ยากอบ 1 - ซูรัจ ปือมือเลา นะ ตูฮัด

¹ กู ยากอบ นู ฌาดี ปราโซฮ นะ ตูฮัด บือซัยํ เดะ อาตัซ_ ฌางัน เยซู คริด เตอ_ กู กีเรบ บรีงัจ กะ ลูมอฮ ซือมียา นะ ตูฮัด ซือมูฮา_ นู กรือจัย ปี ราตาๆ ดัฮ.

ลาฆู ปือจายา_ ลาฆู ปานัย อากัน

² โอ อาดี บราดี นะ กู ซือมูฮา เออ_ วะตู กาเญา กือนา ลาฆู ลกลีฮัจ บาญะ ฌือแนฮ เตอ_ บรี กาเญา อีงัจ จะ_ ฌาดี ลาฆู ซูกา ฮาตี ซูโงฮ ดัฮ เลอ.

³ กรานา กาเญา ตาฮู จะ_ ลาฆู ซูซัฮ อีตู_ ญา ลกลีฮัจ จะ_ กาเญา ปือจายา กือฌะ กือมัซ ดัฮ เฆอ. กะฆีเตอ ญา นะ บูวัจ บรี กาเญา ตาฮัด ฮาตี บือเลฮ.

⁴ กะฆีเตอ บรี กาเญา ตาฮัด ฮาตี บรี ปือนอฮ_ ฮอย เตด บรูบัฮ ลาลู. กะฆีเตอ ฮาตี นะ กาเญา_ นะ ฆือนะ_ ปือนอฮ บาฌิ ดัฮ_ ฮอย เตด กูรัก นามา โปด.

⁵ ดัฮ ซือมียา ดีฮา เดะ ลูมอฮ กาเญา ฮอย อากัน เตอ_ บรี ญา มีตา เดะ ตูฮัด เดะ อาตัซ เลอ. กะฆีเตอ_ ตูฮัด นะ บรี ญา อาดา อากัน. กรานา ตูฮัด เตอ_ ญา ฮาลัย บรี กะ ซือมียา ซือมูฮา_ เตด อูจะ นามา ลาลู.

⁶ ตาปี ซือมียา นู มีตา เตอ_ บรี ญา มีตา ฌางัน ฮาตี ปือจายา_ ฮอย เตด บรีงัจ ปี มาแรฮ. ซาเบะ จะ_ ซือมียา นู บรีงัจ กะฆีเตอ_ ญา ซือรูปา อูมะ เดะ ลาโวจ_ นู อาเงน ตีโยะ ปี มาแรฮ เลอ.

⁷ ซือมียา กะฆีเตอ_ ฌางัน บรี ญา อีงัจ จะ_ นะ บือเลฮ นามา เดะ ตูฮัด เลอ.

⁸ ซือมียา อีตู เตอ_ ฮาตี นะ ญา บือดูวา เลอ_ ญา เตด ตือตู จะ_ นะ ปี ฌาลัด โซะ ดีฮา.

อูรัก ฮาฌะ ฌางัน อูรัก กายา

⁹ โซะ ดีบราดี นู ฮาฌะ ซูโงฮ เตอ_ บรี ญา งันตืองัน เลอ_ นู ตูฮัด นะ อาเกะ ญา บรี ตีงี ดัฮ.

¹⁰ โซะ ซือมียา นู กายา เตอ_ บรี ญา งันตืองัน เดะ ลาฆู_ นู ตูฮัด นะ บูวัจ บรี ญา รือนัฮ ดัฮ. กรานา ญา เตอ_ นะ ลือแงะ ปี ดัฮ_ ซือรูปา บูงา รูโปจ.

¹¹ วะตู มาตาอารี ญาแญะ ตีงี_ ญา นะ ฮางัจ โตระ เลอ_ บูวัจ บรี รูโปจ ลายู ตูโฮยํ_ บูงา รูโปจ โปด_ ฆูรอก. นู บูงา อีตู ญา บือฆาจะ เตอ_ ลือแงะ ฮาบิฮ ปี ดัฮ. อูรัก กายา โปด_ ญา นะ บือนาซา ฮาบิฮ กะฆีเตอ ฌูฆา_ ตืองัฮ ญา อาดา บือกรือฌา โกะ ปือบูวัจ นะ ญา เลอ.

นะ กือนา ลกลีฮัจ ฮาตี_ กือนา ตีปู

¹² ซือนัง ซือลามัจ เลอ_ ซือมียา นู กือนา ลาฆู ลกลีฮัจ ฮาตี_ ตาปี ญา ตาฮัด บือเลฮ. วะตู ลีฮัจ ดัฮ จะ_ นู ญา ตาฮัด บือเลฮ ดัฮ_ ญา นะ ซาโมจ ลาฆู ฮีโดะ ซูโงฮ นู ซือลาลู_ ฌาดี ซือรูปา กือจูบุก บือซรี นู ตูฮัด บือฌาญี ดัฮ_ นะ บรี กะ ลูมอฮ ซือมียา นู ซายัก กะ ญา.

¹³ วะตู ซือมียา กือนา ลาฆู ซูซัฮ บาอาฌะ ญา บรี บูวัจ ดูซา_ ฌางัน บรี ญา มือเลา จะ_ ตูฮัด เลอ นู บาอาฌะ ญา. กรานา ตูฮัด เดะ อาตัซ เตอ_ ญา นะ กือนา บาอาฌะ_ บรี บูวัจ ฌาฮัจ_ เตด บือเลฮ เลอ. ญา โปด_ เตด บาอาฌะ ซาปา บรี บูวัจ ดูซา.

¹⁴ นู ซือมียา กือนา บาอาฌะ กะฆีนี เตอ_ กรานา กูญา ซิกมาซิก ฆาละ นะ บูวัจ นู ฌาฮัจ. กะฆีเตอ_ ซือรูปา อีกัด นู มากัด อูปัด_ ลือกัจ เดะ มาตา กาเยน_ กือนา รีฆะ ดัฮ_ กูญา โปด_ นะ กือนา รีฆะ กะฆีเตอ ฌูฆา.

¹⁵ นู กูญา ฆาละ นะ บูวัจ นู ฌาฮัจ เตอ_ ซือรูปา ดูซา อาดา ดาลับ โปรจ ดัฮ. ลือปัซ เดะ โปรจ_ ฌาดี ลาฆู บูวัจ ดูซา ดัฮ เลอ. วะตู ดูซา อีตู บือซัยํ ดัฮ_ ญา บือฌาดี ลาฆู มาตี ปูลัก.

¹⁶ อาดี บราดี นู กู ซายัก เออ_ ฌางัน ซือซัจ เลอ.

¹⁷ โกะ ซือบารัก นู บาฌิ แนฮฌือแนฮ ดาตัก เดะ โซะ อาตัซ. ตูฮัด เตอ เลอ_ ญา ฮาลัย บรี ซือมูฮา. บือนา อีตู ตูโรด มาแรฮ ดาตัก เดะ อาโปก เดะ อาตัซ. ญา เตอ_ นู บือฌาดี โกะ ตือปัจ จรัฮ เดะ อาตัซ ซือมูฮา. ตูฮัด อาดา กะฮามี เตอ_ ญา อาดา กะฆีเตอ เลอ. ญา เตด บรูบัฮ ดัฮ. ญา เตด อาเลฮ_ บูวัจ บายัก นู กือลับ เลอ.

¹⁸ ตูโรจ กะ ฮาตี นะ ญา ตะอาซิก_ ตูฮัด ญา ซูโรฮ ปือมือเลา นู ซูโงฮ_ บีดา นะ บือฌาดี กีตา_ นะ บรี กีตา ซือรูปา บูวัฮ นู ลามูลา_ เดะ โกะ ซือบารัก นู ญา บือฌาดี ดัฮ ซือมูฮา.

กือนา มือนีงัย_ กือนา บูวัจ ตูโรจ

¹⁹ อาดี บราดี นู กู ซายัก เออ_ บรี กาเญา ตาฮู ลาฆู กะฆีนี. บรี ราตา ซือมียา มือนีงัย งัจบางัจ_ ตาปี ลามัจ นะ มือเลา_ ลามัจ นะ มูซัยํ เลอ.

²⁰ กรานา นู ซือมียา นะ มูซัยํ เตอ_ เตด บูวัจ บรี อาดา ลาฆู นู บาฌิ_ ตูโรจ กะ ฮาตี นะ ตูฮัด.

²¹ กะฆีเตอ กือนา ตีงัน บูวัก เลอ_ ลาฆู นู ตะอารัฮ_ ลาฆู เตด บือฆูนา ซือมูฮา. กือนา มือนูโนะ ฮาตี_ ซาโมจ ปือมือเลา นู ตูฮัด ตานัม เดะ ฮาตี นะ กาเญา ดัฮ. ปือมือเลา อีตู เลอ_ นู นะ บือเลฮ ตูโลก กาเญา_ บรี ฮีโดะ ลือปัซ บาฌิ.

²² กาเญา ฌางัน ตีปู ญาวา ตะอาซิก. ฌางัน ซือมาตา มือนีงัย กะ ปือมือเลา นะ ตูฮัด_ ตาปี กือนา บูวัจ ตูโรจ ฌูฆา.

²³ กรานา จะ_ ดัฮ ซือมียา ดีฮา มือนีงัย กะ ปือมือเลา นะ ตูฮัด_ ตาปี เตด บูวัจ ตูโรจ_ ญา เตอ_ ซือรูปา ซือมียา นู ลีฮัจ มูคา นะ ตะอาซิก เดะ จรือแมน.

²⁴ ซูดัฮ ลีฮัจ บรี บาฌิ_ ญา โปด ปี ดัฮ. ดัดดัด ญา ลูปา จะ_ มูคา นะ ญา ฌาดี กะฮามี.

²⁵ ปือมือเลา นะ ตูฮัด อีตู_ ฌาดี ปือมือเลา ฮูโกบ นู ปือนอฮ บาฌิ_ นู บูวัจ บรี ซือมียา ลือปัซ ดัฮ. กะฆีเตอ_ ซือมียา ดีฮา นู ลีฮัจ บรี บาฌิ_ เดะ ปือมือเลา ฮูโกบ อีตู_ นู บือฮีมัจ เตด บราดู เตอ_ นู บูกัด ฌาดี ซือมียา ซัจ มือนีงัย ซัจ ลูปา_ ตาปี ญา ฌาดี ซือมียา บูวัจ ตูโรจ เตอ_ ซือมียา อีตู เลอ_ ตูฮัด นะ บรี กะ ญา ซือนัง ซือลามัจ_ เดะ โกะ ปือบูวัจ นะ ญา.

²⁶ ดัฮ ซือมียา ดีฮา อีงัจ จะ_ อีซี ญา ฌาดี ซือมียา ตูเฮะ กะ ตูฮัด นะ ญา เตอ_ ตาปี ญา มือเลา เตด บือฮีมัจ ดูลู_ กะฆีเตอ ญา ตีปู ญาวา นะ ญา ตะอาซิก. นู ญา ตูเฮะ โปด_ เตด ฌาดี นามา เลอ.

²⁷ ลาฆู ตูเฮะ นู ตูฮัด อาโปก เดะ อาตัซ ลีฮัจ จะ_ ฌาดี ลาฆู ตูเฮะ นู บาฌิ_ บูกัด ลาฆู ตูเฮะ นู ตะอารัฮ_ ฌาดี กะฆีนี เลอ. บรี ซือมียา ยอม ปือบือลา โกะ นานะ_ นู ฮอย เอด ฮอย อาโปก เตอ_ ยอม ปือบือลา โกะ นีบีนี ฌานา นู ฮาฌะ เตอ. บรี ซือมียา ตีเมา นะ บูวัจ ลาฆู นู ตะอารัฮ_ บือกะ ซือมียา โซะ ดือนียา บูวัจ เตอ. ซือมียา อีตู เลอ นู ตูเฮะ ซูโงฮ.