อิซายา 1 - ซูรัจ ปือมือเลา นะ ตูฮัด

¹ ลาฆู มีปี ปาซัน ยูดา ฌางัน เยรูซาเลม_ นู อิซายา นานะ นะ อามอด บือเลฮ ลีฮัจ_ เดะ ฮาดัจ นะ อุดซียา_ โยทาม_ อาฮาซะ ฌางัน เฮเซคียา_ ราฌา นังฆรี ยูดา.

ลาฆู ฌาฮัจ ซือมูฮา นะ ยูดา

² ลาแงะ เออ กือนา มือนีงัย_ ดือนียา เออ กือนา จีเฮะ ตลีงา มือนีงัย ซาเบะ ตูฮัด บือซัยํ เดะ อาตัซ มือเลา จะ “กู บือเลฮ ปือบือลา นานะ_ บรี ญา บือซัยํ ตาปี กูญา บือเลฮ บูวัจ กือบลากัก กะ กู.

³ ลือมู ญา กราลา ตูฮัด นะ ญา กูดา ดือมิ โปด_ กราลา ปาโลฮ รูโปจ นะ ตกเก นะ ญา ตาปี อิซราเอน เตด กราลา ลูมอฮ บักซา นะ กู เตด มาโซะ เดะ ฮาตี.”

⁴ จือลากา เลอ_ กาเญา_ บักซา ซือมียา นู บือดูซา โตระ ลูมอฮ บักซา นู ปือนอฮ ฌางัน ลาฆู ฌาฮัจ บือแนฮ นะ ซือมียา บูวัจ ลาฆู ดูซา ฌาฮัจ โตระ โกะ นานะ นู บูวัจ ลาฆู ตะอารัฮ. กูญา บือเลฮ ตีงัน ตูฮัด บือซัยํ เดะ อาตัซ บือเลฮ มือฌัฮ กะ ตูฮัด นู จรัฮ บาฌิ นะ อิซราเอน อาเลฮ บลากัก กะ ญา_ ปี ฌาโวฮ ดัฮ.

⁵ บูวัจ นามา กาเญา บือคานะ นะ กือนา รือเปะ กาเตาะ ปูลัก? บูวัจ นามา กาเญา บูวัจ กือบลากัก ปี ซือรูโลยํ? ปาลา ญา ซาเกะ ฮาบิฮ ฮาตี โปด_ ลือมัฮ ลือเตฮ ฮาบิฮ.

⁶ ตะเดะ ตาปะ กากี ฌู รอจ กะ ปาลา ฮอย โซะ ดีฮา นู บาฌิ ลาลู อาดา ซา บารัฮ ฮีเฌา ฮีตับ_ บือกัซ กือนา รือเปะ อาดา บือลียัก ดารัฮ มือนีแลฮ เตด กือปิ ตรือเบะ_ เฆอ จะ บาโลจ ตาโรฮ เฆอ จะ บูวัจ บรี ลือมัฮ ฌางัน มีญะ.

⁷ นังฆรี นะ กาเญา ฮอย ซาปา ดูโดะ_ ฮอย นามา ลาลู โกะ ปาลา นังฆรี นะ กาเญา โปด_ กือนา ตูนู ฌางัน อาปี โซะ นังฆรี นะ กาเญา เตอ_ ลูมอฮ บักซา อาซิก กูญา ปรูโตฮ โซะ ฮือลด มูคา นะ กาเญา ฮอย นามา ดัฮ_ บือกะ โกะ ลูมอฮ บักซา อาซิก บือเลฮ ปรูโตฮ ฮาบิฮ.

⁸ โซะ นานะ นีบีนี_ ฌาดี จะ_ นังฆรี ซีโยน เตอ กือนา ตีงัน บูวัก ดัฮ ซือรูปา บือกะ รูมัฮ ซาเราะ เดะ กือโบด บูวัฮ อางุน ซือรูปา บือกะ รูมัฮ ซาเราะ เดะ กือโบด ตีมอน บือติ ซือรูปา นังฆรี นู กือนา กือลีลิก.

⁹ ดัฮ ตูฮัด บือซัยํ เดะ อาตัซ_ ตูฮัด นู มือฆัฮ เตด บือเลฮ บรี อาดา ลือเบฮ ซือมียา ซือตืองัฮ บรี กะ กีตา กีตา โปด_ นะ บือเลฮ ฌาดี บือกะ นังฆรี โซโดม ฌาดี บือกะ นังฆรี โกโมรา.

¹⁰ กาเญา เออ_ ลูมอฮ กือปาลา นังฆรี โซโดม มือนีงัย กะ ปือมือเลา นะ ตูฮัด บือซัยํ เดะ อาตัซ เลอ. กาเญา ลูมอฮ ซือมียา นังฆรี โกโมรา เออ กือนา จีเฮะ ตือลีงา มือนีงัย กะ ปือมือเลา ฮูโกบ นะ ตูฮัด นะ กีตา.

¹¹ ตูฮัด บือซัยํ เดะ อาตัซ มือเลา จะ “กู เตด ปือดูลี โกะ ซือบารัก มือญือมัฮ นู บาญะ นะ กาเญา เตอ กาเมก บาปา_ นู ตูนู มือญือมัฮ อีตู เตอ_ กู อาดา ลือเบฮ ดัฮ ฆือนะ ฌางัน ลือมะ บือนาตัก ซือมูฮา นู ปือบือลา ดัฮ เตอ กู เตด ซูกา ฮาตี เดะ ดารัฮ นะ ลือมู บาปา เฆอ จะ นะ อานะ กาเมก_ เฆอ จะ แบะ บาปา.

¹² “กาลา กาเญา มาโซะ มาแรฮ ซารี กู ซาปา ซูโรฮ บรี กาเญา บูวัจ กะฆีนี? ฌางัน กาจะ มาโซะ มาแรฮ เดะ ลามัน รูมัฮ มือญือมัฮ นะ กู ลาฆี เลอ.

¹³ ฌางัน บาวา บารัก มือญือมัฮ นู เตด ฌาดี นามา มาแรฮ เลอ โกะ กือมียัน กู กีรา ฌาดี บารัก ตะอารัฮ เลอ อารี บรามัย บูลัด ญาแญะ_ อารี บราดู กรือฌา_ อารี บลาโลก บือมุน ลาฆู บูวัจ ฌาฮัจ ซาแมน บลาโลก มาแรฮ บือมุน ลาฆู ซีดี_ กู ตาฮัด เตด บือเลฮ.

¹⁴ ฮาตี นะ กู บือชี อารี บรามัย บูลัด ญาแญะ นะ กาเญา ฌางัน อารี บรามัย นู กาเญา ตือตู ดัฮ ญา ฌาดี บือกะ บารัก บรัจ กะ กู นู กู ตาโงก ฌู ปือนัจ ดัฮ.

¹⁵ กาลา กาเญา ดือดี ตางัน กู นะ ตูโดก มูคา นะ กู เดะ กาเญา มีเซ จะ กาเญา นะ บือซาโวจ บาญะ โปด กู นะ เตด มือนีงัย กรานา ตางัน นะ กาเญา บือซีมอยํ ปือนอฮ ฌางัน ดารัฮ.

¹⁶ กือนา บาโซฮ ญาวา_ บูวัจ บรี ญาวา นะ กาเญา จรัฮ บาฌิ กือนา อาเมด ลาฆู ฌาฮัจ นะ กาเญา_ ตรือเบะ ปี ฌาโวฮ เดะ ฮือลด มาตา นะ กู กือนา บราดู บูวัจ ฌาฮัจ เลอ

¹⁷ บลาฌัยํ บูวัจ ลาฆู บาฌิ กือนา กือวาซา บูวัจ บรี กือนา ลาฆู กือนา ตูโลก ซือมียา นู กือนา ปรือกัด ฌาฆา โกะ นานะ นู ฮอย ปะมะ กือนา บือดะวา ตูโลก โกะ นีบีนี ฌานา.”

¹⁸ ตูฮัด บือซัยํ เดะ อาตัซ มือเลา จะ “มาแรฮ เลอ_ บรี กีตา บือลาวัด บือดะวา มีเซ จะ ดูซา นะ กาเญา_ ญา มีรัฮ ฮีตับ โปด ญา นะ ปูเตฮ บือกะ ซึง มีเซ ญา นะ มีรัฮ_ บือกะ กาเยด ซี มีรัฮ ญา นะ ฌาดี บือกะ บูลู กาเมก.

¹⁹ ดัฮ กาเญา ปือนอฮ ฮาตี นะ มือนีงัย กาเญา โปด_ นะ บือเลฮ มากัด บูวัฮ นู บาฌิ เดะ ดือนียา.

²⁰ ตาปี ดัฮ กาเญา กีปัซ บูวัก_ บูวัจ ลาฆู กือบลากัก กาเญา นะ ฌาดี อูปัด นะ ปือดัก นู ตาฌับ ซาเบะ จะ มูโลจ นะ ตูฮัด บือซัยํ เดะ อาตัซ บือเลฮ มือเลา ดัฮ.”

นังฆรี นู บือซีมอยํ

²¹ โอ นังฆรี นู รือมัก บาฌิ ฌาดี นังฆรี ฌาลัก ดัฮ กะฮามี เลอ. ญา นู ดือละ ปือนอฮ ฌางัน ลาฆู กรัจ ฮูโกบ กือนา ลาฆู อาดา ลาฆู บาฌิ ตือปัจ ดูโดะ เตอ ตาปี วะตู อีนี อาดา ซา ซือมียา บูนอฮ ซือมียา.

²² ปีระ นะ เกา ฌาดี ตาฮี ปีระ ดัฮ อาระ อางุน นะ เกา โปด_ จาโปยํ ฌางัน อาเย ดัฮ.

²³ โกะ กือปาลา นะ เกา ฌาดี ลูมอฮ บูวัจ กือบลากัก ฌาดี กาวัด นะ อูรัก ปือญูรี. ราตา อูรัก ซูกา ซาโมจ ลาฆู ปือซูวะ อูเซ ตูโรจ กะ โกะ ซือบารัก นู กูญา บรี เตด ฌาฆา โกะ นานะ ฮอย ปะมะ ตีเมา กรัจ ฮูโกบ ลาฆู บือดะวา นะ นีบีนี ฌานา.

²⁴ กะฆีเตอ_ ตูฮัด บือซัยํ เดะ อาตัซ_ ตูฮัด นู มือฆัฮ โตระ ตูฮัด นู ตือฆัยํ อูรัจ นะ ลูมอฮ อิซราเอน_ ญา มือเลา จะ “ลีฮัจ เลอ_ กู นะ อูแร ลาฆู มูซัยํ นะ กู_ เดะ อาตัซ ลูมอฮ ซือตรู นะ กู นะ บาลัซ โกะ ซือตรู นะ กู บรี กะ ตะอาซิก.

²⁵ กู นะ อาเลฮ มาแรฮ ลาวัด เกา นะ ปือลัย โปรฮ ตาฮี บีเฌฮ นะ เกา ตรือเบะ บือกะ บาโซฮ ฌางัน อาเย นู กรอจ นะ อาเมด บารัก จาโปยํ นะ เกา ตรือเบะ บรี ฮาบิฮ.

²⁶ กู นะ บูวัจ บรี ซือมียา กรัจ ฮูโกบ นะ เกา ฌาดี ซือรูปา นู ลามา นะ บรี ซือมียา บือกีรา นะ เกา บือกะ ลามูลา เดะ บลากัก กูญา นะ บลาโลก เกา จะ นังฆรี นู บาฌิ ตือปัจ ฌาดี นังฆรี นู รือมัก ซูโงฮ.

²⁷ “นังฆรี ซีโยน นะ กือนา ตือบุซ ดัฮ_ ฌางัน ลาฆู กรัจ ฮูโกบ บรี กือนา ลาฆู โกะ ซือมียา เดะ นังฆรี นู บราเลฮ ฮาตี_ นะ กือนา ตือบุซ ฌางัน ลาฆู บาฌิ ตือปัจ.

²⁸ ตาปี ลูมอฮ ซือมียา บูวัจ กือบลากัก ฌางัน ลูมอฮ ซือมียา บูวัจ ดูซา นะ กือนา บูวัจ บรี ฌาฮานัม มารือมา โกะ ซือมียา นู ตีงัน ตูฮัด บือซัยํ เดะ อาตัซ นะ บือกะ กือนา อาปี ปือลัฮ ฮาบิฮ.

²⁹ ซาเบะ จะ_ ลูมอฮ กาเญา นะ จือและ ปาซัน โกะ ปูโฮด กรามัจ ฌาดี ปูโฮด นู กาเญา ดือละ ซูกา เตอ นะ บราซา จือและ มาตา ปาซัน กือโบด นู กาเญา ดือละ ปีเลฮ ดัฮ เตอ.

³⁰ ซาเบะ กาเญา นะ ฌาดี บือกะ ปูโฮด บือซัยํ นู ดาโวด จีรอจ บือกะ กือโบด นู ฮอย อาเย.

³¹ ซือมียา นู ตือฆัยํ อูรัจ นะ ฌาดี บือนัง ลูลู กาเยด ลาฆู บือกรือฌา นะ กูญา ฌาดี บือกะ ปูติก อาปี กูญา กือดูวา นะ ฮางอซ มารือมา ฮอย ซาปา นะ ปาดับ บือเลฮ.”