะ ตือกอซ บาฮาเฆด นะ กาเญา ฌูฆา.” ซีเมโอน โปด_ ปี ฌางัน กูญา. 4 กะฆีเตอ ยูดา_ ญาแญะ ปี บือปรัก. ตูฮัด บือซัยํ เดะ อาตัซ เตอ_ บือเลฮ ซรัฮ ลูมอฮ คานาอัน_ ฌางัน ลูมอฮ เปรีซี_ บรี อาดา เดะ บาวัฮ ฮูโกบ นะ กูญา. กูญา โปด_ บูนอฮ ซือมียา เดะ นังฆรี เบเซก_ 10,000 อูรัก 5 กูญา ดาปัจ อาโดนี-เบเซก_ เดะ นังฆรี เบเซก_ บือลาวัด บือปรัก ฌางัน ญา. กูญา บือเลฮ ฌือนัฮ เดะ ลูมอฮ คานาอัน_ ฌางัน ลูมอฮ เปรีซี. 6 โซะ อาโดนี-เบเซก ลารี ปี ดัฮ_ ตาปี กูญา อูเซ รีฆะ ญา_ บือเลฮ กรัจ ฌารี บือซัยํ เดะ ตางัน_ ฌางัน กากี นะ ญา ดัฮ. 7 อาโดนี-เบเซก มือเลา จะ “อาดา ราฌา ตูโฌฮ ปูโลฮ อูรัก_ ฌารี บือซัยํ เดะ กากี ฌางัน ฌารี บือซัยํ เดะ ตางัน กูโดก ฮาบิฮ_ กูญา ดือละ ปูงอจ โกะ กรือดะ นาซี_ เดะ บาวัฮ ปาปัด โตะ นะ กู. กู บูวัจ ฌางัน กูญา กะฮามี_ ตูฮัด ญา บูวัจ กะ กู บือกะฆีเตอ เลอ.” กูญา บาวา ญา_ มาแรฮ กะ นังฆรี เยรูซาเลม. ญา โปด_ มาตี เดะ ตือปัจ อีตู. ปาลัฮ ยูดา บือปรัก ฌือนัฮ เดะ นังฆรี เยรูซาเลม_ ฌางัน นังฆรี เฮโบรน 8 โกะ ลูมอฮ ยูดา บือเลฮ มาโซะ บือปรัก ฌางัน นังฆรี เยรูซาเลม_ ราปัซ อาเมด นังฆรี อีตู_ บือเลฮ บูนอฮ โกะ ลูมอฮ ซือมียา เดะ นังฆรี_ ฌางัน ปือดัก_ อาเมด อาปี ตูนู นังฆรี อีตู. 9 ลือปัซ อีตู_ โกะ ปาลัฮ ยูดา บือเลฮ ตูโรด ปี บือปรัก ฌางัน ลูมอฮ คานาอัน_ นู อาดา ดูโดะ เดะ โซะ อาตัซ บูเกะ_ เดะ ตือปัจ ตูโฮยํ โซะ บารัจ ดายา_ ฌางัน เดะ ตือปัจ ตานัฮ รือนัฮ. 10 ยูดา บือเลฮ ปี บือปรัก ฌางัน ลูมอฮ คานาอัน_ นู ดูโดะ เดะ เฮโบรน. (นังฆรี เฮโบรน เตอ_ เดะ กาลา ดูลู อาดา ปือนามา จะ_ คีริยาด-อาระบา). กูญา บือเลฮ บูนอฮ เซซัย_ อาฮีมาน_ ฌางัน ทันมัย. โอดนีเอน บือปรัก ฌือนัฮ เดะ นังฆรี เดบีระ 11 กูญา ตรือเบะ เดะ ตือปัจ อีตู_ ปี บือลาวัด บือปรัก ฌางัน ลูมอฮ นังฆรี เดบีระ (นังฆรี เดบีระ เตอ_ เดะ กาลา ดูลู อาดา ปือนามา จะ คีริยาด-เซเฟอ.) 12 กะฆีเตอ_ คาเลบ มือเลา จะ_ “ซาปา บือปรัก ราปัซ อาเมด นังฆรี คีริยาด-เซเฟอ_ กู นะ อาเกะ อักซัฮ_ นานะ ราดารา นะ กู_ บรี ฌาดี บีนี นะ ญา.” 13 โอดนีเอน_ นานะ นะ เคนัด_ อาดี กีลากี นะ คาเลบ_ บือเลฮ บือปรัก ฌือนัฮ เดะ นังฆรี อีตู. กะฆีเตอ คาเลบ โปด_ อาเกะ อักซัฮ_ บรี ฌาดี บีนี นะ ญา. 14 กาลา กูญา บือนีกัฮ ดัฮ_ ญา บืออาฌะ ลากี_ ซูโรฮ ปี มีตา บือนัก เดะ ปะ. ตานา อักซัฮ_ ตูโรด เดะ บลากัก กูดา ดือมิ_ คาเลบ ตาญา นีบีนี อีตู จะ_ “เกา มาแรฮ อาดา ลาฆู นามา?” 15 นีบีนี อีตู ตีกัฮ กะ ญา จะ_ “ฮาฆิ ซือบารัก ซา ฌือแนฮ กะ กู เลอ_ กาลา ปะ บือเลฮ บรี กะ กู มาแรฮ ดูโดะ เดะ ตือปัจ ตูโฮยํ โซะ บารัจ ดายา ดัฮ_ กู มีตา อาเย ซือบุยํ ฌูฆา เลอ.” คาเลบ โปด_ อาเกะ อาเย ซือบุยํ โซะ อาตัซ_ ฌางัน อาเย ซือบุยํ โซะ บาวัฮ_ บรี กะ ญา. ลาฆู ฌือนัฮ นะ ปาลัฮ ยูดา ฌางัน ปาลัฮ เบนยามิน 16 ลูมอฮ เคนี_ นู ฌาดี บือแนฮ นะ ปะ มือตูฮา นะ มูซา_ บือเลฮ ญาแญะ ปี กะ นังฆรี เยรีโค_ นังฆรี ปูโฮด อินทะพาลัม_ มารือมา ฌางัน ลูมอฮ ยูดา_ มาแรฮ รอจ กะ ตานัฮ ตูโฮยํ นู ลือฆา นะ ยูดา_ นู อาดา เดะ ตือปัจ ตูโฮยํ โซะ บารัจ ดายา_ ดาปิก นังฆรี อาราด. กูญา โปด_ มาโซะ ปี ดูโดะ บือซามา ฌางัน ลูมอฮ บักซา อีตู. 17 ปาลัฮ ยูดา โปด_ ปี บือซามา ฌางัน ปาลัฮ ซีเมโอน_ จา เดะ ญา_ บูนอฮ โกะ ลูมอฮ คานาอัน_ นู ดูโดะ เดะ นังฆรี เซฟัด_ ปรูโตฮ นังฆรี อีตู บรี ฌาฮานัม ฮาบิฮ ดัฮ. กูญา เตอ_ บลาโลก นังฆรี อีตู จะ_ โฮระมัฮ 18 ยูดา บือเลฮ ราปัซ อาเมด นังฆรี ฆาซา_ ฆือนะ ฌางัน ตือกอซ นังฆรี อีตู_ นังฆรี อัดซะเคโลน_ ฆือนะ ฌางัน ตือกอซ นะ นังฆรี อีตู_ นังฆรี เอโครน_ ฆือนะ ฌางัน ตือกอซ นะ นังฆรี อีตู ฌูฆา. 19 ตูฮัด บือซัยํ เดะ อาตัซ ดูโดะ บือซามา ฌางัน ยูดา_ กะฆีเตอ กูญา บือเลฮ ราปัซ โกะ บูเกะ_ ตาปี เตด ฆามะ นะ โปรฮ โกะ ลูมอฮ ซือมียา_ นู ดูโดะ โซะ ตือปัจ ซามา_ บรี ตรือเบะ ปี_ ซาเบะ โกะ ลูมอฮ อีตู_ อาดา ซือตรี บือปรัก นู ฌาดี บือซี. 20 นังฆรี เฮโบรน เตอ_ กูญา อาเกะ บรี กะ คาเลบ_ บือกะ นู มูซา บือเลฮ มือเลา ดัฮ. กะฆีเตอ_ คาเลบ โปรฮ นานะ กีลากี_ ตีฆา อูรัก_ นะ อานาก_ บรี ตรือเบะ ปี เลอ. 21 ตาปี ลูมอฮ เบนยามิน_ เตด บือเลฮ โปรฮ ลูมอฮ เยบูซี_ นู ดูโดะ เดะ เยรูซาเลม_ บรี ตรือเบะ ปี เลอ. กะฆีเตอ_ ลูมอฮ เยบูซี ดูโดะ ฌางัน ลูมอฮ เบนยามิน_ เดะ เยรูซาเลม_ ฌู รอจ กะ ฮาดัจ อีนี. บือแนฮ นะ โยเซบ บือปรัก ฌือนัฮ เดะ นังฆรี เบดเอน 22 กะฆีเตอ_ บือแนฮ นะ โยเซบ บือเลฮ ญาแญะ ปี บือปรัก ฌางัน นังฆรี เบดเอน ฌูฆา. ตูฮัด บือซัยํ เดะ อาตัซ โปด_ บือเลฮ ดูโดะ บือซามา ฌางัน กูญา. 23 บือแนฮ นะ โยเซบ_ ซูโรฮ ซือมียา ปี มือญาซัจ เดะ นังฆรี เบดเอน (เดะ กาลา ดูลู_ นังฆรี อีนี ปือนามา จะ_ ลูด). 24 ซือมียา นู มือญาซัจ_ ลีฮัจ จะ_ อาดา กีลากี ซืออูรัก บือฌาลัด ตรือเบะ เดะ นังฆรี_ มือเลา ฌางัน ญา จะ “มีตา ตูโญะ ฌาลัด_ นะ มาโซะ นังฆรี_ บรี กะ กามี. กามี นะ บูวัจ บือกะ ฮาตี รือมัก กะ เกา เลอ.” 25 กะฆีเตอ_ กีลากี อีตู_ ตูโญะ กะ กูญา_ ฌาลัด มาโซะ กะ นังฆรี. กูญา โปด_ บูนอฮ ราตา ซือมียา เดะ นังฆรี ฌางัน ปือดัก_ ตาปี ปลือปัซ กีลากี อีตู_ ฌางัน โกะ นะบรานะ นะ ญา ซือมูฮา_ บรี ตรือเบะ ปี. 26 กีลากี อีตู โปด_ บือฌาลัด ปี กะ นังฆรี นะ ลูมอฮ เฮด_ บูวัจ นังฆรี ซา นังฆรี_ บลาโลก ปือนามา นังฆรี อีตู จะ_ ลูด_ นู ฌาดี ปือนามา ฌู รอจ กะ ฮาดัจ อีนี. ลูมอฮ ซือมียา นู โกะ ลูมอฮ อิซราเอน โปรฮ เตด บือเลฮ 27 ลูมอฮ ปาลัฮ มานาเซฮ เตอ_ เตด บือเลฮ โปรฮ ลูมอฮ นังฆรี เบด-ซาน_ นังฆรี ทาอานาก_ นังฆรี โด-ระ_ นังฆรี อิบเลอัม_ นังฆรี เมกิดโด_ ฌางัน โกะ ซือมียา เดะ ตูโปะ ดาปิก นังฆรี อีตู ซือมูฮา. ตาปี ลูมอฮ คานาอัน_ กูญา อาดา ดูโดะ เดะ โซะ ตือกอซ นังฆรี อีตู ลาฆี. 28 กาลา ลูมอฮ อิซราเอน ตือฆัยํ อูรัจ ดัฮ_ กูญา ปรือกัด บรี ลูมอฮ คานาอัน บือกรือฌา โตระ บือกะ ปราโซฮ_ ตาปี เตด บือเลฮ โปรฮ กูญา_ บรี ตรือเบะ เลอ. 29 ลูมอฮ ปาลัฮ เอฟราอิม_ เตด บือเลฮ โปรฮ ลูมอฮ คานาอัน_ นู อาดา ดูโดะ เดะ นังฆรี เกเซอ_ บรี ตรือเบะ_ ตาปี ลูมอฮ คานาอัน อาดา ดูโดะ เดะ นังฆรี เกเซอ_ ซามา ตืองัฮ กูญา. 30 ลูมอฮ ปาลัฮ เซบูลุน_ เตด บือเลฮ โปรฮ ลูมอฮ นังฆรี คิดโรน_ เฆอ จะ ลูมอฮ นังฆรี นาฮะโลน_ ตาปี ลูมอฮ คานาอัน บือเลฮ ดูโดะ ซามา ตืองัฮ กูญา_ กือนา ปรือกัด ซูโรฮ บือกรือฌา บรี กะ กูญา. 31 ลูมอฮ ปาลัฮ อาเซอ_ เตด บือเลฮ โปรฮ ลูมอฮ นังฆรี อักโค_ นังฆรี ซีโดน_ นังฆรี อักลาบ_ นังฆรี อักซิบ_ นังฆรี เฮละบัฮ_ นังฆรี อาฟิก_ ฌางัน นังฆรี เรโฮบ. 32 ตาปี ลูมอฮ ปาลัฮ อาเซอ บือเลฮ ดูโดะ เดะ ซามา ตืองัฮ ลูมอฮ คานาอัน_ เดะ นังฆรี อีตู_ ซาเบะ กูญา เตด บือเลฮ โปรฮ ลูมอฮ คานาอัน บรี ตรือเบะ ปี เลอ. 33 ลูมอฮ ปาลัฮ นับทาลี_ เตด บือเลฮ โปรฮ ลูมอฮ นังฆรี เบด-เซเมด_ เฆอ จะ_ ลูมอฮ นังฆรี เบด-อานาด_ ตาปี อาดา ดูโดะ เดะ ซามา ตืองัฮ ลูมอฮ คานาอัน_ เดะ นังฆรี อีตู. ตาปี กะฮามี โปด_ ลูมอฮ นังฆรี เบดเซเมด_ ฌางัน นังฆรี เบดอานาด_ กือนา ปรือกัด บรี บือกรือฌา บรี กะ กูญา. 34 ลูมอฮ อาโมรี บือเลฮ โปรฮ ลูมอฮ ปาลัฮ ดาน_ บรี บาลิ ปาเระ ปี กะ อาตัซ บูเกะ_ ตีเมา บรี ตูโรด มาแรฮ กะ ตือปัจ ซามา. 35 ลูมอฮ อาโมรี อาดา ดูโดะ กือฌะ กือมัซ เดะ บูเกะ เฮเรด_ เดะ นังฆรี อัยยาโลน_ ฌางัน เดะ นังฆรี ซาอันบิม_ ตาปี บือแนฮ โยเซบ ญา มือฆัฮ ลาฆี เดะ กูญา ซือมูฮา. กะฆีเตอ กูญา ซือมูฮา กือนา ปรือกัด บรี บือกรือฌา บรี กะ กูญา บือกะ ปราโซฮ. 36 ตือกอซ นะ ลูมอฮ อาโมรี_ ฮืนตะ เดะ ฌาลัด ญาแญะ บูเกะ อักรับบิม_ ฌาดี จะ ตะเดะ นังฆรี เซลัฮ ปี ซือรูโลยํ เลอ. |